1 ဇဝ်ဖြာ ဝီ စ်ု အာမုဝ်ဆဲ ဂါယ် အာရူန် တဲး ဂါယ် ကာလာင် ဒီ ဂေ ဒူအီ အီဆာရေလ တဝ်း၊ 2 “ဆေ အီမာယ် မိုဝ်း အီ ရွတ့် အီ ဇွိုမ် လေး ဒီ လခါနာ အန်၊ အီ ဇွိုမ် လေး တီ တဲး ဝီ တီ တူ ဆီငါ ဘွတ် ဒူပ် ပီ ဒမ် ဒါရာ။ 3 အီ ဇွိုမ် လေး တီ၊ ဘော မုး န့ရွတ့် ဇွိုမ် လေး၊ ဘော မုး အီ န့ကင်၊ န့ တဲး ဒူအီ ဝီ တီ တူ ဆီငါ။

4 ကာစှူင့် ဒူင် ဟဲ့ ဒွိုမ် အိတ် အန်၊ ဘော ပဲ့ ဟဲ့ တုတ့် အန် ဒွန် မျုဝ် အာဝ် ဆီငါ။ 5 အာဆေ ဝီ တာ ဒိုဝ် တာ ပါ ကာစှူင့် အိတ် တီ၊ အန် လုဝ် ဝီ လး ခြိုင် အန်၊ တာ ဘော အိုမ်။ အန် မိူဝ် တူ ဆီငါ ဇမ် ဘာ ဒီ အပ်။ 6 ဆေ ဒူအီ ပေါ အူ ဝီ ဝီ တုတ့် ဒီ ဒူင် တုတ့် ဝီ တီ၊ ဘော အန် တူ ဆီငါ ဇမ် ဘာ ဒီ အပ်။ အန် လုဝ် လး ခြိုင် အန်၊ တာ ဘော အိုမ်။

7 အာဆေ တာ ဒိုဝ် တာ ပါ ဒူအီ အီ ဟဲ့ ဘဲန် ဇိုဝ် တီ၊ ဘော အန် လုဝ် ဝီ လး ခြိုင် အန်၊ တာ ဘော အိုမ်။ အန် မိူဝ် တူ ဆီငါ ဇမ် ဘာ ဒီ အပ်။

8 ဒူအီ အီ မိုဝ်း အီ ဇွိုမ် လေး တီ၊ ဆေ အန် ပတ့်၊ အိုမ် ပတ့် အန် ဝီ ဒိုဝ် ဒူအီ အီ ဆီငါ၊ ဒူအီ တီ လုဝ် ဝီ လး ခြိုင် အန်၊ တာ ဘော အိုမ်။ အန် မိူဝ် တူ ဆီငါ ဇမ် ဘာ ဒီ အပ်။

9 ကွပ် ပီ ပဝ့် ပီ တုတ့် ဒူအီ အီ မိုဝ်း ဆဝ် ဇိုဝ် တီ ဟဲ့ ဘဲန် တူတ့် အီ တူ ဆီငါ။ 10 အာဆေ ဝီ တာ ဒိုဝ် ခြိုင် ပဲ့ ဟဲ့ တုတ့် အန်၊ ဘော မုး မာဆေ အာဝ် တဝ်း၊ န့ တူ ဆီငါ ဇမ် ဘာ ဒီ အပ်။ ဒူအီ အီ ဝီ ဒိုဝ်း ဟာဝ် ခြိုင် အန် တွိုန် မိူဝ်၊ အန် လုဝ် ဝီ လး ခြိုင် အန်၊ တာ ဘော အိုမ်။ န့ ဟဲ့ ဘဲန် တူ ဆီငါ ဒီ အန် ဇမ် ဘာ ဒီ အပ်။

11 ဆေ ဒူအီ မိုဝ်း အီ ဇွိုမ် လေး ဒီ အန် တီ၊ တူ ဘာယ် ဒဲ အန်၊ ဝီ ပါ အီ ဟဝ်၊ ဘော ဒူအီ ပီ ပါ အန် တီ လုဝ် ဝီ လး ခြိုင် အန်၊ တာ ဘော အိုမ်။ အန် တူ ဆီငါ ဇမ် ဘာ ဒီ အပ်။

12 ကာလုဝ့် ကာဒါယ် ဒွန် ဘူင့်၊ ဆေ ဒူအီ တီ ဟီ တာ ဒိုဝ်၊ လုဝ် မး ကာလာတ့်။ ဆေ န့ ယီ မုး မ့ပါန် ဟေ ပဲ့ ဟဲ့ တာ ဒိုဝ် တာ ပါ အန်၊ လုဝ် ဝီ ခူတ့်၊ ဝီ ဘာယ် ဝဲန်။

13 ဝါယ် ဟဲ့ ဟွတ့် ဟြာယ် ရောဂါ အီ ဇွိုမ် လေး ဒီ ဒူအီ တွိုန်၊ အန် လုဝ် ဘ်ု အာဒါ ဘူ ဆီငဲ။ ဟဲ့ ဟွတ့်၊ အန် လုဝ် ဝီ ဟာဝ် တာ အိုမ်၊ လး ဘော ခြိုင် အန် ခဲင် အိုမ် အီ လှဲ။ ဝါယ် အန် တီ အန် ဟဲ့ ဝီ ဆီငါ ဒူပ် ပီ ဒမ် ဒါရာ။ 14 ဟီ ဇမ် ဆီငဲ န့ဒါ၊ အန် လုဝ် ဒိုဝ်း တး မာဘ့လူယ် အာ ဒုဝ်။ ဆေ အာဝ် မုး မာဘ့လူယ်၊ တဲး အန် ဒိုဝ်း မာဘ့လူယ် ပြဲ အာ ဒုဝ်၊ ဒိုဝ်း ဟာဝ် ဒီ အာတ့် ဇဝ်ဖြာ ဒီ ဘာင် မာလုဝ်း ထိုပ် ဘိက် ဘွတ်၊ ဒွါ ဒီ ဒါ အီ လှူ ဒီ ဇဝ်ဖြာ။ 15 ဒါ အီ လှူ ဒီ ဇဝ်ဖြာ လုဝ် ဒိုဝ်း မာဆိမ် တွိုန် အူ ဒုဝ်၊ လှူ ဒီ ဇဝ်ဖြာ၊ တဲး န့ ဘဲန် ပီ လှူ အီ တဲး ဇဝ်ဖြာ ဂဝ်း ဝဲန် မှာပ် ဒူအီ တွိုန်။ အန် လုဝ် လှူ ပေါ အူ ဒုဝ်၊ တဲး န့ ဘဲန် ပီ လှူ အီ ဒုဝ့် ဒီ ငဝ်။ အန် လုဝ် ဘူင် ပါယ် တီ တဲး အန် ဝီ လာယ် ကာလဝ့် ဒီ ဇဝ်ဖြာ ဝါယ် ဟဲ့ ဟွတ့် မိုဝ်း အန် အီ ဇွိုမ် လေး ဒီ ဒုဝ် အန်။

16 ဆေ အီမာယ် ပီလေး အိုမ် ကြုဝ် အန်၊ အန် လုဝ် ဝီ တာ အိုမ် ဘော ဒုဝ်။ အန် မိူဝ် တူ ဆီငါ ဇမ် ဘာ ဒီ အပ်။ 17 ခြိုင် ပီ တာ ပီ စှိုပ် အန် ဘော မုး ဘိက်၊ ဘော မုး ဒဝ့်၊ ဘော မုး ဟုန် ဒုဝ် ဆတ်၊ ဆေ အိုမ် ကြုဝ် အန် တီ ဟဲ့ တာ ဒိုဝ်၊ လုဝ် ဝီ လး ဘာယ် ဝဲန်။ ခြိုင် တီ တူ ဆီငါ ဇမ် ဘာ ဒီ အပ်။

18 ဝါယ် ဟဲ့ ဟွတ့် လာယ် လာယ် အီဘိုန့် အီမာယ်၊ ဂါယ် ဘော ဝီ လုဝ် ဝီ တာ အိုမ်။ ဟဲ့ ဘဲန် တူ ဆီငါ ဇမ် ဘာ ဒီ အပ်။

19 ဆေ အီဘိုန့် မိုဝ်း ခြိုင် ကာပ့လု၊ အန် တူ ဆီငါ ဒူပ် ပီ ဒမ် ဒါရာ အာဒါ ဘူ ဆီငဲ။ အာဆေ တာ ဒိုဝ် တာ ပါ အန်၊ အန် မိူဝ် တူ ဆီငါ ဇမ် ဘာ ဒီ အပ်။

20 ခြိုင် တာ ပဲ့ ဟဲ့ တုတ့် ပဲ့ ဟဲ့ မ့ဘေ၀် အန် ဒေါ အန် တီ ဟဲ့ ဘဲန် တူတ့် အီ တူ ဆီငါ။ 21 အာဆေ ဝီ တာ ဒိုဝ် ကာစှူင့် အိတ် အန်၊ အန် လုဝ် ဝီ လး ခြိုင် အန်၊ တာ ဘော အိုမ်။ အန် မိူဝ် တူ ဆီငါ ဇမ် ဘာ ဒီ အပ်။ 22 ဒူအီ အီ ဝီ တာ ဒိုဝ် ဒူင် ပဲ့ ဟဲ့ ဟွတ့် အန် တုတ့်၊ ဒူအီ တီ လုဝ် ဝီ လး ခြိုင် အန်၊ တာ ဘော အိုမ်။ အန် မိူဝ် တူ ဆီငါ ဇမ် ဘာ ဒီ အပ်။ 23 ဘော ကာစှူင့် အိတ် အန် တီ၊ ဘော ပဲ့ ဟဲ့ တုတ့် အန် ဒွန် မျုဝ်၊ အာဆေ ဝီ တာ ဒိုဝ်၊ အန် တူ ဆီငါ ဇမ် ဘာ ဒီ အပ်။

24 ဆေ အီမာယ် အိတ် ဒူပ် အီဘိုန့် ဒေါ မိုဝ်း အန် ခြိုင် ကာပ့လု၊ အီ တူ ဆီငါ အီဘိုန့် တီ ဟဲ့ ဝီ ဒိုက် ဒီ အန်။ အန် မိူဝ် တူ ဆီငါ အာဒါ ဘူ ဆီငဲ။ ဘော ကာစှူင့် အိတ် အန် တူ ဆီငါ။

25 ဆေ အီဘိုန့် မိုဝ်း နှာမ် ဇွိုမ် လှဲ လေး ဒေါ တူ မိုဝ်း အန် ခြိုင် ကာပ့လု၊ ဆေ နှာမ် ဘော ဇွိုမ် လေး လှေန့် လွှိုမ် ဒေါ မိုဝ်း အန် ခြိုင် ကာပ့လု၊ အန် တူ ဆီငါ အာဒါ ဒေါ ဇွိုမ် လေး နှာမ် တီ ဒီ အန်။ အန် တူ ဆီငါ ပီ ဒေါ မိုဝ်း အန် ခြိုင် ကာပ့လု တွိုန်။ 26 ကာစှူင့် ဒူင် အိတ် အန် ဘော ပဲ့ ဟဲ့ တုတ့် အန် ဒေါ မိုဝ်း အီ ဇွိုမ် လေး ဒီ အန် တီ၊ တူ ဆီငါ ပီ ဒေါ မိုဝ်း အန် ခြိုင် ကာပ့လု။ 27 အာဆေ ဝီ တာ ဒိုဝ် ခြိုင် တာ ဇိုဝ် တီ၊ ဘော အန် တူ ဆီငါ။ အန် လုဝ် ဝီ လး ခြိုင် အန်၊ တာ ဘော အိုမ်။ အန် တူ ဆီငါ ဇမ် ဘာ ဒီ အပ်။

28 ဝါယ် ဟဲ့ ဟွတ့် ဂိူတ် နှာမ် အန် တီ၊ အီဘိုန့် တီ လုဝ် ဝီ ဘ်ု အာဒါ ဘူ ဆီငဲ။ ဟဲ့ ဟွတ့်၊ အန် ဝီ ဘဲန် အီ ဆီငါ။ 29 ဟီ ဇမ် ဆီငဲ န့ဒါ၊ အန် လုဝ် ဒိုဝ်း မာဘ့လူယ် အာ ဒုဝ်။ ဆေ အာဝ် ပါယ် တီ မိူဝ်၊ ဒိုဝ်း မာဘ့လူယ် ပြဲ အာ ဒုဝ်၊ ဟာဝ် ဒူင် ကွယ် ဒါ အီ လှူ ဒီ ဇဝ်ဖြာ ဒီ ခူပ် မာလုဝ်း ထိုပ် ဘိက် ဘွတ်။ 30 ဒါ အီ လှူ ဒီ ဇဝ်ဖြာ လုဝ် ဒိုဝ်း မာဘ့လူယ် တီ အာဒါ အူ ဒုဝ်၊ လှူ တဲး န့ ဘဲန် ပီ လှူ အီ တဲး ဇဝ်ဖြာ ဂဝ်း ဝဲန် မှာပ်။ အန် လုဝ် လှူ ပေါ အူ ဒုဝ်၊ တဲး န့ ဘဲန် ပီ လှူ အီ ဒုဝ့် ဒီ ငဝ်။ ပါယ် တီ ဒါ အီ လှူ ဒီ ဇဝ်ဖြာ လုဝ် ဘူင်၊ တဲး အီဘိုန့် တီ ဝီ လာယ် ကာလဝ့် ဒီ ဇဝ်ဖြာ ဝါယ် ဟဲ့ မိုဝ်း အန် နှာမ် ဇွိုမ် လေး တွိုန်။

31 ပါယ် တီ ဘေ လုဝ် ဆာဒိက်၊ ကွဲ့ တဲး ဂေ ဒူအီ အီဆာရေလ ဘူင် ဘဲန် မျုဝ် ဘဲန် မျုဝ် အီ တဲး ဂေ တူ ဆီငါ၊ တဲး ဂေ ပီ ကာဒါတ့် ဒူင် ကွယ် အုဝ် အီ ကွယ် ကာတဲ ဒူင် ကွယ် ဂေ။ ဆေ ဂေ တူ ရုဝ်ဆေ ဒူင် ကွယ် အုဝ်၊ ယုဝ် ဂေ ယမ် ကူပ် တူ ဆီငါ ဂေ မျုဝ် အီ ဒူပ် ဒါရာ။”

32 ဇိုဝ် တီ ဘော မုး ဒါရာ လွင် အီမာယ် အီ မိုဝ်း အီ ရွတ့် အီ ဇွိုမ် လှဲ လေး ဒီ ဒုဝ် အန် ဘော လွင် အီမာယ် အီ ပီလေး အိုမ် ကြုဝ် အန်။ 33 န့ မုး ဘော လွင် အီဘိုန့် အီ မိုဝ်း ခြိုင် ကာပ့လု ဘော လွင် အီမာယ် အီဘိုန့် အီ မိုဝ်း အီ ရွတ့် အီ ဇွိုမ် လေး ဒီ ဒုဝ် ဂေ ဘော လွင် အီမာယ် အီ လာယ် အီဘိုန့် အီ တူ ဆီငါ ဒူပ် ပီ ဒမ် ဒါရာ။