1 ဇဝ်ဖြာ ပီ ဝီ စ်ု အာမုဝ်ဆဲ၊ 2 တဲး အန် ဝီ ကာလာင် ဒီ ဂေ ဒူအီ အီဆာရေလ တဝ်း၊ “အုဝ် မုး အန် ဇဝ် အီ မုး ဇဝ်ဖြာ ပီ ကြိုပ် ဘေ။ 3 ဘေ တူ ပွိုန် ဘူင် ဒူပ် ပီ ဘူင် ဂေ ဒူအီ အဲဂိုပ် ဒူင် ပဲ့ ဟဲ့ ဒွိုမ် ကွယ် ဘေ တွိုန်။ ဘေ မိူဝ် တူ ပွိုန် ဘူင် ဒူပ် ဂေ ဒူအီ ကာနန့် အီ ကွယ် ဒူင် ဒီ ဟာဝ် တိုယ် အုဝ် ဘေ ကွယ်။ 4 တဲး ဘေ ဒူပ် ဒါရာ အုဝ်၊ ဘူင် ဒူပ် ပီ ကာလာင် အုဝ်။ အုဝ် မုး အန် ဇဝ် အီ မုး ဇဝ်ဖြာ ပီ ကြိုပ် ဘေ။ 5 တဲး ဘေ ဒူပ် ဆီချာ ဒါရာ ပီ ဒမ် အုန် အုဝ် ဒီ ဘေ နီ။ ခုဝ်၊ အာဆေ ဒူပ် ဆီချာ၊ အာဆာက် အန် တူ စှိုမ်။ အုဝ် မုး အန် ဇဝ်။

6 ကာတဲ ဘေ၊ ကွဲ့ တဲး န့ မိုဝ်း အာဆေ အီ ဝီ ဒိုဝ်း ဝီ လာယ် ဘီနွင် ဝေါဝဲ အန်။ အုဝ် မုး အန် ဇဝ်။

7 အာဝ် ပွိုန် ဘူင် တဲး ဂုန့် မဲ မွှိုမ် ဆာယ် ကူပ် ဝီ ဒိုဝ်း ဝီ လာယ် မဲ အီဘိုန့် အန် အီ မုး မာ မဲ။

8 အာဝ် ပွိုန် ဘူင် တဲး ဂုန့် မဲ မွှိုမ် ဆာယ် ကူပ် ဝီ ဒိုဝ်း ဝီ လာယ် မဲ အီဘိုန့် အန် ပေါ အူ ဝီ။

9 အာဝ် ပွိုန် ဝီ ဒိုဝ်း ဝီ လာယ် အူကတ် အူဝါ မဲ အီ မုး ဂွန် အီဘိုန့်။ အန် ဘော မုး အီကတ် ဆိူပ်၊ ဝါ ဆိူပ်၊ ဘော မုး အန် ဂွိုတ် ခဲင် ကာင်၊ ဘော မုး အန် ဂွိုတ် အီ တေတ့် အီ တ၊ အာဝ် ပွိုန် ဝီ ဒိုဝ်း ဝီ လာယ်။

10 ကွဲ့ ဝီ ဒိုဝ်း ဝီ လာယ် ဂွန် အီဘိုန့် အီ မုး လှာန် မဲ။ န့ ဒီ တဲး မဲ ဆာယ် အီ ဟဝ်။

11 ကွဲ့ ဝီ ဒိုဝ်း ဝီ လာယ် အီကတ် ဆိူပ် မဲ၊ ဝါ ဆိူပ် မဲ အီ မုး အီဘိုန့်။ ဘေ ပီ ဆ ဒီ ရိုမ် မာ၊ ဘေ ယီ ဒီ ရိုမ် ဂုန့်။ ခုဝ်၊ အန် ဟဲ့ ဘဲန် အီကတ် အာရာင် မဲ၊ ဝါ အာရာင် မဲ။

12 ကွဲ့ ဝီ ဒိုဝ်း ဝီ လာယ် ဂိုန့် မဲ။ အန် မုး ဝေါဝဲ ကာချြီ့ ဂုန့် မဲ။

13 ကွဲ့ ဝီ ဒိုဝ်း ဝီ လာယ် မာတဲ့ မဲ ဘော မာအာန် မဲ။ အန် ဘော မုး ဝေါဝဲ ကာချြီ့ မာ မဲ။

14 ကွဲ့ ဝီ ဒိုဝ်း ဝီ လာယ် မာအာန် မဲ ဂေ မာဒဝ် မဲ။ န့ ဒီ တဲး ဂုန့် အာန် ဘော ဂုန့် တဲ့ မဲ မွှိုမ် ဆာယ်။

15 ကွဲ့ ဝီ ဒိုဝ်း ဝီ လာယ် အဝ် မဲ။ အန် မုး အီဘိုန့် ဂွန် အီမာယ် မဲ။ အာဝ် ပွိုန် ဘူင် တဲး အန် မွှိုမ် ဆာယ်။

16 ကွဲ့ ဝီ ဒိုဝ်း ဝီ လာယ် အီဘိုန့် အီကတ် မဲ၊ အီဘိုန့် ဝါ မဲ။ န့ ဒီ တဲး အီကတ် မဲ ဘော ဝါ မဲ မွှိုမ် ဆာယ်။

17 ဆေ မဲ ဟဲ့ လာယ် အီဘိုန့် အူ ဝီ၊ ကွဲ့ ဝီ ဒိုဝ်း ဝီ လာယ် ဘော ဂွန် အီဘိုန့် အန်။ ဘော လှာန် အန် တီ၊ အာဝ် ပွိုန် ဝီ ဒိုဝ်း ဝီ လာယ်။ ဂေ မုး လှာန် အာရာင် ဘော ဂွန် အာရာင် အီဘိုန့် မဲ တီ။ အာဆေ ဘူင် ပါယ် တီ အန် ဟဲ့ ဟာယ် ဟဲ့ မိူက် ကာဆဝ်။

18 ဆေ အီဘိုန့် မဲ ဆီ ကွယ်၊ အာဝ် ပွိုန် ဝီ ဒိုဝ်း အီကတ် အီဘိုန့် မဲ ဘော ဝါ အီဘိုန့် မဲ၊ တဲး အန် ဝီ ဘဲန် အီဘိုန့် တျီ့ မဲ။

19 အာဝ် ပွိုန် လာယ် အီဘိုန့် ဒေါ တူ ဆီငါ အန်၊ ဒေါ မိုဝ်း အန် ခြိုင် ကာပ့လု။

20 ကွဲ့ ဝီ ဒိုဝ်း ဝီ လာယ် အီဘိုန့် အီ ဟဝ်၊ ကွဲ့ ဘူင် တဲး ဒုဝ် မဲ ကာဒါတ့်။

21 အာဝ် ပွိုန် ဒိုဝ်း ဂွန် မဲ ခေါ အူ ဝီ၊ လှူ ဒီ ဇဝ် မူလွက့်။ ခုဝ်၊ ဆေ ဘေ ဘူင် ပါယ် တီ န့ ပီ ဘေ တူ ရီမာတ် ခဲ့ ဘွတ် အုဝ်။ အုဝ် မုး ဇဝ်ဖြာ။

22 အီမာယ် နင်ဂန် အာဝ် ပွိုန် လာယ် လာယ်၊ တဲး န့ ပီ ဂေ လာယ် အီဘိုန့်။ ဇဝ်ဖြာ ဘော ဇွင့် ကာဆဝ် မျုဝ် တီ။

23 အီဘိုန့် အီမာယ် အာဝ် တဝ်း၊ အာဝ် ပွိုန် ဝိန် ဒီ လာယ် ဒုဝ် ဆတ်။ န့ တူ ဒူပ် ပီ ကာအာပ် ဘူင် အာမျုဝ် ဒူအီ။ န့ ဟဲ့ မွှိုမ် ကာအိး ကာဆဝ်။

24 အာဝ် ပွိုန် ဘူင် တဲး ဒုဝ် ဘြိမ် ဘေ ကာဒါတ့် ကူပ် ဘူင် ဘေ ဇိုဝ် တီ။ ဂေ ဒူအီ ပီ ဒီ ညွန် တဝ် အုဝ် ဒီ အာတ့် ဘေ ခဲင် မိူင် ကာနန့် တွိုန်၊ ဂေ နပ် ဒီ ဘူင် ဇိုဝ် တီ ဒွန် မျုဝ်၊ တဲး ဂေ ကာဒါတ့်။ 25 ကူပ် ဘူင် ဂေ ဇိုဝ် တီ၊ န့ တဲး ဘော မိူင် ဂေ ကာဒါတ့်။ ခုဝ်၊ အုဝ် ဟဲ့ ဒမ် မှာပ် ဒီ ဂေ၊ တဲး န့ ပီ မိူင် အာဝ် ဟူ ခမ် ဒူအီ ဇိုဝ် တီ၊ တဲး န့ ပီ အန် ဟိုဝ် ဝဲန် ဂေ။ 26 အီ မုး ဘေ၊ ဘော မုး ဒူအီ အီဆာရေလ၊ ဘော မုး ဒူအီ ဟဝ် အီ တး ကွယ် ကာတဲ ဘေ၊ ဘေ လုဝ် ဘူင် ဒူပ် ဒါရာ အုဝ်၊ ဒူပ် ဘော ဂြုဝ်း ပီ ကာလာင် အုဝ်။ အာဝ် ပွိုန် ဘူင် အီ မွှိုမ် ကာအိး ဇိုဝ် တီ ခေါ အူ မျုဝ်။ 27 ခုဝ်၊ ဂေ ဒူအီ အီ ကွယ် ဒီ အာတ့် ဘေ ခဲင် မိူင် ကာနန့် တီ၊ ဂေ ဟဲ့ ဘူင် အီ မွှိုမ် ကာအိး ဇိုဝ် တီ ဒွန် မျုဝ်၊ တဲး ဘော မိူင် ဂေ ကာဒါတ့်။

28 ဆေ ဘေ ဒီ ဘူင် ဇိုဝ် တီ ဒွန် မျုဝ်၊ ဘော ဘေ ဒီ တဲး မိူင် တီ ဝီ ကာဒါတ့်၊ တဲး ဘော ဘေ ဝီ ခမ် ပဲ့ ဟဲ့ ခမ် ဂေ၊ တဲး န့ ပီ မိူင် တီ ဒီ ဟိုဝ် ဝဲန် ဘော ဘေ။

29 အာဆေ ဘူင် အီ မွှိုမ် ကာအိး ဇိုဝ် တီ၊ ဘေ လုဝ် ဘ့လေး ဝဲန် အန်၊ ကွဲ့ တဲး ဘေ မာတ် အန် မုး ဒူအီ အာမျုဝ် ဘေ။ 30 ကူပ် န့ ပါယ် တီ တဲး ဘေ ဒူပ် ဒါရာ ပဲ့ ဟဲ့ ဒွါ အုဝ် ဒီ ဘေ။ ကွဲ့ ဘူင် အီ မွှိုမ် ကာအိး မျုဝ် ပီ ဘူင် ဂေ ဒူအီ အီ ကွယ် ခဲင် မိူင် ကာနန့် ဒီ အာတ့် ဘေ။ ကွဲ့ ဘူင် ဒူပ် ပီ ဘူင် ဂေ၊ တဲး ဒုဝ် ဘေ ကာဒါတ့် ဒူပ် ပီ ဒမ် ဒါရာ။ အုဝ် မုး အန် ဇဝ် အီ မုး ဇဝ်ဖြာ ပီ ကြိုပ် ဘေ။”