1 ဇဝ်ဖြာ ဝီ စ်ု အာမုဝ်ဆဲ၊ 2 တဲး အန် ဝီ ကာလာင် ဒီ ဂေ ဒူအီ အီဆာရေလ တဝ်း၊ “ဆေ န့ မိုဝ်း ဒူအီ အီ ဒိုဝ်း ဂွန် အန်၊ လှူ ဒီ ဇဝ် မူလွက့်၊ ဘော မုး ဒူအီ အာမျုဝ် ဘေ၊ ဘော မုး ဒူအီ အာမျုဝ် ဟဝ်၊ အာဆေ ဘူင် ပါယ် တီ အန် လုဝ် ခမ် ဒီ ယမ် အာခ်ု မှာန်။ ဖိုင် ဂေ ဒူအီ ကိူန် လုဝ် ကာဖြူမ် ဒီ ဒိုဝ်း မာဝ်၊ ဝိုန့် အန်။ 3 အာဆေ ဘူင် ပါယ် တီ န့ ပီ အန် ဘူင် တဲး ထိုပ် ဘိက် ဘွတ် ကာဒါတ့်။ န့ ဘော ပီ အန် တူ ရီမာတ် ခဲ့ ဘွတ် အုဝ်။ အုဝ် မိူဝ် တူ ယွတ် အန်၊ တူ မာတ် အန် မုး ဒူအီ အာမျုဝ် အီဆာရေလ။ 4 ဆေ ဖိုင် ဂေ ဒူအီ ကိူန် တူ ညိုင်ရာင် ယိုဝ် လွင် ပဲ့ ဟဲ့ ဘူင် အန် တီ၊ တူ တဲး အန် ယမ်၊ 5 အုဝ် ယီ ဒီ ဝဲန် ဒူအီ တီ၊ တူ ယွတ် ဘော အန် ဘော ဒူအီ ခဲင် န့ဟူမ် အန် ဘောကာဂ့လျီတ် ဘော ဂေ အီ ဘူင် ဒူပ် အန်၊ အီ တူ ဒူပ် အုဝ်၊ အီ ကြိုပ် ဇဝ် မူလွက့် တီ။ အုဝ် မိူဝ် တူ မာတ် ဂေ မုး ဒူအီ အာမျုဝ် အီဆာရေလ။ ခုဝ်၊ ဒေါ ဘူင် ဂေ ပါယ် တီ ဂေ ဟဲ့ ဝဲန် အုဝ် ပီ အီဘိုန့် ဝဲန် အီမာယ် အန်၊ ဝီ ဘဲန် ယာ မာလမ်။

6 ဆေ န့ မိုဝ်း ဒူအီ အီ ဟာဝ် ဒီမွှတ် ယာ ပြေ ဘော ဘိုင် ဒါ ဘူ မိူင်၊ ဘော အာတီ ဟဲ့ ပီ အီဘိုန့် ဝဲန် အီမာယ် အန်၊ ဝီ ဘဲန် ယာ မာလမ်။ အုဝ် မိူဝ် တူ ယွတ် အန်၊ တူ မာတ် အန် မုး ဒူအီ အာမျုဝ် အီဆာရေလ။

7 တဲး ဘေ ဒူပ် ဆီချာ ဂြုဝ်း အုဝ်၊ တဲး ဘေ ဆီငါ ဘွတ်။ ခုဝ်၊ အုဝ် မုး အန် ဇဝ် အီ မုး ဇဝ်ဖြာ ပီ ကြိုပ် ဘေ။

8 တဲး ဘေ ဘူင် ဒူပ် ဆီချာ ဒါရာ အုဝ် နီ။ ခုဝ်၊ န့ မုး အုဝ် ဇဝ်ဖြာ အီ တဲး ဘေ ဆီငါ ဘွတ်။

9 အာဆေ ဒိူင် ဂုန့် မာ အန်၊ အန် လုဝ် ခမ် ဒီ ယမ်၊ တဲး အန် ခမ် မှာပ် အန်။

10 အာဆေ ဝီ ဒိုဝ်း ဝီ လာယ် အီဘိုန့် အီ အီ မုး ဒူအီ အီဆာရေလ နင်ဂန်၊ ဘေ လုဝ် ဒိုဝ်း ဘော အန် ဘော အီဘိုန့် တီ တဲး ဂါယ် ယမ်။

11 အာဆေ ဝီ ဒိုဝ်း ဝီ လာယ် အီဘိုန့် ဂုန့် အန်၊ ဘူင် တဲး ဂုန့် အန် စှိုမ် ဆာရေ၊ ဘေ လုဝ် ဒိုဝ်း ဘော အန် ဘော အီဘိုန့် တီ၊ တဲး ဂါယ် ယမ်၊ တဲး ဂါယ် ခမ် မှာပ် ဂါယ်။

12 အာဆေ ဝီ ဒိုဝ်း ဝီ လာယ် အဝ် အန်၊ ဘေ လုဝ် ငဝ်း ယမ် ဂါယ် ဘော အာ ဝီ အာခ်ု မှာန်။ ခုဝ်၊ ပဲ့ ဟဲ့ ဘူင် ဂါယ် တူ ဒူပ် ပီ ကာအာပ် ဒူပ် ဒူအီ။ န့ တဲး ဂါယ် လုဝ် ခမ် မှာပ် ဂါယ်။

13 ဆေ အီမာယ် နင်ဂန် ဝီ လာယ် လုတ့် လာယ် လာယ်၊ ဟဲ့ မွှိုမ် ကာအိး ကာဆဝ် ပီ ဘူင် ဂါယ်။ ဘေ လုဝ် ငဝ်း ယမ် ဂါယ် ဘော အာ ဝီ၊ တဲး ဂါယ် ခမ် မှာပ် ဂါယ်။

14 အာဆေ ဒိုဝ်း ဘော ဂွန် ဘော မာ၊ တဲး ဂါယ် ဘဲန် အီဘိုန့် အန်၊ အန် ဘူင် အီ မိူက် ကာဆဝ်။ ဘေ လုဝ် ဒုဝ့် ယမ် ဂေ ခဲင် ငဝ် ဘော အူယ် ဝီ။ မျုဝ် အီ မိူက် တီ၊ ကွဲ့ တဲး န့ မိုဝ်း ကာတဲ ဘေ။

15 ဆေ အီမာယ် လာယ် ဒုဝ် ဆတ်၊ ဘေ ဒီ လုဝ် ငဝ်း ယမ် ဘော အန် ဘော ဒုဝ် ဆတ် တီ။

16 ဆေ အီဘိုန့် လာယ် ဒုဝ် ဆတ်၊ ဘေ လုဝ် ငဝ်း ယမ် အီဘိုန့် တီ ဘော ဒုဝ် ဆတ် တီ။ ဂါယ် လုဝ် ခမ် မှာပ် ဂါယ် တီ။

17 ဆေ ဒူအီ အူ ဝီ ဝီ ဒိုဝ်း အူကတ် အူဝါ အန်၊ ဘော မုး အီကတ် အာရာင် အန် ဘော ဝါ အာရာင် အန်၊ ဘော မုး အီကတ် ဆိူပ်၊ ဝါ ဆိူပ် အန်၊ ဆေ အန် ဝီ ဒိုဝ်း ဝီ တီ ဘဲန် အီဘိုန့် အန်၊ န့ တဲး ဂါယ် စှိုမ် ဆာရေ။ ဘေ လုဝ် ပဲ ဝဲန် ဂါယ်၊ တဲး ဒွန် အီ ယိုဝ် လွင် အန် တီ။ ကူပ် ဟဲ့ ဝီ လာယ် အန် အူကတ် အူဝါ အာရာင် အန်၊ အန် လုဝ် ဝီ ခမ် မှာပ် အန် တီ။

18 ဆေ အီမာယ် အိတ် ဒူပ် အီဘိုန့် ဒေါ မိုဝ်း အန် ခြိုင် ကာပ့လု၊ ဘေ လုဝ် ပဲ ဝဲန် ဂါယ်၊ ကွဲ့ ဟူ မာတ် ဂါယ် မုး ဒူအီ အာမျုဝ် ဘေ။

19 ဆေ န့ မိုဝ်း အီ ဝီ ဒိုဝ်း ဝီ လာယ် ဂိုန့် အန်၊ မာအာန် အန် ဘော မာတဲ့ အန်၊ န့ ဟဲ့ ပီ အန် လုတ့် ရဝ်။ အန် ဟဲ့ ဝီ လုတ့် ဘီနွင် ကာချြီ့ အန်။ ဘော အီဘိုန့် ဘော အီမာယ် တီ လုဝ် ခမ် မှာပ် ဂါယ်။

20 အာဆေ ဝီ ဒိုဝ်း ဝီ လာယ် အီဘိုန့် အီကတ် ဂုန့် အန် ဘော အီဘိုန့် ဝါ ဂုန့် အန်၊ အီဘိုန့် အီကတ် မာ အန် ဘော အီဘိုန့် ဝါ မာ အန်၊ အန် ဘူင် တဲး ဂုန့် တဲ့၊ ဂုန့် အာန် အန် ဘော ဘိုဝ် အန် စှိုမ် ဆာရေ။ ဂါယ် ဘော အာ ဝီ လုဝ် ခမ် မှာပ် ဂါယ်။ ဘော စုဝ် ဂါယ်၊ ဂါယ် အာဝ် ဟူ နပ် ဒီ မိုဝ်း ဂွန်။

21 အာဆေ ဝီ ဒိုဝ်း ဝီ လာယ် အီဘိုန့် အီကတ် အန်၊ ဘော အီဘိုန့် ဝါ အန်၊ တဲး န့ ဝီ ဘဲန် အီဘိုန့် အန်၊ အန် ဘူင် အီ မွှိုမ် ကာအိး။ အန် ဟဲ့ ဘူင် တဲး အူကတ် အူဝါ အန် စှိုမ် ဆာရေ။ ခုဝ်၊ ဂါယ် တူ ပွိုန် ဒီ ဟျီင် ဂွန် ဒေါ မှဝ်။

22 ဘေ လုဝ် ဘူင် ဒူပ် ဒါရာ အုဝ် ဘော ထူမ် ဂြုဝ်း ပီ ကာလာင် အုဝ် ဒွန် မျုဝ်။ ဘေ ဟီ ဇမ် ခဲင် မိူင် ကာနန့် အီ မုး မိူင် ဒူင် ဒီ ယဲတ့် အုဝ် ဘေ ဟာဝ် ကွယ်၊ ကွဲ့ တဲး န့ ပီ မိူင် တီ လုဝ် ဟိုဝ် ဝဲန် ဘေ။ 23 ဘေ တူ ပွိုန် ဒူပ် ဟိတ် ဂေ ဒူအီ အာမျုဝ် ဟဝ် ပီ ဒီ ညွန် တဝ် အုဝ် ဒီ အာတ့် ဘေ။ ကူပ် ဘူင် ဂေ အီ မွှိုမ် ကာအိး ဇိုဝ် တီ ဒွန် မျုဝ်၊ အုဝ် ဟဲ့ ကာအိး ကာဆဝ် ဂေ။ 24 အုဝ် ဟဲ့ ဒွိုမ် ဒွါ ကာဒိက် ဆတ်ဇာ တဝ်း၊ အုဝ် ဒီ တဲး ဘေ ပွိုန် ခါဂုန် အီ မုး မိူင် ဘွတ် ဘော ကာဒါယ် မွှိုမ်၊ တဲး န့ ဘော မိုဝ်း ဘော ဟေ ဘ့လေ ဒွန် မျုဝ်၊ တဲး ဘေ မိုဝ်း ပီ ဒီ လုဝ် ဘေ ဒွန် မျုဝ်။ အုဝ် ဒီ တဲး န့ ဘဲန် မိူင် ပီ အိုပ် ဘေ။ အုဝ် ဘော မုး အန် ဇဝ် အီ မုး ဇဝ်ဖြာ ပီ ကြိုပ် ဘေ၊ အီ ဟဲ့ ဒိုဝ်း ကာယဝ်း ဘေ ဒီ ဒူအီ အာမျုဝ် ဟဝ်။

25 ကူပ် န့ ပါယ် တီ ဘေ လုဝ် နပ် ဒီ ကာယဝ်း ဒုဝ် ဆတ်ဒါဝါ ဘေ ဘော မာဆိမ်၊ မျုဝ် မှဝ် အီ ဆီငါ ဘွတ်၊ မျုဝ် မှဝ် တူ ဆီငါ ဘွတ်။ ဘေ တူ ပွိုန် ဟူမ် ယင် ဆတ်ဒါဝါ ဘော ယင် မာဆိမ် ဂေ ဒုဝ် အီ မွိုန် ဟာဝ် ဒီ ကာဒါယ် အီ တူ ဆီငါ၊ ကွဲ့ တဲး ဘော ဘေ ဝီ ဘဲန် အီ တူ ဆီငါ ဘွတ်။ ခုဝ်၊ အုဝ် ဟဲ့ ဟွတ့် တဝ်း၊ ဒုဝ် ဂေ တီ မုး မျုဝ် တူ မွှိုမ်။ 26 ဘေ လုဝ် တဲး ဒုဝ် ဘေ ဆီငါ ဘွတ် အာဒါ အုဝ်။ ခုဝ်၊ အုဝ် အီ မုး ဇဝ်ဖြာ ပီ ကြိုပ် ဘေ၊ အုဝ် ဟဲ့ ဆီငါ ဘွတ်။ အုဝ် ဟဲ့ တဲး ဘေ ကာဂဝ်း ကာယဝ်း ဒီ ဒူအီ အာမျုဝ် ဟဝ်၊ တဲး ဘေ ဘဲန် ဒူအီ အီ ဘိုင် ကြိုပ် မီ အုဝ်။

27 ဆေ န့ ယီ မိုဝ်း ယာ ပြေ ဘော ဒါ ဘူ မိူင် ကာတဲ ဘေ၊ ဘေ လုဝ် ဒိုဝ်း မာဝ်၊ ဝိုန့် ယမ် ဂေ။ အာဆေ ဘူင် ဇိုဝ် တီ၊ အန် လုဝ် ခမ် မှာပ် အန်။”