1 ဒေါ ကွယ် အာမုဝ်ဆဲ ဒဲင် နွန် ဆီနာယ် တွိုန်၊ ဇဝ်ဖြာ ဝီ စ်ု အန်၊ 2 တဲး အန် ဝီ ကာလာင် ဒီ ဂေ ဒူအီ အီဆာရေလ တဝ်း၊ “ပန် ဒီ လိုပ် ဘေ ခဲင် မိူင် ပဲ့ ဟဲ့ တဝ်း အုဝ် ဒီ ဒွါ ဒီ ဘေ တွိုန်၊ ဘော ကာဒါယ် ခဲင် မိူင် တီ ဘေ လုဝ် တဲး န့ ဒီလှဝ်၊ တဲး န့ လဝ့် နဝ်း ဇဝ်ဖြာ။ 3 အာဒါ ဒဝ် ဆီနမ် ဘေ ဟဲ့ ပွိုန် ရန့် မာန်၊ ရန့် ဒူင် နာ။ ဟဲ့ ပွိုန် ခြး ဟေ မာငုန် ဘေ၊ ဟဲ့ ပွိုန် ဂဲပ် အုန် ဘ့လေ ပီ ပိတ် ပီ ဆမ် ဘေ။ 4 မာလဲ၊ ဘော ဇမ် ဆီနမ် မ့ဘူ၊ ဘေ လုဝ် တဲး ကာဒါယ် ဒီလှဝ်။ ဘေ ဒူအီ လုဝ် ဒီလှဝ် ဘူ ဆီငဲ အူ ဇေန့်။ ပါယ် တီ ဘေ လုဝ် တဲး ကာဒါယ် ဘေ ဒီလှဝ် ဘူ ဆီနမ် အူ ဇေန့်။ ဘေ လုဝ် ဘူင် ပါယ် တီ တဲး န့ လဝ့် နဝ်း ဇဝ်ဖြာ။ အာဝ် လုဝ် ရန့် မာန်၊ ရန့် ဒူင် နာ။ အာဝ် လုဝ် ခြး ဟေ မာငုန် ဘေ။ 5 ဘော ကာယူင့် အီ လေး တး ရာင် အန် ခဲင် မာန် ခဲင် ဒူင် နာ ဘေ မိူဝ်၊ ကွဲ့ ဟာဝ် ဆုဝ့်၊ ဟာဝ် ဘေတ့်။ ဘော ဟေ မာငုန် ပီ တူ ခြး ဘေ ရာ အန်၊ အီ ဘ့လေ ရာင် အန်၊ ဘေ ကွဲ့ ဟာဝ် ဂဲပ်၊ ဟာဝ် ဘေတ့်။ န့ မုး ဆီနမ် အီ တဲး ကာဒါယ် ဒီလှဝ်။ 6 ဒွန် အီ ယီ ပွိုန် ဟြေတ့် ပီ ဒီ ဟူမ် အီ လေး ရာင် အန်၊ ဒိုဝ်း ခဲ့ ပီ လုဝ် အန်။ ဘော အာဒါ န့ဟူမ် ဘေ ဘော အာဒါ မှာယ် ဘေ ဘော အာဒါ ဒူအီ အီ ဇာင် ဒီ ဘေ ဘော အာဒါ ဂေ ဒူအီ အာမျုဝ် ဟဝ် အီ ကွယ် ရိုမ် ဒူပ် ဘေ 7 ဘော အာဒါ ဒုဝ် ဆတ်ဒါဝါ ဘေ ဘော အာဒါ ဂေ မာဒုဝ် ပြဲ၊ န့ ဒီ မိုဝ်း ပီ ဒီ ဟူမ် ဒွန် မျုဝ် အီ လေး ရာင် အန်။”

8 “ဘေ လုဝ် တိး ဆီနမ် ဒီလှဝ် ဘူ ဇေန့်။ န့ ဘဲန် ဘူ ဆီနမ် ဘူ ဇေန့်။ ဘောကာဂ့လျီတ် န့ ဘဲန် ဖွုန် ဂိုဝ် ဒီ ဒိမ် ဆီနမ်။ ဝါယ် ဟဲ့ တူတ့် ဖွုန် ဂိုဝ် ဒီ ဒိမ် ဆီနမ် တီ၊ 9 ဒေါ ဇမ် မာဂျီန် မ့ဘူ၊ ဆီငဲ ဂိုဝ်၊ န့ မုး ဆီငဲ ပီ လုဝ် ဘူင် ဘေ ဘ့လွယ် အီ တဲး ဘေ ဝီ လာယ် ကာလဝ့် ဒီ ဇဝ်ဖြာ။ ဆီငဲ အန် တီ ဘေ လုဝ် စ်ု ဒူအီ အူ ဝီ၊ တဲး အန် ဘုတ် ဝဝ်၊ တဲး န့ လိုဝ်း ကာလတ့် ဘော မိူင်။ 10 ဆီနမ် တီ၊ အီ မုး ဆီနမ် ဖန် ဂိုဝ်၊ ဘေ လုဝ် တဲး န့ ဘဲန် ဆီနမ် အီ ဆီငါ ဘွတ်။ န့ ဒီ ဘဲန် ဆီနမ် ဒေါ တဲး ဘေ ဒူအီ ဒွန် အီ ဝီ ဘဲန် ဒူအီ အီ ကွယ် ထင်ဟာင်။ ဒွန် အီ ဘော လုဝ် ကွယ် ဒါခိုယ် ဆီနမ် တီ။ ကာဒါယ် ပဲ့ ဟဲ့ ယွင့် အီ ဟဝ် ဒီ ဘေ၊ ဘေ လုဝ် ဝီ ဒွါ ဝိဝ် ဒီ ကာညာ ဘြိမ် အန်။ ဘော ဂေ ဒူအီ ပဲ့ ဟဲ့ ယွင့် အီ၊ တဲး ဂေ ဘဲန် မှာယ် အီ၊ ဂေ ဒီ ပွိုန် ဝီ ဝေန့် ဒီ ကာင် ဂေ၊ ဝေန့် ခဲင် န့ဟူမ် ဂေ။ 11 ဆီနမ် ဖန် ဂိုဝ် တီ၊ န့ ဒီ တဲး ဘေ ဘျုဝ် ဒါခိုယ်။ ဆီနမ် တီ ဘေ တူ ပွိုန် ဆမ် မာဆေ။ ကာယူင့် အီ လေး တး ရာင် အန် ဒီ ဒင် အန် တွိုန် မိူဝ်၊ ဘေ တူ ပွိုန် ဆုဝ့်၊ တူ ပွိုန် ဘေတ့်။ ဟေ မာငုန် ပီ တူ ကာဒုး ဘေ ဒီ ခြး၊ အီ ဝီ ဘ့လေ တး ရာင် အန်၊ ဘေ တူ ပွိုန် ဘေတ့်၊ တူ ပွိုန် ဒိုဝ်း အုန်။ 12 ခုဝ်၊ န့ မုး ဆီနမ် အီ တဲး ဘေ ဘျုဝ် ဒါခိုယ်။ န့ မုး ဆီနမ် ဘွတ် ဘော ဆီနမ်။ ဘေ ဒီ ဟူမ် မီ အီ လေး တး ရာင် အန် ခဲင် မာန် ခဲင် ဒူင် နာ ဘေ။

13 ဒေါ ဆီနမ် အီ တဲး ဘေ ဘျုဝ် ဒါခိုယ် တီ ဒွန် အီ ဒီ ဝီ ပွိုန် ဝေန့် ဘိုင် ခါဂုန် ဘြိမ် အန်။

14 ပါယ် တီ ဆေ ဘေ ဒူအီ အီဆာရေလ နင်ဂန် ဘော လာယ် စိုဝ်း လာယ် ယွင့် ကာဒါယ်၊ ဘေ ကွဲ့ လာယ် ပီလွှက့်။ 15 ငဝ်း ကာဒါယ် ပီ လာယ် ကာစိုဝ်း ကာယွင့် ဘေ တီ၊ ဘေ လုဝ် ကာလာင် ဒူပ် အာခြာဝ် အီ ဆီ ဂိတ် တဲး ကော ဇမ် ဆီနမ် ဒီ လုဝ် ဒွါ ဝိဝ်၊ တဲး န့ ဒူပ် ပေါ နှာင် ဆီနမ် ဆီ ပွိုန် ဆမ် ပွိုန် ဆုဝ့်။ 16 ဆေ ဆီနမ် အန် ဘော ကိူန်၊ ငဝ်း အန် ဘော ဟုဝ့်။ ဆေ ဆီနမ် အန် ဘော ပြေတ့်၊ ငဝ်း အန် ဘော ယူမ် လူင်။ ခုဝ်၊ န့ မုး မီ ဘ့လေ အီ ဒီ လေး ခဲင် ကာဒါယ် တီ ပီ ကာစိုဝ်း ကာယွင့် ဘေ။ 17 ကွဲ့ တဲး ဘေ လာယ် ပီလွှက့်၊ တဲး ဘေ ယီ ယုဝ် ဇဝ်ဖြာ။ အုဝ် မုး အန် ဇဝ် အီ မုး ဇဝ်ဖြာ ပီ ကြိုပ် ဘေ။

18 ဘေ လုဝ် ဘူင် ဒူပ် ဒါရာ အုဝ် တီ ဘော ပီ စ်ု အုဝ် ဘေ ဘူင်။ ပါယ် တီ ဘေ မိူဝ် ဒီ ပွိုန် ဒီ ကွယ် ဒါခိုယ် ဘော လွတ် အာဖေ အာရေ ခဲင် မိူင် တီ။ 19 ကာဒါယ် မိူဝ် ဒီ မိုဝ်း ဘ့လေ၊ မိုဝ်း ကာယူင့် အန်။ ဘေ မိူဝ် ဒီ ဘော ပွိုန် ဒီ ဟူမ် ဖဲ၊ ကွယ် ဒါခိုယ် ဂတ် ဂျီတ်။ 20 ဆေ မင် အီ ဘော နပ် တဝ်း၊ ‘ပန် ဒီ ဇမ် ဆီနမ် မ့ဘူ တီ၊ မှဝ် အေ ဒီ ပါယ် ဒီ ပွိုန် ဒီ ဟူမ်၊ ဆေ အေ တူ ပွိုန် ဒီ ဆမ် မာဆေ၊ တူ ပွိုန် ဒီ ဘေတ့် ဘ့လေ မာဆေ။း’ 21 အုဝ် ယီ တဝ်း၊ ဇဝ်ဖြာ ဒီ မွင့်ကာရာ ဒွါ ကိူန် ဒေါ ဇမ် ဆီနမ် န့ဒဝ်။ အန် တဲး န့ လေး ကိူန် ဘ့လေ ဂေ ငှုဝ်၊ တဲး န့ ကော ဂ့လိုမ် ဟူမ် အာဒါ အူယ် ဆီနမ်။ 22 ဆေ ဘေ ရန့် မာန် ဂေ ဒူင် နာ ဘေ ဒေါ မုး ဆီနမ် န့ဒါ၊ ဘေ ဆီ မိုဝ်း ပီ ဒီ ဟူမ် ပီ ဆမ် ဘေ ဆီနမ် န့ဒဝ်။ ဘေ ဒီ ဘော မိုဝ်း တဲး ကော ဇမ် ဆီနမ် န့ ဒိမ်။

23 ကာဒါယ် ဘေ တူ ပွိုန် ယွင့် ကာဒတ် ဒီ အီ ဟဝ်။ န့ မုး ကာဒါယ် အုဝ် ဇဝ်ဖြာ။ ဘေ ပီ ဒူအီ အီ ခါတ် ဒီ ကွယ် ဒီ ကာဒါယ် အုဝ်။ 24 ကာဒါယ် ပဲ့ ဟဲ့ ဟွတ့် စိုဝ်း ဘေ၊ ဘေ လုဝ် ဝီ တဲး ဒါ ကာညာ ဘြိမ် အန် ပွိုန် ဒီ ထုတ် ဝိဝ်။

25 ဆေ န့ မုး ဒူအီ အီဆာရေလ အီ ဟဲ့ ဂိန် ကာဆဝ်၊ ဟဲ့ ယွင့် ဟာဝ် ကာဒါယ် အန်၊ တဲး ဘီနွင် ဝေါဝဲ အီ ကာချြီ့ ဒီ အန် ဝီ ထုတ် ဝိဝ်။ 26 ဆေ ဒူအီ ဝီ တီ ယီ တူ မိုဝ်း ဘီနွင် အီ ဒီ ထုတ် ဝိဝ် ကာဒါယ် တီ၊ ဆေ အန် ယီ ပွိုန် ထုတ် ဝိဝ် ရာင် အန်၊ 27 တဲး အန် တိး ဘော ဆီနမ် အာတ့် ဇမ် ဆီနမ် ဒီ လုဝ် ဒွါ ဝိဝ် တွိုန်၊ တဲး အန် ခေ မီ အာဒါ ဆီနမ် တီ။ 28 ဆေ အန် ယီ တူ မိုဝ်း ရွိုန် အာဒါ ပီ ဒီ လုဝ် ထုတ် ဝိဝ် တီ၊ တဲး ဒူအီ အီ ဟဲ့ စိုဝ်း တွိုန် ရန့် ဟာဝ် ကော ဇမ် ဆီနမ် ဒီ လုဝ် ဒွါ ဝိဝ်။ ကာဒါယ် တီ၊ အန် လုဝ် ဝီ ဒွါ ဝိဝ် ဒီ ကာညာ ဘြိမ် အန် ဆီနမ် တီ။ ဟဲ့ ဟွတ့်၊ ဒါ ကာညာ ဘြိမ် တီ ပွိုန် ဝီ ဟာဝ် ကွယ် ဒီ ကာဒါယ် အန် တီ။

29 ဆေ န့ မိုဝ်း ဒူအီ အီ ဟဲ့ ယွင့် ကာင် အန် အီ ကွယ် ခဲင် မိူင် အီ မိုဝ်း ရဲင် ရူပ် မိူင် တီ၊ အန် ပွိုန် ထုတ် ဝိဝ် မီ ကာန်ု အူ ဆီနမ်၊ တိး ဆိန့် ဆီငဲ ယွင့် အန် တီ။ ကာန်ု ဆီနမ် တီ အန် ဟဲ့ ပွိုန် ထုတ် ဝိဝ်။ 30 ဆေ အန် ယီ တူ ထုတ် ဝိဝ် ဆီနမ် တီ၊ အန် အာဝ် ဟူ ပွိုန် ထုတ် ဝိဝ်။ ကာင် အန် တီ ဒီ ဘဲန် ကာင် ဒူအီ အီ စိုဝ်း တွိုန်။ န့ ဒီ ဘဲန် ကြုဝ် အန်၊ တဲး ကော ဇမ် စုဝ် လှုက် စုဝ် လှာန် အန်။ ပီ ဘော ဟဲ့ ဇမ် ဆီနမ် လုဝ် ဒွါ ဝိဝ် မိူဝ်၊ အာဝ် ဟူ လုဝ် ဒွါ ဝိဝ်။ 31 မာလဲ၊ ဆေ န့ မုး ကာင် အီ တူ ကွယ် ခဲင် မိူင် အီ မိုဝ်း ရဲင်၊ ကာညာ ဘြိမ် အန် ဟဲ့ ပွိုန် ထုတ် ဝိဝ် ပီ ထုတ် ဝိဝ် အန် ဒူင် နာ ဂေ မာန် တွိုန်။ ကာင် ဇိုဝ် တီ လုဝ် ဝီ အာပ် ဝိဝ် ဒီ ကာညာ ဘြိမ် အန် ဒေါ ဇမ် ဆီနမ် ဒီ လုဝ် ဒွါ ဝိဝ်။

32 အီ မုး ခြိုဝ် ဒူအီ အာလေဝီ၊ ဂေ ယီ ပွိုန် ထုတ် ဝိဝ် ဆေဆေ ကာင် အီ ကွယ် ခဲင် မိူင် ဒူင် ကွယ် ဂေ။ 33 ဆေ ဒူအီ အာလေဝီ ဟဲ့ ယွင့် ကာင် အီ ကွယ် ခဲင် မိူင် အန်၊ ယီ တူ ပွိုန် ထုတ် ဝိဝ်၊ ဒါ အီ စိုဝ်း လုဝ် ဝီ ဒွါ ဝိဝ် ဆီနမ် ဒီ လုဝ် ဝီ ဒွါ ဝိဝ် တွိုန်။ ခုဝ်၊ ဒူအီ အာလေဝီ အီ ကွယ် ခဲင် မိူင် ဂေ ကာတဲ ဂေ ဒူအီ အီဆာရေလ၊ ဂေ ပွိုန် ကွယ် ခဲင် ကာင် အီ ဟဲ့ ဘဲန် ကြုဝ် ဂေ ဆေဆေ။ 34 ဘော မာန် ဂေ ဒူင် နာ အီ ကွယ် ခူပ် မိူင် ဂေ တီ၊ အာဝ် ပွိုန် ယွင့် ဒေါ မှဝ်။ န့ မုး ကြုဝ် ဂေ ဆေဆေ။

35 ဆေ ဒူအီ အီဆာရေလ အီ ကွယ် ချြီ့ ဘေ ဟဲ့ ဂိန်၊ ဆေ အန် အာဝ် ဟူ ပွိုန် စွယ် ဒုဝ် ဘြိမ် အန်၊ ဘေ လုဝ် စွယ် အန်၊ တဲး န့ ပီ ဘေ စွယ် ခဲတ့် အီ ကွယ် ကာတဲ ဘေ၊ တဲး အန် ဘော ပွိုန် ဒီ ကွယ် ဟာဝ် ဒူပ် ဘေ။ 36 ခဲ့ ပီ ဒွါ ဘေ ဒီ အန်၊ ကွဲ့ ဒိုဝ်း အျီင် အန် ခေါ အူ မျုဝ်။ ဘေ လုဝ် ယုဝ် ဇဝ်ဖြာ။ တဲး ဘီနွင် ဘေ ပွိုန် ဒီ ကွယ် ဟာဝ် ဒူပ် ဘေ။ 37 ရွိုန် ပီ ဒွါ ဘေ အန် ကာရဝ်း၊ ဘေ တူ ပွိုန် ဒိုဝ်း အျီင် အန်။ ပီ ဒီ ဟူမ် ပီ ယွင့် ဒွါ ဘေ ဒီ အန်၊ ဘေ တူ လုဝ် ဒိုဝ်း အာမျာတ် အန်။ 38 အုဝ် ဇဝ်ဖြာ အီ မုး ဇဝ်ဖြာ အီ ထုတ် လေး ဘေ ခဲင် မိူင် အဲဂိုပ်၊ အီ ဝီ အာပ် မိူင် ကာနန့် ဒီ ဘေ၊ အုဝ် ဟဲ့ မုး ဇဝ်ဖြာ ပီ ကြိုပ် ဘေ။ န့ မုး အုဝ် အီ စ်ု ဘေ ဘူင် ပါယ် တီ။

39 ဆေ ဒူအီ အီဆာရေလ အီ ကွယ် ချြီ့ ဘေ ဟဲ့ ဂိန်၊ ဆေ အန် ဟဲ့ ယွင့် ဒုဝ် အန်၊ တဲး အန် ဘဲန် မှာယ် ဘေ၊ ဘေ တူ ပွိုန် စ်ု အန် ဘူင် ဂါန် ပီ မှာယ် ဘေ။ 40 အန် လုဝ် ကွယ် ရိုမ် ဒူပ် ဘေ ပီ ဒူအီ အီ ဇာင် ဒီ ဘေ ဘော ပီ ခဲတ့် အီ ကွယ် ဒူပ် ဘေ။ အန် ဒီ ဘဲန် ပီ ဆုတ့် ပီ စ်ု ဘေ ကော ဇမ် ဆီနမ် ဒီ ဝီ ဒွါ ဝိဝ် တွိုန်။ 41 ဆီနမ် တီ၊ ဘော အန် ဘော အီဘိုန့် ဂွန် ဝါ အန် ဒီ လုဝ် လေး ဒီ ဘေ၊ ဝီ ဝေန့် ဒူင် ကွယ် န့ဟူမ် အန်၊ ဝေန့် ဒူင် ကွယ် ကာဒါယ် ဂုန့် ဒင် အန်။ 42 ဂေ ဒူအီ အီဆာရေလ မုး ဒဲစေန့် အုဝ် ဇဝ်ဖြာ။ ဂေ တူ ပွိုန် ဘဲန် မှာယ် အီ ဒေါ မှဝ်။ အုဝ် ဇဝ်ဖြာ ဟဲ့ ယဲတ့် လေး ဂေ ခဲင် မိူင် အဲဂိုပ်။ 43 ဘေ တူ ပွိုန် စ်ု ဂေ ဘူင် အီ ညှာပ် ကာဆဝ်။ တဲး ဘေ ယုဝ် ဇဝ်ဖြာ ပီ ကြိုပ် ဘေ။

44 ဆေ ဘေ လုဝ် မှာယ်၊ တဲး ဘေ စိုဝ်း ဒူအီ အာမျုဝ် ဟဝ် အီ ကွယ် ခူပ် ဘေ၊ တဲး ဂေ ဘဲန် မှာယ် ဘေ။ 45 ဂွန် ဂေ ဒူအီ အာမျုဝ် ဟဝ် အီ ဟဲ့ တး ကွယ် ဒူပ် ဘေ ဟဲ့ ပွိုန် စိုဝ်း၊ တဲး ဂေ ဘဲန် မှာယ် ဘေ။ ဘော လှုက်လှာန် ဂေ အာမျုဝ် ဟဝ် အီ ဂွိုတ် ခဲင် မိူင် ဘေ တီ ဟဲ့ ပွိုန် တဲး ဂေ ဘဲန် ပီ ဆုတ့် ပီ စ်ု ဘေ ဆေဆေ။ 46 ဘေ ဟဲ့ ပွိုန် ဒိုဝ်း ဂေ ဘဲန် ပီ ခါဂုန် ပီ ဒီ ပွိုန် ပ့လု လှုက်လှာန် ဘေ။ ဂေ ပွိုန် ဘဲန် ပီ ဆုတ့် ပီ စ်ု ဘေ ဘော စုဝ် ဂေ။ ဆေ န့ ယီ မုး ဒူအီ အီဆာရေလ၊ ဘေ တူ ပွိုန် စ်ု ဂေ ဘူင် ဂါန် အီ စန် ကာဆဝ်။

47 ဆေ ဒူအီ အာမျုဝ် ဟဝ် အီ ကွယ် ကာတဲ ဘေ ဟဲ့ ဝီ မိုဝ်း ဝီ ခြမ်၊ ဘေ ဒူအီ အီဆာရေလ အူ ဝီ ယီ ဟဲ့ ဝီ ဂိန်၊ ဟဲ့ ဝီ ကာဒုး ဒီ ယွင့် ဒုဝ် အန်၊ ဝီ ဘဲန် မှာယ် ဒူအီ အာမျုဝ် ဟဝ် တီ၊ ဆေ အန် ဘော ဘဲန် မှာယ် ခဲင် ခြိုဝ် ဝေါဝဲ ဒူအီ အာမျုဝ် ဟဝ် တီ၊ 48 ဘေ ဟဲ့ ပွိုန် ဝီ ထုတ် ဝိဝ် အန် ဆေဆေ။ ဘော ဝေါဝဲ အန် ဟဲ့ ပွိုန် ထုတ် ဝိဝ် အန်။ 49 ဘော ဂုန့် တဲ့ အန် ဘော ဂွန် အီကတ် ဂွန် ဝါ အန်၊ ဆေ န့ မုး ဘီနွင် အီ မုး န့ကြိုဝ်း န့ကြာတ့် အန်၊ ဂေ ဒွန် အီ ဟဲ့ ပွိုန် ထုတ် ဝိဝ် အန်။ ဆေ ဇဝ်ဖြာ ဒီ ဘူင် နာ မွှိုမ် ဒီ အန်၊ အန် ဘော ပွိုန် ဒီ ထုတ် ဝိဝ် ဒုဝ် ဘြိမ် အန် ရာင် အန်။ 50 ဘေ လုဝ် တိး ဆီနမ် အီ ဆီ ကွယ် တဲး ကော ဇမ် ဆီနမ် ဒီ လုဝ် ဝီ ဒွါ ဝိဝ် တွိုန်။ ငဝ်း ပီ လုဝ် ဒွါ ဒူအီ အီ ထုတ် ဝိဝ် မှာယ် တီ လုဝ် ဒူပ် ငဝ်း ဇာင် ဒူအီ အူ ဝီ အာဒါ ဆီနမ် အီ ဆီ ကွယ် တီ။ 51 ဆေ န့ ဆီ ဂိတ် လှေန့်၊ အီ ဒီ ထုတ် လေး မှာယ် တီ လုဝ် ဒွါ ကိူန်။ 52 ဆေ န့ ယီ ဆီ ဂိတ် ပြေတ့်၊ ငဝ်း အန် လုဝ် ယူမ် လူင်။ 53 ဒါ ကာညာ အီ မုး ဒူအီ အာမျုဝ် ဟဝ် လုဝ် မာတ် အန် ပီ ဒူအီ အီ ဇာင် ဒီ အန်။ ဘေ လုဝ် ဆာဒိက်၊ ကွဲ့ တဲး အန် စ်ု ကာဆဝ် မှာယ် အီ မုး ဘီနွင် ဘေ။

54 ဆေ န့ ယီ တူ မိုဝ်း အီ ဒီ ထုတ် ဝိဝ် မှာယ် တီ၊ ဒါ ကာညာ အန် လုဝ် ဘ့လေး ဝိဝ် အန် ဘော အီဘိုန့် ဂွန် ဝါ အန် ဒေါ ဇမ် ဆီနမ် ဒီ လုဝ် ဒွါ ဝိဝ်။ 55 ခုဝ်၊ ဆေ န့ မုး ဒူအီ အီဆာရေလ၊ အူ ဝီ မိူဝ် တူ ပွိုန် ဘဲန် မှာယ် အီ ဟဝ် ဆေဆေ။ ဂေ မုး ဒဲစေန့် အုဝ် အီ မုး ဇဝ်ဖြာ။ အုဝ် ဟဲ့ ယဲတ့် လေး ဂေ ခဲင် မိူင် အဲဂိုပ်။ အုဝ် မိူဝ် မုး အန် ဇဝ် အီ မုး ဇဝ်ဖြာ ပီ ကြိုပ် ဂေ။”