1 ဇဝ်ဖြာ ဝီ စ်ု အာမုဝ်ဆဲ ပေါ မ့ပွါ၊ 2 တဲး အန် ဝီ ကာလာင် ဒီ အာရူန် ဂေ ဂွန် အန် တဝ်း၊ “တဲး ဘေ ရီမာတ် ပီ ဒီ လှူ ဂေ ဒူအီ အီဆာရေလ ဒီ အုဝ် အီ ဆီငါ ဘွတ်။ ဆေ ဘေ တူ ဘူင် ပါယ် တီ န့ ပီ ဘေ တူ ရီမာတ် ခဲ့ ဘွတ် အုဝ်။

3 ကာတဲ ဂေ လှုက်လှာန် မဲ အီ ဒီ ဆိူပ် တး နာ အာတ့် နီ ဟာဝ်၊ ဆေ န့ မိုဝ်း ဒူအီ အီ တူ ဆီငါ ဒူပ် ပီ ဒမ် ဒါရာ၊ ဆေ အန် တး ကာတတ် ပီ လှူ ဂေ ဒူအီ အီဆာရေလ ဒီ အုဝ် အီ ဆီငါ ဘွတ်၊ ဒူအီ ဝီ တီ အာဝ် ပွိုန် တး ဒူင် ကွယ် အုဝ် ဘော လှူ ပီ ဒီ လှူ ဒီ အုဝ် ဒေါ မှဝ်။ ပါယ် တီ ဘေ လုဝ် ဘူင် ဒူပ် ဒွန် စုဝ် ဒွန် ဘာန် နာ အာတ့် နီ ဟာဝ်။ အုဝ် မုး အန် ဇဝ် အီ မုး ဇဝ်ဖြာ။

4 ဆေ န့ မိုဝ်း ဒူအီ ခဲင် လှုက်လှာန် အာရူန် အီ ဒီ ဆိူပ် တး နာ အာတ့် နီ၊ အီ မိုဝ်း ရောဂါ ဒီ ဟုန် အန် အီ နပ် ဒီ ပြဲ၊ နပ် ဒီ ဒိုက်၊ မိုဝ်း ဘော အီ ရွတ့် ဇွိုမ် လေး ဒီ ကြုဝ် အန်၊ ဒေါ တူ ဆီငါ အန် ပါယ် တီ အန် တူ ပွိုန် ဟူမ် ပီ ဒီ ဟူမ် အီ ဆီငါ ဘွတ်။ ဆေ ဒါ အီ လှူ ဒီ ဇဝ်ဖြာ တာ ဒိုဝ် မျုဝ် တူ ဆီငါ ဘော မုး ကူပ် ဒုဝ် ယမ်၊ ဘော မုး ကူပ် အိုမ် ကြုဝ် အန် အီ လှဲ လေး၊ ဘော ဇိုဝ် တီ တဲး အန် တူ ဆီငါ။ 5 ဘော ဆေ အန် တာ ဒိုဝ် ဒုဝ် ဆတ် အီ လှန်၊ အီ မွိုန်၊ န့ တဲး အန် တူ ဆီငါ။ ဘော ဆေ အန် တာ ဒိုဝ် အီ ဟဝ် အီ တူ ဆီငါ မျုဝ် မှဝ် အာဝ် တဝ်း၊ န့ ဝီ တဲး ဘော အန် တူ ဆီငါ။ 6 ဒါ အီ လှူ ဒီ ဇဝ်ဖြာ အီ တူ ဆီငါ တီ၊ အန် တူ ဆီငါ ဇမ် ဘာ ဒီ အပ်။ အာတ့် တာ အန် အိုမ်၊ အန် တူ ပွိုန် ဟူမ် ပီ လှူ အီ ဆီငါ ဘွတ်။ 7 ဝါယ် တီ၊ ဆေ ဆီငဲ ဟီ ဂေတ့်၊ အန် ဟဲ့ ဝီ ဆီငါ။ ပါယ် တီ အန် ဟဲ့ ဝီ ပွိုန် ဟူမ် ပီ လှူ အီ ဆီငါ အီ မုး ပီ ဒီ ဟူမ် အန်။ 8 အန် တူ ပွိုန် ဟူမ် ယင် ဒုဝ် ဆတ် အီ ယမ် ရာင် အန်။ ဘော ဒုဝ် ဆတ် ပီ ကဝ့် ယမ် မာဒုဝ် ပြဲ အီ ဟာယ်၊ အာဝ် ပွိုန် ဟူမ်။ န့ ဒီ တဲး အန် တူ ဆီငါ။ အုဝ် မုး အန် ဇဝ် အီ မုး ဇဝ်ဖြာ။

9 ခဲ့ ကွယ် ဒါ အီ လှူ ဒီ ဇဝ်ဖြာ ဒွန် အီ လုဝ် ဒူပ် ဒါရာ ပီ ဒွါ အုန် အုဝ် နီ။ ဆေ ဂေ တူ ဒူပ် န့ ဒီ ဘဲန် မှာပ် ဒီ ဂေ၊ တဲး ဂေ ယမ် ကူပ် တူ ရီမာတ် ဂေ ဒါရာ အုဝ်။ အုဝ် မုး ဇဝ်ဖြာ အီ တဲး ဂေ ဆီငါ ဘွတ်။

10 န့ မိုဝ်း မီ ဂေ ဒူအီ ခဲင် န့ဟူမ် ဒါ အီ လှူ ဒီ ဇဝ်ဖြာ အီ ပွိုန် ဟူမ် ပီ လှူ အီ ဆီငါ ဘွတ်။ ဆေ န့ မုး ဒူအီ တး ကွယ် ဒူပ် ဂေ၊ ဘော မုး ဒူအီ ဇာင် ဒီ ဂေ၊ ဘော မုး ဒူအီ ဟဝ်၊ အာဝ် ပွိုန် ဟူမ် ခေါ အူ ဝီ။ 11 ဆေ န့ ယီ မုး မှာယ် ပီ စိုဝ်း ဒါ အီ လှူ ဒီ ဇဝ်ဖြာ၊ ဘော မှာယ် အီ ဂွိုတ် ခဲင် န့ဟူမ် အန်၊ ဝီ တီ ဟဲ့ ပွိုန် ဟူမ် ပီ ဟူမ် အန်။ 12 ဆေ ဂွန် အီဘိုန့် ဒါ အီ လှူ ဒီ ဇဝ်ဖြာ ခတ် ဒိုဝ်း အီမာယ် အီ တူ မုး ဒူအီ လှူ ဒီ ဇဝ်ဖြာ၊ အန် မိူဝ် တူ ပွိုန် ဟူမ် ပီ လှူ အီ ဆီငါ တီ။ 13 မာလဲ၊ ဆေ ဂွန် အီဘိုန့် တီ ဟဲ့ ဝီ ဘဲန် ယာ ဆီပြး၊ ယီ တူ မိုဝ်း ဂွန် ခေါ အူ ဝီ၊ ဆေ အန် ဝီ တး ကွယ် ဒီ ကာင် ဂုန့် အန် ပီ ဒေါ မုး အန် ဒီဘျာ၊ အီဘိုန့် တီ ဟဲ့ ပွိုန် ဝီ ဟူမ် ပီ ဟူမ် ဂုန့် အန်။ ပါယ် တီ န့ မိုဝ်း မီ ဒူအီ ခဲင် န့ဟူမ် ဒါ အီ လှူ ဒီ ဇဝ်ဖြာ အီ ပွိုန် ဟူမ် ပီ လှူ ဇိုဝ် တီ။

14 ဆေ န့ မိုဝ်း ဒူအီ အီ တး ဟူမ် ခဲင် ကာင် ဒါ အီ လှူ ဒီ ဇဝ်ဖြာ၊ ယီ တူ နပ်၊ န့ မုး ပီ လှူ အီ ဆီငါ ဘွတ်၊ အန် လုဝ် ဝီ ဝျီ့ ပီ လှူ တီ ဘော ဝီ ပွါ ဖန် ဘုန် အူ ဘုန်၊ ဒွါ ဒီ ဒါ အီ လှူ ဒီ ဇဝ်ဖြာ တွိုန်။ 15 ဒါ အီ လှူ ဒီ ဇဝ်ဖြာ ဒွန် အီ လုဝ် ရီမာတ် ပီ လှူ အီ ဆီငါ ဘွတ်၊ အီ မုး ပီ လှူ ဂေ ဒူအီ အီဆာရေလ ဒီ ဇဝ်ဖြာ။ 16 အာဝ် ပွိုန် ခ့ဝါင် အီ ဟဝ် ဟူမ်၊ တဲး န့ ဘဲန် မှာပ် ဒီ အန်၊ တဲး အန် လုဝ် ဝီ ဝျီ့ တူတ့်။ ခုဝ်၊ န့ မုး အုဝ် ဇဝ်ဖြာ အီ ဘူင် တဲး ပီ လှူ တီ ဆီငါ ဘွတ်။”

17 ဇဝ်ဖြာ ပီ ဝီ စ်ု အာမုဝ်ဆဲ ပေါ န့ ပွါ၊ 18 တဲး အန် ဝီ ကာလာင် ဒီ အာရူန် ဂေ ဂွန် အန် ဒွန် အီ ဘော ဒီ ဂေ ဒူအီ အီဆာရေလ ဘောကာဂ့လျီတ် တဝ်း၊ “ဆေ ဘေ ဆီ လှူ ဒီ ဇဝ်ဖြာ၊ ဘေ ဘော မုး ဒူအီ အီဆာရေလ၊ ဘော မုး ဒူအီ အာမျုဝ် ဟဝ် အီ ကွယ် ရိုမ် ဒူပ် ဘေ၊ ဆေ ဘေ ဆီ လှူ ပီ ဒီ လှူ အီ ဒုဝ့် ဒီ ငဝ်၊ ဘော မုး ပီ လှူ ပီ ဒွိုမ် ကာဆဲန့် ဘေ၊ ဘော မုး ပီ လှူ ပီ ဆီ လှူ ဘေ ဘဲန် မျုဝ် ဘဲန် မျုဝ်၊ ဘေ လုဝ် ဆာဒိက်။ ဒုဝ် ပီ လှူ ဘေ တီ၊ ကွဲ့ တဲး န့ မိုဝ်း ဒူင် စှေ ဒူင် နဲ။ 19 ဘေ လုဝ် ဒိုဝ်း မက် အာလူင့်၊ မာဘူ အာလူင့် ဘော မာပဲ အာလူင့် အီ ဇေ့ဇုင်၊ ဝီ လှူ၊ တဲး ဇဝ်ဖြာ ရပ် ပီ လှူ ဘေ တီ အီ ဟဲ့ ကာဒါင် ဘေ။

20 ဘေ တူ ပွိုန် ဒိုဝ်း ဒုဝ် အီ မိုဝ်း ဒူင် စှေ၊ ဝီ လှူ ဒီ ဇဝ်ဖြာ။ ခုဝ်၊ ဇဝ်ဖြာ တူ ရပ် မျုဝ် တီ၊ တဲး န့ ဘဲန် ပီ လှူ အီ ဟဲ့ ကာဒါင် ဘေ။ 21 ဆေ န့ မိုဝ်း ဒူအီ အီ ဆီ လှူ ပီ ဒီ လှူ အီ ကွယ် ကာဇု ဟူမ် ရိုမ်၊ ဆေ အန် ဆီ လှူ ဘော ပီ ဒီ လှူ ပီ ဒွိုမ် ကာဆဲန့် အန် ဘော လှူ ပီ ဆီ လှူ အန် ဘဲန် မျုဝ် ဘဲန် မျုဝ်၊ အန် လုဝ် လှူ ဒုဝ် အီ တူ မိုဝ်း ဒူင် စှေ ဒူင် နဲ၊ တဲး ဇဝ်ဖြာ ပွိုန် ရပ်။ 22 ဘေ တူ ပွိုန် ဒိုဝ်း ဒုဝ် အီ ငါယ် အပ်၊ ဒုဝ် အီ ပ့လဝ် ဂဲ့၊ ဒုဝ် အီ ဟဲ့ မိုဝ်း ဒူင် စှေ၊ ဒုဝ် အီ မိုဝ်း ဘိုပ် မိုဝ်း ဒိမ်၊ ဝီ လှူ ဒီ ဇဝ်ဖြာ။ ဒုဝ် ဇိုဝ် တီ အာဝ် ပွိုန် ဒိုဝ်း ဒေါ မှဝ်၊ ဘ့လေး ဒဲင် ကာစှူင့် လှူ အီ ဒုဝ့် ဒီ ငဝ်။ 23 ဆေ ဘေ ယီ မိုဝ်း နဝ်း ဆီ လှူ ရာင် ဘေ ဘဲန် မျုဝ် ဘဲန် မျုဝ်၊ ဘေ ပွိုန် ဒိုဝ်း မာမက် ဂေ မာဘူ အီ တူ ဇဲ့ဇုင် တီ၊ ဝီ လှူ။ မာလဲ၊ ဆေ န့ မုး ပီ ကာဆဲန့် ဘေ ဒီ လှူ၊ ဒုဝ် ဇိုဝ် တီ အာဝ် ပွိုန် လှူ။ 24 ဘော ဒုဝ် ဆတ် အီ ဟဲ့ ဟွတ့် ဆး၊ အီ ဟဲ့ ဆီနျီ့ ကာလာတ့် ဂဝ် အန် အီ ဟဲ့ အဝ်း၊ ဘေ တူ ပွိုန် ဒိုဝ်း တး လှူ ဒီ ဇဝ်ဖြာ ခေါ အူ ဒုဝ်။ ဘေ တူ ပွိုန် လှူ ဇိုဝ် တီ ခဲင် မိူင် ဘေ။ 25 ဘော ဒုဝ် ပီ ဒိုဝ်း တး ဘေ ဒီ ဒူအီ အာမျုဝ် ဟဝ် အီ မိုဝ်း ဒူင် စှေ ပါယ် တီ အာဝ် ပွိုန် လှူ တဲး န့ ဘဲန် ပီ လှူ ဒီ ဇဝ်ဖြာ အီ မုး ဇဝ်ဖြာ ပီ ကြိုပ် ဘေ။ ဒုဝ် ဂေ တီ၊ အာဝ် ပွိုန် လှူ ကူပ် ဟဲ့ ဟွတ့် လိုဝ် ဂေ။ ဇဝ်ဖြာ မိူဝ် တူ ရပ် ဂေ။”

26 ဇဝ်ဖြာ ပီ ဝီ ကာလာင် ဒီ အာမုဝ်ဆဲ ပေါ မ့ပွါ။ အန် တဝ်း၊ 27 “ဆေ မာဘူ၊ မာပဲ၊ မာမက် ဘေ မိုဝ်း ဂွန်၊ တဲး အန် ကွယ် ဒူပ် မာ အန် အာဒါ ဘူ ဆီငဲ။ ဝါယ် တီ၊ ဟဲ့ ပွိုန် ဘဲန် ပီ ဒီ လှူ ဒီ ဇဝ်ဖြာ အီ ဒုဝ့် ဒီ ငဝ်။ 28 ဘော မုး မာဘူ၊ မာမက်၊ မာပဲ၊ မျုဝ် မှဝ် အာဝ် တဝ်း၊ အာဝ် ပွိုန် ငဝ်း ဘော ဂွန် ဘော မာ အန်၊ တဲး ဂါယ် ယမ် အူ ဆီငဲ။

29 ဒေါ လှူ ဘေ ပီ ဒီ လှူ အီ ဒါင် ဂုင် ဂေဇူ ဒီ ဇဝ်ဖြာ၊ လုဝ် ဘူင် ဒူပ် ဒါရာ၊ တဲး ဇဝ်ဖြာ ရပ် ပီ လှူ ဘေ တီ အီ ဟဲ့ ကာဒါင် ဘေ။ 30 ဆီငဲ လှူ တီ၊ ဘေ လုဝ် ဟူမ် တူတ့် ပီ လှူ ဘေ တီ။ အာဝ် ပွိုန် အုန် တဲး န့ ကာလူယ် ဇမ် ပါ ခဲညှာ။ အုဝ် မုး အန် ဇဝ် အီ မုး ဇဝ်ဖြာ။

31 တဲး ဘေ ဘူင် ဒူပ် ဒါရာ အုဝ် ဒွန် မျုဝ်။ အုဝ် မုး အန် ဇဝ် အီ မုး ဇဝ်ဖြာ။ 32 ဘေ ကွဲ့ ဘူင် မာဆေ အီ တူ ရီမာတ် ခဲ့ ဘွတ် အုဝ်။ ခဲ့ ကွယ် ဒူအီ အီဆာရေလ ဘောကာဂ့လျီတ်၊ ဂေ လုဝ် လှုဝ်း ဆေဆေ ခဲ့ ဘွတ် အုဝ်။ 33 အုဝ် မုး ဇဝ်ဖြာ အီ ဘူင် တဲး ဘေ ဆီငါ ဘွတ်။ အုဝ် မိူဝ် ဟဲ့ ဒိုဝ်း လေး ဘေ ခဲင် မိူင် အဲဂိုပ်၊ တဲး အုဝ် ပွိုန် ဒီ ဘဲန် ဇဝ်ဖြာ ပီ ကြိုပ် ဘေ။ န့ မုး အုဝ် အီ အိုပ် ဘေ။”