1 ဇဝ်ဖြာ ပီ ဝီ ကာလာင် ဟာဝ် တဝ်း၊ “အာနီ မုး ဒါရာ လွင် ပီ လှူ အီ ဂဝ်း ဝဲန် ပီ ကာလိုပ် အီ။ န့ ဟဲ့ ဘွတ် ကာဆဝ်။ 2 ဂေ လုဝ် ဒိုဝ်း ဒုဝ် ပီ ဒီ လှူ တီ၊ ဆွာ့ မဲင် အန် ခူပ် ဒူင် ငဝ်း ဂေ ဒုဝ် ပီ လှူ အီ ဒုဝ့် ဒီ ငဝ် တွိုန်။ လုဝ် ဒိုဝ်း နှာမ် အန်၊ ဟုး ပ ရူပ် ကာစှူင့် လှူ ဘော ဖွုန် ဘ့လာက်။ 3 လုဝ် ဒိုဝ်း လေး တူတ့် ဘျြီင် အန်၊ လှူ ဒဲင် ကာစှူင့် လှူ၊ ဘော ဘျြီင် ဒီ ဆီဒါ အန်၊ ဘော ဘျြီင် အီ ဒိုက် ဒီ ခူင်န်ု အန်။ 4 ဘော ဘ့လေ လမ် အန် အာ ဘူင့် ဘော ဘျြီင် အန် ဘော ဘျြီင် အီ ဒိုက် ဒီ ကာဒူမ် အန်။ ဇိုဝ် တီ လုဝ် ဒိုဝ်း တူတ့်။ 5 ဂေ ဒါ အီ လှူ ဒီ ဇဝ်ဖြာ လုဝ် ဒိုဝ်း လေး တူတ့် ဘျြီင် ဂေ တီ၊ ဒုဝ့် ခဲင် ငဝ်၊ တဲး န့ ဘဲန် ပီ လှူ ဒီ ဇဝ်ဖြာ။ အာတီ မုး ပီ လှူ အီ ဂဝ်း ဝဲန် ပီ ကာလိုပ် အီ။ 6 အီမာယ် ဒွန် အီ အီ ကွယ် ခဲင် န့ဟူမ် ဒါ အီ လှူ ဒီ ဇဝ်ဖြာ ဟဲ့ ပွိုန် ဟူမ် ယင် တီ။ ကူပ် ဟဲ့ ဘွတ် ကာဆဝ်၊ ဂေ လုဝ် ဟူမ် ခဲင် ဒူင် ဆီငါ ဘွတ်။

7 ဒါရာ တီ လွင် ပီ ဒီ လှူ အီ ဂဝ်း ဝဲန် ပီ ကာလိုပ် အီ ဘော ဒါရာ လွင် ပီ ဒီ လှူ အီ ဂဝ်း ဝဲန် မှာပ် အီ ဟဲ့ မုး အူ မျုဝ်။ ယင် အန် ဟဲ့ ဘဲန် ကြုဝ် ဒါ အီ လှူ ဒီ ဇဝ်ဖြာ အီ ဟဲ့ လှူ ဒါင် ဂေ ဒူအီ အီ ဆီ ဝီ ကာလဝ့် ဒီ ဇဝ်ဖြာ။ 8 ဒါ အီ လှူ ဒီ ဇဝ်ဖြာ အီ လှူ ကြုဝ် ပီ လှူ အီ ဒုဝ့် ဒီ ငဝ် အာဒါ အီ ဟဝ် တီ၊ အန် ဒီ ပွိုန် ဟုန် ဒုဝ် ပီ လှူ အန် တီ။ 9 ဘော လွင် ပီ ဒီ လှူ ဒီဂါဝ် ဘဲန် မျုဝ် ဘဲန် မျုဝ်၊ န့ ဘော ပါယ် တီ။ န့ ဘော မုး ပဲ့ ဟဲ့ ဘ့လေး ဂေ ခဲင် ကာဒဝ် ဖုဝ်၊ တဲး န့ ဆိန်၊ ဘော မုး ပဲ့ ဟဲ့ ခုဝ် ဂေ ခဲင် ကာလုဝ့် မာခါင် ဘော ပဲ့ ဟဲ့ ခုဝ် ဂေ ဒဲင် ဒီဖ့လ ဟိန်၊ ဇိုဝ် တီ ဘော တူတ့် ဒွန် မျုဝ်၊ ဒါ အီ လှူ ဒီ ဇဝ်ဖြာ ဝီ အီ လှူ တီ၊ အန် ဟဲ့ ပွိုန် ဒိုဝ်း၊ တဲး န့ ဘဲန် ကြုဝ် အန်။ 10 ဆေ န့ ယီ မုး ပီ ဒီ လှူ ဒီဂါဝ် ဘဲန် မျုဝ် ဘဲန် မျုဝ်၊ ဆေ န့ တူ ဆိန်၊ ဘော မုး မျုဝ် အီ ကာဝ်ု နာမန်၊ မျုဝ် အီ ညှမ် ကာဝ်ု၊ ဂေ ဒါ အီ လှူ ဒီ ဇဝ်ဖြာ အီ မုး ဂွန် အာရူန် တွိုန်၊ ဂေ လုဝ် ကာဆာင် ဒီ ဂေ ဒွန် အီ၊ တဲး န့ ကာရမ်။”

11 ဇဝ်ဖြာ ပီ ဝီ တဝ်း၊ “အာနီ န့ မုး ဒါရာ လွင် ပီ ဒီ လှူ ဒီ ဇဝ်ဖြာ အီ ကွယ် ကာဇု ဟူမ် ရိုမ်။ 12 ဆေ န့ မိုဝ်း ဒူအီ အီ ဆီ လှူ ကူပ် ဆီ ဒါင် အန် ဂုင် ဂေဇူ ဒီ ဇဝ်ဖြာ၊ အန် လုဝ် လှူ ခါမုန် အီ တူ ဟပ် ဆီနမ် ဘြး၊ ယီ ကာဝ်ု နာမန်။ န့ ဘော မုး ခါမုန် ဒီဖ့လ၊ ဘော မုး ခါမုန် အီ ဒိုဝ်း ခဝ်ချုင် ဘော ကာဝ်ု နာမန်၊ အန် လုဝ် ဒိုဝ်း လှူ ကာဒူပ် ဒီ ဒုဝ် ပီ လုဝ် လှူ တဲး န့ ဘဲန် ပီ ဒီ လှူ အီ ဒါင် ဂုင် ဂေဇူ ဒီ ဇဝ်ဖြာ။ 13 ဒဲင် တီ၊ အန် ပီ ဝီ လုဝ် လှူ ဘော ခါမုန် အီ ဟပ် ဆီနမ် ဘြး။ 14 အန် လုဝ် ဒိုဝ်း ခါမုန် တီ၊ အူ မျုဝ် အူ ဘူင့်၊ တဲး န့ ဘဲန် ပီ လှူ ဒီ ဇဝ်ဖြာ။ န့ ဘော ဘဲန် ကြုဝ် ဒါ အီ လှူ ဒီ ဇဝ်ဖြာ၊ ဝီ အီ ဟဲ့ ဒိုဝ်း နှာမ် ဒုဝ် ပီ လှူ အန် တီ ဘော ဖဝ်း ဒီ ကာစှူင့် လှူ တွိုန်။ 15 ယင် ဒုဝ် ပီ လှူ တီ လုဝ် ဟူမ် ဆီငဲ တီ အူ ဇေန့်။ အာဝ် ပွိုန် အုန် တဲး န့ ဇမ် ပါ ခဲညှာ ဆိန့်ဝး။

16 ဆေ န့ ယီ မိုဝ်း ဒူအီ အီ ဆီ လှူ ပီ ဒီ လှူ အီ ကွယ် ကာဇု ဟူမ် ရိုမ် ကူပ် ဟဲ့ ကာဆဲန့် အန် ဒီ လှူ ဘော ကူပ် ဟဲ့ ဆီ လှူ အန် ရာင် အန်၊ ဆေ ဂေ ယီ တူ ပွိုန် ဒီ ဟူမ် တဲး န့ တူတ့် ဆီငဲ လှူ တီ၊ အီ ဆီ ဂိတ် ဆီ ကွယ် တွိုန် ဟဲ့ ပွိုန် ဟူမ် ပါ ခဲညှာ။ 17 ဆေ န့ ယီ မိုဝ်း ယင် ဒုဝ် ပီ လှူ အီ ဆီ ကွယ် ဇမ် ပန် တ ညှာ၊ လုဝ် ဒုဝ့် ဝဲန် တူတ့် ခဲင် ငဝ်။ 18 ဆေ ဟီ ဟူမ် ဆီငဲ တ ညှာ တီ၊ ဇဝ်ဖြာ တူ ဒိုဝ်း ပီ လှူ ဒူအီ ဝီ တီ။ ပီ လှူ အန် တီ၊ အာဝ် မိုဝ်း အာဂျိုဝ် မာဆေ။ ဟဲ့ ဘဲန် တူတ့် အီ မွှိုမ် ကာအိး။ ဒူအီ ဝီ တီ လုဝ် ခမ် မှာပ် အန်။

19 ဆေ မျုဝ် အီ တူ ဆီငါ ဘွတ် ဟဲ့ တာ ဒိုဝ် ယင် ဒုဝ် ပီ လှူ အီ၊ အာဝ် ပွိုန် ဟူမ် ယင် တီ။ လုဝ် ဒုဝ့် ဝဲန် ခဲင် ငဝ်။ ဆေ န့ ယီ မုး ယင် ပီ ဒီ လှူ အီ မွှိုမ်၊ ဒွန် အီ အီ ဟဲ့ ဆီငါ ဘွတ် ဒူပ် ပီ ဒမ် ဒါရာ ဟဲ့ ပွိုန် ဟူမ်။ 20 ဆေ န့ ယီ မိုဝ်း ဒူအီ အီ တူ ဆီငါ ဘွတ် ဒူပ် ပီ ဒမ် ဒါရာ၊ ဆေ အန် ယီ ဟူမ်၊ ဘေ လုဝ် ဘ့လေး ဝဲန် အန်၊ ကွဲ့ တဲး ဘေ မာတ် အန် မုး ဒူအီ အာမျုဝ် ဘေ။ 21 ဒဲင် တီ၊ ဝီ အီ ဟူမ် ယင် ဒုဝ် ပီ လှူ တီ ဝါယ် ဟဲ့ တာ ဒိုဝ် တာ ပါ အန် အီ တူ ဆီငါ ဘွတ် မင် မျုဝ်၊ ဘော မုး အီ ဒိုက် ဒီ ဒူအီ၊ အီ ဒိုက် ဒီ ဒုဝ် ဆတ်ဒါဝါ၊ ဒူအီ ဝီ တီ မိူဝ်၊ ဘေ လုဝ် ဘ့လေး ဝဲန် အန်၊ ကွဲ့ တဲး ဘေ မာတ် အန် မုး ဒူအီ အာမျုဝ် ဘေ။”

22 ဇဝ်ဖြာ ပီ ဝီ စ်ု အာမုဝ်ဆဲ၊ 23 တဲး အန် ဝီ ကာလာင် ဒီ ဂေ ဒူအီ အီဆာရေလ တဝ်း၊ “ခဲ့ ကွယ် ဘျြီင် မာမက် ဘော ဘျြီင် မာဘူ ဂေ မာပဲ၊ ဘေ တူ ပွိုန် ဟူမ် ဒေါ မှဝ်။ 24 ဘျြီင် ဒုဝ် ဆတ် အီ ယမ် ရာင် အန်၊ ဘော ဘျြီင် ဒုဝ် ဆတ် ပီ ကဝ့် ယမ် မာဒုဝ် ပြဲ၊ ဘေ တူ ပွိုန် ဟူမ် ဒေါ မှဝ်။ မာလဲ၊ ဆေ ဘေ ဒိုဝ်း စ်ု ဘူင် ပေါ အူ မျုဝ်၊ ဟဲ့ ပွိုန်။ 25 ဆေ န့ ယီ မိုဝ်း ဒူအီ အီ ဟူမ် ဘျြီင် ဒုဝ် ဆတ် အီ ပွိုန် လှူ ဒီ ဇဝ်ဖြာ တဲး န့ ဘဲန် ပီ ဒီ လှူ အီ ဒုဝ့် ဒီ ငဝ်၊ ဘေ လုဝ် ဘ့လေး ဝဲန် ဒူအီ ဝီ တီ၊ ကွဲ့ တဲး ဘေ မာတ် အန် မုး ဒူအီ အာမျုဝ် ဘေ။ 26 ဘေ ဒူအီ အီဆာရေလ၊ ဘေ ဘော ကွယ် ဒီ မှဝ် အာဝ် တဝ်း၊ ဘေ မိူဝ် တူ ပွိုန် ဟူမ် နှာမ် မာဆိမ် ဘော နှာမ် ဒုဝ် ဆတ် ခေါ အူ မျုဝ်။ 27 ဆေ န့ ယီ မိုဝ်း ဒူအီ အီ ဟဲ့ လုတ့်၊ ဟဲ့ ဘ့လိူင် ဒါရာ တီ၊ ဒူအီ ဝီ တီ၊ ဘေ လုဝ် ဘ့လေး ဝဲန် အန်၊ ကွဲ့ တဲး ဘေ မာတ် အန် မုး ဒူအီ အာမျုဝ် ဘေ။”

28 ဇဝ်ဖြာ ဝီ စ်ု အာမုဝ်ဆဲ 29 တဲး အန် ဝီ ကာလာင် ဒီ ဂေ ဒူအီ အီဆာရေလ တဝ်း၊ “ဆေ န့ မိုဝ်း ဒူအီ အီ ဆီ လှူ ပီ ဒီ လှူ အီ ကွယ် ကာဇု ဟူမ် ရိုမ်၊ အန် လုဝ် ဒိုဝ်း တး ပီ လှူ တီ၊ အာဒါ အူ ဘုန်၊ ဝီ လှူ ဒီ ဇဝ်ဖြာ။ 30 အန် လုဝ် ဒိုဝ်း ဒုဝ် ပီ ဒီ လှူ အန် တီ၊ တဲး န့ ဘဲန် ပီ လှူ အီ ဒုဝ့် ဒီ ငဝ်။ အန် လုဝ် ဒိုဝ်း ဘျြီင် ဒုဝ် တီ၊ ဘော ဘင်နဝ်း အန်၊ တး လှူ။ ဘင်နဝ်း အန်၊ အန် လုဝ် မာဝတ် ဝိဝ် မာဝတ် ဝေန့် ဒီ အာတ့် ဇဝ်ဖြာ၊ တဲး န့ ဘဲန် ပီ လှူ အီ မာဝတ် ဝိဝ် မာဝတ် ဝေန့်။ 31 ဒါ အီ လှူ ဒီ ဇဝ်ဖြာ လုဝ် ဒိုဝ်း ဘျြီင်၊ ဒုဝ့် ဒဲင် ကာစှူင့် လှူ။ မာလဲ၊ ဘင်နဝ်း အန် ဒီ ဘဲန် ကြုဝ် ဒါ အီ လှူ ဒီ ဇဝ်ဖြာ။ 32 ဘော ဂိုမ် ပန် အန် ဘ့လာက် အာအး လုဝ် ဒွါ ဒီ ဒါ အီ လှူ ဒီ ဇဝ်ဖြာ၊ တဲး န့ ဘဲန် ရုး အီ ဒါင် ဂုင် ဂေဇူ ဒီ အန်။ 33 ဂွန် အာရူန် အီ မုး ဝီ အီ လှူ နှာမ် ဂေ ဘျြီင် ဒုဝ် ပီ လှူ အီ ဘော ကွယ် ကာဇု ဟူမ် ရိုမ် တီ၊ အန် ဒီ ပွိုန် ဂိုမ် ပန် အန် ဘ့လာက် အာအး တီ။ 34 ဘော ဘင်နဝ်း ဒုဝ် ပီ လှူ ဂေ တီ၊ ဘော ဂိုမ် ပန် ဘ့လာက် အာအး၊ အုဝ် ဇဝ်ဖြာ ဟဲ့ ဒိုဝ်း ဒီ ဂေ ဒူအီ အီဆာရေလ၊ ဝီ ဒွါ ဒီ ဂေ ဒါ အီ လှူ ဒီ ဇဝ်ဖြာ။ အာတီ ဟဲ့ ဘဲန် ပီ လုဝ် ဒွါ ဂေ ဒူအီ အီဆာရေလ ဆေဆေ။ ဂေ လုဝ် ဒွါ ဇိုဝ် တီ ဒီ ဒါ အီ လှူ ဒီ ဇဝ်ဖြာ ဒွန် စုဝ် ဒွန် ဘာန် ဟာဝ် နာ အာတ့် နီ။”

35 အာတီ မုး အူ ဘုန် ပီ ဒိုဝ်း လေး ဂေ ခဲင် ပီ လှူ ဒီ ဇဝ်ဖြာ အီ ဒုဝ့် ဒီ ငဝ်။ ဂေ လုဝ် ဝီ ဒွါ ဘုန် တီ ဒီ အာရူန် ဂေ ဂွန် အန်။ ဒေါ တဲး ဇဝ်ဖြာ ဂေ ဘဲန် ဒါ အီ လှူ ဒီ ဇဝ်ဖြာ၊ အန် ဒွါ ဒီ ဂေ အူ ဘုန် တီ။ 36 ဒေါ တဲး အန် ဇဝ် ဂေ ဘဲန် ဒါ အီ လှူ ဒီ ဇဝ်ဖြာ တီ၊ ဇဝ်ဖြာ ဟဲ့ ကာလာင် ဒီ ဂေ ဒူအီ အီဆာရေလ ဘောကာဂ့လျီတ်၊ တဲး ဂေ ဒိုဝ်း လေး ခဲင် ပီ လှူ ဂေ တီ၊ ဝီ ဒွါ ဒီ ဂွန် အာရူန် တွိုန်။ အာတီ ဟဲ့ မုး ဒါရာ ပီ လုဝ် ဒူပ် ဂေ ဒူအီ အီဆာရေလ ဒွန် စုဝ် ဒွန် ဘာန် ဟာဝ် နာ အာတ့် နီ။

37 ခဲ့ တီ မုး ဒါရာ ပီ ဒွါ ဇဝ်ဖြာ လွင် ပီ လှူ အီ ဒုဝ့် ဒီ ငဝ် ဘော ပီ လှူ ဒီဂါဝ် ဘဲန် မျုဝ် ဘဲန် မျုဝ် ဘော ပီ လှူ အီ ဂဝ်း ဝဲန် မှာပ် ဘော ပီ လှူ အီ ဂဝ်း ဝဲန် ပီ ကာလိုပ် အီ။ န့ ဘော မုး ဘော ဒါရာ လွင် ပီ လုဝ် လှူ ဒေါ စုဝ့် ဂေ ဂွန် အာရူန်၊ တဲး ဂေ ဘဲန် ဒါ အီ လှူ ဒီ ဇဝ်ဖြာ။ န့ မုး ဘော လွင် ပီ လှူ အီ ကွယ် ကာဇု ဟူမ် ရိုမ်။ 38 ဇဝ်ဖြာ ဟဲ့ ကာလာင် ဇိုဝ် တီ ဒီ အာမုဝ်ဆဲ ဒေါ ကွယ် အာမုဝ်ဆဲ ဒဲင် နွန် ဆီနာယ်။ န့ ဘော မုး ဆီငဲ ဒေါ ကာလာင် အန် ဒီ ဂေ ဒူအီ အီဆာရေလ၊ တဲး ဂေ ဘူင် ပီ ဒီ လှူ ဒီ ဇဝ်ဖြာ ဒေါ ကွယ် ဂေ ခဲင် ပြဲ ကာဟဝ်း ဒီ နွန် ဆီနာယ်။