1 ဂေ ဒူအီ အီဆာရေလ ဟဲ့ ဟွတ့် လေး ခဲင် မိူင် အဲဂိုပ် အာဒါ အူ ဆီနမ်။ ဒေါ အန် တီ ဂေ ဆီ ကွယ် ခဲင် ပြဲ ကာဟဝ်း ဒီ ခူပ် နွန် ဆီနာယ် တွိုန်။ န့ ဘော ဝီ ဇမ် ဆီနမ် ဟာအာ၊ မာဂျီန် ဟာအာ၊ ဆီငဲ လှေး၊ ဇဝ်ဖြာ ဘော ဝီ ကာလာင် ဂြုဝ်း ဒီ အာမုဝ်ဆဲ။ ဒေါ အန် တီ အာမုဝ်ဆဲ ကွယ် ခဲင် ထိုပ် ဘိက် ဘွတ် တွိုန်။ 2 ဇဝ်ဖြာ တဝ်း၊ “တဲး ဘာယ် အာရူန် တိး ခဲ့ ကွယ် ဂေ ဒူအီ အီဆာရေလ ဘောကာဂ့လျီတ်။ တိး ဒူပ် ခြိုဝ် မှဝ် ခြိုဝ် အန်၊ န့ကြိုဝ်း မှဝ် န့ကြိုဝ်း အန်။ ခဲ့ ကွယ် အီမာယ်၊ တဲး ဘာယ် ဒဲမ် တူတ့် စိူဝ် ဂေ၊ ဟပ် ခဲင် ဇာရာင်။ 3 စုး အာဆာက် အာ ဂိုဝ် ဆီနမ် ဟုဝ့် နာ ဒဲင်၊ ဘာယ် လုဝ် တိး တူတ့် ခဲ့ ကွယ် အီမာယ် အီ ဟဲ့ ပဲ ဒီ ကာဂုဝ်း ဒီ ကာဘန့်။ ဘာယ် လုဝ် ဒဲမ် ဇာရာင် ဂေ တီ ဒူပ် န့ကြိုဝ်း မှဝ် န့ကြိုဝ်း အန်။ 4 တဲး ဘာယ် ရဝ်း ဂိန့် န့ဟူမ် အူ ဝီ၊ တဲး ဂေ တး စွယ် ဘာယ်။ 5 ဂေ အီ လုဝ် စွယ် ပါယ် တီ စိူဝ် ဂေ ပါယ် နီ။

ခြိုဝ် အာရူဘေန် ဘော မုး အာအေလီစူ အီ မုး ဂွန် အာဆေတူရ။

6 ခြိုဝ် အာဆီမေအူန် ဘော မုး အာဆေလူမေန် အီ မုး ဂွန် အာဇူရီဆာဒေ။

7 ခြိုဝ် အာယူဒါ ဘော မုး အာနာဆူန် အီ မုး ဂွန် အာမီနာဒါပ်။

8 ခြိုဝ် အာအီဆာခါ ဘော မုး အာနေထာနေလာ အီ မုး ဂွန် အာစူအာ။

9 ခြိုဝ် အာဇေဘူလူန် ဘော မုး အာအေလီအာပ် အီ မုး ဂွန် အာဟေလူန်။

10 ခြိုဝ် အာအေဖာရိမ် အီ မုး ဂွန် အာယုဝ် အူ ဝီ ဘော မုး အာအေလီဆာမာ အီ မုး ဂွန် အာမီဟုတ်။ ခြိုဝ် အာမာနာဆေ အီ မုး ဂွန် အာယုဝ် ပေါ ဝီ ဘော မုး အာဂါမာလေန် အီ မုး ဂွန် အာပေတာစူရ။

11 ခြိုဝ် အာဘေန်ယာမ် ဘော မုး အာဖီဒါန် အီ မုး ဂွန် အာကီတောနီ။

12 ခြိုဝ် အာဒါန် ဘော မုး အာဟေစာ အီ မုး ဂွန် အာမီဆာဒေ။

13 ခြိုဝ် အာဆေန် ဘော မုး အာဘာဂ့လဝ် အီ မုး ဂွန် အာအောခါရာ။

14 ခြိုဝ် အာဂတ် ဘော မုး အာအေလာဆာပ် အီ မုး ဂွန် အာတူလာ။

15 ခြိုဝ် အာနာပ်ထာလီ ဘော မုး အာဟီရ အီ မုး ဂွန် အာအေနန်။”

16 န့ မုး ဂေ ဒူအီ ဂိုဝ် ဒီ အာ ဝီ တီ ပဲ့ ဟဲ့ ရဝ်း အာမုဝ်ဆဲ ဂါယ် အာရူန်၊ တဲး ဂေ စွယ် ဂါယ်။ ဂေ ဘော မုး ဒါ တာင် အီ အိုပ် ခြိုဝ် ဒူအီ အီဆာရေလ။

17 အာမုဝ်ဆဲ ဂါယ် အာရူန် ဟဲ့ ဟွတ့် ဒဲ့ ဒူအီ ပဲ့ ဟဲ့ ရဝ်း ဇဝ်ဖြာ ဂေ တီ၊ 18 ဂေ ဘော ဒဲ့ ကာဇု တူတ့် ဒွန် ဇိုဝ် ဒွန် ခြိုဝ် ဒေါ မုး မာဂျီန် ဟာအာ၊ ဆီငဲ လှေး တွိုန်။ ဂေ ဘော ဒဲမ် တူတ့် ခဲ့ ကွယ် စိူဝ် ဂေ၊ ခြိုဝ် မှဝ် ခြိုဝ် အန်။ ဂေ ဘော ဒဲမ် ဇာရာင် အီမာယ် ဒွန် အီ အီ မုး အာဆာက် အာ ဂိုဝ် ဆီနမ် ဟုဝ့် နာ ဒဲင်၊ 19 တဲး န့ ဒူပ် ပီ ကာလာင် ဇဝ်ဖြာ ဒီ အာမုဝ်ဆဲ တွိုန်။ ပါယ် တီ အာမုဝ်ဆဲ ဘော တိး ဂေ ဒူအီ အီဆာရေလ၊ တဲး အန် နပ် ခဲ့ ကိူန် ဂေ ဒေါ ကွယ် ဂေ ခဲင် ပြဲ ကာဟဝ်း ခူပ် နွန် ဆီနာယ် တွိုန်။

20-21 ခြိုဝ် အာရူဘေန် အီ မုး ဂွန် ဂိန့် အာကူပ် အီ ဘော စိူဝ် အာအီဆာရေလ တွိုန်၊ ခဲ့ ကွယ် အီမာယ် ပဲ့ ဟဲ့ တိး ဂါယ် ဒူပ် န့ကြိုဝ်း မှဝ် န့ကြိုဝ်း အန်၊ ဂါယ် ဟဲ့ ဟပ် တူတ့် စိူဝ် ဂေ ခဲင် ဇာရာင်။ စုး ဆိန့် အာဆာက် အာ ဂိုဝ် ဆီနမ် ဟုဝ့် နာ ဒဲင်၊ ခဲ့ ကွယ် အီမာယ် အီ ဟဲ့ ပဲ ဒီ ကာဂုဝ်း၊ ဂေ ကွယ် ဖွုန် မှိုန့် ဒီ ဒဝ် ဟြဲန့် ဒီ ဖန် မာယဝ်း ဝီ။

22-23 ခြိုဝ် အာဆီမေအူန်၊ ခဲ့ ကွယ် အီမာယ် ပဲ့ ဟဲ့ တိး ဂါယ် ဒူပ် န့ကြိုဝ်း မှဝ် န့ကြိုဝ်း အန်၊ ဂါယ် ဟဲ့ ဟပ် တူတ့် စိူဝ် ဂေ ခဲင် ဇာရာင်။ စုး ဆိန့် အာဆာက် အာ ဂိုဝ် ဆီနမ် ဟုဝ့် နာ ဒဲင်၊ ခဲ့ ကွယ် အီမာယ် အီ ဟဲ့ ပဲ ဒီ ကာဂုဝ်း၊ ဂေ ကွယ် ဖန် မှိုန့် ဒီ ဒိမ် ဟြဲန့် ဒီ အူယ် မာယဝ်း ဝီ။

24-25 ခြိုဝ် အာဂတ်၊ ခဲ့ ကွယ် အီမာယ် ပဲ့ ဟဲ့ တိး ဂါယ် ဒူပ် န့ကြိုဝ်း မှဝ် န့ကြိုဝ်း အန်၊ ဂါယ် ဟဲ့ ဟပ် တူတ့် စိူဝ် ဂေ ခဲင် ဇာရာင်။ စုး ဆိန့် အာဆာက် အာ ဂိုဝ် ဆီနမ် ဟုဝ့် နာ ဒဲင်၊ ခဲ့ ကွယ် အီမာယ် အီ ဟဲ့ ပဲ ဒီ ကာဂုဝ်း ဒီ ကာဘန့်၊ ဂေ ကွယ် ဖွုန် မှိုန့် ဒီ ဖန် ဟြဲန့် ဒီ ဒဝ် မာယဝ်း ဒီ ဖန် ဂိုဝ် ဝီ။

26-27 ခြိုဝ် အာယူဒါ၊ ခဲ့ ကွယ် အီမာယ် ပဲ့ ဟဲ့ တိး ဂါယ် ဒူပ် န့ကြိုဝ်း မှဝ် န့ကြိုဝ်း အန်၊ ဂါယ် ဟဲ့ ဟပ် တူတ့် စိူဝ် ဂေ ခဲင် ဇာရာင်။ စုး ဆိန့် အာဆာက် အာ ဂိုဝ် ဆီနမ် ဟုဝ့် နာ ဒဲင်၊ ခဲ့ ကွယ် အီမာယ် အီ ဟဲ့ ပဲ ဒီ ကာဂုဝ်း၊ ဂေ ကွယ် ဘူ မှိုန့် ဒီ ဖွုန် ဟြဲန့် ဒီ ဒဝ် မာယဝ်း ဝီ။

28-29 ခြိုဝ် အာအီဆာခါ၊ ခဲ့ ကွယ် အီမာယ် ပဲ့ ဟဲ့ တိး ဂါယ် ဒူပ် န့ကြိုဝ်း မှဝ် န့ကြိုဝ်း အန်၊ ဂါယ် ဟဲ့ ဟပ် တူတ့် စိူဝ် ဂေ ခဲင် ဇာရာင်။ စုး အာဆာက် အာ ဂိုဝ် ဆီနမ် ဟုဝ့် နာ ဒဲင်၊ ခဲ့ ကွယ် အီမာယ် အီ ဟဲ့ ပဲ ဒီ ကာဂုဝ်း၊ ဂေ ကွယ် ဖန် မှိုန့် ဒီ ဖွုန် ဟြဲန့် ဒီ ဖွုန် မာယဝ်း ဝီ။

30-31 ခြိုဝ် အာဇေဘူလူန်၊ ခဲ့ ကွယ် အီမာယ် ပဲ့ ဟဲ့ တိး ဂါယ် ဒူပ် န့ကြိုဝ်း မှဝ် န့ကြိုဝ်း အန်၊ ဂါယ် ဟဲ့ ဟပ် တူတ့် စိူဝ် ဂေ ခဲင် ဇာရာင်။ စုး ဆိန့် အာဆာက် အာ ဂိုဝ် ဆီနမ် ဟုဝ့် နာ ဒဲင်၊ ခဲ့ ကွယ် အီမာယ် အီ ဟဲ့ ပဲ ဒီ ကာဂုဝ်း၊ ဂေ ကွယ် ဖန် မှိုန့် ဒီ ဘူ ဟြဲန့် ဒီ ဖွုန် မာယဝ်း ဝီ။

32-33 ခြိုဝ် အာအေဖာရိမ် အီ မုး လှုက်လှာန် အာယုဝ်၊ ခဲ့ ကွယ် အီမာယ် ပဲ့ ဟဲ့ တိး ဂါယ် ဒူပ် န့ကြိုဝ်း မှဝ် န့ကြိုဝ်း အန်၊ ဂါယ် ဟဲ့ ဟပ် တူတ့် စိူဝ် ဂေ ခဲင် ဇာရာင်။ စုး ဆိန့် အာဆာက် အာ ဂိုဝ် ဆီနမ် ဟုဝ့် နာ ဒဲင်၊ ခဲ့ ကွယ် အီမာယ် အီ ဟဲ့ ပဲ ဒီ ကာဂုဝ်း၊ ဂေ ကွယ် ဖွုန် မှိုန့် ဒီ ဖန် မာယဝ်း ဝီ။

34-35 ခြိုဝ် အာမာနာဆေ၊ ခဲ့ ကွယ် အီမာယ် ပဲ့ ဟဲ့ တိး ဂါယ် ဒူပ် န့ကြိုဝ်း မှဝ် န့ကြိုဝ်း အန်၊ ဂါယ် ဟဲ့ ဟပ် တူတ့် စိူဝ် ဂေ ခဲင် ဇာရာင်။ စုး ဆိန့် အာဆာက် အာ ဂိုဝ် ဆီနမ် ဟုဝ့် နာ ဒဲင်၊ ခဲ့ ကွယ် အီမာယ် အီ ဟဲ့ ပဲ ဒီ ကာဂုဝ်း၊ ဂေ ကွယ် အူယ် မှိုန့် ဒီ အာ ဟြဲန့် ဒီ အာ မာယဝ်း ဝီ။

36-37 ခြိုဝ် အာဘေန်ယာမ်၊ ခဲ့ ကွယ် အီမာယ် ပဲ့ ဟဲ့ တိး ဂါယ် ဒူပ် န့ကြိုဝ်း မှဝ် န့ကြိုဝ်း အန်၊ ဂါယ် ဟဲ့ ဟပ် တူတ့် စိူဝ် ဂေ ခဲင် ဇာရာင်။ စုး ဆိန့် အာဆာက် အာ ဂိုဝ် ဆီနမ် ဟုဝ့် နာ ဒဲင်၊ ခဲ့ ကွယ် အီမာယ် အီ ဟဲ့ ပဲ ဒီ ကာဂုဝ်း၊ ဂေ ကွယ် အူယ် မှိုန့် ဒီ ဖန် ဟြဲန့် ဒီ ဖွုန် မာယဝ်း ဝီ။

38-39 ခြိုဝ် အာဒါန်၊ ခဲ့ ကွယ် အီမာယ် ပဲ့ ဟဲ့ တိး ဂါယ် ဒူပ် န့ကြိုဝ်း မှဝ် န့ကြိုဝ်း အန်၊ ဂါယ် ဟဲ့ ဟပ် တူတ့် စိူဝ် ဂေ ခဲင် ဇာရာင်။ စုး ဆိန့် အာဆာက် အာ ဂိုဝ် ဆီနမ် ဟုဝ့် နာ ဒဲင်၊ ခဲ့ ကွယ် အီမာယ် အီ ဟဲ့ ပဲ ဒီ ကာဂုဝ်း၊ ဂေ ကွယ် ဒဝ် မှိုန့် ဒီ အာ ဟြဲန့် ဒီ ဘူ မာယဝ်း ဝီ။

40-41 ခြိုဝ် အာဆေန်၊ ခဲ့ ကွယ် အီမာယ် ပဲ့ ဟဲ့ တိး ဂါယ် ဒူပ် န့ကြိုဝ်း မှဝ် န့ကြိုဝ်း အန်၊ ဂါယ် ဟဲ့ ဟပ် တူတ့် စိူဝ် ဂေ ခဲင် ဇာရာင်။ စုး အာဆာက် အာ ဂိုဝ် ဆီနမ် ဟုဝ့် နာ ဒဲင်၊ ခဲ့ ကွယ် အီမာယ် အီ ဟဲ့ ပဲ ဒီ ကာဂုဝ်း၊ ဂေ ကွယ် ဖွုန် မှိုန့် ဒီ အူ ဟြဲန့် ဒီ ဖန် မာယဝ်း ဝီ။

42-43 ခြိုဝ် အာနာပ်ထာလီ၊ ခဲ့ ကွယ် အီမာယ် ပဲ့ ဟဲ့ တိး ဂါယ် ဒူပ် န့ကြိုဝ်း မှဝ် န့ကြိုဝ်း အန်၊ ဂါယ် ဟဲ့ ဟပ် တူတ့် စိူဝ် ဂေ ခဲင် ဇာရာင်။ စုး ဆိန့် အာဆာက် အာ ဂိုဝ် ဆီနမ် ဟုဝ့် နာ ဒဲင်၊ ခဲ့ ကွယ် အီမာယ် အီ ဟဲ့ ပဲ ဒီ ကာဂုဝ်း၊ ဂေ ကွယ် ဖန် မှိုန့် ဒီ အူယ် ဟြဲန့် ဒီ ဖွုန် မာယဝ်း ဝီ။

44 ဒူအီ ဂေ တီ၊ ဂေ မုး အီမာယ် ပဲ့ ဟဲ့ တိး အာမုဝ်ဆဲ ဂါယ် အာရူန်၊ တဲး န့ ဒူပ် န့ကြိုဝ်း မှဝ် န့ကြိုဝ်း အန်။ ဂေ ဒါ တာင် ဂိုဝ် ဒီ အာ ဝီ တွိုန် မိူဝ် အီ ကာဒါင် ခြိုဝ် ဂေ၊ ဂေ ဟဲ့ စွယ် ဂါယ်။ 45 ဂေ မိူဝ် ဟဲ့ တိး အီမာယ် အာမျုဝ် ဒူအီ အီဆာရေလ ဒွန် အီ၊ အီ ဟဲ့ နုဝ့် အာ ဂိုဝ် ဆီနမ် ဟုဝ့် နာ ဒဲင်။ န့ မုး ဒွန် အီ ဟဲ့ ပွိုန် ကာဂုဝ်း ကာဘန့်။ 46 ဂေ ဒူအီ အီဆာရေလ ဂိုဝ် ဒီ အာ ခြိုဝ် တီ၊ ဂေ ဘောကာဂ့လျီတ် ကွယ် ဒဝ် ဆဲန် ဒီ အူယ် ဟြဲန့် ဒီ ဖန် မာယဝ်း ဒီ ဖန် ဂိုဝ် ဝီ။

47 အီ မုး ခြိုဝ် အာလေဝီ ယီ တူ တိး၊ တူ လိုပ် ခဲင် ဇာရာင် တီ ဒူပ် အီ ဟဝ်။ 48 ခုဝ်၊ ဇဝ်ဖြာ ဟဲ့ ဟွတ့် ကာလာင် အုန် ဒီ အာမုဝ်ဆဲ တဝ်း၊ 49 “ဒေါ ဒဲမ် မဲ ဇာရာင် အီမာယ် ဂေ ဒူအီ အီဆာရေလ အီ ဟဲ့ ပဲ ဒီ ကာဂုဝ်း တီ၊ မဲ ကွဲ့ ဒဲမ် ဇာရာင် ဂေ ဒူအီ ခြိုဝ် အာလေဝီ။ 50 မဲ လုဝ် တဲး ဒူအီ ခြိုဝ် အာလေဝီ ဘူင် ဒွန် မျုဝ် ခဲင် ထိုပ် ဘိက် ဘွတ်။ တဲး ဂေ ယွတ် လိုမ်လာ ဘော ထိုပ် ဘော တူတ့် ဒွန် မျုဝ် အီ ကွယ် နာ ခဲင်။ တဲး ဂေ ကာယူင့် ထိုပ် တီ ဘော ခြိုင် တာ အန် ဒွန် မျုဝ်။ တဲး ဂေ ဘူင် ဂါန် ခဲင် ထိုပ် တီ ဘော ကွယ် ရူပ် အန်။ 51 ဆေ ဘေ ကာထုဝ့် ဒူင် ချ ဘေ၊ ဟာဝ် ပေါ ပ့လုဝ့်၊ ဂေ ဒူအီ ခြိုဝ် အာလေဝီ တီ လုဝ် ယဝ်း ဒီ ဂျြီပ် ထိုပ် ဘိက် တီ၊ ပီ ဝီ ဆမ် ဒူင် ချ ကာမာယ် ဘေ တီ ဒွန် ဇေန့်။ ဆေ ဒူအီ ဟဝ် အီ တူ မုး ခြိုဝ် အာလေဝီ တး ကာတတ် ထိုပ် ဘိက် ဘွတ် တီ၊ ဘေ လုဝ် ငဝ်း ယမ် အန်။ 52 ဂေ ဒူအီ အီဆာရေလ ဒွန် ခြိုဝ် အီ တူ မုး ခြိုဝ် အာလေဝီ၊ တဲး ဂေ ချ ဒူပ် ဖိုင် မှဝ် ဖိုင် အန်။ တဲး ဂေ ကွယ် ဒူပ် အာလာမ် ဂေ မျုဝ် မှဝ် မျုဝ် အန်။ 53 မာလဲ၊ အီ မုး ဒူအီ ခြိုဝ် အာလေဝီ၊ ဂေ လုဝ် ကွယ် ရူပ် ထိုပ် ဘိက် ဘွတ် တီ၊ ကွဲ့ တဲး န့ မိုဝ်း အာဆေ ပွိုန် ဒီ တး ကာတတ်၊ ဘူင် တဲး ဇဝ်ဖြာ ရူ ဘော ဒွါ ဒုက် ဒီ ဒူအီ အီဆာရေလ။”

54 ဇဝ်ဖြာ ဟဲ့ ဟွတ့် ကာလာင် ပါယ် တီ ဂေ ဒူအီ အီဆာရေလ ဘော ဘူင် ဒူပ် ပီ ကာလာင် ဇဝ်ဖြာ ဒီ အာမုဝ်ဆဲ တီ။