1 ဇဝ်ဖြာ ပီ ဝီ စ်ု အာမုဝ်ဆဲ၊ 2 တဲး အန် ဝီ ကာလာင် ဒီ ဂေ ဒူအီ အီဆာရေလ တဝ်း၊ “ဆေ အီဘိုန့် အီ ဟဲ့ ဒဲ ဘာဒိက် ဆန်ထေ မိုဝ်း ဂွန် အီမာယ်၊ အန် တူ ဆီငါ ဘွတ် အာဒါ ဘူ ဆီငဲ။ န့ ဒီ ပီ ဒေါ တူ ဆီငါ ဘွတ် အန် ဒေါ မိုဝ်း အန် ခြိုင် ကာပ့လု။ 3 ဆေ ဟီ နုဝ့် ဒါ ဆီငဲ၊ ဂေ လုဝ် ဆွာ့ ဝဲန် ဟုန် လခါနာ ဂွန် အီမာယ် တီ။ 4 ဝါယ် အန် တီ အီဘိုန့် တီ လုဝ် ကွယ် ဘော အူယ် ဂိုဝ် ဒီ အူယ် ဆီငဲ၊ တဲး ဒုဝ် ဘူင့် အန် ကော ဟေန့် ဆီချာ။ ဒေါ အန် တီ အန် တူ ပွိုန် ဒိုဝ်၊ တူ ပွိုန် ပါ မာဆေ အီ ဆီငါ ဘွတ်။ ခဲင် ဒူင် ဘွတ် အီ မုး ဒူင် ကြိုပ် ဂေ ဒီ ဇဝ်ဖြာ မိူဝ်၊ အန် တူ ပွိုန် ဟာဝ်။ အန် လုဝ် ဘ်ု၊ တဲး ဒုဝ် အန် ဝီ ဆီငါ၊ တဲး န့ ကော နုဝ့် ဆီငဲ တီ။ 5 ဆေ အန် ဘော ဂွိုတ် ဂွန် အီဘိုန့်၊ ဂိုဝ် ဒီ ဖွုန် ဆီငဲ အန် တူ ဆီငါ ပီ ဒေါ မိုဝ်း အန် ခြိုင် ကာပ့လု။ ဟဲ့ ဟွတ့်၊ အန် လုဝ် ကွယ် ဘော ဒဝ် ဂိုဝ် ဒီ ဒဝ် ဆီငဲ၊ တဲး ဒုဝ် ဘူင့် အန် ကော ဟေန့် ဆီချာ။

6 ဒေါ ဟဲ့ ဟွတ့် ပွုန် ဆီငဲ တူ ဆီငါ အန်၊ ဘော မုး ဂွန် အီဘိုန့် ဂွန် အီမာယ်၊ ဟဲ့ ဟွတ့် ဘြေ့ ဆီငဲ အန်၊ အန် လုဝ် ဒိုဝ်း ဂွန် မာဘူ အူ ဒုဝ် အီ ညှမ် နုဝ့် အူ ဆီနမ်၊ တဲး န့ ဘဲန် ပီ ဒီ လှူ အီ ဒုဝ့် ဒီ ငဝ်။ အန် လုဝ် ဒိုဝ်း ဘော မာဘ့လူယ် အူ ဒုဝ်။ ဆေ အာဝ် ပါယ် တီ လုဝ် ဒိုဝ်း မာဘ့လူယ် ပြဲ အူ ဒုဝ်၊ တဲး န့ ဘဲန် ပီ ဒီ လှူ အီ တဲး ဇဝ်ဖြာ ဂဝ်း ဝဲန် မှာပ်။ အန် ဘော လုဝ် ဒိုဝ်း တး ဒွါ တူတ့် ဒီ ဒါ အီ လှူ ဒီ ဇဝ်ဖြာ ဒီ ဘာင် မာလုဝ်း ထိုပ် ဘိက် ဘွတ်၊ တဲး အန် လှူ။ 7 ဒါ အီ လှူ ဒီ ဇဝ်ဖြာ လုဝ် ဒိုဝ်း ပီ လှူ အီဘိုန့် တီ၊ ဝီ လှူ ဒီ ဇဝ်ဖြာ၊ တဲး အန် ဝီ ကာလဝ့် ဒီ ဇဝ်ဖြာ၊ တဲး ဒုဝ် ဘူင့် အန် ဝီ ဆီငါ။ အာတီ မုး ဒါရာ လွင် အီဘိုန့် အီ ဟဲ့ ဟွတ့် ဂွိုတ် ဂွန်။

8 ဆေ အီဘိုန့် တီ တူ မိုဝ်း ဂွန် မာဘူ၊ အန် လုဝ် ဒိုဝ်း မာဘ့လူယ် အာ ဒုဝ်။ ဆေ အာဝ် မိုဝ်း မာဘ့လူယ်၊ အန် လုဝ် ဒိုဝ်း မာဘ့လူယ် ပြဲ အာ ဒုဝ်။ တဲး န့ ဘဲန် ပီ ဒီ လှူ အီ ဒုဝ့် ဒီ ငဝ် အူ ဒုဝ်။ ပေါ အူ ဒုဝ် တဲး န့ ဘဲန် ပီ ဒီ လှူ အီ တဲး ဇဝ်ဖြာ ဂဝ်း ဝဲန် မှာပ်။ ဒါ အီ လှူ ဒီ ဇဝ်ဖြာ လုဝ် လှူ ပီ လှူ တီ၊ တဲး အီဘိုန့် တွိုန် ဝီ ကာလဝ့် ဒီ ဇဝ်ဖြာ၊ တဲး အန် ဝီ ဆီငါ ဘွတ် ဒူပ် ပီ ဒမ် ဒါရာ။ ဟီ ဟွတ့် လှူ ပါယ် တီ အန် ဘော ဝီ ဆီငါ။”