1 ဇဝ်ဖြာ ဝီ စ်ု အာမုဝ်ဆဲ ဂါယ် အာရူန်၊ 2 တဲး ဂါယ် ဝီ ကာလာင် ဒီ ဂေ ဒူအီ အီဆာရေလ တဝ်း၊ “ဒုဝ် ဆတ် အီ ကွယ် ဒဲင် ကာဒါယ် နီ၊ အာဝ် မုး ဒွန် မျုဝ် ဘေ ဟဲ့ ပွိုန် ဟူမ်။ 3 ခဲ့ ဘော မိုဝ်း ဒုဝ် ဆတ် အီ မိုဝ်း ဂိပ် ရာ ဘော နပ် ဒီ ဆုဝ်း ပီ ဟူမ် အန်၊ ဇိုဝ် တီ ဒွန် မျုဝ် ဘေ ဟဲ့ ပွိုန် ဟူမ်။

4 မာလဲ ပီ ဘော တဝ်း ပါယ် တီ မိူဝ်၊ ဒုဝ် အီ ဆုဝ်း ပီ ဟူမ် အန်၊ ဂိပ် အန် ယီ တူ ရာ ဘော ဒုဝ် အီ မိုဝ်း ဂိပ် ရာ ယီ တူ ဆုဝ်း ပီ ဟူမ် အန် အာဝ် ပွိုန် ဟူမ်။ ဆေ န့ မုး မင်ပြွင့် ကာဟာတ့်၊ အန် ဟဲ့ ဆုဝ်း ပီ ဟူမ် အန်၊ ဂိပ် အန် ယီ တူ ရာ။ ခုဝ်၊ အာဝ် ပွိုန် ဟူမ်၊ န့ တူ ဆီငါ ဘွတ် ဒီ ဘေ။ 5 မာယုန် ပြဲ မိူဝ်၊ အန် ဟဲ့ ဆုဝ်း ပီ ဟူမ် အန်၊ အန် ယီ တူ မိုဝ်း ဂိပ် အီ ရာ။ ခုဝ်၊ န့ တူ ဆီငါ ဒီ ဘေ။ 6 မာ အာယုန် မိူဝ်၊ ဟဲ့ ဆုဝ်း ပီ ဟူမ် အန်၊ ယီ တူ မိုဝ်း ဂိပ် အီ ရာ။ ဘော အာတီ အာဝ် ဆီငါ ဒီ ဘေ။ 7 ဘော မာလေတ့်၊ ဂိပ် အန် ပီ ဘော ဟဲ့ ရာ၊ အန် ယီ တူ ဆုဝ်း ပီ ဟူမ် အန်။ ခုဝ်၊ န့ ဘဲန် အီ တူ ဆီငါ ဒီ ဘေ။ ကွဲ့ တဲး ဘေ ဟူမ်။ 8 ယင် ဒုဝ် ဆတ် ဇိုဝ် တီ၊ ဘေ တူ ပွိုန် ဟူမ်။ ဒုဝ် ယမ် ဂေ မိူဝ်၊ ဘေ ကွဲ့ ဒိုဝ်။ န့ ဘဲန် အီ တူ ဆီငါ ဒီ ဘေ။ 9 ခဲ့ ကွယ် ဒုဝ် ခဲင် အိုမ် မိူဝ်၊ မျုဝ် အီ မိုဝ်း ကုက် ဂေ ဂဲတ်၊ ဟဲ့ မွှိုမ် ဟူမ် ဒွန် မျုဝ်။ 10 ခဲ့ ကွယ် ဒုဝ် အီ မိုဝ်း ဖွိုမ် ဘဲန် မျုဝ် ဘဲန် မျုဝ် အီ ကွယ် ခဲင် အိုမ်၊ အီ တူ မိုဝ်း ကုက် ဂေ ဂဲတ်၊ န့ ဘဲန် တူတ့် အီ မွှိုမ် ကာအိး၊ မွှိုမ် ကာဒါတ့် ဒီ ဘေ။ 11 ဘေ လုဝ် မာတ် န့ ဘဲန် အီ တူ ဆီငါ။ ယင် မိူဝ်၊ အာဝ် လုဝ် ဟူမ်။ ဒုဝ် ယမ် မိူဝ်၊ ဘေ ကွဲ့ ဒိုဝ်၊ ကွဲ့ ပါ ဒေါ မှဝ်။ 12 ခဲ့ ကွယ် ဒုဝ် အီ မိုဝ်း ဖွိုမ် အီ ကွယ် ခဲင် အိုမ်၊ အီ တူ မိုဝ်း ကုက် ဂေ ဂဲတ်၊ န့ ဘဲန် အီ မွှိုမ် ကာအိး ဒီ ဘေ။

13 အာမျုဝ် မာဆိမ် ပီ တူ ပွိုန် ဟူမ် ဘေ၊ အီ မွှိုမ် ကာအိး မွှိုမ် ကာဒါတ့် ဒီ ဘေ န့ ဘော မုး မာလင်ဒါ၊ မာဂ့လာင် တာင်၊ မာတီတုတ်၊ 14 မာဂ့လာင် ဒွန် မျုဝ်၊ 15 မာကာအ ဒွန် မျုဝ်၊ 16 မာဒီဘုဝ့် ဒွန် မျုဝ်၊ 17 မာဆိမ် ကဲဝက်၊ 18 မာဘေပ် ကာကာ၊ မာတီတုတ် ဘော မာလင်ဒါ အီ ဟူမ် ဒုဝ် အီ ဟဲ့ ဟွတ့် ယမ်၊ 19 မာနူက်ကွန်၊ မာနူက်ကျာင်၊ မာပြာန့် ဘော မာကာလ။

20 ဘော မာဝ မျုဝ် အီ မိုဝ်း ဖျီင် ဘော နပ် ဒီ မွိုန် ဟာဝ်၊ အီ မိုဝ်း ဖွုန် ပ့လဝ် ဒွန် မျုဝ်၊ န့ ဘဲန် တူတ့် အီ မွှိုမ် ကာဒါတ့် ဒီ ဘေ။ 21 မာလဲ၊ န့ မိုဝ်း မာဝ မင် မျုဝ် အီ မိုဝ်း ဖျီင် ဘော တာ ပ့လဝ် ဂေ၊ နပ် ဒီ ဒဲန် နပ် ဒီ ဒန့်၊ ဇိုဝ် တီ ဘေ ဟဲ့ ပွိုန် ဟူမ်။ 22 န့ ဘော မုး မာအာမူင့်၊ မာအာဇူင့်၊ မာအာတွန် ဘော မာအာမူင့် ငျီန်။ ဇိုဝ် တီ ဒွန် မျုဝ်၊ ဘေ ဟဲ့ ပွိုန် ဟူမ်။ 23 မာလဲ၊ မာဝ အီ မိုဝ်း ဖျီင်၊ အီ မွိုန် ဖွုန် ပ့လဝ်၊ ဒွန် မျုဝ် ဟဲ့ ဘဲန် တူတ့် အီ မွှိုမ် ကာအိး ဒီ ဘေ။

24 ပါယ် တီ ခဲ့ ကွယ် ဒုဝ် ဆတ် ပဲ့ ဟဲ့ ကာလာင် တီ ဒွန် မျုဝ်၊ ဂေ ဘော နပ် ဒီ တဲး ဘေ တူ ဆီငါ။ အာဆေ တာ ဒိုဝ်၊ တာ ပါ ဒုဝ် ယမ် ဂေ တီ၊ ဘော အန် တူ ဆီငါ ဇမ် ဘာ ဒီ အပ်။ 25 အာဆေ ပါ ဒုဝ် ဆတ် ဇိုဝ် တီ အီ ဟဲ့ ယမ်၊ အန် လုဝ် ဝီ ဘာယ် ဝဲန်၊ လး ဘော ခြိုင် ပီ တာ အန်။ ဘော ဒုဝ် အန် အာဝ် ဟူ ဆီငါ ဇမ် ဘာ ဒီ အပ်။

26 ဒုဝ် ဆတ် အီ မိုဝ်း ဂိပ်၊ ယီ တူ ရာ ဆီချာ ဘော တူ ဆုဝ်း ပီ ဟူမ် အန်၊ န့ ဘဲန် အီ တူ ဆီငါ ဘွတ် ဒီ ဘေ။ အာဆေ တာ ဒိုဝ် ဒုဝ် ယမ် ဂေ၊ ဘော အန် အာဝ် ဟူ ဆီငါ ဘွတ်။ 27 ခဲင် ဒုဝ် ဆတ် ဖွုန် ပ့လဝ် တီ၊ ဒုဝ် အီ ဇာပ် ဟာဝ် ဒီ ကာဘာ ပ့လဝ် အန်၊ ဇိုဝ် တီ ဒွန် မျုဝ် အာဝ် ဆီငါ အာဝ် ဘွတ် ဒီ ဘေ။ အာဆေ တာ ဒိုဝ် တာ ပါ ဒုဝ် ယမ် ဂေ၊ ဘော အန် အာဝ် ဟူ ဆီငါ ဇမ် ဘာ ဒီ အပ်။ 28 အာဆေ ပါ ဒုဝ် ယမ် ဆတ် ဇိုဝ် တီ၊ အန် လုဝ် ဝီ ဘာယ် ဝဲန်၊ ဝီ လး ခြိုင် ပီ တာ အန်။ အန် အာဝ် ဟူ ဆီငါ ဘွတ် ဇမ် ဘာ ဒီ အပ်။ ဒုဝ် ဆတ် ဇိုဝ် တီ၊ အာဝ် ဆီငါ၊ အာဝ် ဘွတ် ဒီ ဘေ။

29 ဒုဝ် ဆတ် အီ မွိုန် ဒဲင် ကာဒါယ် နီ၊ အီ တူ ဆီငါ ဘွတ် ဒီ ဘေ၊ န့ ဘော မုး မာဘုယ်၊ မာနှာယ်၊ မာရွင့်ကာင် ဒွန် မျုဝ်၊ 30 မာတွက့်ကဲ၊ မာလဲန်၊ မာအာပ့လျီ့၊ မာကာပိုဝ် ဘော မာအာဂူယ်။ 31 ဒုဝ် အီ မွိုန် ဇိုဝ် တီ ဒွန် မျုဝ်၊ အာဝ် ဆီငါ ဒီ ဘေ။ အာဆေ တာ ဒိုဝ် တာ ပါ ဒုဝ် ယမ် ဆတ် ဇိုဝ် တီ၊ အန် အာဝ် ဟူ ဆီငါ ဇမ် ဘာ ဒီ အပ်။ 32 ဆေ ဒုဝ် ယမ် ဆတ် ဇိုဝ် တီ ဟီ စုဝ်း ခဲင် ခြိုင် တာ မျုဝ် မှဝ် အာဝ် တဝ်း၊ မျုဝ် တီ ဟဲ့ ဟွတ့် ကာဒါတ့်၊ အာဝ် ဟူ ဆီငါ။ န့ ဘော မုး ခြိုင် တာ အီ မုး ဟေ၊ ဘော မုး ဘိက် ဂေ ဟုန် ဒုဝ် ဆတ်၊ ဘော မုး ကာတမ်၊ ခဲ့ ကွယ် ခြိုင် တာ ဒွန် မျုဝ် ဟဲ့ ဟွတ့် ဘဲန် တူတ့် အီ တူ ဆီငါ။ န့ လုဝ် စဲ ခဲင် အိုမ်။ အာဝ် ဟူ ဆီငါ ဇမ် ဘာ ဒီ အပ်။ ဝါယ် တီ၊ ဟဲ့ ဝီ ဆီငါ။ 33 ဆေ ဒုဝ် ယမ် ဇိုဝ် တီ စုဝ်း ခဲင် ကာလုဝ့်၊ ခဲင် ဆီလယ့် ကာဒါယ်၊ ခဲ့ ပီ မိုဝ်း အီ ကွယ် ခဲင် ကာလုဝ့် တီ၊ ဟဲ့ ဟွတ့် ကာဒါတ့် တူတ့်။ လုဝ် မး ကာလာတ့် ကာလုဝ့် ဂေ ဆီလယ့် တီ။ 34 ဆေ န့ မိုဝ်း အိုမ် အီ ဟဲ့ ကွယ် ခဲင် ကာလုဝ့် အီ တူ ဆီငါ၊ အိုမ် တီ ဝီ တာ ဒိုဝ် ပီ ဒီ ဟူမ် အီ မွှိုမ် ဟူမ်၊ န့ တဲး ဘော ပီ ဒီ ဟူမ် တီ ဘဲန် အီ ကာဒါတ့်။ ဘော အိုမ် ဒျီင် အီ ကွယ် ခဲင် ကာလုဝ့် ဘော ခဲင် ဆီလယ့် ဇိုဝ် တီ ဟဲ့ ဟွတ့် ကာဒါတ့် တူတ့်။ အာဝ် ဟူ ပွိုန် ဒျီင်။ 35 ခဲ့ ကွယ် ခြိုင် တာ ဒွန် မျုဝ်၊ ဆေ ဒုဝ် ယမ် ဇိုဝ် တီ စုဝ်း ဒိုဝ်၊ န့ ဘဲန် အီ တူ ဆီငါ။ ဘော မုး ကာဝှါင်၊ ဘော မုး ကာလုဝ့် ကာဒါယ်၊ ဟဲ့ ဟွတ့် ဘဲန် တူတ့် အီ တူ ဆီငါ။ န့ လုဝ် ပျာတ့် ဝဲန်၊ ဟဲ့ ဘဲန် အီ မွှိုမ် ကာအိး၊ မွှိုမ် ကာဒါတ့် ဒီ ဘေ။ 36 ဆေ န့ ယီ မုး အိုမ် တုဝ်း ဘော အိုမ် ခိုမ်၊ န့ တူ ဘဲန် အီ ကာဒါတ့်။ ဟဲ့ ဆီငါ တူတ့် ဒွန် မျုဝ်။ န့ မိုဝ်း မီ အီ တာ ဒိုဝ် ဒုဝ် ယမ် တီ၊ အန် တူ ဆီငါ။ 37 ဆေ ဒုဝ် ယမ် ဇိုဝ် တီ စုဝ်း ဒဲင် ခြိုင် ဆီမာ ပီ လုဝ် ဆမ် ဘေ၊ ခြိုင် ဆီမာ တီ၊ တူ ဘဲန် အီ ကာဒါတ့်။ 38 မာလဲ၊ ဆေ ဒုဝ် ယမ် တီ စုဝ်း ဒဲင် ခြိုင် ဆီမာ ပဲ့ ဟဲ့ စဲ အုန် ခဲင် အိုမ်၊ ခြိုင် ဆီမာ တီ ဟဲ့ ဟွတ့် ကာဒါတ့်၊ အာဝ် ဟူ ဆီငါ။

39 ဆေ န့ မုး ဒုဝ် ဆတ် ပီ ပွိုန် ဟူမ် ဘေ၊ ဆေ အန် ယီ ယမ်၊ အာဆေ ဘော တာ ဒိုဝ်၊ တာ ပါ ဒုဝ် ယမ် တီ၊ အန် အာဝ် ဟူ ဆီငါ ဇမ် ဘာ ဒီ အပ်။ 40 အာဆေ ယီ ဟူမ် ဒုဝ် ယမ် တီ၊ အန် လုဝ် ဝီ လး ခြိုင် အန်။ ဒုဝ် အန် မိူဝ်၊ အာဝ် ဟူ ဆီငါ ဇမ် ဘာ ဒီ အပ်။ အာဆေ ဒိုဝ်း ဟာဝ် ဝဲန် ဒုဝ် ယမ် တီ၊ ဘော အန် လုဝ် လး ခြိုင် အန်။ ဒုဝ် အန် မိူဝ်၊ အာဝ် ဟူ ဆီငါ ဇမ် ဘာ ဒီ အပ်။

41 ခဲ့ ကွယ် ဒုဝ် အီ မွိုန် ဒဲင် ကာဒါယ် နီ ဒွန် မျုဝ် ဟဲ့ မွှိုမ် ကာအိး၊ အာဝ် မွှိုမ် ဟူမ်။ 42 န့ ဘော မုး ဒုဝ် အီ လှန် ဟာဝ်၊ ဒုဝ် အီ မွိုန် ဟာဝ်၊ ဒုဝ် အီ ဟာဝ် ဖွုန် ပ့လဝ်၊ ဒုဝ် အီ ဟာဝ် ပ့လဝ် ကိူန်၊ န့ ဘဲန် တူတ့် အီ မွှိုမ် ကာအိး၊ ကွဲ့ တဲး ဘေ ဟူမ်။ 43 ဒုဝ် ဇိုဝ် တီ ဒွန် မျုဝ်၊ ကွဲ့ တဲး ဘေ ဟူမ်။ ကွဲ့ တဲး န့ ဘဲန် တူ ဆီငါ ဘွတ် ဒီ ဘေ။ 44 အုဝ် မုး အန် ဇဝ် အီ မုး ဇဝ်ဖြာ ပီ ကြိုပ် ဘေ။ အုဝ် ဟဲ့ ဆီငါ ဘွတ်။ ခုဝ်၊ ဘေ လုဝ် တဲး ဘော ဒုဝ် ဘေ ဘဲန် အီ ဆီငါ ဘွတ်။ ကွဲ့ တဲး ဒုဝ် အီ လှန် ဒဲင် ကာဒါယ် တီ ဘူင် တဲး ဘေ ဘဲန် အီ တူ ဆီငါ ဘွတ်။ 45 အုဝ် မုး ဇဝ်ဖြာ အီ ဟဲ့ ထုတ် လေး ဘေ ခဲင် မိူင် အဲဂိုပ်၊ တဲး အုဝ် ဘဲန် ဇဝ်ဖြာ ပီ ကြိုပ် ဘေ။ အုဝ် ဟဲ့ ဆီငါ ဘွတ်။ ခုဝ်၊ တဲး ဘော ဘေ ဘဲန် ဒူအီ အီ ဆီငါ ဘွတ်။

46 အာတီ န့ မုး ဒါရာ လွင် ဒုဝ် ဆတ်။ န့ ဘော မုး မာဆိမ်၊ ဒုဝ် ဆတ် အီ ကွယ် ခဲင် အိုမ် ဘော ဒုဝ် ဆတ် ဒွန် မျုဝ် အီ မိုဝ်း ဖွိုမ် အီ ကွယ် ဒဲင် ကာဒါယ် နီ၊ အုဝ် ဟဲ့ တဲး ဘေ နပ် မျုဝ် မှဝ် ဟဲ့ ဆီငါ ဘွတ် ဘော မျုဝ် မှဝ် အီ တူ ဆီငါ ဘွတ်။ 47 တဲး ဘေ နပ် ဒီ ကာယဝ်း ဒုဝ် အီ ဆီငါ ဘော ဒုဝ် အီ တူ ဆီငါ၊ တဲး ဘေ နပ် ဘော အီ မွှိုမ် ဟူမ်၊ အီ တူ မွှိုမ် ဟူမ်။”