1 ဇဝ်ဖြာ ဝီ စ်ု အာမုဝ်ဆဲ၊ 2 တဲး အန် ဝီ ကာလာင် ဒီ ဒူအီ အီဆာရေလ တဝ်း၊ “ဆေ န့ မိုဝ်း ဒူအီ အီ ဟဲ့ ကာဆဲန့် ဒီ လှူ ဒူအီ အူ ဝီ ဒီ ဇဝ်ဖြာ၊ အန် လုဝ် ဝီ ထုတ် ဝိဝ် ဝီ တီ၊ ဝီ ဒွါ ငဝ်း အန် ဒီ ဇဝ်ဖြာ။ 3 ဘေ လုဝ် ဆုင်ဖျာတ် ငဝ်း ဒူအီ ပါယ် နီ။ ဆေ န့ မုး အီမာယ်၊ အာဆာက် အန် ဟဲ့ နုဝ့် အာ ဂိုဝ် ဆီနမ် ဇမ် ဒဝ် ဂိုဝ် ဆီနမ်၊ ဘေ လုဝ် လှူ ရွိုန် ဒဝ် ဂိုဝ် ဘူင့် အာဒါ အန်။ ဘေ လုဝ် ဆ ရွိုန် တီ တာ ဘ့လေ ဆ အီ ကွယ် ခဲင် ထိုပ် ဘိက် ဘွတ်။ 4 ဆေ န့ မုး အီဘိုန့်၊ အာဆာက် အန် ဟဲ့ နုဝ့် အာ ဂိုဝ် ဆီနမ် ဇမ် ဒဝ် ဂိုဝ် ဆီနမ်၊ ဘေ လုဝ် လှူ ရွိုန် အူယ် ဂိုဝ် ဘူင့်။ 5 ဆေ န့ မုး ဒူအီ၊ အာဆာက် အန် ဟဲ့ နုဝ့် ဖန် ဆီနမ် ဇမ် အာ ဂိုဝ် ဆီနမ်၊ ဆေ အန် မုး အီမာယ်၊ ဘေ လုဝ် လှူ ရွိုန် အာ ဂိုဝ် ဘူင့်။ ဆေ န့ မုး ဂွန် အီဘိုန့်၊ တဲး ဘေ လှူ ရွိုန် ဂိုဝ် ဘူင့်။ 6 ဆေ န့ မုး ဂွန် အီမာယ်၊ အာဆာက် အန် ဟဲ့ နုဝ့် အူ မာဂျီန် ဇမ် ဖန် ဆီနမ်၊ ဘေ လုဝ် လှူ ရွိုန် ဖန် ဘူင့်။ ဆေ န့ မုး ဂွန် အီဘိုန့်၊ ဘေ လုဝ် လှူ ရွိုန် အူယ် ဘူင့်။ 7 ဆေ န့ မုး အီမာယ် အာဆာက် ဟဲ့ နုဝ့် ဒဝ် ဂိုဝ် ဆီနမ် ဟုဝ့် နာ ဒဲင်၊ ဘေ လုဝ် လှူ ရွိုန် ဂိုဝ် ဒီ ဖန် ဘူင့်။ ဆေ န့ မုး အီဘိုန့်၊ ဘေ လုဝ် လှူ ရွိုန် ဂိုဝ် ဘူင့်။ တဲး ဘေ လှူ ပါယ် တီ။

8 ဆေ န့ ယီ မုး ဒူအီ အီ ဟဲ့ ဂိန် ကာဆဝ်၊ တူ ပွိုန် ဒွါ ခဲ့ ပီ လုဝ် လှူ အန်၊ တဲး န့ ထုတ် ဝိဝ် ပဲ့ ဟဲ့ ဒွိုမ် ကာဆဲန့် အန်၊ ဒူအီ ဝီ တီ လုဝ် ဟာဝ် ဒူင် ကွယ် ဒါ အီ လှူ ဒီ ဇဝ်ဖြာ၊ တဲး ဒါ အီ လှူ ဒီ ဇဝ်ဖြာ ဆုင်ဖျာတ် ဒွါ ခဲ့ ဒီ မိုဝ်း အန်။

9 ဆေ ဘေ ဟဲ့ ကာဆဲန့် ဒီ လှူ ဒုဝ် ဆတ်ဒါဝါ ဒီ ဇဝ်ဖြာ၊ ဆေ ဒုဝ် တီ ဟဲ့ မွှိုမ် လှူ၊ န့ ဒီ ဘဲန် ဒုဝ် အီ ဆီငါ ဘွတ်။ 10 ဘော မုး ဒုဝ် အီ မွှိုမ်၊ ဒုဝ် အီ တူ မွှိုမ်၊ ဒူအီ အီ ဟဲ့ ဟွတ့် ကာဆဲန့် ဒီ လှူ တီ၊ အန် တူ ပွိုန် ဝီ ကာပ့လု လှူ ပေါ အူ ဒုဝ်။ ဆေ အန် ယီ ဝီ ကာပ့လု ဝီ လှူ ဒုဝ် ဟဝ်၊ ဘော အာ ဒုဝ် ဟဲ့ ဘဲန် ဒုဝ် အီ ဆီငါ ဘွတ် ပီ လုဝ် လှူ အန် ဒီ ဇဝ်ဖြာ။ 11 ဆေ ဒုဝ် ဆတ် ပီ ကာဆဲန့် ဘေ ဒီ လှူ တီ မုး ဒုဝ် ဆတ် အီ တူ ဆီငါ အီ တူ ဘွတ်၊ အီ တူ ကာအာပ် တဲး အန် ဘဲန် ပီ လှူ ဒီ ဇဝ်ဖြာ၊ ဘေ လုဝ် ဒိုဝ်း ဒုဝ် ပီ ကာဆဲန့် ဘေ တီ၊ ဟာဝ် တိုယ် ဒီ ဒါ အီ လှူ ဒီ ဇဝ်ဖြာ။ 12 ဒါ အီ လှူ ဒီ ဇဝ်ဖြာ လုဝ် ဆုင်ဖျာတ် ငဝ်း အန်၊ တဲး န့ ကာဒါန် ခဲ့ မွှိုမ် တူ မွှိုမ် ဒုဝ် ဆတ် တီ။ အန် တဝ်း ခဲ့ မှဝ်၊ ဘေ လုဝ် ဒွါ ခဲ့ တီ။ 13 ဆေ ဒူအီ တီ ဘော ဆီ ထုတ် ဝိဝ် ဒုဝ် တီ၊ လုဝ် ခေ ငဝ်း အန် ခဲ့ ပီ ဆုင်ဖျာတ် အုန် ဒါ အီ လှူ ဒီ ဇဝ်ဖြာ တွိုန်။ အန် လုဝ် ဝီ ပွါ ပေါ ဖန် ဘုန် အူ ဘုန်။

14 ဆေ န့ မိုဝ်း ဒူအီ အီ ဆီ လှူ ကာင် အန် ဒီ ဇဝ်ဖြာ၊ တဲး န့ ဆီငါ ဘွတ်၊ ဒါ အီ လှူ ဒီ ဇဝ်ဖြာ လုဝ် ဆုင်ဖျာတ် ငဝ်း အန်၊ ယွတ် ကာင် တီ၊ ယုဝ် န့ ဆီချာ၊ တူ ဆီချာ။ အန် ဘော တဝ်း ငဝ်း အန် ခဲ့ မှဝ်၊ ဒူအီ အီ လှူ တီ လုဝ် ဒွါ ခဲ့ တီ။ 15 ဆေ ဒူအီ အီ လှူ ကာင် တီ ဝီ ဆီ ထုတ် ဝိဝ်၊ တဲး အန် ခေ ခဲ့ ဟဲ့ ကာလာင် အုန် ဒါ အီ လှူ ဒီ ဇဝ်ဖြာ ဘော ဝီ ပွါ ပေါ ဖန် ဘုန် အူ ဘုန်။ ဟဲ့ ဟွတ့်၊ ကာင် တီ ဝီ ဘဲန် ကာင် အန်။

16 ဆေ န့ မိုဝ်း ဒူအီ အီ ဆီ လှူ မာန် ဂေ ဒူင် နာ ဒီ ဇဝ်ဖြာ၊ တဲး န့ ဆီငါ ဘွတ်၊ ဘေ လုဝ် ဆုင်ဖျာတ် ငဝ်း အန် ခဲ့ လိုပ် ဆီမာ ငှုဝ်။ ဆေ ဆီမာ ငှုဝ် လိုပ် ဂိုဝ် အေဖာ အီ မုး အူ ခွန် ဒီ ဘူ ဘ့လဲ၊ ငဝ်း အန် ဟဲ့ မိုဝ်း ရွိုန် ဖန် ဂိုဝ် ဘူင့်။ 17 ဆေ အန် လှူ မာန် ဂေ ဒူင် နာ ဒေါ မုး ဆီနမ် ဒီ လုဝ် ဒွါ ဝိဝ် တွိုန်၊ ငဝ်း အန် မုး ခဲ့ ပီ ကာလာင် အုန် တီ။ 18 ဆေ အန် ယီ လှူ ဝါယ် ဆီနမ် ဒီ လုဝ် ဒွါ ဝိဝ် တီ၊ ဒါ အီ လှူ ဒီ ဇဝ်ဖြာ လုဝ် တိး ဆီနမ် အီ ဆီ ဂိတ်၊ ကော ဒီ ဇမ် ဆီနမ် ဒီ လုဝ် ဒွါ ဝိဝ် ပေါ အူ ဇေန့်။ ငဝ်း အန် လုဝ် ယူမ် ဒူပ် ဆီနမ် အီ ဆီ ဂိတ် တီ။ 19 ဆေ အန် ဘော ဝီ ဆီ ထုတ် ဝိဝ် ဒူင် နာ ပဲ့ ဟဲ့ လှူ အန် တီ၊ အန် လုဝ် ခေ ငဝ်း အန် ခဲ့ ပီ ကာလာင် အုန် ဒါ အီ လှူ ဒီ ဇဝ်ဖြာ ဘော ဝီ ပွါ ဖန် ဘုန် အူ ဘုန်။ 20 ဆေ ဒူအီ တီ ဝီ ယွင့် ဒူင် နာ တီ ဒီ အီ ဟဝ် အာတ့် ပွိုန် အန် ဒီ ထုတ် ဝိဝ် ဒီ ဇဝ်ဖြာ၊ အန် အာဝ် ဟူ ပွိုန် ဝီ ထုတ် ဝိဝ် ဒေါ မှဝ် 21 ဆေ န့ ဇမ် ဆီနမ် ဒီ လုဝ် ဝီ ဒွါ ဝိဝ် တွိုန်၊ မာန် ဂေ ဒူင် နာ ဇိုဝ် တီ ဘဲန် အီ ဆီငါ ဘွတ်၊ ဘဲန် ကြုဝ် ဇဝ်ဖြာ။ ဒါ အီ လှူ ဒီ ဇဝ်ဖြာ ပွိုန် ဝီ ရန့် ဒီ ဟူမ်။

22 ဆေ န့ ယီ မိုဝ်း ဒူအီ အီ ဟဲ့ လှူ ဒူင် နာ ဂေ မာန် ပီ စိုဝ်း အန် ဒီ အီ ဟဝ်၊ ဆေ အာဝ် မုး ခါဂုန် ပီ ကာဆာင် ဂုန့် အန်၊ 23 ဒါ အီ လှူ ဒီ ဇဝ်ဖြာ လုဝ် တိး နှာင် ဆီနမ် ဆီ ဂိတ် ကော ဇမ် ဆီနမ် ဒီ လုဝ် ဝီ ဒွါ ဝိဝ် တွိုန်၊ ဝီ ဆုင်ဖျာတ် ငဝ်း အန်။ ဟဲ့ ဟွတ့်၊ ဒူအီ အီ လှူ တွိုန် လုဝ် ဒွါ ငဝ်း အန် တီ ဆီငဲ တီ။ ရွိုန် တီ ဟဲ့ ဘွတ် ကာဆဝ်။ ခုဝ်၊ န့ ဟဲ့ ဘဲန် ပဲ့ ဟဲ့ လှူ ဒီ ဇဝ်ဖြာ။ 24 ဒေါ ဇမ် ဆီနမ် ဒီ လုဝ် ဒွါ ဝိဝ် တွိုန်၊ မာန် ဂေ ဒူင် နာ တီ၊ ဘေ လုဝ် ဝီ အာပ် ဝိဝ် ဒီ ဒါ ကာညာ ဘြိမ် အန်။ 25 ခဲ့ ပီ ဆုင်ဖျာတ် ဘေ ငဝ်း ပီ ဒီ လှူ ဒွန် မျုဝ်၊ ဘေ လုဝ် ဆ တာ ဘ့လေ ဆ အီ ကွယ် ခဲင် ထိုပ် ဘိက် ဘွတ်။

26 ဂွန် ဂိန့် ဒုဝ် ဆတ်ဒါဝါ အာဝ် ပွိုန် လှူ ဒီ ဇဝ်ဖြာ။ န့ ဟဲ့ ဟွတ့် မုး ကြုဝ် ဇဝ်ဖြာ။ ဘော မုး မာဘူ၊ မာမက် ဂေ မာပဲ၊ န့ ဟဲ့ မုး တူတ့် ကြုဝ် ဇဝ်ဖြာ။ 27 ဆေ န့ မုး ဂွန် ဂိန့် ဒုဝ် ဆတ်ဒါဝါ မျုဝ် အီ တူ ဆီငါ၊ ဘေ လုဝ် ဝီ ထုတ် ဝိဝ်၊ ဒွါ ငဝ်း ပဲ့ ဟဲ့ ဆုင်ဖျာတ် ဂေ ဒီ အာတ့်။ ဘေ လုဝ် ဝီ ပွါ ပေါ ဖန် ဘုန် အူ ဘုန်။ ဆေ ဒါ ကာညာ အန် ယီ တူ ဝီ ထုတ် ဝိဝ်၊ ဒါ အီ လှူ ဒီ ဇဝ်ဖြာ လုဝ် ယွင့် ဒီ အီ ဟဝ်။ ဝီ အီ စိုဝ်း လုဝ် ဒွါ ငဝ်း အန် ခဲ့ ဟဲ့ ဟွတ့် ဆုင်ဖျာတ် တွိုန်။

28 မျုဝ် မှဝ် အာဝ် တဝ်း၊ ပဲ့ ဟဲ့ ကာဆဲန့် ဘေ ဒီ လှူ ကာဒတ် ဒီ ဇဝ်ဖြာ၊ ဘော မုး ဒူအီ ဘော မုး ဒုဝ် ဆတ်ဒါဝါ ဘော မုး မာန် ဂေ ဒူင် နာ၊ အာဝ် ပွိုန် ဝီ ယွင့်၊ အာဝ် ပွိုန် ဝီ ထုတ် ဝိဝ်။ ဟဲ့ ဘဲန် အီ ဆီငါ ဘွတ် အီ မုး ကြုဝ် ဇဝ်ဖြာ။

29 ပီ ဘော မုး ဒူအီ ပဲ့ ဟဲ့ ကာဆဲန့် ဘေ ဒီ လှူ ကာဒတ် ဒီ ဇဝ်ဖြာ မိူဝ်၊ အာဝ် ပွိုန် ဝီ ထုတ် ဝိဝ်။ ဘေ လုဝ် တဲး အန် ယမ်။

30 ခဲ့ ကွယ် မျုဝ် အီ လတ့် ဒဲင် ကာဒါယ် ဒွန် မျုဝ်၊ ဘော မုး မျုဝ် အီ မိုဝ်း ဂဝ်၊ ဘော မုး မျုဝ် အီ မိုဝ်း ဘ့လေ၊ ဂိုဝ် ဘုန် အူ ဘုန် မုး ကြုဝ် ဇဝ်ဖြာ။ န့ ဟဲ့ ဘွတ် ကာဆဝ်။ 31 ဆေ န့ ယီ မိုဝ်း ဒူအီ အီ ဆီ ထုတ် ဝိဝ် ဂိုဝ် ဘုန် အူ ဘုန် တီ၊ ဘေ လုဝ် ခေ ငဝ်း အန် ဘော ဝီ ပွါ ပေါ ဖန် ဘုန် အူ ဘုန်။ 32 ခဲင် ဒုဝ် ဆတ်ဒါဝါ ပီ ဟျီင် ဘေ၊ ဂိုဝ် ဒုဝ် အူ ဒုဝ် ဘေ လုဝ် ကာယဝ်း လေး၊ တဲး န့ ဘဲန် ကြုဝ် အုဝ် အီ မုး ဇဝ်ဖြာ။ 33 ဒါ ကာညာ ဒုဝ် ဆတ် တီ ယီ တူ ပွိုန် ဒိုဝ်း ဒုဝ် အီ တူ မွှိုမ်၊ ဝီ ပ့လု ဒုဝ် ပဲ့ ဟဲ့ ဟွတ့် ရဝ်း အန် တီ။ ဆေ အန် ယီ ဒိုဝ်း ဒုဝ် ဟဝ်၊ ဝီ ပ့လု ဒုဝ် တီ၊ ဘော ဒုဝ် တီ၊ ဘော ဒုဝ် ပီ ကာပ့လု အန် ဟဲ့ ဘဲန် ကြုဝ် ဇဝ်ဖြာ။”

34 အာတီ၊ န့ မုး ဒါရာ ပီ ဒမ် အုန် ဇဝ်ဖြာ ဒီ အာမုဝ်ဆဲ ဒေါ ကွယ် အန် ဒဲင် နွန် ဆီနာယ်၊ တဲး ဂေ ဒူအီ အီဆာရေလ ဘူင် ဒူပ်။