1 ဇဝ်ဖြာ ဝီ စ်ု အာမုဝ်ဆဲ၊ 2 တဲး အန် ဝီ ကာလာင် ဒီ အာရူန် ဂေ ဂွန် အီမာယ် အန် ဒွန် အီ ဘော ဒီ ဂေ ဒူအီ အီဆာရေလ ဘောကာဂ့လျီတ်။ 3 တဲး အန် တဝ်း၊ “ကာတဲ ဘေ ဒူအီ အီဆာရေလ၊ ဆေ န့ မိုဝ်း အီ ငဝ်း မာမက် ဘော မာဘူ ဂေ မာပဲ၊ ဘော မုး ခဲင် ဒူင် ချ ဘေ၊ ဘော မုး နာ ရေတ့် ဒူင် ချ ဘေ၊ 4 ဆေ အန် ယီ တူ ဒိုဝ်း တး ဒီ ဘာင် မာလုဝ်း ထိုပ် ဘိက် ဘွတ်၊ တဲး အန် ပွိုန် ဒီ လှူ ဒီ ဇဝ်ဖြာ၊ ဒူအီ ဝီ တီ ဟဲ့ ဟွတ့် လုတ့် ဒါရာ။ အန် ဟဲ့ ဘူင် တဲး နှာမ် လေး။ ဘေ လုဝ် ဝဲန် အန်၊ ကွဲ့ တဲး ဘေ မာတ် အန် မုး ဒူအီ အာမျုဝ် ဘေ။ 5 ခုဝ်၊ ဘေ ဒူအီ အီဆာရေလ ဟဲ့ ဒွိုမ် လှူ ပီ လှူ ဘေ ခဲင် ကာဂ့လ ကာဂ့လဲန့်။ ပုင် အာတိုဝ် နီ ဟာဝ်၊ ဘေ ယီ လုဝ် ဒိုဝ်း တး ဒုဝ် ပီ ဒီ လှူ ဘေ တီ ဒီ ဒါ အီ လှူ ဒီ ဇဝ်ဖြာ၊ တဲး အန် လှူ ဒီ ဇဝ်ဖြာ နာ အာတ့် ထိုပ် ဘိက် ဘွတ်၊ တဲး န့ ဘဲန် ပီ လှူ အီ ကွယ် ကာဇု ဟူမ် ရိုမ်။ 6 ဒါ အီ လှူ ဒီ ဇဝ်ဖြာ လုဝ် ဒိုဝ်း နှာမ် ဒုဝ် ဆတ် တီ၊ ခြဝ်း ဒီ ရဲင် ကာစှူင့် လှူ အီ ကွယ် ခူပ် ထိုပ် ဘိက် ဘွတ် တွိုန်။ အန် လုဝ် ဒိုဝ်း ဘျြီင် ဒုဝ် တီ၊ ဒုဝ့် ခဲင် ငဝ်၊ တဲး အုး ငှုန် အန် လဝ့် နဝ်း ဇဝ်ဖြာ။ 7 ကွဲ့ တဲး ဘေ လှူ မာဆေ ဒီ အာရိုပ် ကာနမ် ဟာယ် အီ ပီ မာပဲ ပဲ့ ဟဲ့ ကြိုပ် ဘေ။ ခုဝ်၊ ဒေါ ဘူင် ဘေ ပါယ် တီ ဘေ ဟဲ့ ဝဲန် အုဝ် ပီ အီဘိုန့် ဝဲန် အီမာယ် အန်၊ ဝီ ဘူင် ပီ ယာ မာလမ်။ ပုင် အာတိုဝ် နီ ဟာဝ် နာ အာတ့်၊ ဘေ ဒူအီ အီဆာရေလ လုဝ် ဘူင် ဒူပ် ဒါရာ တီ ဆေဆေ ဒွန် စုဝ် ဒွန် ဘာန်။

8 ဘော မုး ဒူအီ အီဆာရေလ၊ ဘော မုး ဒူအီ အာမျုဝ် ဟဝ် အီ ကွယ် ရိုမ် ဒူပ် ဘေ၊ ဆေ ဒူအီ အူ ဝီ လှူ ပီ လှူ အီ ဒုဝ့် ဒီ ငဝ် ဘော ပီ လှူ အာမျုဝ် ဟဝ်၊ ဆေ အန် လှူ ခဲင် ကာဂ့လ ကာဂ့လဲန့်၊ 9 ယီ တူ ဒိုဝ်း တး ခူပ် ဘာင် မာလုဝ်း ထိုပ် ဘိက် ဘွတ်၊ တဲး အန် ပွိုန် ဒီ လှူ ဒီ ဇဝ်ဖြာ၊ ဘေ လုဝ် ဝဲန် ဒူအီ ဝီ တီ၊ ကွဲ့ တဲး ဘေ မာတ် အန် မုး ဒူအီ အာမျုဝ် ဘေ။

10 ဘော မုး ဒူအီ အီဆာရေလ၊ ဘော မုး ဒူအီ အာမျုဝ် ဟဝ် အီ ကွယ် ရိုမ် ဒူပ် ဘေ၊ ဆေ န့ မိုဝ်း ဒူအီ အီ ဟူမ် နှာမ်၊ အုဝ် မိူဝ် တူ ယွတ် အန်။ အုဝ် ဒီ ပဲ ဝဲန် အန်၊ ကွဲ့ တဲး အန် ကွယ် ကာတဲ ဂေ ဒူအီ ပီ အိုပ် အုဝ်။ 11 ခုဝ်၊ ဆေ န့ မုး ဒုဝ် အီ အိမ်၊ အာဆာက် အန် ဘော ကွယ် ခဲင် နှာမ် အန်။ ကူပ် န့ ပါယ် တီ အုဝ် ဟဲ့ တဝ်း ဒီ ဘေ၊ တဲး ဘေ ဒိုဝ်း နှာမ် အီ ကွယ် ခဲင် ဒုဝ် ဆတ်၊ ဟုး ဒီ ကာစှူင့် လှူ၊ တဲး ဒုဝ် ဆတ် ယမ် ကာဒါင် ဘေ၊ တဲး အုဝ် ဂဝ်း ဝဲန် မှာပ် ဘေ ဒူအီ ဘောကာဂ့လျီတ်။ 12 ကူပ် န့ ပါယ် တီ အုဝ် ဒမ် ကာလာင် ဒီ ဒူအီ အီဆာရေလ ဘော ဒီ ဒူအီ အာမျုဝ် ဟဝ် အီ ကွယ် ရိုမ် ဒူပ် ဘေ၊ ဘေ တူ ပွိုန် ဟူမ် နှာမ် ဒေါ မှဝ်။

13 ဘော မုး ဒူအီ အီဆာရေလ၊ ဘော မုး ဒူအီ အာမျုဝ် ဟဝ် အီ ကွယ် ရိုမ် ဒူပ် ဘေ၊ ဆေ န့ မိုဝ်း ဒူအီ အီ ဟာဝ် လဲ ပြဲ ဘော ပွိုန် ဒီ ဘန့် မာဒုဝ် ပြဲ၊ ဘော မုး မာဆိမ်၊ ဘော မုး ခဲ့ ကွယ် မျုဝ် အီ ပွိုန် ဟူမ်၊ အန် လုဝ် ဂူင့် ဆာပင် တဲး နှာမ် အန် လေး။ ဟဲ့ ဟွတ့်၊ ဝီ ဒိုဝ်း ကာဒါယ် ပုန်။ 14 ခုဝ်၊ အာဆာက် ဘော ကွယ် ခဲင် နှာမ် ဒုဝ် ဆတ်ဒါဝါ ဒွန် မျုဝ်။ ကူပ် န့ ပါယ် တီ အုဝ် တဝ်း ဒီ ဒူအီ အီဆာရေလ ဘောကာဂ့လျီတ်၊ အာဝ် ပွိုန် ဟူမ် နှာမ်။ ဆေ န့ ယီ မိုဝ်း ဒူအီ အီ ဟူမ်၊ ဘေ လုဝ် ပဲ ဝဲန် အန်၊ ကွဲ့ ဟူ မာတ် အန် မုး ဒူအီ အာမျုဝ် ဘေ။

15 ဘော မုး ဒူအီ အီဆာရေလ၊ ဘော မုး ဒူအီ အာမျုဝ် ဟဝ် အီ ကွယ် ရိုမ် ဒူပ် ဘေ၊ ဆေ ဒူအီ အူ ဝီ ဟူမ် ယင် ဒုဝ် ဆတ် အီ ယမ် ရာင် အန်၊ ဘော မုး ပီ ကဝ့် ယမ် မာဒုဝ် ပြဲ အီ ဟာယ်၊ အန် လုဝ် ဝီ တာ အိုမ်၊ လး ခြိုင် အန်။ အန် မိူဝ် အာဝ် ဟူ ဆီငါ ဇမ် ဘာ ဒီ အပ်။ 16 ဆေ အန် ယီ တူ လး ခြိုင် အန်၊ တူ တာ အိုမ်၊ အန် လုဝ် ခမ် မှာပ် အန်။”