1 ဇဝ်ဖြာ ဝီ စ်ု အာမုဝ်ဆဲ၊ တဲး အန် ဝီ ကာလာင် ပေါ န့ ပွါ ဒီ ဂွန် အာရူန် ဂေ အီ မုး ဒါ အီ လှူ ဒီ ဇဝ်ဖြာ တွိုန်၊ တဲး အန် တဝ်း၊ “ဒါ အီ လှူ ဒီ ဇဝ်ဖြာ ဝီ မှဝ် အာဝ် တဝ်း၊ အာဝ် ပွိုန် တဲး ဒုဝ် အန် ကာဒါတ့် ဒူပ် ပီ ခြဲ ဒါရာ။ အာဝ် ပွိုန် တာ ဒိုဝ် ဒူအီ ယမ် အီ မုး အာမျုဝ် အန်။ 2 ဆေ န့ ယီ မုး ဝေါဝဲ ကာချြီ့ အန်၊ ဘော မုး ဂုန့် မာ အန်၊ ဘော မုး ဂွန် အီမာယ် ဂွန် အီဘိုန့် အန်၊ ဘော မုး အီကတ် ဝါ ဂွန် အီမာယ် 3 ဘော အီကတ် ဝါ အီ မုး ဂွန် အီဘိုန့် အီ ဆီ မုး ဒီဘျာ၊ အီ ဆီ ဘိုင် အန် ကူပ် တူ မိုဝ်း အန် အီမာယ်၊ န့ မုး မီ ဒူအီ ဇိုဝ် တီ၊ ဆေ အူ ဝီ ဘော ယမ်၊ ဒါ အီ လှူ ဒီ ဇဝ်ဖြာ ဟဲ့ ပွိုန် တဲး ဒုဝ် အန် ကာဒါတ့် ကူပ် တာ ဒိုဝ် အန် ဝီ တီ။ 4 ဆေ ဒူအီ ယမ် မုး ဘီနွင် ဘ့လာက် အီဘိုန့် အန်၊ အာဝ် ပွိုန် ဒိုဝ် တဲး ဒုဝ် အန် ကာဒါတ့်။

5 ဒါ အီ လှူ ဒီ ဇဝ်ဖြာ တူ ပွိုန် ဂါ့ ဂိန့်၊ ဂါ့ ဒီမုဝ်း ဒီ ကုင်ကာပ် ဂေ။ အာဝ် ပွိုန် ဆွာ့ ဟုန်၊ ဆွာ့ ယင် ဂေ အီ ဘျ ပီ ပါယ် ဂေ ဒီ က့လိုဝ် ဒီ ငှဝ် ကူပ် ဟဲ့ ယမ် ဒူအီ တီ။ 6 ဂေ လုဝ် ဘူင် တဲး ဒုဝ် ဂေ ဆီငါ အာဒါ ဇဝ်ဖြာ ပီ ကြိုပ် ဂေ။ အာဝ် ပွိုန် ဘူင် ပီ ဂေ အီ တူ ရီမာတ် ခဲ့ ဘွတ် ဇဝ်ဖြာ။ ခုဝ်၊ ဂေ လုဝ် လှူ ပီ လှူ အီ ဒုဝ့် ဒီ ငဝ် ဒီ ဇဝ်ဖြာ။ ဂေ လုဝ် ယွတ် ဒုဝ် ဂေ၊ တဲး န့ ဆီငါ ဆေဆေ။

7 ဂေ တူ ပွိုန် ခတ် ဒိုဝ်း အီဘိုန့် အီ ဟဲ့ ဒွိုမ် ဘဲန် ယာ မာလမ်။ ဂေ တူ ပွိုန် ခတ် ဒိုဝ်း အီဘိုန့် အီ ဟဲ့ ဒွိုမ် ဝဲန် အီမာယ်။ ခုဝ်၊ ဂေ မုး ဒါ အီ လှူ ဒီ ဇဝ်ဖြာ အီ ဆီငါ ဘွတ် အာဒါ ဇဝ်ဖြာ ပီ ကြိုပ် ဂေ။ 8 ဘေ ဒူအီ ဘောကာဂ့လျီတ် လုဝ် ရုဝ်ဆေ ဒါ အီ လှူ ဒီ ဇဝ်ဖြာ။ အန် မုး ဒူအီ အီ ဆီငါ ဘွတ် ကူပ် လှူ အန် ပီ ဒီ ဟူမ် ဒီ ဇဝ်ဖြာ ပီ ကြိုပ် ဘေ။ ဘေ လုဝ် မာတ် ဂေ မုး ဒူအီ အီ ဆီငါ ဘွတ်။ ခုဝ်၊ ဘော အုဝ် ဟဲ့ မုး ဇဝ်ဖြာ အီ ဆီငါ ဘွတ်။ အုဝ် မိူဝ် ဘူင် တဲး ဘော ဂေ ဆီငါ ဘွတ်။

9 ဆေ ဂွန် အီဘိုန့် ဒါ အီ လှူ ဒီ ဇဝ်ဖြာ ဘဲန် ယာ မာလမ်၊ အန် ဟဲ့ ဖျာက် ဆာရေ ဂုန့် အန်။ ဘေ လုဝ် ငဝ်း ယမ် အန်၊ ဝီ ဒုဝ့် ခဲင် ငဝ်။

10 အီ မုး ဒါ တာင် ဒါ အီ လှူ ဒီ ဇဝ်ဖြာ ဝီ ပဲ့ ဟဲ့ ရဝ်း ဂေ ခဲင် ဘီနွင် အန်၊ ဝီ ပဲ့ ဟဲ့ ဖဝ်း ဂေ နာမန် ဒီ ဂိန့် အန်၊ ဝီ အီ ဟဲ့ ပွိုန် စှိုပ် ခြိုင် ဒါ တာင် အီ လှူ ဒီ ဇဝ်ဖြာ၊ အန် တူ ပွိုန် တဲး ဟိုက် ဂိန့် အန် ကာဝှ်ု။ အာဝ် ပွိုန် ကာယာတ့် ခြိုင် အန် ဘော ဘျ နဝ်း က့လိုဝ် နဝ်း ငှဝ် အန် ကူပ် ဒူအီ ယမ်။ 11 အန် တူ ပွိုန် ဟာဝ် ဒူင် ကွယ် ဒူအီ ယမ်။ ပီ ဘော ဟဲ့ မုး ဂုန့် မာ အန် မိူဝ်၊ အန် တူ ပွိုန် တဲး ဒုဝ် အန် ကာဒါတ့် ကူပ် ဟဲ့ ယမ် ဒူအီ တီ။ 12 ခုဝ်၊ ဒါ တာင် ဒါ အီ လှူ ဒီ ဇဝ်ဖြာ၊ အန် ဟဲ့ ဟွတ့် အာပ် ဒုဝ် အန် ဒီ ဇဝ်ဖြာ ဒေါ ခမ် အန် ဒီ ဖဝ်း နာမန် ဇဝ်ဖြာ ဒီ ဂိန့် အန်။ အန် တူ ပွိုန် လေး နာ ရေတ့် ဒူင် ဆီငါ ဘွတ်၊ ဝီ ဟာဝ် ဒူင် ကွယ် ဒူအီ ယမ်၊ ဘူင် တဲး ဒူင် ဆီငါ ဘွတ် ဝီ ကာဒါတ့်။ အုဝ် မုး အန် ဇဝ် အီ မုး ဇဝ်ဖြာ။

13 အန် လုဝ် ဒိုဝ်း မီ ဒီဘျာ ဇဲတ်၊ ဘဲန် အီဘိုန့် အန်။ 14 အန် တူ ပွိုန် ခတ် ဒိုဝ်း ယာ မာလမ် ဂေ ယာ ဆီပြး၊ ဘော မုး ယာ ဆီပြး အိမ်၊ ဘော မုး ယာ ဆီပြး ယမ်။ အန် လုဝ် ဒိုဝ်း မီ အီ မုး ဒီဘျာ ဇဲတ်၊ အီ မုး ဒူအီ အာမျုဝ် အန်။ 15 ဆေ အာဝ် ပါယ် တီ ဂွန် အန် အီ ဟဲ့ ကာအာပ် ဘဲန် ဒူအီ အီ ဆီငါ တွိုန်၊ ဂေ ဒီ ဝီ ဘဲန် အီ တူ ဆီငါ။ န့ ယီ မုး အုဝ်၊ အုဝ် မုး အန် ဇဝ် အီ ဟဲ့ ဒါင် တဲး အန် ဘဲန် ဒါ အီ ဆီငါ ဘွတ်။”

16 ဇဝ်ဖြာ ပီ ဝီ စ်ု အာမုဝ်ဆဲ ပေါ န့ ပွါ၊ 17 တဲး အန် ဝီ ကာလာင် ဒီ အာရူန် တဝ်း၊ “လှုက်လှာန် မဲ၊ ဒူအီ အီ ဒီ ဆိူပ် ဟာဝ် နာ အာတ့် နီ ဒွန် စုဝ် ဒွန် ဘာန်၊ ဆေ န့ မိုဝ်း ဒူအီ အီ မိုဝ်း ဒူင် စှေ၊ အန် တူ ပွိုန် လှူ ပီ ဒီ ဟူမ် ဒီ အုဝ်။ 18 ဝီ အီ မိုဝ်း ဒူင် စှေ ဇိုဝ် တီ၊ န့ ဘော မုး ငါယ် အပ်၊ ပ့လဝ် ဂဲ့၊ အာရိုပ် တူ ဇေ့ဇုင်၊ 19 ပ့လဝ် ဂုဝ့်၊ ဒဲ ဂုဝ့်၊ 20 ကာတု ဂုး၊ ဒုဝ် အဲက်၊ ငါယ် ပြး၊ မိုဝ်း ဒိမ် အီ မိုဝ်း အိုမ် ကာတိုမ်၊ ဘော ဒူအီ အီ တူ မိုဝ်း ဂဝ် ဆီချာ၊ အာဆေ မိုဝ်း ဒူင် စှေ ဇိုဝ် တီ ဒွန် အီ အာဝ် ပွိုန် လှူ ဒီ အုဝ်။ 21 ဆေ န့ မိုဝ်း လှုက်လှာန် အာရူန် အီ မုး ဒါ အီ လှူ ဒီ ဇဝ်ဖြာ၊ ဆေ အန် မိုဝ်း ဒူင် စှေ ဇိုဝ် တီ၊ အာဝ် ပွိုန် လှူ ပီ လှူ အီ ဒုဝ့် ဒီ ငဝ် ဒီ အုဝ်။ 22 ဝီ အီ မိုဝ်း ဒူင် စှေ ပါယ် တီ အန် ဒီ ပွိုန် ဒီ ဟူမ် ပီ ဒီ ဟူမ် ပီ လှူ အီ ဒီ အုဝ် အီ ဟဲ့ ဘွတ် ကာဆဝ် ဘော ပီ လှူ အီ ဆီငါ ဘွတ် တွိုန်။ 23 မာလဲ၊ ကူပ် မိုဝ်း အန် ဒူင် စှေ တီ၊ အန် တူ ပွိုန် တး ချြီ့ ဘိက် ဂွင့် အီ ဆီငါ ဘွတ်။ အန် တူ ပွိုန် တး ကာတတ် ကာစှူင့် လှူ၊ ကွဲ့ တဲး ကြုဝ် အီ ဆီငါ ဘွတ် ဂေ တီ ဝီ ကာဒါတ့်။ အုဝ် မုး အန် ဇဝ်၊ အုဝ် ဟဲ့ တဲး ဇိုဝ် တီ ဘဲန် မျုဝ် အီ ဆီငါ ဘွတ်။” 24 ဇဝ်ဖြာ ဟဲ့ ဟွတ့် ကာလာင် ဂြုဝ်း တီ ဒွန် မျုဝ်၊ အာမုဝ်ဆဲ ဘော ဝီ ကာလာင် ဒီ အာရူန် ဂေ ဂွန် အန် ဘော ဒီ ဂေ ဒူအီ အီဆာရေလ ဘောကာဂ့လျီတ်။