1 ဂွန် အီမာယ် အာရူန် အီ စိူဝ် အာနာဒါပ် ဂါယ် အာဘီဟူ၊ ဂါယ် ဘော ဒိုဝ်း တး ဆီလယ့် ပီ ဒုဝ့် ဆီနမ် အုး ငှုန်၊ ဟပ် ဘော ငဝ် ဘော န့ကြိုဝ်း အုး ငှုန်၊ ဝီ လှူ ဒီ ဇဝ်ဖြာ။ ပီ လှူ ဂေ တီ အာဝ် မုး ငဝ် ပီ ဒမ် အုန် ဇဝ်ဖြာ တဲး ဂေ ဘူင်။ 2 ဇဝ်ဖြာ ဘော တဲး ငဝ် လေး ဒူင် ကွယ် အန်၊ တဲး န့ ကာဆိုမ် ယမ် ဂါယ် ဒီ အာတ့် ဇဝ်ဖြာ အူ ဇေန့်။ 3 ပန် တီ အာမုဝ်ဆဲ ဝီ တဝ်း ဒီ အာရူန်၊ “အာနီ ဟဲ့ မုး ပီ ကာလာင် အုန် ဇဝ်ဖြာ ဒေါ တဝ်း အန်၊ ‘ဂေ အီ ဘူင် ဂါန် အုဝ် ဒွန် မျုဝ်၊ ဂေ လုဝ် လှုဝ်း ခဲ့ ဆီငါ ဘွတ် အုဝ်။ အုဝ် ဒီ တဲး အာဖုင် ဒင်ခုဝ် အုဝ် လိုဝ်း ဆီချာ ဒီ ဒူအီ ဘောကာဂ့လျီတ်၊ တဲး ဂေ ရုဝ်ဆေ အုဝ်။’” ဟဲ့ ဟွတ့် ပါယ် တီ အာရူန် ဘော ကွယ် အာဝ် ဟူ ဂြုဝ်း။

4 အာမုဝ်ဆဲ ဘော ဒဲ့ အာမီဆာအေန် ဘော အာအေန်ဆာဖာန်၊ အီ မုး ဂွန် အာအူဆီအေန်။ အာအူဆီအေန် ဘော မုး ဂုန့် တဲ့ အာရူန် တွိုန်။ အန် တဝ်း ဒီ ဂါယ်၊ “တး ဒိုဝ်း ဒုဝ် ယမ် ဘီနွင် ဘာယ် လေး ဒီ အာတ့် ထိုပ် ဘိက် ဘွတ် နီ၊ ဟာဝ် နာ ရေတ့် ဒူင် ချ အေ နီ။” 5 ဂါယ် ဘော တး ဒိုဝ်း ဒုဝ် ယမ် ဂါယ် တီ ဒေါ ဆီ စှိုပ် ဂေ ဆီတုဝ် တုန် ဂေ၊ ဘော ကာယူင့် လေး ဂါယ် နာ ရေတ့်၊ တဲး န့ ဒူပ် ပီ တဝ်း အာမုဝ်ဆဲ တွိုန်။

6 ပန် တီ အာမုဝ်ဆဲ ဝီ ကာလာင် ဒီ အာရူန် ဂေ ဂွန် အန် အီ စိူဝ် အာလေအာဆာ ဂါယ် အာအီထာမာ တဝ်း၊ “အာဝ် လုဝ် ဘျ နဝ်း က့လိုဝ်၊ နဝ်း ငှဝ် ဘေ။ ဟိုက် ဂိန့် ဘေ၊ အာဝ် ပွိုန် တဲး န့ ကာဝှ်ု။ ခြိုင် ဘေ မိူဝ်၊ အာဝ် ပွိုန် ကာယာတ့်။ ဆေ ဘေ ဟီ ဘူင်၊ ယုဝ် ဘေ ယမ်၊ ယုဝ် ဇဝ်ဖြာ ဒီ ရူ ဘော ဒီ ဂေ ဒူအီ ကိူန်။ မာလဲ၊ ဂေ ဘီနွင် ဝေါဝဲ ဘေ ဘော ဂေ ဒူအီ အီဆာရေလ ဘောကာဂ့လျီတ်၊ ဂေ ဟဲ့ ပွိုန် က့လိုဝ်၊ ပွိုန် ငှဝ် ကူပ် ဟဲ့ တိုယ် ဇဝ်ဖြာ ငဝ် ကာဆိုမ် ယမ် ဂါယ် အာ ဝီ တီ။ 7 တဲး ဘေ ကွယ် ဒီ ဘာင် မာလုဝ်း ထိုပ် ဘိက် ဘွတ် နီ၊ ကွဲ့ လေး နာ ရေတ့်၊ ယုဝ် ဘေ ယမ်။ ခုဝ်၊ ဇဝ်ဖြာ ဟဲ့ ဟွတ့် ဖဝ်း နာမန် ဒီ ဂိန့် ဘေ။” အာမုဝ်ဆဲ ဟဲ့ ဟွတ့် ကာလာင် ဂြုဝ်း တီ၊ ဂေ ဘော ဘူင် ဒူပ် ပီ ကာလာင် အန်။

8 ဇဝ်ဖြာ ဝီ ကာလာင် ဒီ အာရူန် တဝ်း၊ 9 “ဆေ မဲ ဘော ဂွန် မဲ ဟဲ့ ဒျီင် အိုမ် မာငုန်၊ ဘော အိုမ် ပဝ်း အာမျုဝ် ဟဝ်၊ ဘေ တူ ပွိုန် လိုပ် ခဲင် ထိုပ် ဘိက် ဘွတ်၊ ယုဝ် ဘေ ဒီ ဘော ယမ်။ န့ မုး ဒါရာ ပီ လုဝ် ဒူပ် ဘေ ဆေဆေ ဒွန် စုဝ် ဒွန် ဘာန်။ 10 ဘေ လုဝ် နပ် ဒီ ကာယဝ်း၊ အာမျုဝ် မှဝ် အီ မုး အာဒါ ဇဝ်ဖြာ၊ အာမျုဝ် မှဝ် အီ မုး အာဒါ ဒူအီ။ ဘေ လုဝ် နပ် ဘော အာမျုဝ် မှဝ် မုး အီ ဆီငါ ဘွတ်၊ ဘော အာမျုဝ် မှဝ် မုး အီ တူ ဆီငါ ဘွတ်။ 11 ဒါရာ ပီ ဒွါ အုဝ် ဒီ အာမုဝ်ဆဲ၊ ပဲ့ ဟဲ့ ဝီ ကာလာင် အန် ဒီ မဲ ဒွန် မျုဝ်၊ မဲ လုဝ် ဝီ မာနုဝ် ဂေ ဒူအီ အီဆာရေလ ဘောကာဂ့လျီတ်။”

12 ပန် တီ အာမုဝ်ဆဲ ဝီ ကာလာင် ဒီ အာရူန် ဘော ဒီ ဂွန် အာရူန် အာ ဝီ အီ ဆီ ဂိတ် တွိုန်၊ အီ စိူဝ် အာလေအာဆာ ဂါယ် အာအီထာမာ။ အန် တဝ်း၊ “တဲး ဘေ ဒိုဝ်း တး ပီ ဒီ လှူ ဒီဂါဝ် ဘဲန် မျုဝ် ဘဲန် မျုဝ် အီ ဆီ ဂိတ် ဒီ ပီ လှူ အီ ဒုဝ့် ဒီ ငဝ် တွိုန်၊ တဲး ဘေ ဝီ ဘူင် ခါမုန် အီ တူ ဟပ် ဆီနမ် ဘြး၊ ဝီ ဟူမ် ခူပ် ကာစှူင့် လှူ။ ပီ လှူ တီ ဟဲ့ မုး အီ ဆီငါ ဘွတ် ကာဆဝ်။ 13 ဘေ လုဝ် ဟူမ် ခါမုန် တီ ဒီ ဒူင် ဆီငါ ဘွတ်။ ခုဝ်၊ န့ ဟဲ့ မုး ကြုဝ် ဘေ ဂွန် မဲ။ ဘေ ဟဲ့ ကာအာပ် ဟူမ် ခါမုန် တီ။ န့ မုး ဘုန် ဘေ ပီ ဒိုဝ်း လေး ဒီ ပီ လှူ အီ ဒုဝ့် ဒီ ငဝ်။ ဇဝ်ဖြာ ဟဲ့ ကာလာင် အုန် ဒီ အုဝ် ပါယ် တီ။ 14 န့ ဘော မုး ဘင်နဝ်း ဘော ဂိုမ် ပန် အီ ဟဲ့ ဟွတ့် မာဝတ် ဝိဝ် မာဝတ် ဝေန့် ဒီ အာတ့် ဇဝ်ဖြာ၊ န့ ဟဲ့ ဘဲန် ကြုဝ် ဒူအီ အီ လှူ ဒီ ဇဝ်ဖြာ။ ဘော ဂွန် အီမာယ် ဂွန် အီဘိုန့် မဲ ဟဲ့ ပွိုန် ဟူမ်။ ဘေ ယီ လုဝ် ဟူမ် ဒီ ဒူင် ဆီငါ ဘွတ်။ ခုဝ်၊ ပီ လှူ နီ ဟဲ့ ဒိုဝ်း လေး ခဲင် ပီ လှူ အီ ကွယ် ကာဇု ဟူမ် ရိုမ် အီ မုး ပီ လှူ ဂေ ဒူအီ အီဆာရေလ။ န့ ဟဲ့ ဘဲန် ကြုဝ် မဲ ဘော ကြုဝ် ဂေ လှုက်လှာန် မဲ။ 15 ဂိုမ် ပန် အီ ဟဲ့ ဟွတ့် အာပ် ဒီ ဇဝ်ဖြာ ဘော ဘင်နဝ်း အီ ဟဲ့ ဟွတ့် မာဝတ် ဝိဝ် မာဝတ် ဝေန့် ဘော ဘျြီင် အီ လုဝ် ဒုဝ့် ဒီ ငဝ်၊ ဘေ လုဝ် ဒိုဝ်း တူတ့်၊ မာဝတ် ဝိဝ် မာဝတ် ဝေန့် ဒီ အာတ့် ဇဝ်ဖြာ။ ဟဲ့ ဟွတ့်၊ ယင် တွိုန် ဘေ ဟဲ့ ပွိုန် ဟူမ်။ ဘော လှုက်လှာန် မဲ ပွိုန် ဟူမ် ယင် တီ၊ တဲး န့ ဒူပ် ပီ ကာလာင် အုန် ဇဝ်ဖြာ။”

16 ပန် တီ အာမုဝ်ဆဲ ဝီ ဒီမွှတ် လွင် မာပဲ အီ ဘဲန် ပီ လှူ အီ ဂဝ်း ဝဲန် မှာပ် တွိုန်။ အန် ကော နပ်၊ ဂေ ဟဲ့ ဟွတ့် ဒုဝ့် ကာဆိုမ် တူတ့်။ ကူပ် လွင် အန် တီ၊ အန် ဘော ရူ ဒီ အာလေအာဆာ ဂါယ် အာအီထာမာ အီ မုး ဂွန် အာရူန် အီ ဆီ ကွယ်။ အန် ဝီ တဝ်း ဒီ ဂါယ်၊ 17 “မှဝ် န့ ပါယ် ပီ တူ ဟူမ် ဘေ ပီ လှူ အီ တဲး ဇဝ်ဖြာ ဂဝ်း ဝဲန် မှာပ် တီ ဒီ ဝဲင် ထိုပ် ဘိက် ဘွတ် နီ။း ပီ ဒီ ဟူမ် တီ ဟဲ့ ဘွတ် ကာဆဝ်။ ပီ လှူ တီ အီ တဲး ဂေ ဒူအီ ဘောကာဂ့လျီတ် ဝီ ကာလဝ့် ဒီ ဇဝ်ဖြာ၊ အန် ဇဝ် ဟဲ့ ဒွါ ဒီ ဘေ ကူပ် လှူ ဘေ ဒါင် ဂေ။ 18 ကူပ် တူ ဒိုဝ်း ဘေ နှာမ် အန် ဟာဝ် ခဲင် ဟူင် အီ ဆီငါ ဘွတ်၊ ဘေ ဟဲ့ ကာအာပ် ဟူမ် ပီ လှူ တီ ဒီ နီ၊ တဲး န့ ဒူပ် ပဲ့ ဟဲ့ ဒမ် အုန် အုဝ်။”

19 အာရူန် ဝီ တဝ်း ဒီ အာမုဝ်ဆဲ၊ “အာတိုဝ် နီ၊ ဂေ ဒူအီ ကိူန် ဟဲ့ ဟွတ့် လှူ ပီ ဒီ လှူ အီ ဂဝ်း ဝဲန် မှာပ်။ ဟဲ့ လှူ ဘော ပီ ဒီ လှူ အီ ဒုဝ့် ဒီ ငဝ် ဒီ ဇဝ်ဖြာ။ ကူပ် အီ ဒုက် အီ ညှာပ် တီ အီ ဟဲ့ ဟွတ့် ဇမ် ဒီ အုဝ် အာတိုဝ်၊ အုဝ် ထာင်၊ ဇဝ်ဖြာ နှဲန် တူ အိုင် ဆေ အုဝ် ဟူမ် ပီ ဒီ လှူ အီ တဲး ဇဝ်ဖြာ ဂဝ်း ဝဲန် မှာပ် အီ။”

20 အာမုဝ်ဆဲ ဘော ယိုဝ် ဂြုဝ်း တီ၊ န့ ဘော ကာလှုး ဒီ နဝ်း အန်။