1 ဇဝ်ဖြာ ဝီ စ်ု အာမုဝ်ဆဲ၊ 2 တဲး အန် ဝီ ကာလာင် ဒီ ဂေ ဒူအီ အီဆာရေလ တဝ်း၊ “ဘေ လုဝ် ဒိုဝ်း တး နာမန် အီ ဆီငါ ပီ ကြိတ် ဂေ တာ ဘ့လေ နာမန်၊ တဲး ဘေ ဟပ် ခဲင် ငဝ် အွမ် တာင် အီ ကွယ် ခဲင် ထိုပ် ဘိက် ဘွတ်၊ တဲး ငဝ် အွမ် တာင် တီ ဘော ဘ့လာင် ဆေဆေ။ 3 အာရူန် လုဝ် ပီဒဝ့် အုန် ငဝ် အွမ် တာင် တီ နာ ရေတ့် ဘိက် ဂွင့်၊ အီ ကွယ် နာ အာတ့် ဇီဒိူက် ခဲင် ဒူင် ဆီငါ ဘွတ် လွှိုမ် တူတ့် တွိုန်။ အန် လုဝ် လိုမ်လာ ငဝ် အီ ကွယ် ဒီ အာတ့် ဇဝ်ဖြာ တီ၊ ဆိန့် ဘာ ဒီ အပ် ကော ဇမ် ပြဲ ဘ့လာင်။ အာတီ န့ မုး ပဲ့ ဟဲ့ စ်ု အုဝ် ဘေ ဘူင် ဒူပ် ဒွန် စုဝ် ဒွန် ဘာန် နာ အာတ့် အာဝ်။ 4 အာရူန် လုဝ် လိုမ်လာ ဒင် ငဝ် အွမ် ပီ ဘူင် ဂေ တာ ခြိဝ် ဇဲတ် တီ၊ တဲး ငဝ် ဘ့လာင် ဒီ အာတ့် ဇဝ်ဖြာ ဆေဆေ။

5 ဘေ ဘော လုဝ် ဒိုဝ်း ကာပဲ့ ခဝ်ချုင် အီ ဟဲ့ ကာမွတ့် ဆီချာ အာဒါ အာ အုဝ်မာ အီ မုး ကာဘက် အူယ် ဘ့လဲ၊ ဘူင် တဲး န့ ဘဲန် ခါမုန် ဂိုဝ် ဒီ အာ ဘူင့်၊ ဝီ ဂိုမ် ခဲင် ကာဝှါင်။ 6 ဘေ လုဝ် ဘ့လေး၊ ဘူင် အာ မ့ပြဲင်။ အူ မ့ပြဲင် ဒဝ် ဘူင့်။ ဘ့လေး ဒဲင် ကာစှူင့် ခြိဝ် ပီ ဘူင် အုန် ဂေ ဒီ အာတ့် ဇဝ်ဖြာ တွိုန်။ 7 ဘေ လုဝ် ဒိုဝ်း ကာညန် လေပူန် အီ ဇဲတ်၊ ဟပ် ဒီ အာ မ့ပြဲင် တွိုန်။ ဟဲ့ ဟွတ့်၊ ဘေ လုဝ် ဒုဝ့် ကာညန် လေပူန် တီ ခဲင် ငဝ်၊ တဲး န့ ဘဲန် ပီ လှူ အီ ဒုဝ့် ဒီ ငဝ်၊ တဲး ဇဝ်ဖြာ လှုဝ်း ဘေ။ 8 ပုင် အာတိုဝ် နီ ဟာဝ် နာ အာတ့်၊ ဘူ ဆီငဲ အူ ဇေန့်၊ ဘေ လုဝ် ဒိုဝ်း ခါမုန် ဇိုဝ် တီ၊ ဘ့လေး ဒီ အာတ့် ဇဝ်ဖြာ။ ဆေ ဇမ် ဆီငဲ ဒီလှဝ်၊ ဘေ လုဝ် ဘူင် ပါယ် တီ တဲး န့ ဘဲန် ပီ လုဝ် ဘူင် ဂေ ဒူအီ အီဆာရေလ ဆေဆေ။ 9 ခါမုန် တီ၊ န့ ဒီ ဘဲန် ပီ ဒီ ဟူမ် အာရူန် ဂေ လှုက်လှာန် အန်။ ဂေ လုဝ် ဟူမ် ခါမုန် တီ ဒီ ဒူင် ဆီငါ ဘွတ်။ ခုဝ်၊ ခါမုန် တီ ဟဲ့ ဆီငါ ဘွတ် လွှိုမ် ပီ ဒီ ဟူမ် ပီ ပွိုန် ဂေ ဒွန် မျုဝ် အီ မုး ပီ လှူ ဂေ ဒူအီ ကိူန် ဒီ ဇဝ်ဖြာ။ န့ မုး ပီ လှူ အီ ဒုဝ့် ဒီ ငဝ်။”

10-11 အူ ဆီငဲ န့ မိုဝ်း အီမာယ် အူ ဝီ။ ဂုန့် အန် မုး ဒူအီ အဲဂိုပ်။ မာ အန် မုး ဒူအီ အီဆာရေလ၊ အီ စိူဝ် နာင် ဆေလောမိတ် အီ မုး ဂွန် အာတီပါရီ အီ မုး ခြိုဝ် အာဒါန်။ ဒူအီ ဝီ တီ ဘော ကာလုတ့် ဒီ ဒူအီ အီဆာရေလ အူ ဝီ ခဲင် ဒူင် ချ ဂေ တွိုန်။ ဒေါ လာယ် ကာအေး ဂါယ် တီ၊ အန် ဘော ခဲန့် ဘော ဒိူင် အေး ဇဝ်ဖြာ။ ဟဲ့ ဟွတ့်၊ ဂေ ဘော ဒိုဝ်း တး အန် ဒူင် ကွယ် အာမုဝ်ဆဲ။ 12 ဂေ ဘော ခြွင့် အုန် အန်၊ ဘ်ု၊ တဲး ဂေ နပ် ပီ ဆီ တဲး ဇဝ်ဖြာ ဂေ ဘူင် ဒီ အန်။

13 ဇဝ်ဖြာ ဘော ကာလာင် ဒီ အာမုဝ်ဆဲ တဝ်း၊ 14 “ဒိုဝ်း ဒူအီ တီ လေး နာ ရေတ့် ဒူင် ချ ဘေ။ တဲး ဒွန် အီ အီ ဟဲ့ ယိုဝ် ဂြုဝ်း ပီ အေး ပီ ဒိူင် အန် တွိုန် ကာဖြူမ် ဒီ ဒါင် ဒဲ ဂေ ဒဲင် ဂိန့် အန်။ ဟဲ့ ဟွတ့်၊ တဲး ဂေ ဒူအီ ဘောကာဂ့လျီတ် ဒိုဝ်း မာဝ်၊ ဝိုန့် ယမ် အန်။ 15 ဟဲ့ ဟွတ့် ပါယ် တီ တဲး မဲ ကာလာင် ဒီ ဂေ ဒူအီ အီဆာရေလ၊ ဝီ မှဝ် အီ အေး ဒိူင် ဇဝ်ဖြာ၊ အန် လုဝ် ခမ် မှာပ် အန် တီ။ 16 ဝီ မှဝ် အီ ခဲန့် ဇဝ်ဖြာ၊ ဘေ လုဝ် ငဝ်း ယမ် အန်။ ဘော မုး ဒူအီ အီဆာရေလ၊ ဘော မုး ဒူအီ အာမျုဝ် ဟဝ် အီ ကွယ် ကာတဲ ဘေ ဒူအီ အီဆာရေလ၊ ဝီ မှဝ် အီ ဆဲ့ နဲန ဇဝ်ဖြာ၊ ဘေ ဒူအီ ဘောကာဂ့လျီတ် လုဝ် ဒိုဝ်း မာဝ်၊ ဝိုန့် တဲး အန် ကော ယမ် အာခါခ်ု။

17 အာဆေ ငဝ်း အာဆာက် အီ၊ အန် မိူဝ် လုဝ် ခမ် အီ ငဝ်း အာဆာက် အန်။ 18 အာဆေ တဲး ဒုဝ် ဆတ် အီ ဟဝ် ယမ်၊ အန် မိူဝ် လုဝ် ဝီ ဝျီ့ ဒုဝ် အိမ်။ ဆေ စှိုမ် ဒုဝ် အိမ်၊ လုဝ် ဝီ ဝျီ့ ဒုဝ် အိမ်။ 19 ဆေ ဒူအီ အူ ဝီ ဘူင် တဲး အီ ဟဝ် ကာဒုး ဆဝ်၊ ဘူင် တဲး အီ ဆဝ် ပါယ် မှဝ်၊ အန် မိူဝ် လုဝ် ဝီ ခမ် ဆဝ် ပါယ် တီ။ 20 ဆေ အန် ဘူင် တဲး ကာအာင် အီ ဟဝ် ကာဘက်၊ အီ ဟဝ် လုဝ် ဝီ ဘူင် တဲး ကာအာင် အန် ကာဘက်။ ဆေ အန် ဘူင် တဲး ငါယ် အီ ဟဝ် အပ်၊ ဂေ လုဝ် ဘူင် တဲး ဘော ငါယ် အန် ဝီ အပ်။ ဆေ အန် ဘူင် တဲး ဟြာင် အီ ကာဘက်၊ ဂေ လုဝ် ဘူင် တဲး ဘော ဟြာင် အန် ဝီ ကာဘက်။ ဆေ အန် ဘူင် ဆဝ် ဒီ အီ ပါယ် မှဝ်၊ အန် မိူဝ် လုဝ် ဝီ ခမ် ပါယ် တီ။ 21 အာဆေ ငဝ်း ယမ် ဒုဝ် ဆတ် အီ ဟဝ် အူ ဒုဝ်၊ အန် လုဝ် ဝီ ဝျီ့ အူ ဒုဝ်။ အာဆေ ယီ ငဝ်း ယမ် ဒူအီ၊ အန် လုဝ် ဝီ ခမ် ဒီ ယမ်။ 22 န့ မုး ဒါရာ မီ အူ မျုဝ်။ ဘော ဘေ ဒူအီ အီဆာရေလ ဘော ဂေ ဒူအီ အာမျုဝ် ဟဝ်၊ ဘေ လုဝ် ဆုင်ဖျာတ် အာမူ ဂေ၊ ဒူပ် ဒါရာ အူ မျုဝ် တီ။ အုဝ် မုး အန် ဇဝ် အီ မုး ဇဝ်ဖြာ ပီ ကြိုပ် ဘေ။”

23 အာမုဝ်ဆဲ ကာလာင် လွင် အန် တီ ဒီ ဂေ ဒူအီ အီဆာရေလ။ ဟဲ့ ဟွတ့်၊ ဂေ ဘော ဒိုဝ်း ဒူအီ အီ ဒိူင် အေး ဇဝ်ဖြာ တွိုန်၊ တဲး အန် လေး နာ ရေတ့် ဒူင် ချ ဂေ။ ဂေ ဘော ဒိုဝ်း မာဝ် ဝိုန့် ယမ် အန်။ ပါယ် တီ ဂေ ဒူအီ အီဆာရေလ ဘူင် ဒူပ် ပီ ကာလာင် ဇဝ်ဖြာ ဒီ အာမုဝ်ဆဲ။