1 ဇဝ်ဖြာ ဝီ ကာလာင် ဒီ အာမုဝ်ဆဲ တဝ်း၊ 2 “အာနီ မုး ဒါရာ လွင် ပီ ဒီ လုဝ် ဘူင် ဒူအီ အီ မိုဝ်း ရောဂါ၊ တဲး အန် ဝီ ဆီငါ။ ဆေ အန် ထာင်၊ ရောဂါ တီ ဟဲ့ ဟြာယ်၊ ဂေ လုဝ် ဒိုဝ်း ဟာဝ် အန် ဒူင် ကွယ် ဒါ အီ လှူ ဒီ ဇဝ်ဖြာ။ 3 ဒါ အီ လှူ ဒီ ဇဝ်ဖြာ လုဝ် ဒိုဝ်း လေး အန် နာ ရေတ့် ဒူင် ချ ဘေ၊ လုဝ် ဝီ ယွတ် ခဲမ် ဒုဝ် အန်။ 4 ဆေ ရောဂါ အန် အီ နပ် ဒီ ဘြဲ၊ နပ် ဒီ လာယ် ဟုဝ့် ဟဲ့ ဟြာယ်၊ ဒါ အီ လှူ ဒီ ဇဝ်ဖြာ လုဝ် စ်ု ဒူအီ အူ ဝီ၊ တဲး အန် ဒိုဝ်း မာဆိမ် အိမ် အီ ဆီငါ အာဒါ အာ ဒုဝ် ဘော ဟေ အာရိတ် ဘော ဆေန့် ရေန့် ဂဲ ဘော ကာဒဲ့ ဒဝ် ဟူဆူပ်၊ တဲး ဒါ အီ လှူ ဒီ ဇဝ်ဖြာ ပွိုန် ဒီ ဘူင် ပီ လုဝ် ဘူင် အန်၊ တဲး ဒူအီ ဆဝ် တီ ဝီ ဆီငါ။ 5 ဒါ အီ လှူ ဒီ ဇဝ်ဖြာ လုဝ် ဝီ ဒမ် အူ ဝီ၊ တဲး အန် ဆွာ့ မဲင် မာဆိမ် အာဒါ အူ ဒုဝ် ဒဲင် ကာလုဝ့် ကာဒါယ် ပီ ဟပ် ဂေ အိုမ် ဆီငါ ပီ တဝ့် တး ဂေ ခဲင် အိုမ် ခိုမ်။ 6 ဒါ အီ လှူ ဒီ ဇဝ်ဖြာ လုဝ် ဝီ ဒိုဝ်း မာဆိမ် အီ ညှမ် ယမ် တွိုန် ဘော ဟေ အာရိတ် ဘော ဆေန့် ရေန့် ဂဲ ဘော ကာဒဲ့ ဒဝ် ဟူဆူပ် တွိုန်၊ ဝီ စိုပ် ခဲင် နှာမ် မာဆိမ် အီ မုး ဒုဝ် ပဲ့ ဟဲ့ ငဝ်း ဂေ တွိုန်။ 7 အန် ဘော လုဝ် ဝီ ခြဝ်း နှာမ် တီ ဒီ ဒူအီ အီ ဒွိုမ် မိုဝ်း ရောဂါ အာဒါ ဘူ ဇေန့်။ ဟဲ့ ဟွတ့် ပါယ် တီ ဟဲ့ ပွိုန် တဝ်း၊ ဒူအီ တီ ဟဲ့ ဆီငါ။ မာဆိမ် အီ ဆီ အိမ် တွိုန် လုဝ် ဘ့လေး တဲး အန် ဘိုန့် ဟာဝ် ခဲင် ကာဂ့လ။

8 ဟဲ့ ဟွတ့်၊ ဒူအီ ဝီ တီ လုဝ် လး ခြိုင် အန်၊ ဂါ့ တူတ့် ဟိုက် ဂိန့် အန် ဘော တာ အိုမ်။ ဟီ ဟွတ့် ပါယ် တီ အန် ဟဲ့ ဆီငါ။ ဝါယ် တီ အန် ဟဲ့ ဝီ ပွိုန် လိုပ် ဒူင် ချ ဂေ ဒူအီ အီဆာရေလ။ မာလဲ၊ အန် လုဝ် ကွယ် နာ ရေတ့် ထိုပ် အန် အာဒါ ဘူ ဆီငဲ။ 9 ဒေါ ဇမ် ဆီငဲ မ့ဘူ၊ အန် လုဝ် ဂါ့ ဂိန့်၊ ဂါ့ ဒီမုဝ်း၊ ဂါ့ ဟိုက် ငါယ် အန်။ ဂါ့ ဟိုက် ဒွန် မျုဝ် ခဲ့ မိုဝ်း ဒီ ဒုဝ် အန်၊ တာ ဘော အိုမ်၊ တဲး အန် ဝီ ဆီငါ။

10 ဟီ ဇမ် ဆီငဲ န့ဒါ၊ အန် လုဝ် ဒိုဝ်း ဂွန် မာဘူ အာလူင့် အာ ဒုဝ် အီ တူ မိုဝ်း ဒူင် စှေ ဒူင် နဲ၊ ဘော မာဘူ အာဟျာင် အီ ညှမ် နုဝ့် အူ ဆီနမ်၊ အီ တူ မိုဝ်း ဒူင် စှေ ဒူင် နဲ။ အန် လုဝ် ဒိုဝ်း ဘော ကာပဲ့ ခဝ်ချုင် အီ ဟဲ့ ဟွတ့် ကာဝ်ု နာမန် အာဒါ အူယ် အုဝ်မာ အီ မုး ကာဘက် ဖွုန် ဘ့လဲ ဒီ အူ ခ့ဝါက်။ အန် လုဝ် ဒိုဝ်း တး ဘော နာမန် အူ ခန်၊ ဒွါ တူတ့် ဒီ ဒါ အီ လှူ ဒီ ဇဝ်ဖြာ။ 11 ဒါ အီ လှူ ဒီ ဇဝ်ဖြာ လုဝ် တိုယ် ဒူအီ တီ ဘော ပီ ဒီ လှူ အန် တီ၊ ဟာဝ် ဒီ ဘာင် မာလုဝ်း ထိုပ် ဘိက် ဘွတ်၊ အာပ် တူတ့် ဒီ ဇဝ်ဖြာ။

12 ပန် တီ ဒါ အီ လှူ ဒီ ဇဝ်ဖြာ လုဝ် ဒိုဝ်း ဂွန် မာဘူ အီ မုး ဂွန် အာလူင့် အာဒါ အူ ဒုဝ် ဘော နာမန် အူ ခန် တွိုန်၊ လှူ ဒီ ဇဝ်ဖြာ၊ တဲး န့ ဘဲန် ပီ လှူ အီ ဒီ ဂဝ်း ဝဲန် ပဲ့ ဟဲ့ ကာလိုပ် ဒူအီ တွိုန်။ အန် လုဝ် မာဝတ် ဝိဝ် မာဝတ် ဝေန့် ပီ လှူ တီ၊ တဲး န့ ဘဲန် ပီ လှူ အီ မာဝတ် ဝိဝ် မာဝတ် ဝေန့် ဒီ ဇဝ်ဖြာ။ 13 ဒါ အီ လှူ ဒီ ဇဝ်ဖြာ လုဝ် ဆွာ့ မဲင် မာဘူ တီ ဒီ ဒူင် ဆီငါ ဘွတ်၊ အီ မုး ဒူင် ငဝ်း ဂေ ဒုဝ် ပီ လှူ အီ တဲး ဇဝ်ဖြာ ဂဝ်း ဝဲန် မှာပ် ဘော ပီ လှူ ဂေ အီ ဒုဝ့် ဒီ ငဝ်။ ပီ လှူ အီ ဂဝ်း ဝဲန် ပဲ့ ဟဲ့ ကာလိုပ် အီ ဘော ပီ လှူ အီ တဲး ဇဝ်ဖြာ ဂဝ်း ဝဲန် မှာပ် အီ၊ န့ မုး အူ မျုဝ်။ န့ ဟဲ့ ဘဲန် အာဒါ ဒါ အီ လှူ ဒီ ဇဝ်ဖြာ။ ဟဲ့ ဆီငါ ဘွတ် ကာဆဝ်။ 14 ဒါ အီ လှူ ဒီ ဇဝ်ဖြာ လုဝ် ဒိုဝ်း နှာမ် မာဘူ တီ မင် ကာလဝ့်၊ ဝီ ဖဝ်း ဒီ အာဟျဝ့် ဘော ကာနူ မာ စေန့်၊ ကာနူ မာ ဒဲ ဘ့လာက် အာအး ဒူအီ အီ ဒွိုမ် မိုဝ်း ရောဂါ တွိုန်။ 15 ဟဲ့ ဟွတ့်၊ ဒါ အီ လှူ ဒီ ဇဝ်ဖြာ လုဝ် ဒိုဝ်း နာမန် အူ ခန် တွိုန် မင် ကာလဝ့်၊ ဝီ ဟုး ဒဲင် ဒဲ အန် ဘ့လာက် အာဂ။ 16 အန် လုဝ် ဝီ ဒိုဝ်း ကာနူ ပုတ့် အန် ဘ့လာက် အာအး၊ ဝီ စိုပ် ခဲင် နာမန် အီ ကွယ် ခဲင် ကာဘာ ဒဲ အန်၊ ဝီ ကာထေတ့် နာ အာတ့် ဇဝ်ဖြာ ဘူ ဇေန့်။ 17 အန် လုဝ် ဝီ ဒိုဝ်း နာမန် အီ ဆီ ကွယ် ခဲင် ကာဘာ ဒဲ အန် မင် ကာလဝ့်၊ ဘော နှာမ် ဂွန် မာဘူ တွိုန် မင် ကာလဝ့်၊ ဝီ ဖဝ်း ဒီ အာဟျဝ့် ဘော ဒီ ကာနူ မာ ဒဲ၊ ကာနူ မာ စေန့် ဘ့လာက် အာအး ဒူအီ အီ ဟဲ့ ဒွိုမ် မိုဝ်း ရောဂါ တွိုန်။ 18 နာမန် အီ ဆီ ဂိတ် ခဲင် ကာဘာ ဒဲ အန်၊ အန် လုဝ် ဝီ ဟုး ဒဲင် ဂိန့် ဒူအီ တွိုန်။ ဒါ အီ လှူ ဒီ ဇဝ်ဖြာ လုဝ် ဘူင် ပါယ် တီ ဒီ အာတ့် ဇဝ်ဖြာ၊ တဲး ဒူအီ တွိုန် ဝီ ကာလဝ့် ဒီ ဇဝ်ဖြာ။

19 ဝါယ် အန် တီ ဒါ အီ လှူ ဒီ ဇဝ်ဖြာ လုဝ် လှူ ပီ လှူ အီ တဲး ဇဝ်ဖြာ ဂဝ်း ဝဲန် မှာပ်၊ တဲး ဒူအီ အီ ဒွိုမ် မိုဝ်း ရောဂါ ဝီ ဘဲန် ဒူအီ အီ ဆီငါ ဒူပ် ပီ ဒမ် ဒါရာ။ ဝါယ် တီ၊ အန် လုဝ် ဝီ ဆွာ့ မဲင် ဒုဝ် အီ ဘဲန် ပီ လှူ အီ ဒုဝ့် ဒီ ငဝ်။ 20 အန် လုဝ် ဝီ လှူ ဒုဝ် တီ ဒူပ် ပီ လှူ အီ မုး ဒီဂါဝ် ဘဲန် မျုဝ် ဘဲန် မျုဝ်၊ လှူ တူတ့် ဒဲင် ကာစှူင့် လှူ တွိုန်။ ဒါ အီ လှူ ဒီ ဇဝ်ဖြာ လုဝ် ဘူင် ဇိုဝ် တီ၊ တဲး ဒူအီ ဆဝ် တွိုန် ဝီ ကာလဝ့် ဒီ ဇဝ်ဖြာ။ ဟဲ့ ဟွတ့်၊ ဒူအီ တွိုန် ဟဲ့ ဘဲန် ဒူအီ ဆီငါ။

21 မာလဲ၊ ဆေ ဒူအီ ဝီ တီ မုး ဒူအီ ဂိန်၊ ဆေ အန် တူ မိုဝ်း ခဲ့ ပီ လုဝ် လှူ ဇိုဝ် တီ ဒွန် မျုဝ်၊ တဲး အန် ဒိုဝ်း မီ ဂွန် မာဘူ အာလူင့် အူ ဒုဝ်၊ တဲး န့ ဘဲန် ပီ လှူ အီ ဂဝ်း ဝဲန် ပီ ကာလိုပ် အန်။ အန် လုဝ် ဒိုဝ်း ဘော ကာပဲ့ ခဝ်ချုင် အီ ဟဲ့ ဟွတ့် ကာဝ်ု နာမန် အာဒါ အူ အုဝ်မာ။^a အန် လုဝ် ဒိုဝ်း ဘော နာမန် အူ ခန်။ ပီ ဒီ လှူ တီ ဒါ အီ လှူ ဒီ ဇဝ်ဖြာ လုဝ် မာဝတ် ဝိဝ် မာဝတ် ဝေန့် ဒီ အာတ့် ဇဝ်ဖြာ။ 22 အန် လုဝ် ဒိုဝ်း ဘော မာဘ့လူယ် အာ ဒုဝ်။ ဆေ အာဝ် မုး မာဘ့လူယ် မိူဝ်၊ ပွိုန် ဒိုဝ်း မာဘ့လူယ် ပြဲ အာ ဒုဝ်။ အူ ဒုဝ် တဲး န့ ဘဲန် ပီ လှူ အီ ဂဝ်း ဝဲန် မှာပ်။ ပေါ အူ ဒုဝ် တဲး န့ ဘဲန် ပီ လှူ အီ ဒုဝ့် ဒီ ငဝ်။

23 ဒေါ ဇမ် ဆီငဲ န့ဒါ၊ ဒူအီ တီ လုဝ် ဒိုဝ်း တး ဇိုဝ် တီ ဒွန် မျုဝ် နာ အာတ့် မာလုဝ်း ထိုပ် ဘိက် ဘွတ်။ 24 ဒါ အီ လှူ ဒီ ဇဝ်ဖြာ လုဝ် ဒိုဝ်း ဂွန် မာဘူ ဘော နာမန် တွိုန် လှူ၊ တဲး န့ ဘဲန် ပီ လှူ အီ မာဝတ် ဝိဝ် မာဝတ် ဝေန့်။ 25 အန် လုဝ် ဆွာ့ မဲင် ဂွန် မာဘူ တီ၊ ဝီ ဒိုဝ်း နှာမ် အန် မင် ကာလဝ့်၊ ဝီ ဖဝ်း ဒီ အာဟျဝ့် ဘော ဒီ ကာနူ မာ ဒဲ၊ ကာနူ မာ စေန့် ဘ့လာက် အာအး ဒူအီ တွိုန်။ 26 အန် လုဝ် ဒိုဝ်း နာမန် တွိုန် မင် ကာလဝ့်၊ ဟုး ခဲင် ကာဘာ ဒဲ အန် ဘ့လာက် အာဂ၊ 27 ဝီ ဒိုဝ်း ကာနူ ပုတ့် အန်၊ စိုပ် ခဲင် နှာမ် အီ ကွယ် ခဲင် ကာဘာ ဒဲ အန် တီ၊ ဝီ ကာထေတ့် ဒီ အာတ့် ဇဝ်ဖြာ ဘူ ဇေန့်။ 28 ဟဲ့ ဟွတ့် ပါယ် တီ အန် လုဝ် ဒိုဝ်း နာမန် မင် ကာလဝ့်၊ ဖဝ်း ဒီ အာဟျဝ့် ဘော ဒီ ကာနူ မာ ဒဲ၊ ကာနူ မာ စေန့် ဘ့လာက် အာအး ဒူအီ တွိုန်။

29 နာမန် အီ ဆီ ဂိတ် ခဲင် ကာဘာ ဒဲ အန် တွိုန်၊ အန် လုဝ် ဟုး ဒဲင် ဂိန့် ဒူအီ တီ။ အန် လုဝ် ဘူင် ပါယ် တီ တဲး ဒူအီ တွိုန် ဝီ ကာလဝ့် ဒီ ဇဝ်ဖြာ။ 30 ပန် တီ အန် ဘော လုဝ် ဒိုဝ်း မာဘ့လူယ်။ ဆေ အာဝ် မုး မာဘ့လူယ်၊ လုဝ် ဒိုဝ်း မာဘ့လူယ် ပြဲ၊ တး လှူ ခဲ့ ပဲ အန် ဒီ လှူ။ 31 အူ ဒုဝ်၊ တဲး န့ ဘဲန် ပီ ဒီ လှူ အီ ဂဝ်း ဝဲန် မှာပ်။ ပေါ အူ ဒုဝ်၊ တဲး န့ ဘဲန် ပီ လှူ အီ ဒုဝ့် ဒီ ငဝ်။ ပီ လှူ တီ လုဝ် လှူ ဒူပ် ပီ လှူ ဒီဂါဝ် ဘဲန် မျုဝ် ဘဲန် မျုဝ်။ ပါယ် တီ ဒါ အီ လှူ ဒီ ဇဝ်ဖြာ လုဝ် ဘူင် တဲး ဒူအီ တွိုန် ဝီ ကာလဝ့် ဒီ ဇဝ်ဖြာ။ 32 အာတီ မုး ဒါရာ လွင် ဒူအီ ဂိန် အီ မိုဝ်း ရောဂါ ဒီ ဟုန် အီ နပ် ဒီ ဘြဲ၊ နပ် ဒီ ဒိုက် ဒီ အီ ဟဝ်။ ဆေ အန် တူ ပဲ ဒီ လှူ ကိူန်၊ တဲး အန် လှူ ခဲ့ တီ။”

33 ဇဝ်ဖြာ ပီ ဝီ ကာလာင် ဒီ အာမုဝ်ဆဲ ဂါယ် အာရူန်။ 34 အန် တဝ်း၊ “ဆေ ဂေ ဒူအီ အီဆာရေလ ကွယ် ခဲင် မိူင် ကာနန့် အီ မုး မိူင် ပီ ဒီ အာပ် ဒွါ အုဝ် ဒီ ဂေ၊ ဆေ အုဝ် ဒီ ဘော တဲး ကာဒိး အူ မျုဝ် ဒိုက် ဒီ ကာင် ဒူအီ အူ ဝီ၊ ဆေ အန် ဘော ယိုဝ် လွင် အန် တီ၊ 35 အန် လုဝ် ဟာဝ် ကာလာင် လွင် အန် တီ ဒီ ဒါ အီ လှူ ဒီ ဇဝ်ဖြာ တဝ်း၊ ‘အုဝ် ထာင် ဟဲ့ မိုဝ်း ကာဒိး အီ လေး ဒီ ကာင် ယေ။’ 36 ပန် တီ ဒါ အီ လှူ ဒီ ဇဝ်ဖြာ လုဝ် စ်ု ဂေ ထုဝ့် လေး တူတ့် ကြုဝ် ဂေ အာတ့် ဟာဝ် ယွတ် အန် ကာဒိး အီ ဒိုက် ဒီ ကာင် တီ၊ ယုဝ် ဘော ကြုဝ် ဂေ တီ ဒီ ဘဲန် တူတ့် အီ တူ ဆီငါ။ ဝါယ် တီ၊ အန် လုဝ် ဝီ ဟာဝ် လိုပ် ယွတ် ခဲင် ကာင် တီ။ 37 အန် လုဝ် ဟာဝ် ယွတ် ခဲမ် အီ ဘုဝ် ဘဲန် ခဲင် ကာင် တီ။ ဆေ ကာဆိူဝ် တီ ဟဲ့ ငျီန် ငျီန်၊ ရေန့် ရေန့်၊ ဟဲ့ နှဲန် ဒီ လိုပ် ဟာဝ် ခဲင် ရဲင်၊ 38 ဒါ အီ လှူ ဒီ ဇဝ်ဖြာ လုဝ် လေး ရေတ့် ကာင် တီ။ ဝီ ကာဘိတ် ရိတ်၊ ကွဲ့ တဲး အီ လိုပ် အာဒါ ဘူ ဆီငဲ။ 39 ဆေ ဇမ် ဆီငဲ မ့ဘူ၊ အန် လုဝ် ဝီ ဟာဝ် ယွတ် ပေါ အူ ဇေန့်။ ဆေ ကာဆိူဝ် တီ ဟဲ့ ဝဲ ဘြဲ တာင်၊ 40 အန် လုဝ် စ်ု အီ ဒိုဝ်း လေး မာဝ် ဒီ ရဲင် ဒူင် ကာဒိး တီ၊ ဝီ ဟာဝ် ဝဲန် နာ ရေတ့် မိူင် ဒူင် တူ ဆီငါ။ 41 ဝါယ် တီ၊ လုဝ် ဂါ့ ဝဲန် ထုန် ပဲ့ ဟဲ့ ဖဝ်း ဂေ ဒီ ရဲင် ဒွန် ပ့လုဝ့်။ ကာပုး ပီ ဂါ့ လေး ဂေ တီ ဂေ လုဝ် ဝီ ဟာဝ် ဝဲန် နာ ရေတ့် မိူင် ဒူင် တူ ဆီငါ။ 42 ဟဲ့ ဟွတ့် ပါယ် တီ ဂေ လုဝ် ဝီ ဒိုဝ်း မာဝ် ကာမာယ်၊ ဝီ ဟပ် ကာဆိူဝ် ကာဒဝ် တွိုန်၊ ဝီ ဒိုဝ်း ထုန် ကာမာယ် ဖဝ်း ဒီ ရဲင် ကာင် တီ ဒွန် ပ့လုဝ့်။

43 ဆေ ကာဒိး တီ ဝီ ဘုဝ် ဘဲန် ဒီ ရဲင် ဒူင် ဟဲ့ ဟွတ့် ပ့လု ဂေ မာဝ် ကာမာယ် ဘော ဒူင် ဟဲ့ ဖဝ်း ဂေ ထုန် ကာမာယ် တွိုန်၊ ဒါ အီ လှူ ဒီ ဇဝ်ဖြာ လုဝ် ဟာဝ် ယွတ်၊ ဟာဝ် ငွိုပ် ပေါ အူ ဇေန့်။ 44 ဆေ ကာဒိး တီ ဟဲ့ ဝဲ ဘြဲ တာင်၊ ကာင် တီ အာဝ် ဟူ ဆီငါ။ 45 ဂေ လုဝ် ပျာတ့် ဝဲန် ကာင် တီ၊ ဒိုဝ်း ဝဲန် မာဝ် ဂေ ဟေ ဘော ပုန် တွိုန်၊ ဝီ ဟာဝ် ဝဲန် ဒူင် တူ ဆီငါ နာ ရေတ့် မိူင်။ 46 ဒေါ ကာဘိတ် အုန် ဂေ မာလုဝ်း ကာင် တီ၊ ဆေ န့ မိုဝ်း ဒူအီ အီ ဟာဝ် လိုပ် ခဲင် ကာင် တီ၊ အန် အာဝ် ဟူ ဆီငါ ဇမ် ဘာ ဒီ အပ်။ 47 အာဆေ အိတ် ခဲင် ကာင် တီ ဘော ဟူမ် ပီ ဒီ ဟူမ် ခဲင် ကာင် တီ၊ အန် လုဝ် ဝီ လး ခြိုင် တာ အန်။ 48 မာလဲ၊ ဆေ ဒါ အီ လှူ ဒီ ဇဝ်ဖြာ ဝီ တး ယွတ် ခဲမ် ကာဆိူဝ် ဘုဝ် ဘဲန် ကာဒိး တွိုန်၊ ဆေ ကာဒိး ယီ တူ ဘြဲ တာင် ဒူင် ဟဲ့ ဖဝ်း ကာမာယ် ဂေ ထုန် တွိုန် ကူပ် ဟဲ့ ဟြာယ် ကာဒိး တီ၊ အန် ဟဲ့ ပွိုန် တဝ်း၊ ကာင် တီ ဟဲ့ ဆီငါ။ 49 ပီ ဒီ ပါယ် ဂေ ဒီ ဘူင် တဲး ကာင် တီ ဝီ ဆီငါ ဒူပ် ပီ ဒမ် ဒါရာ၊ န့ ပါယ် နီ။ ဂေ လုဝ် ဒိုဝ်း တး မာဆိမ် အာ ဒုဝ် ဘော ဟေ အာရိတ် ဘော ဆေန့် ရေန့် ဂဲ ဘော ကာဒဲ့ ဒဝ် ဟူဆူပ်။ 50 ဒါ အီ လှူ ဒီ ဇဝ်ဖြာ လုဝ် ဒိုဝ်း မာဆိမ် အာဒါ အူ ဒုဝ်၊ ဆွာ့ မဲင် အန် ဒဲင် ကာလုဝ့် ကာဒါယ် အီ မိုဝ်း အိုမ် ဆီငါ၊ ပီ တဝ့် တး ဂေ ခဲင် အိုမ် ခိုမ်။ 51 ပါယ် တီ အန် လုဝ် ဒိုဝ်း ယင် ဟေ အာရိတ်၊ ဘော ဆေန့် ရေန့် ဂဲ၊ ဘော ကာဒဲ့ ဒဝ် ဟူဆူပ်၊ ဘော မာဆိမ် အီ ဆီ အိမ် တွိုန်၊ ဝီ စိုပ် တူတ့် ခဲင် နှာမ် ဒုဝ် ပဲ့ ဟဲ့ ငဝ်း ဂေ တွိုန်၊ စိုပ် ဘော ခဲင် အိုမ် ဆီငါ တွိုန်၊ ဝီ ခြဝ်း ခဲင် ကာင် တီ ဘူ ဇေန့်။ 52 ပါယ် တီ အန် လုဝ် ဘူင် တဲး ကာင် တီ ဝီ ဆီငါ ဒူပ် ပီ ဒမ် ဒါရာ။ အန် လုဝ် ဒိုဝ်း နှာမ် မာဆိမ်၊ အိုမ် ဆီငါ၊ မာဆိမ် အိမ်၊ ဟေ အာရိတ်၊ ကာဒဲ့ ဒဝ် ဟူဆူပ် ဘော ဆေန့် ရေန့် ဂဲ။ 53 ဝါယ် တီ၊ အန် လုဝ် ဝီ ဘ့လေး မာဆိမ် အိမ် တွိုန်၊ တဲး အန် ဘိုန့် ဟာဝ် ခဲင် ကာဂ့လ နာ ရေတ့် မိူင်။ ဒါ အီ လှူ ဒီ ဇဝ်ဖြာ လုဝ် ဘူင် ပါယ် တီ တဲး ဇဝ်ဖြာ ဂဝ်း ဝဲန် အီ တူ မွှိုမ် ခဲင် ကာင် တီ။ ဟဲ့ ဟွတ့်၊ ကာင် တီ မိူဝ် ဟဲ့ ဝီ ဘဲန် ကာင် ဆီငါ ဒူပ် ပီ ဒမ် ဒါရာ။”

54 အာတီ န့ မုး ဒါရာ လွင် ရောဂါ အီ ဒိုက် ဒီ ဟုန် အီ နပ် ဒီ ပြဲ၊ နပ် ဒီ ဟုဝ့် ဒီ အီ ဟဝ်။ 55 န့ ဘော မုး ဘော လွင် ကာဒိး အီ နပ် ဒီ ဒိုက် ဒီ ခြိုင် တာ၊ ဘော ကာဒိး အီ ဒိုက် ဒီ ကာင်။ 56 န့ ဘော မုး ဘော လွင် ဘိုပ်၊ ဘော ဟြဝ်၊ ဘော လူဖွိုက် ဇိုဝ် တီ ဒွန် မျုဝ်။ 57 ဒါရာ တီ ဒီ တဲး အီ ဆုင်ဖျာတ်၊ တဲး အီ နပ် ဇိုဝ် မှဝ် ဟဲ့ အီ ဆီငါ၊ ဇိုဝ် မှဝ် တူ ဆီငါ။