1 န့ ဘော ဇမ် ဆီငဲ န့ဒါ၊ အာမုဝ်ဆဲ ဘော ဒဲ့ ကာဇု အာရူန် ဂေ ဂွန် အန် ဘော ဂေ ဒါ တာင် ဒူအီ အီဆာရေလ ဒွန် အီ။

2 အန် တဝ်း ဒီ အာရူန်၊ “တဲး မဲ ဒိုဝ်း ဂွန် မက် အာလူင့် အူ ဒုဝ်၊ တဲး န့ ဘဲန် ပီ ဒီ လှူ အီ ဂဝ်း ဝဲန် မှာပ်။ ဒိုဝ်း ဘော ဂွန် မာဘူ အာလူင့် အူ ဒုဝ်၊ တဲး န့ ဘဲန် ပီ ဒီ လှူ အီ ဒုဝ့် ဒီ ငဝ်။ ဘော အာ ဒုဝ် တီ၊ ကွဲ့ တဲး န့ မိုဝ်း ဒူင် စှေ ဒူင် နဲ၊ တဲး မဲ လှူ ဒီ ဇဝ်ဖြာ။

3 တဲး မဲ ဝီ ကာလာင် ဒီ ဂေ ဒူအီ အီဆာရေလ တဝ်း၊ ‘တဲး ဘေ ဒိုဝ်း ဂွန် မာပဲ အူ ဒုဝ်၊ တဲး န့ ဘဲန် ပီ ဒီ လှူ အီ ဂဝ်း ဝဲန် မှာပ်။ တဲး ဘေ ဒိုဝ်း ဘော ဂွန် မာမက် အူ ဒုဝ် ဘော ဂွန် မာဘူ အူ ဒုဝ် အီ တူ မိုဝ်း ဒူင် စှေ ဒူင် နဲ၊ အီ ညှမ် နုဝ့် အူ ဆီနမ်၊ တဲး န့ ဘဲန် ပီ ဒီ လှူ အီ ဒုဝ့် ဒီ ငဝ်။

4 ဒိုဝ်း ဘော မက် အာလူင့် အူ ဒုဝ်၊ မာဘူ အာလူင့် အူ ဒုဝ်၊ တဲး န့ ဘဲန် ပီ ဒီ လှူ ဒီ ဇဝ်ဖြာ အီ ကွယ် ကာဇု ဟူမ် ရိုမ်။ လှူ ဘော ဒီဂါဝ် ဘဲန် မျုဝ် ဘဲန် မျုဝ် အီ ဟဲ့ ကာဝ်ု နာမန်။ ခုဝ်၊ ဇဝ်ဖြာ ဒီ တး ကာပ့လုး ဒီ ဘေ အာတိုဝ် နီ။’”

5 ဟဲ့ ဟွတ့် ကာလာင်၊ ဂေ ဘော ဒိုဝ်း တး ခဲ့ ပီ ဒမ် အုန် အာမုဝ်ဆဲ ဒီ ဂေ၊ ဒိုဝ်း တး ဒီ အာတ့် ထိုပ် ဘိက် ဘွတ်။ ခဲ့ ကွယ် ဂေ ဒွန် အီ ဘော တး ကွယ် ကာဇု ကြိုပ် ဇဝ်ဖြာ။

6 အာမုဝ်ဆဲ မိူဝ် တဝ်း၊ “ဇဝ်ဖြာ ဟဲ့ ကာလာင် တဲး ဘေ ဘူင် ပါယ် နီ၊ တဲး အာဖုင် ဒင်ခုဝ် ဇဝ်ဖြာ ဘော လိုဝ်း ဆီချာ ဒီ ဘေ။”

7 ပန် တီ အာမုဝ်ဆဲ ဝီ တဝ်း ဒီ အာရူန်၊ “တဲး မဲ ဟာဝ် ဒီ ကာစှူင့် လှူ၊ တဲး မဲ လှူ ပီ ဒီ လှူ အီ ဒုဝ့် ဒီ ငဝ်၊ တဲး ဘော မဲ ဘော ဒူအီ ကိူန် ဝီ ကာလဝ့် ဒီ ဇဝ်ဖြာ၊ တဲး ဇဝ်ဖြာ ဂဝ်း ဝဲန် မှာပ် မဲ ဘော မှာပ် ဂေ ဒူအီ ဘောကာဂ့လျီတ်။ တဲး မဲ လှူ ဘော ပီ ဒီ လှူ ပီ ဒိုဝ်း တး ဒူအီ ဂေ တီ၊ တဲး ဇဝ်ဖြာ ဂဝ်း ဝဲန် မှာပ် ဂေ၊ တဲး န့ ဒူပ် ပီ ကာလာင် အုန် ဇဝ်ဖြာ။”

8 အာရူန် မိူဝ် ဟာဝ် ဒီ ကာစှူင့် လှူ၊ ဆွာ့ မဲင် ဂွန် မက် အာလူင့်၊ တဲး န့ ဘဲန် ပီ ဒီ လှူ အီ တဲး ဇဝ်ဖြာ ဂဝ်း ဝဲန် မှာပ် အန်။

9 ဂေ ဂွန် အာရူန် ဘော ဒိုဝ်း တး နှာမ် မက် တီ၊ ဒွါ ဒီ အန်။ အန် ဘော စိုပ် ကာနူ အန် ခဲင် နှာမ် တီ၊ ဝီ ဖဝ်း ဒီ ကာတူတ့် ဘတ့် အီ ကွယ် ဒီ ဖွုန် ကာတုဝ့် ကာစှူင့် လှူ တွိုန်။ နှာမ် အီ ဆီ ဂိတ် တွိုန်၊ အန် ဘော ဝီ ဟုး ဒီ ဒင် ကာစှူင့် လှူ တီ။

10 အန် ပီ ဝီ ဒိုဝ်း ဘျြီင် ဘော ဘ့လေ လမ် အန် ဘော ဘျြီင် အီ ဒိုက် ဒီ ကာဒူမ်၊ ဝီ ဒုဝ့် ဒဲင် ကာစှူင့် လှူ၊ တဲး န့ ဒူပ် ပီ ကာလာင် ဇဝ်ဖြာ ဒီ အာမုဝ်ဆဲ။

11 အီ မုး ယင် အန် ဘော ဟုန် အန်၊ အာရူန် ဘော ဟာဝ် ဒုဝ့် ဝဲန် နာ ရေတ့် ဒူင် ချ ဂေ။

12 ဟဲ့ ဟွတ့်၊ အာရူန် ပီ ဝီ ဆွာ့ မဲင် ဒုဝ် ပီ ဒီ လှူ၊ တဲး န့ ဘဲန် ပီ ဒီ လှူ အီ ဒုဝ့် ဒီ ငဝ်။ ဂွန် အန် ဂေ ဘော ဒိုဝ်း တး နှာမ် ဒုဝ် တီ၊ ဒွါ ဒီ အန်။ အန် ဘော ဒိုဝ်း ခြဝ်း ဒီ ရဲင် ကာစှူင့် လှူ ဘော ဖွုန် ဘ့လာက်။

13 ဂွန် အန် ဘော ဒိုဝ်း ယင် ဒုဝ် ပီ လှူ တီ၊ ဒွါ ဒီ အန် ဘဲန် ဒီဂ်ု ဘဲန် ဒီဂ်ု။ ဂေ ဘော ဒွါ ဘော ဂိန့် ဒုဝ် တီ။ အန် ဘော ဒုဝ့် တူတ့် ဒဲင် ကာစှူင့် လှူ တီ။ 14 အာရူန် ဘော ဝီ ဘာယ် ခူင်န်ု ဂေ ဂိုမ် ပန် ဒုဝ် တီ၊ ဝီ ဘ့လေး ဒဲင် ဒုဝ် အီ ကာဆိုမ် ဒီ ငဝ် အီ ကွယ် ဒဲင် ကာစှူင့် လှူ တွိုန်။ 15 ဝါယ် တီ အာရူန် ပီ ဝီ လှူ ပီ ဒီ လှူ အာဒါ ဂေ ဒူအီ ကိူန်။ အန် ဘော ဒိုဝ်း မာပဲ အီ မုး ပီ ဒီ လှူ အီ တဲး ဇဝ်ဖြာ ဂဝ်း ဝဲန် မှာပ် ဂေ ဒူအီ ကိူန် တွိုန်။ အန် ဝီ ဆွာ့ မဲင် ဒုဝ် တီ၊ ဝီ လှူ၊ တဲး န့ ပီ ပဲ့ ဟဲ့ ဟွတ့် လှူ အန် အာဒါ ဒုဝ် ဘြိမ် အန် တွိုန်။

16 အန် ပီ ဝီ ဒိုဝ်း ဒုဝ် ပီ လှူ အီ ဒုဝ့် ဒီ ငဝ် တီ၊ ဝီ လှူ တဲး န့ ဒူပ် ပီ ဒမ် ဒါရာ။ 17 အန် ဝီ လှူ ဘော ဒီဂါဝ် ဘဲန် မျုဝ် ဘဲန် မျုဝ်၊ ဝီ ဒိုဝ်း ဘော ကာပဲ့ အူ ကာတိုင် ဒဲ အန်၊ ဝီ ဒုဝ့် ဒဲင် ကာစှူင့် လှူ။ န့ ဘော ဘဲန် ပီ ဒီ လှူ အီ ပွါ ခဲင် ပီ လှူ ဒွန် ဆိန့်ဝး။

18 အန် ပီ ဝီ ငဝ်း မက် အာလူင့် ဘော မာဘူ အာလူင့်၊ တဲး န့ ဘဲန် ပီ ဒီ လှူ အီ တဲး ဒူအီ ကိူန် ကွယ် ကာဇု ဟူမ် ရိုမ်။ ဂွန် အန်၊ ဂေ ဝီ ဒိုဝ်း တး နှာမ် ဒုဝ် တီ၊ ဒွါ ဒီ အန်။ အန် ဝီ ဒိုဝ်း ခြဝ်း ဒီ ရဲင် ကာစှူင့် လှူ ဘော ဖွုန် ဘ့လာက်။ 19 အန် ဝီ ဒိုဝ်း ဘျြီင် ဒုဝ် မာမက် ဂါယ် မာဘူ တွိုန်၊ အီ မုး ဘျြီင် အီ ဒိုက် ဒီ ဆီဒါ အန် ဘော ဘျြီင် အီ ဒိုက် ဒီ ခူင်န်ု အန် ဘော ဘျြီင် အီ ဒိုဝ်း ဒီ ဘ့လေ လမ် အန် ဘော အာ ဘူင့် ဘော ဘျြီင် ဒီ ကာဒူမ် အန်။ 20 အန် ဝီ ဘ့လေး အုန် ဒဲင် ဘင်နဝ်း ဒုဝ် ပီ လှူ တီ။ ဟဲ့ ဟွတ့်၊ အန် ဝီ ဒုဝ့် ခဲင် ငဝ် ဒဲင် ကာစှူင့် လှူ တွိုန်။ 21 အန် ပီ ဝီ ဒိုဝ်း ဘော ဘင်နဝ်း ဘော ဂိုမ် ပန် အန် ဘ့လာက် အာအး တွိုန်၊ ဝီ မာဝတ် ဝိဝ် မာဝတ် ဝေန့် ဒီ အာတ့် ဇဝ်ဖြာ၊ တဲး န့ ဒူပ် ပီ ကာလာင် အုန် အာမုဝ်ဆဲ။

22 အာရူန် ဟဲ့ ဟွတ့် လှူ ဇိုဝ် တီ ဒွန် မျုဝ်၊ အန် ဝီ စုဝ့် ဆူင့် ဒဲ အန်၊ ဝီ မွင့်ကာရာ ဒွါ ဒီ ဂေ ဒူအီ ကိူန်။ အန် ဟဲ့ ဟွတ့် လှူ ပီ လှူ အီ တဲး ဇဝ်ဖြာ ဂဝ်း ဝဲန် မှာပ် ဘော ပီ လှူ အီ ဒုဝ့် ဒီ ငဝ် ဘော ပီ လှူ အီ ကွယ် ကာဇု ဟူမ် ရိုမ်၊ အန် ဝီ လေး လူင် ဒူင် ကွယ် ကာစှူင့် လှူ တွိုန်။

23 ဝါယ် အန် တီ အာမုဝ်ဆဲ ဂါယ် အာရူန် ဝီ ဟာဝ် လိုပ် ခဲင် ထိုပ် ဘိက် ဘွတ်။ ဒေါ ဝီ လေး ဂါယ်၊ ဂါယ် ဝီ မွင့်ကာရာ ဒွါ ဒီ ဂေ ဒူအီ ကိူန်။ ဒေါ အန် တီ အာဖုင် ဒင်ခုဝ် ဇဝ်ဖြာ ဘော လိုဝ်း ဆီချာ ဒီ ဂေ ဒူအီ ဘောကာဂ့လျီတ်။ 24 ဇဝ်ဖြာ ဘော တဲး ငဝ် တး လူင် ဒဲင် ကာစှူင့် လှူ၊ တဲး န့ ကာဆိုမ် ဒုဝ် ပီ လှူ ဂေ ဘော ဘျြီင် အီ ကွယ် ဒဲင် ကာစှူင့် လှူ တွိုန်။ ဂေ ဒူအီ ကိူန် ဘော ယိုဝ် လွင် အန် တီ၊ ဂေ ဘော ကာဖြူမ် ဒီ ဒတ် အူ ဇေန့် ကူပ် ဟဲ့ ဒါခိုယ် ကာဆဝ် ဂေ။ ဂေ ဘော ကာဖြူမ် ဒီ မုတ် ဂိုပ် ကြိုပ် ဇဝ်ဖြာ။