1 ဇဝ်ဖြာ ဝီ တဝ်း ဒီ အာမုဝ်ဆဲ၊ 2 “တဲး မဲ ဒဲ့ အာရူန် ဂေ ဂွန် အန် တး ဒီ ဘာင် မာလုဝ်း ထိုပ် ဘိက် ဘွတ်၊ တဲး မဲ ဒိုဝ်း တး ဘော ခြိုင် တာ ဒူအီ အီ လှူ ဒီ ဇဝ်ဖြာ ဘော နာမန် အုး ငှုန် အီ ပွိုန် ဖဝ်း ဒီ အီ ဘော မာမက် ပီ လုဝ် လှူ တဲး ဇဝ်ဖြာ ဂဝ်း ဝဲန် မှာပ် အီ ဘော မာဘူ အာလူင့် အာ ဒုဝ် ဘော ခါမုန် အီ တူ ဟပ် ဆီနမ် ဘြး အူ ခွန်။ 3 တဲး မဲ ဒဲ့ ဘော ဂေ ဒူအီ ကိူန် တး ကာဇု ဒီ ဘာင် မာလုဝ်း ထိုပ် ဘိက် ဘွတ် တီ။” 4 အာမုဝ်ဆဲ ဘော ဘူင် ဒူပ် ပီ တဝ်း ဇဝ်ဖြာ ဒီ အန်။ ဂေ ဒူအီ ကိူန် ဟဲ့ ဟွတ့် တး ကာဇု၊ 5 အန် ဘော တဝ်း ဒီ ဂေ၊ “အာနီ မုး ပီ ကာလာင် ဇဝ်ဖြာ တဲး အေ ဘူင်၊ တဲး တူတ့် ဒွန် မျုဝ် ကော ဟွတ့် ဆီချာ။” 6 အာမုဝ်ဆဲ ဘော ဒဲ့ အာရူန် ဂေ ဂွန် အန်၊ ဝီ စ်ု ဂေ တာ အိုမ်။ 7 အန် ဘော ဒိုဝ်း ဆီတုဝ် တုန် ဘော ဆီတုဝ် တိူ့၊ စှိုပ် ဒီ အာရူန်၊ ရိတ် ဘော ဆဲ့ ဒီ ညွယ် အန်၊ ပီ ဝီ စှိုပ် ဘော ဆီတုဝ် အေဖူတ်၊ ဝီ ရိတ် ဘော ဆာဘြွတ် အီ ဟဲ့ စှိတ် ကာဆဝ်။ 8 အန် ဝီ စှိုပ် ဘော ဟူ အီ ဒိုက် ဒီ ဘင်နဝ်း၊ ဝီ ဒိုဝ်း မာဝ် အာ ဘူင့် အီ စိူဝ် အူရိမ် ဂါယ် ထူမိမ်၊ ဟပ် ခဲင် ဟူ တီ။ 9 အန် ဝီ ဘြဝ့် ဘော ကာမဲ့။ နာ ရေတ့် ကာမဲ့ တီ၊ အန် ဝီ ပက် ဒိုက် ဒီဖ့လ ခြိဝ် ဘွတ် ဒီ ကာတဝ်း အန်၊ တဲး န့ ပီ မင်ဂိုမ်၊ တဲး န့ ဘျ လွင် ဟဲ့ ဘဲန် အာရူန် ဒါ အီ လှူ ဒီ ဇဝ်ဖြာ။ အာမုဝ်ဆဲ ဘော ဘူင် တူတ့် ဒွန် မျုဝ် တဲး န့ ဒူပ် ပီ ကာလာင် အုန် ဇဝ်ဖြာ။

10 ပန် တီ အာမုဝ်ဆဲ ဝီ ဒိုဝ်း နာမန် အုး ငှုန်၊ ဖဝ်း ဒီ ထိုပ် ဘိက် ဘွတ် ဘော ဒီ ဒွန် မျုဝ် အီ ကွယ် ခဲင် ထိုပ် ဘိက် ဘွတ် တီ။ 11 အန် ဝီ ဒိုဝ်း နာမန် အုး ငှုန် မင် ကာလဝ့်၊ ခြဝ်း ဒီ ကာစှူင့် လှူ ဘူ ဇေန့်၊ တဲး ဘော ကာစှူင့် လှူ ဘော ခြိုင် လှူ ဒွန် မျုဝ် ဘော မ့ပါန် တာင် ဘော စေန့် အန် ဘဲန် အီ ဆီငါ ဘွတ်။ 12 အန် ဘော ဒိုဝ်း နာမန် အုး ငှုန် တီ၊ ဝီ လှုဝ် ဒီ ဂိန့် အာရူန်၊ တဲး အာရူန် ဘဲန် ဒါ အီ လှူ ဒီ ဇဝ်ဖြာ။ 13 ဝါယ် အန် တီ အန် ဝီ ဒဲ့ တး ဘော ဂေ ဂွန် အာရူန်၊ ဝီ စှိုပ် ဆီတုဝ် ဒီ ဂေ၊ ဝီ ရိတ် ဘော ဆဲ့ ဒီ ညွယ် ဂေ၊ စှိုပ် ဘော မာဂိန့် ဒီ ဂိန့် ဂေ၊ တဲး န့ ဒူပ် ပီ ဒမ် အုန် ဇဝ်ဖြာ။

14 ဟဲ့ ဟွတ့် ပါယ် တီ အာမုဝ်ဆဲ ဘော ဒိုဝ်း တး မာမက် ပီ ဒီ လှူ အီ တဲး ဇဝ်ဖြာ ဂဝ်း ဝဲန် မှာပ် တွိုန်။ အာရူန် ဂေ ဂွန် အန် ဘော ဒါင် ဒဲ ဂေ ဒဲင် ဂိန့် မက် တီ။ 15 အာမုဝ်ဆဲ ဟဲ့ ဟွတ့် ဆွာ့ မဲင် မက် တီ၊ အန် ဝီ ဒိုဝ်း နှာမ် အန် မင် ကာလဝ့်၊ ဝီ စိုပ် ကာနူ အန် ခဲင် နှာမ် တီ၊ ဝီ ဖဝ်း ဒီ ကာတူတ့် ဘတ့် ကာစှူင့် လှူ၊ တဲး အန် ဆီငါ ဘွတ်။ အန် ဝီ ဒိုဝ်း နှာမ် တီ၊ ဝီ ဟုး ဒီ စေန့် ကာစှူင့် လှူ တီ၊ တဲး န့ ဆီငါ ဘွတ်၊ တဲး န့ ပွိုန် လှူ ပီ လှူ အီ ဂဝ်း ဝဲန် မှာပ် ဒဲင် ကာစှူင့် တီ။ 16 အာမုဝ်ဆဲ ဘော ဒိုဝ်း တူတ့် ဘျြီင် အီ ဒိုက် ဒီ ခူင်န်ု ဒုဝ် ပီ ဒီ လှူ အန်။ အန် ဒိုဝ်း ဘော ဘျြီင် အီ ဒိုက် ဒီ ကာဒူမ် ဘော ဘ့လေ လမ် အန် ဘော အာ ဘူင့်၊ ဝီ ဒုဝ့် ခဲင် ငဝ် ဒဲင် ကာစှူင့် လှူ။ 17 အန် ပီ ဝီ ဒိုဝ်း ဒုဝ် ပီ လှူ အီ ဆီ ဂိတ် တွိုန်၊ ဘော ဟုန် အန် ဘော ယင် အန် ဘော ဆီဇိင် နှိုမ် အန်၊ ဝီ လေး ဟာဝ် နာ ရေတ့် ဒူင် ချ ဂေ တွိုန်၊ ဝီ ဒုဝ့် ကာဆိုမ်၊ တဲး န့ ဒူပ် ပီ ကာလာင် အုန် ဇဝ်ဖြာ။

18 ဟဲ့ ဟွတ့် ပါယ် တီ အာမုဝ်ဆဲ ဝီ ဒိုဝ်း တး မာဘူ ပီ လုဝ် လှူ အီ ဒုဝ့် ဒီ ငဝ် တွိုန်။ အာရူန် ဂေ ဂွန် အန် ဘော ဒါင် ဒဲ ဂေ ဒဲင် ဂိန့် မာဘူ တီ။ 19 အာမုဝ်ဆဲ ဟဲ့ ဟွတ့် ငဝ်း မာဘူ တီ၊ အန် ဘော ဒိုဝ်း နှာမ် အန်၊ ဖဝ်း ဒီ ရဲင် ကာစှူင့် လှူ ဘော ဖွုန် ဘ့လာက်။ 20 အန် ဘော ကာဒဲပ် မာဘူ တွိုန် ဘဲန် ဒီဂ်ု ဘဲန် ဒီဂ်ု၊ ဝီ ဒိုဝ်း ဂိန့် ဘော ယင် အန် ဘော ဘျြီင် အန်၊ ဝီ ဒုဝ့် ခဲင် ငဝ်။ 21 ဟဲ့ ဟွတ့်၊ အာမုဝ်ဆဲ ဘာယ် ခူင်န်ု မာဘူ တီ ဘော ပ့လဝ် အန် ဂေ တွိုန်၊ ဝီ ဒိုဝ်း မာဘူ တီ ဘော ဒုဝ်၊ ဝီ ဒုဝ့် ခဲင် ငဝ် ဒဲင် ကာစှူင့် လှူ၊ တဲး န့ ဒူပ် ပီ ကာလာင် အုန် ဇဝ်ဖြာ၊ တဲး န့ ဘဲန် ပီ ဒီ လှူ ဒီ ဇဝ်ဖြာ အီ ဒုဝ့် ဒီ ငဝ်။ အုး ငှုန် အန် ဘော လဝ့် နဝ်း ဇဝ်ဖြာ။

22 ပန် တီ အာမုဝ်ဆဲ ပီ ဝီ ဒိုဝ်း တး မာဘူ ပေါ အူ ဒုဝ် အီ မုး ပီ လုဝ် လှူ ဒေါ ဖဝ်း အန် နာမန် ဒီ ဒူအီ အီ ဒီ ဘဲန် ဒါ အီ လှူ ဒီ ဇဝ်ဖြာ။ အာရူန် ဂေ ဂွန် အန် ဘော ဒါင် ဒဲ ဂေ ဒဲင် ဂိန့် မာဘူ တီ။ 23 အာမုဝ်ဆဲ ဟဲ့ ဟွတ့် ဆွာ့ မဲင် မာဘူ တီ၊ အန် ဝီ ဒိုဝ်း နှာမ် အီ စဲက်၊ ဖဝ်း ဒီ ဟျုဝ့် အာရူန် ဘ့လာက် အာအး ဘော ဒီ ကာနူ မာ ဒဲ ဘော ဒီ ကာနူ မာ စေန့် ဘ့လာက် အာအး။ 24 အန် ဟဲ့ ဟွတ့် ဘူင် ပါယ် တီ အန် ဝီ ဒဲ့ ဘော ဂွန် အာရူန် တး။ အန် ဝီ ဒိုဝ်း နှာမ် တွိုန် ဖဝ်း ဘော ဒီ ဟျုဝ့် ဂေ ဘ့လာက် အာအး ဘော ဒီ ကာနူ မာ ဒဲ ဘော ဒီ ကာနူ မာ စေန့် ဂေ ဘ့လာက် အာအး။ နှာမ် အီ ဆီ ဂိတ် တွိုန်၊ အန် ဝီ ဟုး ဒီ ရဲင် ကာစှူင့် လှူ ဘော ဖွုန် ဘ့လာက်။ 25 အန် ဝီ ဒိုဝ်း ဘော ဘျြီင် အန်၊ ဆီဒါ အန် ဘော ဘျြီင် အီ ဒိုက် ဒီ ခူင်န်ု အန် ဘော ဘျြီင် အီ ဒိုက် ဒီ ကာဒူမ် ဘော ဘ့လေ လမ် အန် ဘော အာ ဘူင့် ဘော ဘျြီင် အန် ဘော ဂိုမ် ပန် အန် ဘ့လာက် အာအး။ 26 ဘော ခါမုန် အီ တူ ဟပ် ဆီနမ် ဘြး အီ ကွယ် ခဲင် ခွန် ပဲ့ ဟဲ့ ဘ့လေး ဂေ ဒီ အာတ့် ဇဝ်ဖြာ၊ အန် ဝီ ဒိုဝ်း အူ ဘူင့်။ အန် ပီ ဝီ ဒိုဝ်း ဘော ခါမုန် အီ ဟပ် နာမန် အူ ဘူင့် ဘော ခါမုန် ဒီဖ့လ အူ ဘူင့်၊ ဝီ ဘ့လေး ဒဲင် ဘျြီင် ဂေ ဂိုမ် ပန် ဘ့လာက် အာအး မာဘူ တွိုန်။ 27 အန် ဝီ ဒိုဝ်း တူတ့် ပီ ဒီ လှူ တီ၊ ဝီ ဘ့လေး ဒဲင် ဒဲ အာရူန် ဂေ ဂွန် အန်။ ဂေ မိူဝ် မာဝတ် ဝိဝ် မာဝတ် ဝေန့် ဒီ အာတ့် ဇဝ်ဖြာ။ 28 ဟဲ့ ဟွတ့်၊ အာမုဝ်ဆဲ ဝီ ဒိုဝ်း ပီ လှူ ဒဲင် ဒဲ ဂေ တီ၊ ဝီ ဒုဝ့် ဒဲင် ကာစှူင့် လှူ ဒူပ် ပီ ဒီ လှူ ဂေ အာမျုဝ် ဟဝ်။ ပါယ် တီ န့ ဘဲန် ပီ လုဝ် လှူ ဒေါ ဖဝ်း ဂေ နာမန် ဒီ ဒူအီ အီ ဘဲန် ဒါ အီ လှူ ဒီ ဇဝ်ဖြာ။ န့ မုး ပီ လှူ အီ ဒုဝ့် ဒီ ငဝ်၊ တဲး အုး ငှုန် အန် လဝ့် နဝ်း ဇဝ်ဖြာ။ 29 ဝါယ် အန် တီ အာမုဝ်ဆဲ ဘော ဒိုဝ်း ဘင်နဝ်း မာဘူ တီ ဘော မာဝတ် ဝိဝ် မာဝတ် ဝေန့် ဒီ အာတ့် ဇဝ်ဖြာ။ ဘင်နဝ်း ဒုဝ် တီ ဟဲ့ ဘဲန် ဘုန် အာမုဝ်ဆဲ၊ တဲး န့ ဒူပ် ပီ စ်ု ဇဝ်ဖြာ အန် ဘူင်။

30 အာမုဝ်ဆဲ ဝီ ဒိုဝ်း နာမန် အုး ငှုန် တွိုန် အီ စဲက် ဘော နှာမ် မင် ကာလဝ့် အီ ကွယ် ဒဲင် ကာစှူင့် လှူ တွိုန်၊ ဝီ ခြဝ်း ဒီ အာရူန် ဂေ ဂွန် အန် ဘော ဒီ ခြိုင် တာ ဂေ။ ပါယ် တီ အန် ဘော လှူ ဂေ ဘော ခြိုင် တာ ဂေ ဒီ ဇဝ်ဖြာ။

31 အာမုဝ်ဆဲ ဘော ကာလာင် ဒီ အာရူန် ဂေ ဂွန် အန် တဝ်း၊ “တဲး ဘေ ဒိုဝ်း ယင် နီ၊ ဟာဝ် ခူပ် မာလုဝ်း ထိုပ် ဘိက် ဘွတ်၊ ဒင် ဟူမ် ယင် နီ ဒီ တီ။ ဘေ လုဝ် ဟူမ် ဘော ခါမုန် အီ ကွယ် ခဲင် ခွန် တွိုန် အီ မုး ပီ ဒီ လှူ ဒေါ ဖဝ်း ဘေ နာမန် ဒီ ဒူအီ အီ ဘဲန် ဒါ အီ လှူ ဒီ ဇဝ်ဖြာ၊ တဲး န့ ဒူပ် ပီ ကာလာင် အုန် ဇဝ်ဖြာ။ 32 ခါမုန် ဘော ယင် အီ ဆီ ဂိတ်၊ ဘေ လုဝ် ဒုဝ့် ခဲင် ငဝ်။ 33 အာဒါ ဘူ ဆီငဲ၊ ဘေ တူ ပွိုန် လေး နာ ရေတ့် ထိုပ် ဘိက် ဘွတ် နီ ဒေါ မှဝ်။ ခုဝ်၊ န့ လုဝ် ဘူ ဆီငဲ တီ၊ တဲး ဘေ ဘဲန် ဒါ အီ လှူ ဒီ ဇဝ်ဖြာ။ အာတ့် နုဝ့် ဘူ ဆီငဲ တီ၊ ဘေ ညှမ် မုး ဒါ အီ လှူ ဒီ ဇဝ်ဖြာ။ 34 ပဲ့ ဟဲ့ ဘူင် အေ အာတိုဝ် နီ၊ ဇဝ်ဖြာ ဟဲ့ ဒမ် အုန် တဲး အေ ဘူင်၊ တဲး ဘေ ဝီ ကာလဝ့် ဒီ ဇဝ်ဖြာ။ 35 ဘေ လုဝ် ကွယ် ဒီ မာလုဝ်း ထိုပ် ဘိက် ဘွတ် ဒွင် ဝန် ဒွင် ခိူန်၊ တဲး န့ ကော နုဝ့် ဘူ ဆီငဲ၊ တဲး ဘေ ဘူင် ဒူပ် ပီ ကာလာင် ဇဝ်ဖြာ။ ဆေ ဘေ တူ ဘူင် ပါယ် တီ ဘေ လုဝ် ယမ်။ ဇဝ်ဖြာ ဟဲ့ ကာလာင် အုန် ဒီ အုဝ် ပါယ် တီ။” 36 ပါယ် တီ အာရူန် ဂေ ဂွန် အန် ဘော ဘူင် ဒူပ် ပီ ကာလာင် ဇဝ်ဖြာ ဒီ အာမုဝ်ဆဲ။