1 ဇဝ်ဖြာ ပီ ဝီ တဝ်း၊ “ခဲင် မိူင် ဘေ၊ ဘေ ကွဲ့ ဘူင် အာရိုပ် မာဆေ၊ တဝ်း န့ မုး ဇဝ်ဖြာ။ ကွဲ့ ဘူင် အာရိုပ် မာဆေ၊ တဲး အန် ဘဲန် ပီ ကြိုပ် ဘေ။ ကွဲ့ ဆမ် ဂန်ထွန်၊ ကွဲ့ ဘ့လုဝ်း မာဝ်၊ ဘူင် အာရိုပ် ပီ ဒီ ကြိုပ် ဘေ။ အုဝ် မုး အန် ဇဝ် အီ မုး ဇဝ်ဖြာ ပီ ကြိုပ် ဘေ။

2 ဘေ လုဝ် ကမ် ဆီငဲ ဒီလှဝ်။ ဘေ လုဝ် ရုဝ်ဆေ ဒူင် ကြိုပ် ဘေ ဒီ အုဝ်။ အုဝ် မုး အန် ဇဝ် အီ မုး ဇဝ်ဖြာ။

3 ဆေ ဘေ ဘူင် ဒူပ် ဒါရာ အုဝ်၊ ဘူင် ဒူပ် ပီ စ်ု အုဝ် ဒီ ဘေ၊ 4 အုဝ် ဒီ တဲး ဂ့လာယ် စုဝ်း ဒေါ မုး အာခြာဝ် အန်၊ တဲး ကာဒါယ် ဘေ ဘွတ်၊ တဲး ပီ ဆမ် ဘေ အွင်၊ တဲး ဘော ဟေ ဘ့လေ ပီ ဆမ် ဘေ မိုဝ်း ဘ့လေ ကိူန်။ 5 အုဝ် ဒီ တဲး ငှုဝ် ဘေ ကိူန်၊ တဲး ဘေ မး လှေန့် ငှုဝ် ဘေ၊ တဲး န့ ကော ဇမ် အာခြာဝ် လုဝ် ဘေတ့် ဘေ ဘ့လေ မာငုန်။ ဘေ ဒီ ဘော ဘေတ့် ဘ့လေ မာငုန်၊ တဲး ကော ဇမ် အာခြာဝ် ဝီ လုဝ် ဟပ် ဘေ ခြိုင် ဆီမာ။ ဘေ ဒီ ပွိုန် ဒီ ဟူမ် ဖဲ ဘော ကွယ် ဂတ် ဂျီတ် ခဲင် မိူင် ဘေ။

6 အုဝ် မိူဝ် တူ တဲး န့ မိုဝ်း အီ ကာဂုဝ်း ဒီ ဘေ၊ တူ တဲး န့ မိုဝ်း အီ ရန် အီ ဖျာက် ဘေ။ ဘေ ဒီ ဘော ပွိုန် ဒီ အိတ် ဒါခိုယ်၊ ကွယ် ဒါခိုယ်။ အုဝ် ဒီ ဒိုဝ်း လေး မာဒုဝ် ပြဲ ခဲင် မိူင် ဘေ၊ တူ တဲး န့ မိုဝ်း ဒါ ဆိုက် အီ ကာဂုဝ်း ခဲင် မိူင် ဘေ။ 7 ဘေ ဒီ အွင် ဘော ပဲ ရန်ဆူ ဘေ၊ တဲး ဂေ ဘောကာဂ့လျီတ် တဝ် ဘေ။ 8 ဒူအီ ဘေ ဖန် ဝီ ဒီ ဘော ပဲ ဘော ခုင်ခြး ရန်ဆူ ဘေ အူ မာယဝ်း ဝီ။ ဒူအီ ဘေ အူ မာယဝ်း ဝီ ဒီ ဘော ပဲ ဘော ခုင်ခြး ရန်ဆူ ဘေ အူ မှိုန့် ဝီ။ ရန်ဆူ ဘေ ဒီ ဘော စှိုမ် ဒီ မာပွါ့ လာင် ဘေ။

9 အုဝ် ဒီ မွင့်ကာရာ တဲး လှုက်လှာန် ဘေ ဘြဲ ကိူန်။ ကာဒိက် ဆတ်ဇာ ပီ ဒွါ အုဝ် ဒီ ဘေ အုဝ် တူ တဲး န့ ဘ့လိူင် ဒေါ မှဝ်။ 10 ငှုဝ် ဘေ ဒီ ကိူန်။ အာဝ် တူတ့် ဒီ ဟူမ် အာဒါ အူ ဆီနမ်။ ဘေ ဒီ ဘော လုဝ် ဒိုဝ်း လေး ငှုဝ် ဘြိမ်၊ တဲး န့ မိုဝ်း ဒူင် ဒီ ဝီ ဟပ် ငှုဝ် ကာမာယ်။ 11 အုဝ် ဒီ ကွယ် ရိုမ် ဒူပ် ဘေ ခဲင် ထိုပ် ဘိက် ဘွတ် အီ မုး ဒူင် ကွယ် အုဝ်။ အုဝ် မိူဝ် တူ ဝဲန် ဘေ ဒေါ မှဝ်။ 12 အုဝ် ဒီ ကွယ် ရိုမ် ဒူပ် ဘေ။ အုဝ် ဒီ ဘဲန် ဇဝ်ဖြာ ပီ ကြိုပ် ဘေ။ ဘေ မိူဝ် ဒီ ဘဲန် ဒူအီ ပီ ယွတ် မဲန် အုဝ်။ 13 အုဝ် မုး ဇဝ်ဖြာ ပီ ကြိုပ် ဘေ။ အုဝ် အီ ထုတ် လေး ဘေ ခဲင် မိူင် အဲဂိုပ်၊ တဲး ဘေ လွတ် ဘဲန် မှာယ် အီ ဟဝ်။ အုဝ် ဟဲ့ ဒိုဝ်း ဝဲန် အီ ခါနှာပ် ဘေ၊ ကွဲ့ တဲး ဘေ လုဝ် ခမ် ဒုက် ဆေဆေ။”

14 ဇဝ်ဖြာ ပီ ဝီ တဝ်း၊ “ဆေ ဘေ ယီ တူ ထူမ် ဂြုဝ်း အုဝ်၊ ဘေ ဒီ လုဝ် ခမ် မှာပ် ဘေ။ ဆေ ဘေ တူ ဘူင် ဒူပ် ပီ စ်ု အုဝ် ဒီ ဘေ၊ 15 ဆေ ဘေ ဝဲန် ဂြုဝ်း အုဝ် ဘော ဇွင့် ဒါရာ အုဝ်၊ တူ ဒူပ် ပီ ကာဆဲန့် အုဝ် ဒီ ဘေ၊ 16 အုဝ် ဒီ ဒမ် မှာပ် ဒီ ဘေ ပါယ် နီ။ အုဝ် ဒီ တဲး ဘေ ကော ယုဝ် ကာဆဝ် အူ ညေန့်။ အုဝ် ဒီ တဲး ဘေ မိုဝ်း ဆဝ် ရောဂါ အီ တဲး ငါယ် ဘေ လိုဝ်၊ တဲး အာဆာက် ဘေ စှိုမ်။ ဘေ ဘော ဆမ် မာဆေ၊ န့ ဒီ မိုဝ်း ရန်ဆူ ဘေ အီ ဒီ တး ဟူမ်။ 17 အုဝ် မိူဝ် တူ ယွတ် ဘေ၊ တဲး ဘေ စှိုမ် ဒီ အီ ဟဝ်။ ဂေ အီ ဇွင့် ဘေ ဒီ အိုပ် ဘေ။ ပီ ဆ မိုဝ်း အီ ခုင်ခြး ဘေ၊ ဘေ ယီ ဒီ ကာဒုး ဒီ တဝ်။

18 ဘေ ပီ ဘော ဟဲ့ ကာဒုး ပါယ် တီ ဆေ ဘေ ယီ ဆီ နဲ့ တူ ထူမ် ဂြုဝ်း အုဝ်၊ အုဝ် ဒီ ဝဲ ပွါ ဒုက် ဒီ ဘေ ပေါ ဘူ ဘုန် ကူပ် မှာပ် ဘေ တီ။ 19 အုဝ် ဒီ ဒိုဝ်း ဝဲန် နဝ်း ဒိူဝ် နဝ်း ပီခိုက် ဘေ။ အုဝ် မိူဝ် တူ တဲး ဂ့လာယ် စုဝ်း ခေါ အီ စဲက် ဒူင် ကွယ် ဘေ၊ တဲး ကာဒါယ် ဒူင် ကွယ် ဘေ ကာဟဝ်း ပ့လူမ် ပီ ဟိန်။ 20 ပီ ဂျုဝ်ဂျာ ဘေ ဒီ ဘူင် အာဝ် ဟူ မိုဝ်း ဒီခုဝ် မာဆေ။ ဘေ ဒီ ဘူင် ဂါန် ဒီလူယ် ဒီလာယ် ပီယေန့်။ ကာဒါယ် ဒူင် ကွယ် ဘေ မိူဝ်၊ အာဝ် ဟူ လတ့် မာဆေ။ ဟေ ဘ့လေ ပီ ဆမ် ဘေ မိူဝ်၊ အာဝ် ဟူ မိုဝ်း ဘ့လေ အန်။

21 ဆေ ဘေ ယီ နဲ့ ဇွင့် အုဝ်၊ တူ ထူမ် ဂြုဝ်း အုဝ်၊ အုဝ် ဒီ ဝဲ ပွါ ဒုက် ဒီ ဘေ လွှိုမ် တီ ပေါ ဘူ ဘုန်။ 22 အုဝ် ဒီ တဲး မာဒုဝ် ပြဲ ဟာယ် လိုပ် ဒူင် ကွယ် ဘေ၊ ကဝ့် ယမ် ဂွန် ဘေ၊ တဲး ဂေ ပျာတ့် ဒုဝ် ဆတ် ပီ ဟျီင် ဘေ၊ တဲး ဘော ဒူအီ ဘေ ကြဲ ဒီ ယူမ်၊ ကြဲ ဒီ ပြေတ့်၊ တဲး ဘော န့တေန့် ဘေ ရာမ်။

23 ဘေ ပီ ဘော ဟဲ့ ခမ် ပါယ် တီ ဆေ ဘေ ယီ တူ ထူမ် ဂြုဝ်း အုဝ်၊ နဲ့ အီ ဇွင့် အုဝ်၊ ဘူင် ကာဘး ဒီ အုဝ်၊ 24 အုဝ် ဒီ ဝီ ဒွါ ဒုက် ဒီ ဘေ၊ တဲး န့ ကာဆဝ် လွှိုမ် အာတ့် နီ ပေါ ဘူ ဘုန်။ 25 အုဝ် ဒီ တဲး ဆိုက် တး ကာဂုဝ်း ဒူင် ကွယ် ဘေ ကူပ် ဟဲ့ ဝဲန် ဘေ ပီ လာယ် ကာဆဲန့် ဘေ ဒီ အုဝ်။ ဘေ ပီ ဘော ဟဲ့ ဝေန့် ချြီင် ခဲင် မိူင် ဘေ၊ အုဝ် ဒီ တဲး ဘေ မိုဝ်း ဆဝ် ရောဂါ၊ တဲး ဘေ စှိုမ် ဘော ဒီ ရန်ဆူ ဘေ။ 26 အုဝ် ဒီ ဘူင် တဲး ဘေ အေတ့် ပီ ဒီ ဟူမ်၊ တဲး အီဘိုန့် ဂိုဝ် ဝီ ကော တး စူ ကာဝှါင် အူ ကာဝှါင်၊ ဂိုမ် ခါမုန် ဂေ။ ဂေ ဒီ ဆ ကာဆာင် ခါမုန် တီ ဒီ ဘေ၊ ယီ တူ ကူပ် ဖဲ ဘေ။

27 ဘေ ဟဲ့ ခမ် ဒုက် တာင် ခဲ့ တီ၊ ဆေ ဘေ ယီ ဆီ နဲ့ ဘူင် ကာဘး ဒီ အုဝ်၊ တူ ထူမ် ဂြုဝ်း အုဝ်၊ 28 အုဝ် ဒီ ရူ ကာဆဝ် ဒီ ဘေ၊ ဝီ ဘူင် တဲး ဘေ ခမ် ဒုက် အီ ဟာယ် ကာဆဝ်၊ တဲး န့ လွှိုမ် အာတ့် နီ တီ ပေါ ဘူ ဘုန်။ 29 ဘေ ဒီ ကာပြာန့် ကာဆဝ် ပီ ဒီ ဟူမ်၊ တဲး ဘေ ကော ဝီ ငဝ်း ဟူမ် ယင် ဂွန် ဘေ။ 30 အုဝ် ဒီ ပျာတ့် ဝဲန် ဒူင် ကြိုပ် ဘေ အာရိုပ်၊ အီ ကွယ် ဒဲင် ဒူင် စာ။ အုဝ် ဒီ ပျာတ့် ဝဲန် ကာစှူင့် ဒူင် ဒုဝ့် ဘေ န့ကြိုဝ်း အုး ငှုန်။ အုဝ် ဒီ ဝီ ဒိုဝ်း ဒုဝ် ယမ် ဘေ၊ ဝဲန် ဒဲင် အာရိုပ် ရာင် အီ ဟဲ့ ကာဘက် ဟဲ့ လိုဝ် တီ။ အုဝ် ဒီ ဘော ကာအိး ကာဆဝ် ဘေ။ 31 အုဝ် ဒီ ပျာတ့် မိူင် ဘေ၊ ပျာတ့် ဘော ဒူင် ကြိုပ် ဘေ အာရိုပ်။ ဘော န့ကြိုဝ်း အုး ငှုန် ပီ ဒုဝ့် လှူ ဘေ ဒီ အုဝ်၊ န့ မိူဝ် တူ လဝ့် နဝ်း အုဝ်။ 32 အုဝ် ဒီ ပျာတ့် တဲး မိူင် ဘေ ကော ရာမ် တူတ့်၊ တဲး ဘော ရန်ဆူ ဘေ အီ တး ကွယ် ဒူင် တီ ကော ဝီ ကာပိုန့် ကာဆဝ်။ 33 အုဝ် ဒီ ဘူင် တဲး ဒါ ဆိုက် တး ကာဂုဝ်း ဒီ ဘေ။ တဲး ဘေ တဝ် ကာယဝ်း၊ ဟာဝ် ကွယ် မိူင် အီ ဟဝ်။ မိူင် ဘေ ဒီ ရာမ်၊ ကာပျာတ့် လိုဝ် တူတ့်။ 34 ဆေ မိူင် ဘေ ဟဲ့ ရာမ် ပါယ် တီ န့ ပွိုန် ဒီ ကွယ် ဒီလှဝ် ဘဲန် ဆီနမ် ဘဲန် ဆီနမ် ဒေါ ကွယ် ဘေ ခဲင် မိူင် ရန်ဆူ ဘေ။ ဒေါ တူ မိုဝ်း အာဆေ ခဲင် မိူင် ဘေ တီ၊ န့ ဘော ပွိုန် ကွယ် ဒီလှဝ် ပီ ဒေါ မုး ဆီနမ် ဒီလှဝ်။ 35 ဒေါ ကွယ် ဘေ ခဲင် မိူင် ရန်ဆူ ဘေ၊ ကာဒါယ် ခဲင် မိူင် ဘြိမ် ဘေ ဒီ ဘော ပွိုန် ဒီလှဝ် ဆီချာ ကူပ် တူ တဲး ဘေ မိူင် ဒီလှဝ် ဒေါ လုဝ် ဒီလှဝ်။

36 ဒူအီ ဘေ အီ ဆီ ဂိတ် အီ လုဝ် ကွယ် ခဲင် မိူင် အီ ဟဝ် တွိုန်၊ အုဝ် ဒီ ဘော တဲး ဂေ ယုဝ် ကာဆဝ်။ ဆေ ဂေ ဟီ ယိုဝ် ဟမ် ခုန် ဘုတ် လှာ ဟေ၊ န့ ဒီ ကာဘျုဝ် ဂေ၊ တဲး ဂေ ကော ကေး ဒီ တဝ်၊ တဲး န့ ကော ပီ ဂေ တဝ် ဒါ ဆိုက်။ ဂေ ယီ တဝ် ပီယေန့်၊ အာဝ် မိုဝ်း ရန်ဆူ ခေါ အူ ဝီ ဒူပ် ဂေ။ 37 န့ တူ မိုဝ်း အာဆေ ခုင်ခြး ဂေ။ ဂေ ယီ ဒီ တဝ် ကေး၊ လာယ် ညဲတ့် ပီ ဂေ တဝ် အီ ဟဲ့ ဂူင့် ပွါ့ ဂူင့် လျီး၊ ခုင်ခြး ဂေ။ ဂေ မိူဝ် တူ မိုဝ်း ပ့လူမ် ဒီ ဝီ ကာဂုဝ်း ဒီ ရန်ဆူ။ 38 ဘေ ဒီ ဘော ယမ် ခဲင် မိူင် ဒူအီ ဟဝ်။ န့ ပီ ကာဒါယ် ခဲင် မိူင် ရန်ဆူ ဘေ တီ ဒီ ဘော ညွှတ် ဘေ။ 39 ဂေ အီ ဆီ ဂိတ် ခဲင် မိူင် ရန်ဆူ ဘေ၊ ဂေ ဒီ ဘော ဒီလှး ဘော ကြဲ ဒီ ယမ် ကူပ် မှာပ် ဘေ ဘော ကူပ် မှာပ် ဂုန့် ဒင် ဘေ။

40 ဆေ ဘေ ယီ ဝီ လှုဝ်း ဝီ ကာလာင် မှာပ် ဘေ ဘော မှာပ် ဂုန့် ဒင် ဘေ ဘော ပဲ့ ဟဲ့ ကာလိုပ် ပဲ့ ဟဲ့ ကာဘး ဘေ ဒီ အုဝ်၊ 41 ဆေ ဘေ ဘော ကာလာင် ပဲ့ ဟဲ့ ဘူင် ဘေ အီ တဲး အုဝ် ဘူင် ကာဘး ဒီ ဘေ၊ အီ တဲး အုဝ် ဘော တိုယ် ဘေ ဟာဝ် ကွယ် မိူင် ရန်ဆူ ဘေ၊ ဆေ ဘေ ဘော ဝီ မိုဝ်း နဝ်း ခမ် ဒီ ဂူမ်၊ ခမ် ဒီ ယူမ်၊ ဝီ မှာန့် ဒီ ဘ့လွာ့ ဝဲန် မှာပ် ပဲ့ ဟဲ့ ဘူင် ကာဘး ဘေ ဒီ အုဝ်၊ 42 အုဝ် ဒီ ဝီ ဘူင် ဒူပ် ကာဒိက် ဆတ်ဇာ ပီ ဒွိုမ် ဒွါ အုဝ် ဒီ အာကူပ် ဘော အာဆဲက် ဘော အာဘြာဟမ် တွိုန်။ အုဝ် ဒီ ဝီ လှုဝ်း ပဲ့ ဟဲ့ ကာဆဲန့် အုဝ် လွင် မိူင် ဘေ တီ။ 43 ခုဝ်၊ ဘေ ဟဲ့ ဘ့လေး မိူင် ဘေ၊ တဲး န့ ရာမ်။ ဒေါ တူ ကွယ် ဘေ ခဲင် မိူင် တီ၊ မိူင် ဘော ပွိုန် ဒီ ကွယ် ဒီလှဝ် ပီ ဒေါ မုး ဆီနမ် ဒီလှဝ်။ ဘေ ဒူအီ အီဆာရေလ ယီ လုဝ် ခမ် မှာပ် ဘေ ကူပ် ဝဲန် ဘေ ဂြုဝ်း အုဝ် ဘော လှိုဝ် ဒါရာ ပီ ဒမ် အုန် အုဝ်။ 44 ဘေ ပီ ဘော လုဝ် ခမ် ဒုက် တာင် ဘော လုဝ် ကွယ် ခဲင် မိူင် ရန်ဆူ ဘေ မိူဝ်၊ အုဝ် ယီ တူ ပျာတ့် တူ ဝဲန် တူတ့် ဘေ ဒေါ မှဝ်။ အုဝ် မိူဝ် တူ ပျာတ့် ဝဲန် ကာဒိက် ဆတ်ဇာ ပီ ဒွါ အုဝ် ဒီ ဘေ။ အုဝ် မုး အန် ဇဝ် အီ မုး ဇဝ်ဖြာ ပီ ကြိုပ် ဘေ။ 45 ကူပ် ရွက့် အုဝ် ဒီ ဘေ၊ အုဝ် ဒီ ဘူင် ဒူပ် ကာဒိက် ဆတ်ဇာ ပဲ့ ဟဲ့ ဒွိုမ် ဒွါ အုဝ် ဒီ ဒါ ဒါ ဘေ၊ အီ မုး ပဲ့ ဟဲ့ ယဲတ့် လေး အုဝ် ခဲင် မိူင် အဲဂိုပ် တွိုန်၊ တဲး ဘော ဒူအီ အာမျုဝ် ဟဝ် ယိုဝ် လွင် အန် တီ၊ တဲး ဂေ ဘော နပ်၊ အုဝ် မုး ဇဝ်ဖြာ ပီ ကြိုပ် ဘေ။ အာတီ ဟဲ့ မှာန်၊ အုဝ် မုး အန် ဇဝ် အီ မုး ဇဝ်ဖြာ။”

46 ဂြုဝ်း ဇိုဝ် တီ ဒွန် မျုဝ်၊ ဟဲ့ မုး ဒါရာ ဘော ဂြုဝ်း ပီ ဒမ် အုန် ဇဝ်ဖြာ ဒီ အာမုဝ်ဆဲ ဒေါ ကွယ် အန် ဒီ နွန် ဆီနာယ်၊ တဲး ဂေ ဒူအီ အီဆာရေလ ဒူပ်။