1 ဝါယ် ဟဲ့ ဟွတ့် ယမ် ဂွန် အီမာယ် အာရူန် အာ ဝီ ဒေါ လှူ ဂါယ် ဒီ ဇဝ်ဖြာ တွိုန်၊ ဇဝ်ဖြာ ဝီ စ်ု အာမုဝ်ဆဲ၊ 2 တဲး အန် ကာလာင် ဒီ အီကတ် အန် အီ စိူဝ် အာရူန်။ ဆေ အန် လိုပ် ဟာဝ် ခဲင် ဒူင် ဆီငါ ဘွတ် လွှိုမ် တူတ့် အီ ကွယ် ဒီ ပန် ဘိက် ဂွင့် တွိုန်၊ ကွဲ့ တဲး အန် လိုပ် ဒူပ် နဝ်း အန်၊ ယုဝ် အန် ယမ်။ တဲး အန် လိုပ် မီ ဒေါ ကာအာပ် လိုပ်။ ခုဝ်၊ အုဝ် ဒီ တး ကွယ် ခဲင် န့အု အီ ကွယ် နာ ဒဲင် ဆီဘ့လိုက် ဇီဒိူက် တွိုန် အီ မုး ဒူင် ဒီ ဘျ အုဝ် လွင် ကာဝေ အုဝ် ဒီ ဒူအီ။

3 ဆေ အန် ဒီ လိုပ်၊ အန် လုဝ် ဘူင် ဒူပ် ပီ စ်ု အုဝ် နီ။ အန် လုဝ် ဒိုဝ်း တး ဂွန် မက် အာလူင့် အီ ဘဲန် ပီ ဒီ လှူ အီ တဲး ဇဝ်ဖြာ ဂဝ်း ဝဲန် မှာပ်၊ ဘော မာဘူ အီ ဘဲန် ပီ လှူ အီ ဒုဝ့် ဒီ ငဝ်။ 4 အာတ့် လိုပ် အာရူန် ဒူင် ဆီငါ ဘွတ် လွှိုမ် တူတ့်၊ အန် လုဝ် တာ အိုမ်၊ စှိုပ် ခြိုင် ပီ တာ ဒါ အီ လှူ ဒီ ဇဝ်ဖြာ၊ အီ မုး ဆီတုဝ် ဘိက် ကာတမ် လုယ် ဘော ဆီလာ ဘိက် ကာတမ် လုယ်။ အန် ဘော လုဝ် ရိတ် ဆဲ့ ဒီ ညွယ်၊ ဘြဝ့် ဘော ကာမယ့်။ 5 ဖိုင် ဂေ ဒူအီ အီဆာရေလ လုဝ် ဒွါ မာပဲ အာလူင့် အာ ဒုဝ် ဒီ အာရူန်၊ တဲး န့ ဘဲန် ပီ လှူ အီ တဲး ဇဝ်ဖြာ ဂဝ်း ဝဲန် မှာပ်။ ဂေ လုဝ် ဒွါ ဘော မာဘူ အူ ဒုဝ် အီ ဘဲန် ပီ လှူ အီ ဒုဝ့် ဒီ ငဝ်။

6 အန် လုဝ် လှူ မာမက် အာလူင့် အူ ဒုဝ် တွိုန်၊ တဲး န့ ဘဲန် ပီ လှူ အီ တဲး ဇဝ်ဖြာ ဂဝ်း ဝဲန် မှာပ် ဒုဝ် ဘြိမ် အန်၊ တဲး ဘော အန် ဘော န့ဟူမ် အန် ဝီ ကာလဝ့် ဒီ ဇဝ်ဖြာ။ 7 ဝါယ် တီ၊ အန် လုဝ် ဝီ ဒိုဝ်း မာပဲ အာလူင့် အာ ဒုဝ် တွိုန်၊ အာပ် ဒွါ ဒီ ဇဝ်ဖြာ ဒီ အာတ့် မာလုဝ်း ထိုပ် ဘိက် ဘွတ်။ 8 ဒီ တီ အန် လုဝ် ကာတာမ် လွင် မာပဲ အာ ဒုဝ် တီ။ ဂေ လုဝ် ဒိုဝ်း မာဝ် အူ ဘူင့် အီ မှာယ် အုန် တဲး န့ တဝ်း ‘အာဒါ ဇဝ်ဖြာ။’ ဂေ လုဝ် ဒိုဝ်း မာဝ် ပေါ အူ ဘူင့် အီ တဝ်း၊ ‘အာဒါ အာစာစေလာ။’ 9 ပန် တီ အာရူန် လုဝ် ဒိုဝ်း မာပဲ အာလူင့် ပီ ကာတာမ် အန် တွိုန် အီ မုး အာဒါ ဇဝ်ဖြာ။ ဒုဝ် တီ၊ အန် လုဝ် လှူ ဒီ ဇဝ်ဖြာ၊ တဲး န့ ဘဲန် ပီ လှူ အီ တဲး ဇဝ်ဖြာ ဂဝ်း ဝဲန် မှာပ်။ 10 မာပဲ အာလူင့် ပီ ကာတာမ် အန် အီ မုး အာဒါ အာစာစေလာ တွိုန်၊ အန် လုဝ် အာပ် ဒွါ ဒီ ဇဝ်ဖြာ ဒေါ ဆီ အိမ် အန်။ ဟဲ့ ဟွတ့်၊ အန် လုဝ် ညွန် မာပဲ တီ ဘော ဘ့လေး ဟာဝ် အန် ခဲင် ပြဲ ကာဟဝ်း အီ မုး ဒူင် ကွယ် အာစာစေလာ၊ တဲး အန် ဒိုဝ်း ဟာဝ် မှာပ် ဒူအီ ဘောကာဂ့လျီတ်။

11 အာရူန် လုဝ် ဒိုဝ်း မာမက် အာလူင့်၊ တဲး န့ ဘဲန် ပီ လှူ အီ တဲး ဇဝ်ဖြာ ဂဝ်း ဝဲန် မှာပ် အန်၊ တဲး ဘော အန် ဘော န့ဟူမ် အန် ဝီ ကာလဝ့် ဒီ ဇဝ်ဖြာ။ 12 အန် လုဝ် ဒိုဝ်း ဘော ဆီလယ့် ပီ ဒုဝ့် ဆီနမ် အုး ငှုန်၊ ဒိုဝ်း ဘော ငဝ် ဒဲင် ကာစှူင့် လှူ၊ ဝီ ဟပ် ခဲင် ဆီလယ့် တီ။ အန် လုဝ် ဒိုဝ်း ဘော န့ကြိုဝ်း အုး ငှုန် အီ ဟဲ့ ကာမွတ့် ဆီချာ အာဒါ အာ ကာတူမ်၊ ဒိုဝ်း ဟာဝ် ဒူင် ဆီငါ ဘွတ် လွှိုမ် တူတ့်။ 13 ဒေါ ဇမ် အန် ဒီ အာတ့် ဇဝ်ဖြာ၊ အန် လုဝ် ဒိုဝ်း န့ကြိုဝ်း အုန် ငှုန် တီ၊ ဟပ် ဒဲင် ငဝ် အီ ကွယ် ခဲင် ဆီလယ့် တွိုန်၊ တဲး ဒက် န့ကြိုဝ်း အုး ငှုန် တီ ပ့လိုက် ဒူင် ကွယ် ဇဝ်ဖြာ ဒဲင် ဇီဒိူက် တွိုန်၊ ကွဲ့ တဲး န့ လိုဝ်း၊ ကွဲ့ တဲး အာရူန် ယမ်။ 14 အန် လုဝ် ဒိုဝ်း နှာမ် မာမက် အာလူင့် တွိုန် မင် ကာလဝ့်၊ ဝီ စိုပ် ကာနူ ပုတ့် အန်၊ ဝီ ကာထေတ့် ဒဲင် ဇီဒိူက် ဘ့လာက် နာ အာတ့် အီ မုး ဒူင် ကွယ် ဇဝ်ဖြာ၊ ပီ ဝီ ခြဝ်း ဘော ဒဲင် ကာဒါယ် ဒီ အာတ့် ဇီဒိူက် တွိုန် အာဒါ ဘူ ဇေန့်။

15 ဝါယ် တီ အန် လုဝ် ဝီ ငဝ်း မာပဲ အာဒါ ပီ ဒီ လှူ အီ တဲး ဇဝ်ဖြာ ဂဝ်း ဝဲန် မှာပ် ဂေ ဒူအီ ကိူန်။ ဟဲ့ ဟွတ့်၊ အန် လုဝ် ဝီ ဒိုဝ်း တး နှာမ် တီ ခဲင် ဒူင် အီ ဆီငါ ဘွတ် လွှိုမ် တူတ့်၊ ဝီ ခြဝ်း တဲး န့ ပီ ဒေါ ခြဝ်း အန် နှာမ် မာမက် တွိုန်။ 16 ကူပ် ဘူင် ဂေ ဒူအီ အီဆာရေလ ဘဲန် မျုဝ် ဘဲန် မျုဝ် အီ တဲး ဂေ တူ ဆီငါ ဒူပ် ပီ ဒမ် ဒါရာ၊ ဘော ကူပ် ဟဲ့ ကာဘး ဂေ ဒီ ဇဝ်ဖြာ ဘဲန် မျုဝ် ဘဲန် မျုဝ်၊ ဂေ လုဝ် ဘူင် ပါယ် တီ ဒီ ဒူင် ကွယ် ဇဝ်ဖြာ အီ ဟဲ့ ဘွတ် လွှိုမ် တူတ့် ဘော ဒီ ထိုပ် ဘိက် ဘွတ်၊ တဲး ဇဝ်ဖြာ ခမ် ဒီ ကွယ် ကာတဲ ဂေ အီ တူ ဘွတ်။ 17 စုး ဆိန့် ဒေါ လိုပ် ဟာဝ် အာရူန် ခဲင် ထိုပ် ဘိက် ဘွတ်၊ တဲး ကော ဇမ် ပန် ဒီ ဝီ လေး တး အန်၊ အာဝ် ပွိုန် မိုဝ်း အာဆေ ကွယ် ခဲင် ထိုပ် ဘိက် ဘွတ် တီ။ ဒေါ ဘူင် အန် ဘဲန် မျုဝ် ဘဲန် မျုဝ် အီ တဲး ဘော အန် ဘော န့ဟူမ် အန် ဘော ဂေ ဒူအီ အီဆာရေလ ဘောကာဂ့လျီတ် ဝီ ကာလဝ့် ဒီ ဇဝ်ဖြာ၊ အန် လုဝ် ကွယ် အန် အူ ဝီ၊ တဲး အန် ဘူင် ဟွတ့် ဒွန် မျုဝ်။

18 ဟဲ့ ဟွတ့် ပန် တီ အန် ပီ ဝီ လုဝ် လေး ဟာဝ် ဒူင် ကွယ် ကာစှူင့် လှူ အီ ကွယ် ဒီ အာတ့် ဇဝ်ဖြာ၊ တဲး အန် ပွိုန် ဒီ ဘူင် တဲး ဘော ကာစှူင့် လှူ တီ ဆီငါ။ အန် လုဝ် ဒိုဝ်း နှာမ် မာမက် ဘော နှာမ် မာပဲ တွိုန် မင် ကာလဝ့်၊ ဖဝ်း ဒီ ကာတူတ့် ဘတ့် အီ ကွယ် ဒီ ကာတုဝ့် ကာစှူင့် လှူ တွိုန် ဘော ဒွန် ဘ့လာက်။ 19 အန် ဒီ လုဝ် ဒိုဝ်း ကာနူ ပုတ့် အန် စိုပ် ခဲင် နှာမ်၊ ဝီ ကာထေတ့် ဒီ ကာစှူင့် လှူ ဘူ ဇေန့်။ ပါယ် တီ အန် ဘူင် တဲး ကာစှူင့် လှူ တီ ဝီ ဆီငါ။ ခုဝ်၊ ဂေ ဒူအီ အီဆာရေလ အီ တူ ဆီငါ ဘွတ် ဟဲ့ ဒိုဝ်း တး ပီ ဒီ လှူ ဂေ ဒဲင် ကာစှူင့် တီ။

20 အာရူန် ဟဲ့ ဟွတ့် ဘူင် ပါယ် တီ ကွဲ့ တဲး န့ မိုဝ်း မာဆေ အီ တူ ဆီငါ ခဲင် ဟူင် အီ ဆီငါ ဘွတ် လွှိုမ် တူတ့် ဘော ခဲင် ထိုပ် ဘိက် ဘွတ် ဘော ဒီ ကာစှူင့် လှူ တွိုန်။ ဝါယ် အန် တီ အန် လုဝ် ဝီ ဒိုဝ်း မာပဲ အီ ဆီ အိမ် တွိုန်၊ 21 အန် လုဝ် ဝီ ဒါင် ဒဲ အန် ဘော အာ ဘ့လာက် ဒဲင် ဂိန့် မာပဲ တီ။ ဒေါ အန် တီ အန် ဘော လုဝ် ကာလာင် ခဲ တူတ့် ခဲ့ ကွယ် မှာပ် အီ တူ မွှိုမ် ပဲ့ ဟဲ့ ဘူင် ဂေ ဒူအီ အီဆာရေလ ဒွန် မျုဝ် ဘော ပဲ့ ဟဲ့ ကာဘး ဂေ ဒီ ဇဝ်ဖြာ။ အန် လုဝ် ဘ့လေး တူတ့် မှာပ် တီ ဒဲင် ဂိန့် မာပဲ တီ။ ဟဲ့ ဟွတ့် ပါယ် တီ လုဝ် စ်ု ဒူအီ ပီ ရဝ်း ဂေ အူ ဝီ၊ တဲး အန် ဟာဝ် တိုယ် မာပဲ တီ ခဲင် ပြဲ ကာဟဝ်း ဘော ဘ့လေး အန် ဒီ တီ။ 22 ပါယ် တီ မာပဲ တီ ဒီ ဒိုဝ်း ဟာဝ် မှာပ် ဂေ ဒွန် မျုဝ် ဒူင် တူ မိုဝ်း ဒူအီ။

23 ဟဲ့ ဟွတ့် ပန် တီ အာရူန် လုဝ် ဝီ လိုပ် ခဲင် ထိုပ် ဘိက် ဘွတ် အီ မုး ဒူင် ဆီငါ တွိုန်၊ ဝီ ဘုတ် အုန် ခြိုင် ပီ တာ အန် တွိုန်။ 24 အန် လုဝ် တာ အိုမ် ခဲင် ဒူင် ဆီငါ ဘွတ်၊ ဝီ စှိုပ် ခြိုင် ဘြိမ် အန်၊ ဝီ လေး လှူ ပီ လှူ အီ ဒုဝ့် ဒီ ငဝ်၊ တဲး ဇဝ်ဖြာ ဂဝ်း ဝဲန် မှာပ် အန် ဘော မှာပ် ဂေ ဒူအီ ကိူန်။ 25 အန် လုဝ် ဒိုဝ်း ဘော ဘျြီင် ဒုဝ် ပီ လှူ အီ တဲး ဇဝ်ဖြာ ဂဝ်း ဝဲန် မှာပ်၊ ဒုဝ့် ဒဲင် ကာစှူင့် လှူ။

26 ဒူအီ အီ ဟာဝ် တိုယ် မာပဲ ခဲင် ပြဲ ကာဟဝ်း တွိုန်၊ အန် လုဝ် ဝီ လး ခြိုင် အန်၊ တာ ဘော အိုမ်။ ဟဲ့ ဟွတ့်၊ အန် ဟဲ့ ဝီ ပွိုန် လိုပ် တး ဒူင် ချ ဂေ။ 27 န့ ယီ မုး မာမက် အာလူင့် ဘော မာပဲ အာလူင့်၊ အီ မုး ဒုဝ် ပီ လှူ အီ တဲး ဇဝ်ဖြာ ဂဝ်း ဝဲန် မှာပ်။ နှာမ် ဒုဝ် တီ အာရူန် ဟဲ့ ဟွတ့် ဒိုဝ်း လိုပ် ခဲင် ဒူင် ဆီငါ ဘွတ် လွှိုမ် တူတ့်၊ တဲး အန် ဝီ ဆီငါ။ ဒုဝ် တီ လုဝ် ဒိုဝ်း လေး နာ ရေတ့် ဒူင် ချ ဂေ။ ဟုန် အန် ဘော ယင် အန် ဘော အျီင် အန်၊ လုဝ် ဒုဝ့် ဝဲန် တူတ့် ခဲင် ငဝ်။ 28 ဒူအီ ဝီ အီ ဒုဝ့် ဝဲန် ဒုဝ် တီ၊ အန် လုဝ် ဝီ တာ အိုမ်၊ လး ဘော ခြိုင် အန်။ ဟဲ့ ဟွတ့် ပါယ် တီ အန် ကော ပွိုန် ဝီ လိုပ် ခဲင် ဒူင် ချ ဂေ။

29 လွင် အန် တီ န့ မုး ဒါရာ ပီ လုဝ် ဘူင် ဒူပ် ဘေ ဆေဆေ နာ အာတ့် နီ ဟာဝ် ဒွန် စုဝ် ဒွန် ဘာန်။ ဘေ လုဝ် ဒူပ် ဆီချာ၊ ဒူပ် ခြဲန့် ဒါရာ တီ။ ဒေါ ဇမ် မာဂျီန် မ့ဘူ၊ ဆီငဲ ဂိုဝ်၊ ဘေ ဒူအီ အီဆာရေလ ဘော ဒူအီ အာမျုဝ် ဟဝ် အီ ကွယ် ရိုမ် ဒူပ် ဘေ၊ ဘေ လုဝ် ယိူန် ပီ ဒီ ဟူမ်၊ အာဝ် ပွိုန် ဘူင် မာဆေ။ 30 ခုဝ်၊ ဆီငဲ တီ ဒါ အီ လှူ ဒီ ဇဝ်ဖြာ ဒီ လှူ ဒါင် ဘေ၊ တဲး ဇဝ်ဖြာ ဂဝ်း ဝဲန် မှာပ် ဘေ၊ တဲး ဘေ ဝီ ကာလဝ့် ဒီ ဇဝ်ဖြာ။ 31 ဆီငဲ တီ မုး ဆီငဲ ဒီလှဝ်၊ တဲး ဘေ ကွယ် ဆီချာ၊ ကွယ် နှိမ် ဘော ယိူန် ပီ ဒီ ဟူမ်။ ဘေ ဘော လုဝ် ဘူင် ပါယ် တီ ဆေဆေ။ 32 ဒါ အီ လှူ ဒီ ဇဝ်ဖြာ အီ ဟဲ့ ခမ် ဒီ ဖဝ်း နာမန်၊ တဲး အန် ပ့လု ဂုန့် အန် အီ မုး ဒါ တာင် အီ လှူ ဒီ ဇဝ်ဖြာ၊ အန် လုဝ် ယဲတ့် အီ ဟဝ်၊ လှူ ဒီ ဇဝ်ဖြာ၊ တဲး ဇဝ်ဖြာ ဂဝ်း ဝဲန် မှာပ် ဘေ။ အန် လုဝ် စှိုပ် ခြိုင် ပီ စှိုပ် ဒါ အီ လှူ ဒီ ဇဝ်ဖြာ အီ မုး ခြိုင် ကာတမ် လုယ် တွိုန်။ 33 ဟဲ့ ဟွတ့်၊ အန် လုဝ် လှူ တဲး ဟူင် ဆီငါ ဘွတ် လွှိုမ် တူတ့် ဘော ထိုပ် ဘိက် ဘွတ် ဘော ကာစှူင့် လှူ ဘော ဒါ အီ လှူ ဒီ ဇဝ်ဖြာ ဒွန် အီ ဘော ဖိုင် ဂေ ဒူအီ ကိူန် ဝီ ဘဲန် အီ ဆီငါ ဘွတ် ဒူပ် ပီ ဒမ် ဒါရာ၊ တဲး ဒွန် မျုဝ် ဝီ လဝ့် နဝ်း ဇဝ်ဖြာ။

34 ဒါရာ တီ၊ ဘေ လုဝ် ဒူပ် ဆေဆေ နာ အာတ့် နီ ဟာဝ်။ အူ ဆီနမ် အူ ဇေန့် ဘေ လုဝ် ဘူင်၊ တဲး ဇဝ်ဖြာ ဂဝ်း ဝဲန် မှာပ် ဂေ ဒူအီ အီဆာရေလ ဘောကာဂ့လျီတ်၊ တဲး ဂေ ဝီ ကာလဝ့် ဒီ ဇဝ်ဖြာ။

ဇဝ်ဖြာ ဟဲ့ ဟွတ့် ကာလာင် ဇိုဝ် တီ ဒွန် မျုဝ် ဒီ အာမုဝ်ဆဲ။ အာမုဝ်ဆဲ မိူဝ် ဘူင် ဒူပ် ပီ ကာလာင် အုန် ဇဝ်ဖြာ တီ ဒီ အန်။