1 ဇဝ်ဖြာ ဝီ စ်ု အာမုဝ်ဆဲ၊ 2 တဲး အန် ဝီ ကာလာင် ပေါ န့ ပွါ ဒီ ဂေ ဒူအီ အီဆာရေလ ဘောကာဂ့လျီတ် တဝ်း၊ “တဲး ဘေ ဆီငါ ဘွတ်။ ခုဝ်၊ အုဝ် အီ မုး ဇဝ်ဖြာ ပီ ကြိုပ် ဘေ၊ အုဝ် ဟဲ့ ဆီငါ ဘွတ်။

3 ဘေ ဒွန် အီ လုဝ် ရုဝ်ဆေ ဂုန့် မာ ဘေ။ တဲး ဘေ ကမ် ဘော ဆီငဲ ဒီလှဝ်၊ တဲး န့ ပီ ပီ ကာလာင် အုဝ် တွိုန်။ အုဝ် မုး အန် ဇဝ် အီ မုး ဇဝ်ဖြာ ပီ ကြိုပ် ဘေ။

4 ဘေ ကွဲ့ ကြိုပ် အာရိုပ်။ ကွဲ့ ဒိုဝ်း ဟိန် ဂေ ဘွင့်၊ ဘူင် တဲး န့ ဘဲန် အာရိုပ် ပီ ဒီ ကြိုပ် ဘေ။ အုဝ် မုး အန် ဇဝ် အီ မုး ဇဝ်ဖြာ ပီ ကြိုပ် ဘေ။

5 ဆေ ဘေ လှူ ပီ ဒီ လှူ အီ လုဝ် ကွယ် ကာဇု ဟူမ် ရိုမ်၊ ဘေ လုဝ် ဘူင် ဒွန် မျုဝ် တဲး အုဝ် ပွိုန် ဒီ ရပ် ပီ လှူ တီ ဒီ ဘေ။ 6 ယင် ဒုဝ် ပီ လှူ ဘေ၊ ဘေ ပွိုန် ဟူမ် ဆီငဲ လှူ ဘေ တီ ဘော ပါ ခဲညှာ။ ယင် အီ ကာလူယ် ဇမ် တ ညှာ၊ ဘေ လုဝ် ဒုဝ့် ကာဆိုမ် ခဲင် ငဝ်။ ဇိုဝ် တီ အာဝ် ဟူ ဆီငါ။ 7 ယင် ပီ ဟူမ် ဘေ တ ညှာ တီ၊ န့ ဟဲ့ မွှိုမ် ကာအိး။ အုဝ် မိူဝ် တူ ရပ် ပီ လှူ တီ။ 8 ဒူအီ အီ ဟူမ် ယင် တီ၊ အန် လုဝ် ခမ် မှာပ် အန် ကူပ် တူ ရုဝ်ဆေ အန် ပီ ဒီ လှူ ဒီ ဇဝ်ဖြာ အီ ဘွတ် ကာဆဝ်။ ဘေ လုဝ် ဘ့လေး ဝဲန် အန်၊ ကွဲ့ မာတ် အန် မုး ဒူအီ အာမျုဝ် ဘေ။

9 ဒေါ ဆုဝ့် ဘေ ငှုဝ် ခဲင် ဒူင် နာ ဘေ၊ အာဝ် လုဝ် ဆုဝ့် တူတ့် ဒီ ကာတုဝ့် ဒီ ခူပ် အန်။ အာဝ် လုဝ် ဝီ ဟာဝ် ဆုဝ့် ငှုဝ် အီ ဆီ ဂိတ် ဆီ ကွယ် တွိုန်။ 10 ဆေ ဘေ ဟဲ့ ဟွတ့် ဘေတ့် ဘ့လေ မာငုန် ဘေ၊ အာဝ် လုဝ် ဟာဝ် ဘေတ့် ပေါ အူ ဇေန့်၊ ဘေတ့် အီ ဆီ ဂိတ် ဆီ ကွယ်။ အာဝ် လုဝ် ဝီ ထွန် ဘ့လေ အီ စုဝ်း အီ ရး တွိုန်။ ဘေ လုဝ် အုန် ဘ့လေ တီ အာဒါ ဂေ ဒူအီ ဂိန်၊ ဒူအီ အေတ့် ဘော အာဒါ ဂေ ဒူအီ အာမျုဝ် ဟဝ်။ အုဝ် မုး အန် ဇဝ် အီ မုး ဇဝ်ဖြာ ပီ ကြိုပ် ဘေ။

11 ဘေ ကွဲ့ ပြာ ကြုဝ်ကြာမ် အီ။ ကွဲ့ ကာလုဝ် အီ။ ကွဲ့ ကာလာင် ဂြုဝ်း တူ မှာန်။

12 ကွဲ့ ခမ် ဒိူင် ဆေ န့ တူ မှာန်။ ကွဲ့ တဝ်း၊ ‘ဆေ ဂြုဝ်း အုဝ် တူ မှာန်၊ တဲး ဇဝ်ဖြာ ဒမ် မှာပ် ဒီ အုဝ်။’ ဆေ ဘေ ဘူင် ပါယ် တီ န့ ပီ ဘေ တူ ရီမာတ် ခဲ့ ဘွတ် အုဝ်။ အုဝ် မုး အန် ဇဝ် အီ မုး ဇဝ်ဖြာ ပီ ကြိုပ် ဘေ။

13 ဘေ ကွဲ့ ခါနှာပ် ဘော မှာပ် မှ်ု အီ ဟဝ်။ ဘေ ကွဲ့ ပီလွှက့် ဖာတ် ရိုဝ် ကြုဝ်ကြာမ် အီ။ ရုး ပီ လုဝ် ပွိုန် ဂေ ဒူအီ ဇာင် ဒီ ဘေ၊ ဘေ လုဝ် ဒွါ၊ ကွဲ့ တဲး န့ ပွုန် မှိုဝ် တီ။

14 ကွဲ့ အေး ကွဲ့ ဒိူင် ဒူအီ ဟျုဝ့် ကာအာဝ်။ ကွဲ့ ဒိုဝ်း မျုဝ် အီ ဒီ တဲး အီ ဟဝ် ကာဝှး၊ ဘ့လေး နာ အာတ့် ဒူအီ ငါယ် အပ်။ ဘေ လုဝ် ယုဝ် အုဝ်။ အုဝ် မုး အန် ဇဝ် အီ မုး ဇဝ်ဖြာ ပီ ကြိုပ် ဘေ။

15 ဆေ ဘေ ဆုင်ဖျာတ် အာမူ အီ၊ ဘေ လုဝ် ဆုင်ဖျာတ် ဒူပ် ဒါရာ ဘော ဘူင် ဆိူဝ် ဆိူဝ် မှာန် မှာန်။ ဘော မုး ဒူအီ ဂိန်၊ ဘော မုး ဒါ တာင်၊ ကွဲ့ တဲး ဘေ မိုဝ်း ဒူင် ရွက့် ဒူင် ဇွင့်။

16 ဘေ ကွဲ့ ဘဲန် ဒူအီ ဟုဝ့် ကာင် ကွာ၊ လူင် ကာင် တေတ့်၊ ကာယွင့် ဒူအီ အာမျုဝ် ဘေ။ ဆေ ဒူအီ အူ ဝီ မိုဝ်း အာမူ အီ ကာဒါန် ယမ်၊ ဆေ ဘေ နပ် ဒီ စွယ် အန်၊ တဲး ဘေ ကာလာင်။ အုဝ် မုး အန် ဇဝ် အီ မုး ဇဝ်ဖြာ။

17 ဘေ ကွဲ့ အုန် နဝ်း ဒီ အီ ဟဝ်။ ဆေ အီ ဟဝ် ဟဲ့ ဘူင် နာ တူ မွှိုမ်၊ ဘေ လုဝ် ကာလာင် ဆိူဝ် ဒီ အန်၊ ကွဲ့ တဲး ဘော ဘေ ဘာ ခဲင် မှာပ် တီ။

18 ဘေ ကွဲ့ ဝီ ဘူင် ဝျီ့ နာ တူ မွှိုမ် ဒီ အီ ဟဝ်။ ကွဲ့ အုန် နဝ်း ဒီ အန်။ ဘေ ရွက့် ဒုဝ် ဘေ ခဲ့ မှဝ်၊ တဲး ဘေ ရွက့် အီ ဟဝ် ခဲ့ တီ။ အုဝ် မုး အန် ဇဝ် အီ မုး ဇဝ်ဖြာ။

19 တဲး ဘေ ဘူင် ဒူပ် ဒါရာ အုဝ် ဒွန် မျုဝ်။ ကွဲ့ တဲး ဒုဝ် ဆတ်ဒါဝါ ဘေ အီ တူ မုး အူ မျုဝ် လာယ် ဒူပ်။ ကွဲ့ ဘြတ် ဆီမာ အီ တူ မုး အူ မျုဝ် ခဲင် မာန် ခဲင် ဒူင် နာ ဘေ။ ကွဲ့ ဒိုဝ်း ဆေန့် ဘော ဟိုက် ဒုဝ် ဆတ်၊ ဝီ ဒဝ့် ကာဝ်ု၊ တဲး န့ ဘဲန် ခြိုင် တာ ဘေ။

20 ဆေ ဒူအီ အူ ဝီ ဝီ ဒိုဝ်း ဝီ လာယ် အီဘိုန့် အီ မုး မှာယ် အီ၊ ပီ ဟဲ့ ဟွတ့် ဒီမွှတ်၊ ယီ ညှမ် ဒန် ခတ်၊ ဂါယ် ဘော အာ ဝီ လုဝ် ခမ် မှာပ် ဂါယ်။ မာလဲ၊ မှာပ် ဂါယ် ညှမ် ကာဒါန် ယမ်။ ခုဝ်၊ အီဘိုန့် တီ ညှမ် ကွယ် ထင်ဟာင်၊ အန် ဆီ မုး မှာယ် အီ။ 21 အီမာယ် ဝီ တီ ယီ လုဝ် ဒိုဝ်း မာဘူ အာလူင့် အူ ဒုဝ်၊ ဟာဝ် ဒီ ခူပ် မာလုဝ်း ထိုပ် ဘိက် ဘွတ်၊ လှူ ဒီ ဇဝ်ဖြာ၊ တဲး န့ ဘဲန် ပီ လှူ အီ ဂဝ်း ဝဲန် ပဲ့ ဟဲ့ ကာလိုပ် အီ။ 22 ဒါ အီ လှူ ဒီ ဇဝ်ဖြာ လုဝ် ဒိုဝ်း ဒုဝ် ပီ လှူ တီ၊ ဘူင် တဲး န့ ဘဲန် ပီ လှူ အီ ဂဝ်း ဝဲန် ပီ ကာလိုပ် ဒူအီ တီ၊ တဲး အန် ဝီ ကာလဝ့် ဒီ ဇဝ်ဖြာ။ ဇဝ်ဖြာ မိူဝ် ဒီ ဂဝ်း ဝဲန် မှာပ် ပဲ့ ဟဲ့ ကာလိုပ် အန်။

23 ပန် ဒီ ဟာဝ် ဇမ် ဘေ ခဲင် မိူင် ကာနန့်၊ ဆေ ဘေ ဘော ဆမ် ဟေ အီ မိုဝ်း ဘ့လေ ပီ ဒီ ဟူမ် ဘေ ဒွန် မျုဝ်၊ အာဒါ အူယ် ဆီနမ် ဘေ တူ ပွိုန် ဟူမ် ဘ့လေ တီ။ ဘေ လုဝ် မာတ် ဘ့လေ တီ ပီ ဘ့လေ တူ ဆီငါ။ 24 ဒေါ ဇမ် ဆီနမ် န့ ဖွုန်၊ ဘေ လုဝ် ဘေတ့် ဘ့လေ ဂေ တီ လှူ၊ တဲး န့ ဘဲန် ပီ လှူ အီ ဒါင် ဂုင် ဂေဇူ ဒီ ဇဝ်ဖြာ။ 25 ဟီ ဇမ် ဆီနမ် န့ ဖန်၊ ဘေ ဟဲ့ ပွိုန် ဟူမ် ဘ့လေ တီ။ ဆေ ဘေ ဘူင် ပါယ် တီ ဟေ ဘ့လေ ဂေ တီ ဒီ ဝဲ ဘ့လေ မိုက် ဘ့လေ ကိူန်။ အုဝ် မုး အန် ဇဝ် အီ မုး ဇဝ်ဖြာ ပီ ကြိုပ် ဘေ။

26 ဘေ ကွဲ့ ဟူမ် ယင် အီ ဆီ မိုဝ်း နှာမ်။ ဘေ ကွဲ့ ယွတ် ဘေဒါင်၊ ကွဲ့ ဂါဝ် ပွုန် ကာနမ် ဒေါ မှဝ်။

27 ဘေ ကွဲ့ ဂါ့ ဟိုက် ဂိန့် အီ ကွယ် ခူပ် အာဟျဝ့် ဘေ။ ဘေ ကွဲ့ ဂါ့ ဒီမုဝ်း ဒီ ကုင်ကာပ် ဘေ။

28 ဆေ ဘေ က့လိုဝ် ကူပ် ဟဲ့ ယမ် ဒူအီ အူ ဝီ၊ အာဝ် ပွိုန် ကြိး၊ အာဝ် ပွိုန် ဆွာ့ ယင် ဘေ ဂေ ဟုန် ဘေ၊ တဲး န့ ပဲ့။ အာဝ် ပွိုန် ဆမ် ဒီ ဒုဝ် ဘေ တဲး ဒီလေန် ဒီလာယ်။ အုဝ် မုး အန် ဇဝ် အီ မုး ဇဝ်ဖြာ။

29 ဘေ ကွဲ့ တဲး ဆာရေ ဂွန် ဒီဘျာ ဘေ ဖျာက်။ ကွဲ့ တဲး အန် ဘဲန် ယာ မာလမ်။ ဆေ ဟီ ဘူင် ပါယ် တီ ယုဝ် ဘော မာန် ဘော မိူင် ဒီ ဘော ဘူင် လုတ့် ဒါရာ၊ ဒူပ် ဇဝ် အာမျုဝ် ဟဝ်၊ အီ ပီ ပီ ဘူင် ယာ မာလမ်။

30 ဘေ လုဝ် ကမ် ဆီငဲ ဒီလှဝ်။ ဘေ လုဝ် ရုဝ်ဆေ ဒူင် ကြိုပ် ဘေ ဒီ အုဝ်။ အုဝ် မုး အန် ဇဝ် အီ မုး ဇဝ်ဖြာ။

31 ဘေ ကွဲ့ ဟာဝ် ဒီမွှတ် ယာ ပြေ။ ဘေ ကွဲ့ ဘိုင် ဒါ ဘူ မိူင် ဘော ဂေ အီ ဘူင် အာဒါတ်။ ဆေ ဘေ ဘူင် ဇိုဝ် တီ၊ န့ တဲး ဒုဝ် ဘေ ကာဒါတ့်။ အုဝ် မုး အန် ဇဝ် အီ မုး ဇဝ်ဖြာ ပီ ကြိုပ် ဘေ။

32 ဘေ လုဝ် ဂန်ဒုဝ် ဂေ ဒူအီ ကတ် ဒူအီ ဂဲ ဘော ရုဝ်ဆေ ဂေ။ ဘေ ဘော လုဝ် ယုဝ် ဘော ရီမာတ် ဇဝ်ဖြာ ပီ ကြိုပ် ဘေ။ န့ မုး အုဝ် အီ မုး ဇဝ်ဖြာ တီ။

33 ဆေ ဒူအီ အာမျုဝ် ဟဝ် ကွယ် ရိုမ် ဒူပ် ဘေ ခဲင် မိူင် ဘေ၊ ဘေ ကွဲ့ ခါနှာပ် ဂေ။

34 ဘေ လုဝ် ဘဲန် အူ ဂိုက် ဒီ ဂေ၊ တဲး န့ ပီ ဘေ မုး ဒူအီ အူ မျုဝ်။ တဲး ဘေ ရွက့် ဂေ၊ တဲး န့ ပီ ဘေ ရွက့် ဒုဝ် ဘြိမ် ဘေ။ တဲး ဘေ လှုဝ်း လွင် ဟဲ့ ဒွိုမ် ဘဲန် ဘေ ခဲတ့် ခဲင် မိူင် အဲဂိုပ် တွိုန်။ အုဝ် မုး အန် ဇဝ် အီ မုး ဇဝ်ဖြာ ပီ ကြိုပ် ဘေ။

35 ကွဲ့ ပုဝ်း အီ ဟဝ်။ ဘော မုး မျုဝ် ပီ ဂဝ် ဘဲန် ကာဆာန်၊ ဘော မုး ပီ ဆ ဒီ ညွယ်၊ ဘော မုး ပီ ဂဝ် ဘဲန် ဘ့လဲ၊ တဲး ဘေ ဘူင် ဆိူဝ် ဆိူဝ် မှာန် မှာန် ဆေဆေ။ 36 ဘေ လုဝ် ဂူင့် လစူ ဂေ ညွယ် အီ မှာန် အီ မွှိုမ်။ ဘော ဟပ် ဘ့လေ ဆ အီ မှာန် အီ မွှိုမ်။ ဆေ ဘေ ဂဝ် တာ ဘ့လဲ ဂေ ခွန်၊ တဲး ဘေ တာ ဘ့လဲ ဂေ ခွန် အီ မှာန် အီ မွှိုမ်။ အုဝ် မုး အန် ဇဝ် အီ မုး ဇဝ်ဖြာ ပီ ကြိုပ် ဘေ၊ အီ ဟဲ့ ယဲတ့် လေး ဘေ ခဲင် မိူင် အဲဂိုပ် တွိုန်။

37 ပါယ် တီ တဲး ဘေ ဒူပ် ဒါရာ အုဝ်၊ ဘော ခမ် တူတ့် ဂြုဝ်း ပီ ကာလာင် အုဝ် နီ။ ခုဝ်၊ အုဝ် မုး အန် ဇဝ် အီ မုး ဇဝ်ဖြာ။”