1 ဇဝ်ဖြာ ဝီ စ်ု အာမုဝ်ဆဲ၊ 2 တဲး အန် ဝီ ကာလာင် ဒီ ဂေ ဒူအီ အီဆာရေလ တဝ်း၊ “အုဝ် ဒမ် ဘေ၊ တဲး ဘေ ဘူင် ဘ့လွယ် ဘဲန် မျုဝ် ဘဲန် မျုဝ်။ ဒေါ ဘူင် ဘေ ဘ့လွယ် တီ၊ ဘေ လုဝ် တး ကာဇု၊ တဲး ဘေ ပွိုန် ဒီ ကြိုပ် အုဝ် ဇဝ်ဖြာ။”

3 ဇဝ်ဖြာ ဝီ တဝ်း၊ “ဘေ လုဝ် ဘူင် ဂါန် အာဒါ ဒဝ် ဆီငဲ။ မာလဲ၊ ဆီငဲ မ့ဘူ မုး ဆီငဲ ဒီလှဝ်၊ ဆီငဲ လုဝ် တး ကာဇု ဘေ၊ ကြိုပ် အုဝ်။ ဆီငဲ တီ အာဝ် ပွိုန် ဘူင် ဂါန်၊ ရန့် ဂါန်။ ဘေ လုဝ် တး ကာဇု ကာဒိုမ်၊ ကြိုပ် ဇဝ်ဖြာ။ ဆီငဲ ဒီလှဝ် တီ၊ မုး ဆီငဲ ဒေါ လှုဝ်း ဘေ ဇဝ်ဖြာ ဒီ ဒူင် ကွယ် ဘေ ဒွန် နာ ဒွန် ပ့လုဝ့်။ 4 ပါယ် တီ န့ မိုဝ်း ဘ့လွယ် ဘဲန် မျုဝ် ဘဲန် မျုဝ် ပီ လုဝ် ဘူင် ဘေ ပန် ဒီ ဇမ် အာခြာဝ် ပဲ့ ဟဲ့ ဒမ် အုန် အုဝ်။

5 ဘ့လွယ် လုဝ် လှုဝ်း ဘေ ဇဝ်ဖြာ ဒေါ ကာလုဝ်း အန် ကာင် ဘေ၊ န့ စုး မာဂျီန် လှေး၊ ဆီငဲ ဂိုဝ် ဒီ မ့ဖွုန် ဒေါ ဘာ ဒီ အပ်။ 6 ဒေါ ဇမ် ဆီငဲ ဂိုဝ် ဒီ မ့ဖန်၊ ဘေ လုဝ် စုး ဘ့လွယ် ဟူမ် ခါမုန် တူ ဟပ် ဆီနမ် ဘြး။ ခါမုန် အီ တူ ဟပ် ဆီနမ် ဘြး တီ၊ ဘေ လုဝ် ဟူမ် အာဒါ ဘူ ဆီငဲ။ 7 ဆီငဲ ဒေါ ဂုဝ် ဘ့လွယ် တီ၊ ဘေ လုဝ် ကွယ် ကာဇု ကာဒိုမ်၊ ကြိုပ် ဇဝ်ဖြာ။ အာဝ် ပွိုန် ဘူင် ဂါန် ဘေ။ 8 ဘေ လုဝ် လှူ ပီ ဒီ လှူ အီ ဒုဝ့် ဒီ ငဝ် အာဒါ ဘူ ဆီငဲ။ ဆီငဲ မ့ဘူ တီ၊ ဘေ ပီ ဝီ လုဝ် တး ကာဇု ကာဒိုမ်၊ ကြိုပ် ဇဝ်ဖြာ။ အာဝ် ပွိုန် ဘူင် ဂါန် ဘေ။”

9 ဇဝ်ဖြာ ပီ ဝီ ကာလာင် ဒီ အာမုဝ်ဆဲ ပေါ န့ ပွါ တဝ်း၊ 10 “တဲး မဲ ဝီ ကာလာင် ဒီ ဂေ ဒူအီ အီဆာရေလ၊ ပန် ဒီ တး လိုပ် ဘေ ခဲင် မိူင် ပီ ဒွါ အုဝ် ဒီ ဘေ၊ တဲး ဘေ ပက် ဆီဘယ့် ငှုဝ် ပီ ဆုဝ့် ဘေ အီ မုး ဘ့လေ ဒင်၊ ဒိုဝ်း တး အူ ဆီဘယ့် ဒွါ ဒီ ဒါ အီ လှူ ဒီ ဇဝ်ဖြာ။ 11 အန် ဒီ ဒိုဝ်း ဆီဘယ့် ငှုဝ် တီ လှူ၊ တဲး န့ ဘဲန် ပီ လှူ ဒီ ဇဝ်ဖြာ အီ မာဝတ် ဝိဝ် မာဝတ် ဝေန့်၊ တဲး ဇဝ်ဖြာ ရပ် ပီ လှူ ဘေ အီ ဟဲ့ ကာဒါင် ဘေ တီ။ ဒါ အီ လှူ ဒီ ဇဝ်ဖြာ လုဝ် လှူ ဝါယ် ဆီငဲ ဒီလှဝ်။ 12 ဆီငဲ လှူ ဘေ ဆီဘယ့် ငှုဝ် တီ၊ ဘေ လုဝ် ဒိုဝ်း ဘော ဂွန် မာဘူ အီ ညှမ် နုဝ့် အူ ဆီနမ်၊ အီ တူ မိုဝ်း ဒူင် စှေ ဒူင် နဲ၊ ဝီ လှူ ဒူပ်၊ တဲး န့ ဘဲန် ပီ လှူ ဒီ ဇဝ်ဖြာ အီ ဒုဝ့် ဒီ ငဝ်။ 13 ဘေ လုဝ် ဒိုဝ်း ဘော ကာပဲ့ ခဝ်ချုင် အာဒါ အာ အုဝ်မာ အီ မုး ကာဘက် အူယ် ဘ့လဲ။ ဘေ လုဝ် ကာဝ်ု နာမန် ဘော လှူ ဒူပ်၊ တဲး န့ ဘဲန် ပီ လှူ အီ ဒုဝ့် ဒီ ငဝ်။ ဘေ လုဝ် လှူ ဒူပ် ဘော အိုမ် မာငုန် အူ ကာပဝ်။ အုး ငှုန် ပီ လှူ တီ ဒီ ဘော လဝ့် နဝ်း ဇဝ်ဖြာ။ 14 ဆေ န့ မုး ဒီဂါဝ် ကာမာယ်၊ ဘော မုး ဒီဂါဝ် အိမ်၊ ဘော မုး ပဲ့ ဟဲ့ ခုဝ် ဘေ ဘဲန် ခါမုန်၊ ဘေ တူ ပွိုန် ဟူမ် အာတ့် လှူ ဘေ ပီ လှူ ဇိုဝ် တီ ဒီ ဇဝ်ဖြာ။ ဘေ ဘော ကွယ် ဒီ မှဝ် အာဝ် တဝ်း၊ ဘေ လုဝ် ဘူင် ဒူပ် ပါယ် တီ ဒွန် စုဝ် ဒွန် ဘာန်။

15 စုး ဆိန့် ဆီငဲ ဒီလှဝ်၊ ဝါယ် ဆီငဲ လှူ ဘေ ဆီဘယ့် ငှုဝ် ဒီ ဇဝ်ဖြာ၊ တိး တဲး န့ ကော နုဝ့် ဘူ ခါနာ တိုင်။ 16 ဒေါ ဟဲ့ နုဝ့် ဖန် ဂိုဝ် ဆီငဲ အီ ဟဲ့ ပွုန်၊ ကော ဇမ် ဆီငဲ ဝါယ် ဆီငဲ ဒီလှဝ် မ့ဘူ တီ၊ ဘေ လုဝ် လှူ ဆီဘယ့် ငှုဝ် ကာမာယ် ဒီ ဇဝ်ဖြာ။ 17 ကာင် အူ ကာင် လုဝ် ဒိုဝ်း တး ခါမုန် အာ ဘူင့်၊ လှူ ဒီ ဇဝ်ဖြာ။ တဲး န့ ဘဲန် ပီ လှူ အီ မာဝတ် ဝိဝ် မာဝတ် ဝေန့်။ ဆေ ဘေ ဘူင် ခါမုန် တီ၊ ဘေ လုဝ် ဒိုဝ်း ကာပဲ့ ခဝ်ချုင် အာဒါ အာ အုဝ်မာ အီ မုး ကာဘက် အူယ် ဘ့လဲ၊ ဟပ် ဘော ဆီနမ် ဘြး၊ ဂိုမ် ခဲင် ငဝ်၊ ဝီ လှူ ဒီ ဇဝ်ဖြာ၊ တဲး န့ ဘဲန် ပီ လှူ ဘ့လေ ဒင်။ 18 ဘေ လုဝ် ဒိုဝ်း ဂွန် မာဘူ အာလူင့် အီ ညှမ် နုဝ့် အူ ဆီနမ်၊ အီ တူ မိုဝ်း ဒူင် စှေ အာဒါ ဘူ ဒုဝ် ဘော ဂွန် မာမက် အာလူင့် အူ ဒုဝ်၊ မာပဲ အာလူင့် အာ ဒုဝ်၊ ဝီ လှူ ဒူပ် ခါမုန် တွိုန်။ ဘေ လုဝ် လှူ တဲး န့ ဘဲန် ပီ လှူ အီ ဒုဝ့် ဒီ ငဝ်၊ လုဝ် လှူ ကာဒူပ် ပီ လှူ ဒီဂါဝ် တွိုန် ဘော ပီ လှူ အိုမ် မာငုန်။ အုး ငှုန် ပီ လှူ တီ ဒီ ဘော လဝ့် နဝ်း ဇဝ်ဖြာ။ 19 ဘေ လုဝ် ဝီ ဒိုဝ်း မာပဲ အာဒါ အူ ဒုဝ်၊ ဝီ လှူ၊ တဲး န့ ဘဲန် ပီ လှူ အီ တဲး ဇဝ်ဖြာ ဂဝ်း ဝဲန် မှာပ်။ ဘေ လုဝ် ဒိုဝ်း ဘော မာဘူ ဒီတဲတ် အီ ညှမ် နုဝ့် အူ ဆီနမ် အာဒါ အာ ဒုဝ်၊ တဲး န့ ဘဲန် ပီ လှူ အီ ကွယ် ကာဇု ဟူမ် ရိုမ်။ 20 ဒါ အီ လှူ ဒီ ဇဝ်ဖြာ လုဝ် လှူ ဘော ခါမုန် တွိုန် ဒူပ် မာဘူ ဒီတဲတ် အာ ဒုဝ် တီ၊ တဲး န့ ဘဲန် ပီ လှူ အီ မာဝတ် ဝိဝ် မာဝတ် ဝေန့်။ န့ မုး ပီ ဒီ လှူ အာဒါ ဒါ အီ လှူ ဒီ ဇဝ်ဖြာ အီ ဟဲ့ ဆီငါ ဘွတ် ကာဆဝ်။ 21 ဆီငဲ ဒေါ ဘူင် ဘေ ဘ့လွယ် တီ၊ ဘေ လုဝ် တး ကာဇု ကြိုပ် ဇဝ်ဖြာ။ ဘေ တူ ပွိုန် ဘူင် ဂါန် ဘေ။ ဒါရာ နီ ဘေ လုဝ် ဘူင် ဒူပ် ဆေဆေ ဒွန် စုဝ် ဒွန် ဘာန်၊ ဒေါ ကွယ် ဘေ ဒွန် နာ ဒွန် ပ့လုဝ့်။

22 ဒေါ ဆုဝ့် ဘေ ငှုဝ် ခဲင် ဒူင် နာ ဘေ၊ ကွဲ့ ဆုဝ့် တူတ့် ဒီ ခူပ် ဒီ ကာတုဝ့် ဒူင် နာ ဘေ။ ဘေ တူ လုဝ် ဝီ ဟာဝ် ဆုဝ့် အီ ဆီ ဂိတ်၊ ဆီ ကွယ် ဝါယ် ဟဲ့ ဟွတ့် ဘေ ဆုဝ့်။ ဘေ လုဝ် အုန် ဇိုဝ် တီ အာဒါ ဂေ ဒူအီ ဂိန်၊ ဒူအီ အေတ့်။ အုဝ် မုး အန် ဇဝ် အီ မုး ဇဝ်ဖြာ ပီ ကြိုပ် ဘေ။”

23 ဇဝ်ဖြာ ပီ ဝီ စ်ု အာမုဝ်ဆဲ၊ 24 တဲး အန် ဝီ ကာလာင် ဒီ ဂေ ဒူအီ အီဆာရေလ တဝ်း၊ “ဒေါ မုး ဆီငဲ ဒေါ ဂုဝ် ခဲင် မာဂျီန် မ့ဘူ၊ ဘေ လုဝ် ဘူင် ဆီငဲ ဒီလှဝ်။ ဘေ လုဝ် တး ကာဇု ကာဒိုမ် လှုဝ်း ဇဝ်ဖြာ ဘော ဘုတ် ဝဝ် နိုင် ပဲ။ 25 ဘေ တူ ပွိုန် ဘူင် ဂါန် ဘေ၊ ယီ လုဝ် လှူ ဒီ ဇဝ်ဖြာ၊ တဲး န့ ဘဲန် ပီ လှူ အီ ဒုဝ့် ဒီ ငဝ်။”

26 ဇဝ်ဖြာ ပီ ဝီ ကာလာင် ဒီ အာမုဝ်ဆဲ ပေါ မ့ပွါ တဝ်း၊ 27 “ဆီငဲ ဂိုဝ် ခဲင် မာဂျီန် မ့ဘူ၊ န့ မုး ဆီငဲ ဝီ လာယ် ကာလဝ့် ဘေ ဒီ ဇဝ်ဖြာ။ ဘေ လုဝ် တး ကာဇု ကာဒိုမ်၊ ကြိုပ် ဇဝ်ဖြာ ဘော ယိူန် ပီ ဒီ ဟူမ်။ ဘေ ဒီ ဘော လုဝ် လှူ ဒီ ဇဝ်ဖြာ၊ တဲး န့ ဘဲန် ပီ လှူ အီ ဒုဝ့် ဒီ ငဝ်။ 28 ဆီငဲ တီ၊ ဘေ တူ ပွိုန် ဘူင် ဂါန် မာဆေ။ ခုဝ်၊ ဆီငဲ တီ မုး ဆီငဲ ဒေါ လုဝ် လှူ ဒါ အီ လှူ ဒီ ဇဝ်ဖြာ ဒါင် ဘေ၊ တဲး ဘေ ဝီ လာယ် ကာလဝ့် ဒီ ဇဝ်ဖြာ။ 29 ဆေ န့ မိုဝ်း ဒူအီ အီ တူ ယိူန် ပီ ဒီ ဟူမ် ဆီငဲ တီ၊ ကွဲ့ တဲး ဘေ မာတ် အန် မုး ဒူအီ အီဆာရေလ။ 30 ဝီ မှဝ် အီ ဘူင် ဂါန် ဆီငဲ တီ၊ အုဝ် ဇဝ်ဖြာ ဒီ ငဝ်း ယမ် အန်။ 31 ကွဲ့ ဘူင် ဂါန် မာဆေ။ အာတီ မုး ဒါရာ ပီ လုဝ် ဒူပ် ဘေ ဆေဆေ ဒွန် စုဝ် ဒွန် ဘာန်။ ဘေ ဘော ကွယ် ဒီ မှဝ်၊ ဘေ လုဝ် ဘူင် ပါယ် တီ။ 32 စုး ဘာ ဒီ အပ် ဆီငဲ န့ဒိမ်၊ ဇမ် ဘာ ဒီ အပ် ဆီငဲ ဂိုဝ် ခဲင် မာဂျီန် တီ၊ န့ မုး ဆီငဲ ဒီလှဝ်။ ဘေ လုဝ် ဒီလှဝ် ဘော ယိူန် ပီ ဒီ ဟူမ်။”

33 ဇဝ်ဖြာ ပီ ဝီ စ်ု အာမုဝ်ဆဲ၊ 34 တဲး အန် ကာလာင် ဒီ ဂေ ဒူအီ အီဆာရေလ တဝ်း၊ “ဆီငဲ ဘ့လွယ် လုဝ် ကွယ် ခဲင် ထိုပ်၊ န့ စုး မာဂျီန် မ့ဘူ၊ ဆီငဲ ဂိုဝ် ဒီ မ့ဖန် ဘော ဟာဝ် တဲး န့ ကော နုဝ့် ဘူ ဆီငဲ။ 35 ဆီငဲ ကာစုး ဘ့လွယ် တီ၊ ဘေ လုဝ် တး ကာဇု ကြိုပ် ဇဝ်ဖြာ။ အာဝ် ပွိုန် ဘူင် ဂါန် ဘေ။ 36 ကာန်ု ဘူ ဆီငဲ တီ၊ ဒွန် ဆီငဲ ဘေ လုဝ် လှူ ဒီ ဇဝ်ဖြာ၊ တဲး န့ ဘဲန် ပီ ဒီ လှူ အီ ဒုဝ့် ဒီ ငဝ်။ ဒေါ ဇမ် ဆီငဲ န့ဒါ၊ ဘေ လုဝ် ဝီ တး ကာဇု၊ ဝီ ကြိုပ် ဇဝ်ဖြာ ဘော လှူ ဒီ ဇဝ်ဖြာ၊ တဲး န့ ဘဲန် ပီ လှူ အီ ဒုဝ့် ဒီ ငဝ်။ န့ မုး ဆီငဲ ကာဒဲ့ ဘ့လွယ် တီ။ ကွဲ့ တဲး ဘေ ဘူင် ဂါန် ဘေ။

37 ဘ့လွယ် ဇိုဝ် တီ မုး ဘ့လွယ် ပီ ဒမ် ဇဝ်ဖြာ ဘေ ဘူင်။ ဘေ လုဝ် တး ကာဇု၊ ကြိုပ် ဇဝ်ဖြာ ဘော လှူ ပီ လှူ အီ ဒုဝ့် ဒီ ငဝ် ဘော ပီ လှူ ဒီဂါဝ် ဘဲန် မျုဝ် ဘဲန် မျုဝ် ဘော ပီ လှူ မျုဝ် ဟဝ် ဘဲန် မျုဝ် ဘဲန် မျုဝ် ဘော ပီ လှူ အိုမ် မာငုန်၊ တဲး န့ ဒူပ် ခဲ့ ပီ ကာလာင် အုန် ဇဝ်ဖြာ ဆီငဲ မှဝ် ဆီငဲ အန်။ 38 ပီ လုဝ် လှူ ဘေ တီ၊ ဘေ လုဝ် လှူ ဒဲင် ပီ လှူ ဘေ ဆီငဲ ဒီလှဝ် ဘော ဒဲင် ပီ လှူ ဘေ ဘဲန် မျုဝ် ဘဲန် မျုဝ် ဘော ဒဲင် ပီ ဝီ လုဝ် လှူ အီ ဆေ ဂေ ဟဲ့ ဒွါ ကာဒိက် ဆတ်ဇာ၊ ဘော ဒဲင် ပီ ဆီ လှူ ဘေ ဒွန် မျုဝ်။

39 စုး ဆိန့် မာဂျီန် မ့ဘူ၊ ဆီငဲ ဂိုဝ် ဒီ မ့ဖန် ဝါယ် ဟဲ့ ဆုဝ့် ဘေ ငှုဝ်၊ ဘော ဝါယ် ဟဲ့ ဘေတ့် ဘေ ဘ့လေ၊ တဲး ဘေ ဘူင် ဘ့လွယ် တီ ဒီ ဇဝ်ဖြာ အာဒါ ဘူ ဆီငဲ။ ဆီငဲ ဒေါ ဂုဝ် တွိုန်၊ ဘေ လုဝ် ဒီလှဝ်။ ဒေါ ဇမ် ဆီငဲ န့ဒါ၊ ဘေ ပီ ဝီ လုဝ် ကွယ် ဒီလှဝ် ပေါ အူ ဇေန့်။ 40 ဆီငဲ ဒေါ ဂုဝ် တီ၊ ဘေ လုဝ် ဒိုဝ်း တး ဘ့လေ အီ စှိတ် အီ တး ဒီ ဟေ အီ မိုဝ်း ကာပ့လုယ် ဂ့လမ်၊ ဒိုဝ်း တး ဘော ရာ ဟေ စိုက် ဘော ရာ ဟေ အီ မိုဝ်း လှာ ကိူန်၊ ဘော ရာ ဟေ အာရာပ် အီ ကွယ် ခူပ် ဘ့လဲင် အိုမ်။ ဘေ လုဝ် ဒိုဝ်း တး ဇိုဝ် တီ၊ ဘူင် ဘ့လွယ် တဲး ဘေ ခူယ် ဘော အိူပ် မျုက် ဇဝ်ဖြာ ပီ ကြိုပ် ဘေ အာဒါ ဘူ ဆီငဲ တီ။ 41 ဘေ လုဝ် ဘူင် ဘ့လွယ် တီ၊ အူ ဆီနမ် ဘူ ဆီငဲ။ န့ မုး ပဲ့ ဟဲ့ စ်ု အုဝ် ဘေ ဘူင် ဒွန် စုဝ် ဒွန် ဘာန် နာ အာတ့် ဟာဝ်။ 42 ဒေါ အန် တီ ဘေ ဒူအီ အီဆာရေလ ဘောကာဂ့လျီတ် လုဝ် ကွယ် ခဲင် ထိုပ် အာဒါ ဘူ ဆီငဲ။ 43 ဆေ ဘေ ဘူင် ပါယ် တီ ဒူအီ အာမျုဝ် ဘေ အီ ဒီ ဆိူပ် ဟာဝ် နာ အာတ့်၊ ဂေ ဒီ ဘော နပ် ဘော နုဝ် လွင် ဇဝ်ဖြာ ဟဲ့ ဒွိုမ် တဲး ဂေ ဒူအီ အီဆာရေလ ကွယ် ခဲင် ထိုပ် ဒေါ ယဲတ့် လေး အန် ဒီ ဂေ ခဲင် မိူင် အဲဂိုပ် တွိုန်။ န့ မုး အုဝ် ဇဝ်ဖြာ၊ အီ မုး ဇဝ်ဖြာ ပီ ကြိုပ် ဘေ။”

44 ဇဝ်ဖြာ ဟဲ့ ဟွတ့် ကာလာင် ဇိုဝ် တီ ဒွန် မျုဝ်၊ အာမုဝ်ဆဲ ဝီ ကာလာင် လွင် အန် တီ ဒီ ဂေ ဒူအီ အီဆာရေလ၊ တဲး ဂေ နပ် အာခြာဝ် ပီ လုဝ် ဘူင် ဂေ ဘ့လွယ် မျုဝ် မှဝ် မျုဝ် အန်။