1 ဇဝ်ဖြာ ဝီ ကာလာင် ဒီ အာမုဝ်ဆဲ ဂါယ် အာရူန် တဝ်း၊ 2 “ဆေ ဒူအီ အူ ဝီ မိုဝ်း ဘိုပ်၊ မိုဝ်း ဟြဝ်၊ မိုဝ်း ဆဝ် အီ နပ် ဒီ ဘြဲ၊ ယုဝ် န့ မုး မျုဝ် အီ နပ် ဒီ ဒိုက် ဒီ အီ ဟဝ်၊ လုဝ် ဒဲ့ ဒူအီ ဝီ တီ ဟာဝ် ညိူဝ် အာရူန်။ ဆေ အာဝ် ပါယ် တီ လုဝ် ညိူဝ် ဂွန် အန် အီ မုး ဒူအီ လှူ ဒီ ဇဝ်ဖြာ။ 3 ဒါ အီ လှူ ဒီ ဇဝ်ဖြာ လုဝ် ယွတ် ခဲမ်။ ဆေ ဟိုက် အီ လတ့် ကာဆိူဝ် ဒိမ် တီ ယီ လုယ် ဘော ဟုန် ဒီဂ့လုဝ့် ကာဆိူဝ် တီ၊ န့ မုး ရောဂါ အီ နပ် ဒီ ဘြဲ၊ နပ် ဒီ ဒိုက်။ ဒါ အီ လှူ ဒီ ဇဝ်ဖြာ လုဝ် တဝ်း ဒူအီ တီ၊ အန် တူ ဆီငါ ဒူပ် ပီ ဒမ် ဒါရာ။ 4 ဆေ ဟုန် ကာဆိူဝ် ဒိမ် တီ ယီ လုယ်၊ ဆေ န့ ယီ တူ ဒီဂ့လုဝ့်၊ ဟိုက် ကာဆိူဝ် တီ မိူဝ် တူ လုယ်၊ တဲး ဒါ အီ လှူ ဒီ ဇဝ်ဖြာ ခြွင့် အုန် ဒူအီ ဝီ တီ အာဒါ ဘူ ဆီငဲ။ 5 ဆေ ဟဲ့ နုဝ့် ဘူ ဆီငဲ၊ ဒါ အီ လှူ ဒီ ဇဝ်ဖြာ လုဝ် ဝီ ယွတ်။ ဆေ ရောဂါ အီ လေး ဒီ ဟုန် အန် တီ တူ ဘ့လိူင်၊ ဆေ န့ တူ တာင် တူ ယူမ်၊ အန် ဒီ ဝီ လုဝ် ခြွင့် အန် ပေါ ဘူ ဆီငဲ။ 6 ဆေ ဟဲ့ နုဝ့် ဘူ ဆီငဲ တီ၊ ဒါ အီ လှူ ဒီ ဇဝ်ဖြာ တွိုန် လုဝ် ဝီ ယွတ် ခဲမ် ပေါ အူ ဇေန့်။ ဆေ ဒူင် ဒိမ် တီ ဟဲ့ ကာဟဝ်း ဟေန့်၊ အာဝ် ဟူ ဂ့လာမ် ဘြဲ ပေါ န့ ပွါ၊ ဒါ အီ လှူ ဒီ ဇဝ်ဖြာ ဟဲ့ ပွိုန် တဝ်း၊ ဒူအီ တီ ဟဲ့ ဆီငါ။ န့ ဟြဝ် ပီယေန့်။ ဒူအီ ဝီ တီ လုဝ် လး ခြိုင် အန်၊ တဲး အန် ဝီ ဆီငါ ဒူပ် ပီ ဒမ် ဒါရာ။ 7 မာလဲ၊ ဝါယ် ဟဲ့ ဟွတ့် တဝ်း ဒါ အီ လှူ ဒီ ဇဝ်ဖြာ၊ ဒူအီ ဝီ တီ ဟဲ့ ဆီငါ၊ ဆေ ဟြဝ် အန် ဝီ ကာပ့လုး၊ ဝီ ဘြဲ တာင်၊ အန် လုဝ် ဝီ ဟာဝ် ဘျ ဒုဝ် အန် ဒီ ဒါ အီ လှူ ဒီ ဇဝ်ဖြာ ပေါ အူ ဇေန့်။ 8 ဒါ အီ လှူ ဒီ ဇဝ်ဖြာ လုဝ် ဝီ ယွတ် ခဲမ်။ ဆေ ဟြဝ် အန် တီ ဝီ ဘြဲ ကိူန်၊ အန် လုဝ် တဝ်း၊ ဒူအီ တီ အာဝ် ဆီငါ။ န့ မုး ရောဂါ အီ နပ် ဒီ ဘြဲ၊ နပ် ဒီ ဒိုက် ဒီ အီ ဟဝ်။

9 ဆေ ဒူအီ မိုဝ်း ရောဂါ အီ လေး ဒီ ဟုန် အန် အီ နပ် ဒီ ဒိုက် ဒီ အီ ဟဝ်၊ ဘေ လုဝ် ဒဲ့ ဟာဝ် အန် ဒူင် ကွယ် ဒါ အီ လှူ ဒီ ဇဝ်ဖြာ။ 10 ဒါ အီ လှူ ဒီ ဇဝ်ဖြာ တီ လုဝ် ယွတ် ခဲမ်။ ဆေ န့ မိုဝ်း ဘိုပ် အီ လုယ်၊ ဝီ တဲး ဘော ဟိုက် အန် လုယ်၊ ယင် အန် မိူဝ် စေဝ် ရေန့် ကာဆဝ်၊ 11 အာတီ ဟဲ့ မုး ရောဂါ အီ နပ် ဒီ ဒိုက်၊ နပ် ဒီ ဘြဲ။ ဒါ အီ လှူ ဒီ ဇဝ်ဖြာ လုဝ် တဝ်း၊ ဒူအီ ဝီ တီ အန် တူ ဆီငါ။ အာဝ် ဟူ လုဝ် ခြွင့် အုန်။ ခုဝ်၊ ဟဲ့ ဟွတ့် နပ်၊ အန် တူ ဆီငါ။

12 ဆေ ရောဂါ အန် တီ ဟဲ့ ဂ့လာမ် ကာလယ့် ဒီ အန် ဘော ဒုဝ်၊ စုး ဒီ ဂိန့် ကော ဇမ် ပ့လဝ်၊ 13 ဒါ အီ လှူ ဒီ ဇဝ်ဖြာ လုဝ် ဝီ ယွတ် ခဲမ် ပေါ အူ ဇေန့်။ ဆေ ဟဲ့ ယိုဝ်၊ ရောဂါ တီ ဟဲ့ ဝီ ဘြဲ ကာလတ့် ဘော ဒုဝ်၊ အန် လုဝ် တဝ်း၊ ဒူအီ ဝီ တီ ဟဲ့ ဝီ ဆီငါ။ ခုဝ်၊ အန် ဟဲ့ ဝီ လုယ် ဘော ဒုဝ်၊ ဟဲ့ ဝီ ဘဲန် အီ ဆီငါ ဒီ အန်။ 14 ဆေ ဘိုပ် တီ ယီ ဘြး၊ ယင် အန် မိူဝ် ရေန့်၊ အန် တူ ဆီငါ။ 15 ဆေ ဒါ အီ လှူ ဒီ ဇဝ်ဖြာ ယိုဝ်၊ ဘိုပ် ဒိမ် တီ ဟဲ့ ဘြး၊ ယင် မိူဝ် ရေန့်၊ အန် လုဝ် တဝ်း ဒူအီ ဝီ တီ တူ ဆီငါ။ ဆဝ် ဘိုပ် ဘြး ဘော ယင် ရေန့် တီ၊ န့ မုး ရောဂါ အီ နပ် ဒီ ဒိုက်၊ နပ် ဒီ ဘြဲ။ န့ တူ ဆီငါ။ 16 မာလဲ၊ ဆေ ယင် ရေန့် တီ ဝီ ဘျွင်၊ ဝီ လုယ်၊ ဒူအီ ဝီ တီ လုဝ် ဝီ ဟာဝ် ဒူင် ကွယ် ဒါ အီ လှူ ဒီ ဇဝ်ဖြာ။ 17 ဒါ အီ လှူ ဒီ ဇဝ်ဖြာ လုဝ် ဝီ ယွတ် ပေါ အူ ဇေန့်။ ဆေ ဒိမ် အန် ဒူင် ဘိုပ် တီ ဝီ လုယ်၊ အန် ဟဲ့ ဆီငါ။ ဒါ အီ လှူ ဒီ ဇဝ်ဖြာ လုဝ် တဝ်း၊ ဒူအီ တီ ဟဲ့ ဝီ ဆီငါ။

18 ဆေ န့ ယီ မိုဝ်း ဒူအီ အီ ဟဲ့ မိုဝ်း ဘိုပ် အီ ဟဲ့ ဟြာယ်၊ 19 ဝါယ် တီ ဝီ ဘဲန် ဘိုပ် လုယ်၊ ဆေ အာဝ် ပါယ် တီ ကာဆိူဝ် တီ ဝီ လုယ် ရေန့်၊ အန် လုဝ် ဝီ ဟာဝ် ဒူင် ကွယ် ဒါ အီ လှူ ဒီ ဇဝ်ဖြာ။ 20 ဒါ အီ လှူ ဒီ ဇဝ်ဖြာ လုဝ် ယွတ် ဆီချာ။ ဆေ ကာဆိူဝ် ဒိမ် တီ နှဲန် ဟဲ့ ဝဲ ခ့ဝါက် တာင်၊ ဟိုက် အန် မိူဝ် လုယ်၊ အန် လုဝ် တဝ်း၊ ဒူအီ ဝီ တီ အာဝ် ဆီငါ။ န့ မုး ရောဂါ အီ နပ် ဒီ ဘြဲ၊ နပ် ဒီ ဒိုက် ဒီ အီ ဟဝ် အီ တး ဒီ ဘိုပ် တွိုန်။ 21 မာလဲ၊ ဆေ ဒါ အီ လှူ ဒီ ဇဝ်ဖြာ ဟဲ့ ဟွတ့် ယွတ် ခဲမ်၊ ဆေ ဟိုက် အန် ကာဆိူဝ် ဒိမ် တီ မိူဝ် တူ လုယ်၊ ဒိမ် ခဲင် ဟုန် မိူဝ် အာဝ် လိုက်၊ အာဝ် ဟူ ရေန့်၊ ဒါ အီ လှူ ဒီ ဇဝ်ဖြာ လုဝ် ဝီ ခြွင့် အုန် ဒူအီ တီ အာဒါ ဘူ ဆီငဲ။ 22 ဒေါ အန် တီ၊ ဆေ ကာဆိူဝ် ဒိမ် ဝီ ဘြဲ ကိူန်၊ ဒါ အီ လှူ ဒီ ဇဝ်ဖြာ လုဝ် တဝ်း၊ ဒူအီ တီ တူ ဆီငါ။ န့ မုး ရောဂါ အီ နပ် ဒီ ဒိုက်၊ နပ် ဒီ ဘြဲ ဒီ အီ ဟဝ်။ 23 မာလဲ၊ ဆေ ကာဆိူဝ် ဒိမ် တီ ယီ တူ ဘ့လိူင်၊ တူ ဘြဲ ကိူန်၊ န့ မုး ပ့လာ ဒိမ် ပါယ် တီ။ ဒါ အီ လှူ ဒီ ဇဝ်ဖြာ ဟဲ့ ပွိုန် တဝ်း၊ အန် ဟဲ့ ဆီငါ။

24 ဆေ န့ ယီ မိုဝ်း ဒူအီ အီ ဟဲ့ ဘ့လုး ဒီ ငဝ်၊ ဟဲ့ ဘဲန် ဒိမ် ဒီ ဒုဝ် အန်၊ ကာဆိူဝ် ဒိမ် တီ ဝီ လေး အီ လုယ်၊ အီ လုယ် ရေန့်၊ 25 ဒါ အီ လှူ ဒီ ဇဝ်ဖြာ လုဝ် ယွတ် ခဲမ်။ ဆေ ဟိုက် ကာဆိူဝ် တီ မိူဝ် လုယ်၊ ဒိမ် တီ ဟဲ့ ရာမ် လိုက်၊ န့ မုး ရောဂါ အီ နပ် ဒီ ဘြဲ၊ နပ် ဒီ ဒိုက်၊ အီ တး ဒီ ဒိမ် အီ ဘ့လုး ဒီ ငဝ် တွိုန်။ ဒါ အီ လှူ ဒီ ဇဝ်ဖြာ လုဝ် တဝ်း၊ ဒူအီ ဝီ တီ တူ ဆီငါ။ 26 မာလဲ၊ ဆေ ဟိုက် ကာဆိူဝ် တီ တူ လုယ်၊ ဒိမ် မိူဝ် တူ လူင် လိုက်၊ အာဝ် ဟူ ရေန့်၊ ဒါ အီ လှူ ဒီ ဇဝ်ဖြာ လုဝ် ခြွင့် အုန် ဒူအီ ဝီ တီ အာဒါ ဘူ ဆီငဲ။ 27 ဆေ ဟဲ့ ဟွတ့် နုဝ့် ဘူ ဆီငဲ၊ ဒါ အီ လှူ ဒီ ဇဝ်ဖြာ လုဝ် ဝီ ယွတ် ခဲမ် ပေါ အူ ဇေန့်။ ဆေ ကာဆိူဝ် ဒိမ် တီ ဟဲ့ ဘြဲ၊ အန် လုဝ် တဝ်း၊ ဒူအီ တီ တူ ဆီငါ။ 28 မာလဲ၊ ဆေ ကာဆိူဝ် တီ တူ ဘ့လိူင်၊ တူ ဘြဲ တာင်၊ အာဝ် ဟူ ရေန့်၊ န့ တူ မုး ရောဂါ အီ နပ် ဒီ ဘြဲ၊ နပ် ဒီ ဒိုက်။ ဒါ အီ လှူ ဒီ ဇဝ်ဖြာ ဟဲ့ ပွိုန် တဝ်း၊ ဒူအီ ဝီ တီ ဟဲ့ ဆီငါ။ ခုဝ်၊ န့ မုး ဒိမ် ဘ့လုး ဒီ ငဝ် ပီယေန့်။

29 ဆေ န့ မိုဝ်း အီဘိုန့် အီမာယ် အီ မိုဝ်း ဒူင် ဆဝ် ဒီ ဂိန့်၊ ဆဝ် ဒီ ကုင်ကာပ်၊ 30 ဒါ အီ လှူ ဒီ ဇဝ်ဖြာ လုဝ် ယွတ် ခဲမ်။ ဆေ ဟီ နှဲန် ဒီ ဆဝ် ခဲင် ယင်၊ ဟိုက် ကာဆိူဝ် တီ မိူဝ် ဒေန့် ဒေန့်၊ ဟိုက် ဂိန့် အန် မိူဝ် ဟာင်၊ န့ မုး ရောဂါ အီ နပ် ဒီ ဒိုက်၊ နပ် ဒီ ဘြဲ။ အန် လုဝ် တဝ်း၊ ဒူအီ ဝီ တီ တူ ဆီငါ။ 31 ဆေ ဒါ အီ လှူ ဒီ ဇဝ်ဖြာ ယီ ယွတ် ခဲမ် ကာဆိူဝ် တီ၊ ဆေ ဒိမ် တူ လူင် ခဲင် ယင်၊ ဟိုက် ယီ တူ ဝွင့်၊ အန် လုဝ် ဒိုဝ်း ခြွင့် ဒူအီ တီ အာဒါ ဘူ ဆီငဲ။ 32 ဆေ ဟီ နုဝ့် ဘူ ဆီငဲ၊ ဒါ အီ လှူ ဒီ ဇဝ်ဖြာ လုဝ် ဝီ ယွတ် ဆီချာ။ ဆေ ကာဆိူဝ် တီ အာဝ် ဟူ ဘြဲ တာင်၊ အာဝ် မိုဝ်း ဟိုက် ဒေန့်၊ အာဝ် နှဲန် ဒီ လူင် ခဲင် ယင်၊ 33 ဂေ လုဝ် ဂါ့ ဝဲန် ဟိုက် ဂိန့် အန် တီ။ ဒါ အီ လှူ ဒီ ဇဝ်ဖြာ လုဝ် ဝီ ခြွင့် အုန် အန် ပေါ ဘူ ဆီငဲ။ 34 ဆေ ယီ နုဝ့် ဘူ ဆီငဲ တီ၊ ဒါ အီ လှူ ဒီ ဇဝ်ဖြာ လုဝ် ဝီ ယွတ် ကာဆိူဝ် ဒိမ်၊ ကာဆိူဝ် ဆဝ် တီ ပေါ အူ ဇေန့်။ ဆေ အာဝ် နှဲန် ဒီ ဘြဲ တာင်၊ အာဝ် နှဲန် ဒီ လူင် ခဲင် ယင် ခဲင် ဟုန်၊ အန် ဟဲ့ ပွိုန် တဝ်း၊ ဒူအီ တီ ဟဲ့ ဆီငါ။ 35 မာလဲ၊ ဝါယ် ဟဲ့ ဟွတ့် တဝ်း ဒါ အီ လှူ ဒီ ဇဝ်ဖြာ၊ ဒူအီ တီ ဟဲ့ ဆီငါ၊ ဆေ ဒိမ် အန် တီ ဝီ ဘြဲ တာင်၊ 36 ဒါ အီ လှူ ဒီ ဇဝ်ဖြာ လုဝ် ဝီ ယွတ် ပေါ အူ ဇေန့်။ ဆေ ဒိမ် အန် တီ ဟဲ့ ဘြဲ တာင်၊ အာဝ် ဟူ လုဝ် ယွတ် ယုဝ် ဟိုက် ဒေန့် တူ ဒေန့်။ ဟဲ့ ပွိုန် တဝ်း၊ ဒူအီ ဝီ တီ တူ ဆီငါ။ 37 မာလဲ၊ ဆေ ဒါ အီ လှူ ဒီ ဇဝ်ဖြာ ထာင်၊ ဒိမ် အန် တီ အာဝ် ဟူ ဘြဲ တာင်၊ ဟိုက် အီ ဝွင့် ယီ ဆီ လတ့်၊ ဒိမ် တီ မိူဝ် ဟဲ့ ကဲန်။ ဒါ အီ လှူ ဒီ ဇဝ်ဖြာ ဟဲ့ ပွိုန် တဝ်း၊ ဒူအီ တီ ဟဲ့ ဆီငါ။

38 ဆေ အီဘိုန့် အီမာယ် မိုဝ်း ဒူင် အီ လုယ် ဒီ ဟုန် အန် ဘဲန် ပ့လုဝ့် ဘဲန် ပ့လုဝ့်၊ ဒါ အီ လှူ ဒီ ဇဝ်ဖြာ လုဝ် ယွတ် ခဲမ်။ 39 ဆေ ကာဆိူဝ် တီ ယီ ဂး လုယ်၊ န့ မုး လူဖွိုက်။ ဒူအီ ဝီ တီ ဟဲ့ ဆီငါ။

40 ဆေ န့ မိုဝ်း ဒူအီ ဟိုက် ဂိန့် အန် န့ ထဲ၊ ဘဲန် ဂိန့် ဂ့လ၊ ဒူအီ တီ ဟဲ့ ဆီငါ။ 41 ဆေ ဂိန့် ဂ့လ ဒီ ကာတဝ်း၊ ဒူအီ တီ ဟဲ့ ဆီငါ။

42 မာလဲ၊ ဆေ ဒိမ် လုယ် ရေန့် ဝီ လေး ကာဆိူဝ် ဂ့လ ဒီ ဂိန့် အန် ဘော ဒီ ကာတဝ်း တီ၊ န့ မုး ရောဂါ အီ နပ် ဒီ ဒိုက်၊ နပ် ဒီ ဘြဲ။ 43 ဒါ အီ လှူ ဒီ ဇဝ်ဖြာ လုဝ် ဝီ ယွတ် ခဲမ်။ ဆေ ကာဆိူဝ် ဆဝ် တီ ဟဲ့ လုယ် ရေန့် ဒီ ဂိန့် ဂ့လ ဘော ဒီ ကာတဝ်း ဂ့လ အန်၊ ဆေ န့ ပီ ရောဂါ အီ လေး ဒီ ဟုန် တွိုန်၊ 44 ဒါ အီ လှူ ဒီ ဇဝ်ဖြာ လုဝ် တဝ်း၊ ဒူအီ တီ တူ ဆီငါ။

45 ဒူအီ အီ မိုဝ်း ဒိမ် ဒီ ဟုန်၊ အီ နပ် ဒီ ဘြဲ၊ နပ် ဒီ ဒိုက် တီ၊ အန် လုဝ် တာ ခြိုင် လှုး၊ ခြိုင် ကာပျာတ့်။ အန် လုဝ် ဘ့လေး ဟိုက် ဂိန့် အန် ပါယ် တီ တူ စး။ အန် လုဝ် ကာဘိတ် မူတ့် အန် ဘော ဒတ် တဝ်း၊ ‘အုဝ် တူ ဆီငါ။ အုဝ် တူ ဆီငါ။’ 46 အန် ဒီ ဘဲန် ဒူအီ တူ ဆီငါ စုဝ် မိုဝ်း အန် ရောဂါ တီ။ အန် လုဝ် ကွယ် အန် အူ ဝီ၊ ကွယ် နာ ရေတ့် ဒူင် ချ၊ အာဝ် ပွိုန် ကွယ် ရိုမ် ဒူပ် အီ ဟဝ်။”

47 ဇဝ်ဖြာ ပီ ဝီ တဝ်း၊ “ဆေ ခြိုင် တာ ဘေ မိုဝ်း ကာဒိး၊ ဘော မုး ခြိုင် ဟိုက် မာဘူ ဘော မုး ခြိုင် ကာတမ် လုယ်၊ 48 န့ ဘော မုး ပီ ဒဝ့် ပီ ဒါန့် ဘေ ဘော မုး ဆေန့် ဘိက် ဘော ဆေန့် ဟိုက် မာဘူ ဘော မုး ခြိုင် မျုဝ် အီ ဘူင် တာ ဟုန်၊ 49 ဆေ ကာဒိး အန် ဘော ဘုဝ် ဘဲန် ဒီ ခြိုင် တာ၊ ဆေ န့ ဝီ ကာငျီန် ကာငျီန် ဘော ရေန့် ရေန့်၊ ဇိုဝ် တီ ဟဲ့ မုး တူတ့် ရောဂါ ကာဒိး။ ဘေ လုဝ် ဟာဝ် ဘျ ကြုဝ် တီ ဒီ ဒါ အီ လှူ ဒီ ဇဝ်ဖြာ။ 50 ဒါ အီ လှူ ဒီ ဇဝ်ဖြာ လုဝ် ယွတ် ခဲမ် ခြိုင် အီ ကာဒိး တီ၊ လုဝ် အုန် အာဒါ ဘူ ဆီငဲ။ 51 ဆေ ဟဲ့ နုဝ့် ဘူ ဆီငဲ၊ ဒါ အီ လှူ ဒီ ဇဝ်ဖြာ လုဝ် ဝီ ယွတ် ခဲမ် ပေါ အူ ဇေန့်။ ဆေ ကာဒိး တီ ဟဲ့ ဝဲ ဘြဲ တာင်၊ ခြိုင် တီ အာဝ် ဟူ ဆီငါ။ 52 ဒါ အီ လှူ ဒီ ဇဝ်ဖြာ လုဝ် ဒုဝ့် ဝဲန် ခဲင် ငဝ် ကူပ် ဟဲ့ မိုဝ်း အန် ကာဒိး အီ နပ် ဒီ ဘဲန် နာ တူ မွှိုမ် ဒီ အီ။

53 ဆေ ဒါ အီ လှူ ဒီ ဇဝ်ဖြာ ဟဲ့ ဟွတ့် ယွတ် ခဲမ်၊ ဟဲ့ နပ် ရောဂါ တီ တူ ဘြဲ ဒီ ခြိုင် တာ ဇိုဝ် တီ၊ 54 အန် လုဝ် ကာလာင်၊ တဲး ဂေ လး ခြိုင် တီ။ ဟဲ့ ဟွတ့်၊ ပီ ဝီ အုန် ပေါ ဘူ ဆီငဲ။ 55 ဟဲ့ ဟွတ့် ပန် တီ ဒါ အီ လှူ ဒီ ဇဝ်ဖြာ လုဝ် ဝီ ယွတ်။ ဆေ ကာဆိူဝ် ကာဒိး တီ ဆီ မိုဝ်း၊ အာဝ် ဘ့လိူင်၊ ယီ တူ တာင် လွှိုမ် ဘြိမ်၊ ခြိုင် တီ တူ ဆီငါ။ ကာဆိူဝ် ကာဒိး ခြိုင် တီ ဘော ကွယ် နာ မှဝ်၊ လုဝ် ဒုဝ့် ဝဲန် ခဲင် ငဝ်။ 56 ဆေ ဒါ အီ လှူ ဒီ ဇဝ်ဖြာ ဟဲ့ ဟွတ့် ယွတ် ခဲမ် ဝါယ် ဟဲ့ ဟွတ့် လး ခြိုင် တီ၊ ဆေ ကာဒိး တီ ဟဲ့ ယူမ် လူင်၊ လုဝ် ကာယာတ့် ဝဲန် ကာဆိူဝ် ကာဒိး တီ။ 57 ဆေ ကာဆိူဝ် ကာဒိး တီ ဝီ ဘြဲ တာင် ဒီ ခြိုင် တွိုန်၊ ဒါ ကာညာ အန် လုဝ် ဒုဝ့် ဝဲန် ခဲင် ငဝ်။ 58 မာလဲ၊ ဆေ ဟဲ့ ဟွတ့် လး ခြိုင် အီ မိုဝ်း ကာဒိး တီ၊ ဆေ ကာဒိး တီ မိူဝ် ဟဲ့ ဟြာယ်၊ အန် ပီ ဝီ လုဝ် လး ပေါ အူ ဇေန့်။ ဟဲ့ ဟွတ့်၊ ခြိုင် တီ ဟဲ့ ဝီ ဆီငါ။”

59 အာနီ န့ မုး ဒါရာ လွင် ရောဂါ ခြိုင် ကာဒိး၊ အီ နပ် ဒီ ဘုဝ် ဘဲန် ဒီ ခြိုင် ဟိုက် မာဘူ ဂေ ခြိုင် ကာတမ် လုယ် ဘော ဒီ ခြိုင် ပီ ဒဝ့် ပီ ဒါန့် ဘော ဒီ ခြိုင် ပီ ဘူင် ဂေ တာ ဟုန် ဒုဝ် ဆတ်။ န့ မုး ဒါရာ တဲး အီ နပ်၊ အာ မှဝ် ဟဲ့ ဆီငါ၊ အာ မှဝ် တူ ဆီငါ။