ဇဝ်ဖြာ ပီ ဝီ ကာလာင် ဒီ အာမုဝ်ဆဲ ပေါ အူ ဇေန့် တဝ်း၊ 2 “ဒူအီ ဘော နပ် ဒီ ဘူင် မှာပ် ဒီ အာတ့် ဇဝ်ဖြာ ပါယ် နီ။ ဆေ ဒူအီ အူ ဝီ ဟဲ့ ဝဲန် ကြုဝ်ကြာမ် ပဲ့ ဟဲ့ အာပ် ဒွါ အီ ဟဝ် ဒီ အန်၊ ဘော မုး ကြုဝ် ပဲ့ ဟဲ့ အုန် အီ ဟဝ် ဒီ အန်၊ ဘော မုး ကြုဝ် ပဲ့ ဟဲ့ မှာပ် မှ်ု ဒီ အီ ဟဝ်၊ ဘော မုး ကြုဝ် ပဲ့ ဟဲ့ ဇူန် ဒီ အီ ဟဝ်၊ ဆေ အန် ယီ တူ ယွတ် မဲန် ဆီချာ ကြုဝ် တီ ဘော ခါနှာပ် ကာစွှာ့ တဲး အန် ပွိုန် ကြုဝ် အီ ဟဝ်၊ အန် ဒီ ခမ် မှာပ် အန် တီ။ 3 ဆေ အန် ဘော ယိုဝ် ကြုဝ်ကြာမ် အီ ဟဲ့ ဘျုဝ်း၊ အန် ယီ ကာလုဝ် နဲ့ တဝ်း အန် တူ ယိုဝ်၊ ဆေ အန် မိူဝ် ခမ် ဆမ်ဒိူင် လွင် အီ တူ မှာန်၊ လွင် မှာပ် ဘဲန် မျုဝ် ဘဲန် မျုဝ် ပီ ဘူင် ဒူအီ၊ 4 ဆေ န့ မိုဝ်း အီ ဟဲ့ ဘူင် နာ တူ မွှိုမ် ဇိုဝ် တီ ဘဲန် မျုဝ် ဘဲန် မျုဝ်၊ အန် လုဝ် ဝီ ဝျီ့ ဝိဝ် ကြုဝ် ပီ ကာလုဝ် အန် တီ ဒွန် မျုဝ်။ 5 ဆီငဲ ဝီ နပ် အီ အန် ဟဲ့ လုတ့် တီ၊ အန် လုဝ် ဝီ ဒွါ ဝိဝ် တူတ့် ဒီ ဒါ ကာညာ ကြုဝ် တီ။ အာဝ် ဝန် ခဲ့ တီ။ အန် ပီ ဝီ လုဝ် ဒွါ ပေါ ဖန် ဘုန် အူ ဘုန်။ 6 ဒဲင် တီ၊ ဆီငဲ အန် တီ အန် လုဝ် ဒိုဝ်း တး ပီ ဒီ လှူ၊ ဒွါ ဒီ ဒါ အီ လှူ ဒီ ဇဝ်ဖြာ တဲး ဒါ အီ လှူ ဒီ ဇဝ်ဖြာ လှူ၊ တဲး ဇဝ်ဖြာ ဂဝ်း ဝဲန် ပဲ့ ဟဲ့ ကာလိုပ် အန်။ ကြုဝ် ပီ ဒီ လှူ တီ၊ အန် လုဝ် ဒိုဝ်း မာဘူ ဒုဝ် အာလူင့်။ ဆေ အာဝ် ပါယ် တီ မာပဲ ဒုဝ် အာလူင့် အီ တူ မိုဝ်း ဒူင် ဒီ နဲ။ ငဝ်း အန်၊ အန် လုဝ် ဒိုဝ်း ခဲ့ ပီ တဝ်း ဒါ အီ လှူ ဒီ ဇဝ်ဖြာ။ 7 ဒါ အီ လှူ ဒီ ဇဝ်ဖြာ ဒီ ဘော လှူ ဒီ ဇဝ်ဖြာ၊ တဲး ဒူအီ ဝီ တီ ဝီ ကာလဝ့် ဒီ ဇဝ်ဖြာ။ ဟဲ့ ဟွတ့် လှူ၊ ဇဝ်ဖြာ မိူဝ် ဒီ ဂဝ်း ဝဲန် မှာပ် ပဲ့ ဟဲ့ ဘူင် အန် တီ ဒွန် မျုဝ်။”

8 ဇဝ်ဖြာ ပီ ဝီ တဝ်း ဒီ အာမုဝ်ဆဲ၊ 9 “တဲး မဲ ကာလာင် ဒီ အာရူန် ဂေ ဂွန် အန် တဝ်း၊ ‘အာနီ န့ မုး ပီ မှာန့် ဒါရာ လွင် ပီ ဒီ လှူ အီ ဒုဝ့် ဒီ ငဝ်။ ဒုဝ် ပီ ဒီ လှူ အီ ဒုဝ့် ဒီ ငဝ် တီ လုဝ် ဘ့လေး ဒဲင် ကာစှူင့် လှူ၊ တဲး န့ ကွယ် ဒွင် ခိူန် ကော ဇမ် ဝး။ တဲး ငဝ် ကုး ဆေဆေ၊ ကွဲ့ တဲး န့ ယတ် ဒေါ မှဝ်။ 10 ဒါ အီ လှူ ဒီ ဇဝ်ဖြာ လုဝ် စှိုပ် ဆီတုဝ် ကာတမ် လုယ် ဘော ဆီလာ ကာတမ် လုယ်၊ ဝီ ဒိုဝ်း ဘြဝ် ဒုဝ် ပီ ဒုဝ့် ဂေ ဒဲင် ကာစှူင့် လှူ တီ၊ ဝီ ဘ့လေး ခူပ် ကာစှူင့် လှူ တွိုန်။ 11 ဟဲ့ ဟွတ့် ပါယ် တီ အန် လုဝ် ဝီ ကာပ့လု လေး ခြိုင် ပီ တာ အန်။ ဝီ ဒိုဝ်း ဘြဝ် ငဝ် တီ၊ လေး နာ ရေတ့် ဒူင် ချ ဘေ၊ ဝီ ဟာဝ် ဒူင် ဆီငါ ဘွတ် တွိုန်။ 12 ငဝ် ဒဲင် ကာစှူင့် လှူ တွိုန်၊ အာဝ် ပွိုန် တဲး န့ ယတ်။ တဲး န့ ကုး ဆေဆေ။ ဒွန် ညှာ ဒါ အီ လှူ ဒီ ဇဝ်ဖြာ လုဝ် ဟပ် ဟေ၊ ကာဆုး ငဝ် တီ။ အန် လုဝ် ဘ့လေး ဆီချာ ဒုဝ် ပီ ဒီ လှူ အီ ဒုဝ့် ဒီ ငဝ် ဒဲင် ကာစှူင့် လှူ တီ။ အန် ဘော လုဝ် ဝီ ဒုဝ့် ဘျြီင် ဒုဝ် အီ မုး ပီ လှူ အီ ကွယ် ကာဇု ဟူမ် ရိုမ်။ 13 ငဝ် တီ လုဝ် ကုး ဆေဆေ ဒဲင် ကာစှူင့် လှူ။ အာဝ် ပွိုန် ယတ် ဒေါ မှဝ်။’”

14 ဇဝ်ဖြာ ဝီ တဝ်း၊ “အာနီ မုး ဒါရာ လွင် ပီ လုဝ် လှူ ဒီဂါဝ် ဘဲန် မျုဝ် ဘဲန် မျုဝ်။ ဂွန် အာရူန် အူ ဝီ လုဝ် လှူ ဇိုဝ် တီ ဒီ ဇဝ်ဖြာ ဒဲင် ကာစှူင့် လှူ။ 15 ခဲင် ပီ လှူ ဒီဂါဝ် တီ၊ အန် လုဝ် ဒိုဝ်း ကာပဲ့ ခဝ်ချုင် အူ ကာတိုင် ဒဲ အန် ဘော နာမန် ဘော ကာညန် လေဘူန်။ အန် လုဝ် ဒိုဝ်း တူတ့်၊ ဝီ ဒုဝ့် ဒဲင် ကာစှူင့် လှူ။ န့ ဘဲန် ပီ လှူ အီ တဲး ဇဝ်ဖြာ လှုဝ်း ဒူအီ အီ လှူ တီ၊ တဲး န့ အုး ငှုန် ဒီ အန်။ 16 ဂေ ဒါ အီ လှူ ဒီ ဇဝ်ဖြာ၊ ဂေ ဒီ ပွိုန် ဒီ ဟူမ် အီ ဆီ ဂိတ် ဆီ ကွယ် တွိုန်၊ ယီ တူ ပွိုန် ဟပ် ဆီနမ် ဘြး။ ဂေ လုဝ် ဟူမ် ဒူင် ဆီငါ ဘွတ် အီ ကွယ် ခဲင် ဝဲင် ထိုပ် ဘိက် ဘွတ်။ 17 အီ ဆီ ဂိတ် တွိုန်၊ အုဝ် ဟဲ့ ဒိုဝ်း လေး ခဲင် ပီ လှူ အီ ဒုဝ့် ဒီ ငဝ်၊ ဝီ ဒွါ ဒီ ဂေ ဒါ အီ လှူ ဒီ ဇဝ်ဖြာ။ န့ ဟဲ့ ဘွတ် ကာဆဝ်။ န့ ဟဲ့ ပီ ပီ လှူ အီ ဂဝ်း ဝဲန် မှာပ် ဘော ပီ လှူ အီ ဂဝ်း ဝဲန် ပဲ့ ဟဲ့ ကာလိုပ် အီ။ 18 ဆိန့် ဒေါ ကာစုး ဂေ ဒီ လှူ ပါယ် တီ ဟာဝ် နာ အာတ့်၊ ဂွန် အီမာယ် အီ မုး လှုက်လှာန် အာရူန်၊ ဂေ ဒွန် အီ ဟဲ့ ပွိုန် ဟူမ် ပဲ့ ဟဲ့ ကာယဝ်း လေး အုဝ် ပီ ဒီ လှူ တီ၊ တဲး ဂေ ဟူမ် ဆေဆေ။ အာဆေ ဘော တာ ဒိုဝ် တာ ပါ ပီ လှူ တီ၊ အန် ဒီ ဘဲန် ဒူအီ အီ ဆီငါ ဘွတ်။”

19 ဇဝ်ဖြာ ပီ ဝီ ကာလာင် ဒီ အာမုဝ်ဆဲ တဝ်း၊ 20 “ဆီငဲ ပီ ဖဝ်း အာရူန် နာမန် ဒီ ဂိန့် အန် တဲး အန် ဘဲန် ဒါ အီ လှူ ဒီ အုဝ်၊ ဘော အန် ဘော ဂွန် အန်၊ ဂေ လုဝ် ဒိုဝ်း လှူ ကာပဲ့ ခဝ်ချုင် အီ ဟဲ့ ကာမွတ့် ဆီချာ အာဒါ အူ ဘ့လဲ ဒီ အူ ခ့ဝါက်၊ ဘူင် တဲး န့ ဘဲန် ပီ ဒီ လှူ ဒီဂါဝ် ဘဲန် မျုဝ် ဘဲန် မျုဝ် ပီ လုဝ် လှူ ဂေ ဆေဆေ။ ဂေ လုဝ် လှူ စေဝ် ညှာ အူ ကာတဲ၊ ဘာ ဒီ အပ် အူ ကာတဲ။ 21 ဂေ ဘော လုဝ် ကာဝ်ု နာမန်၊ ဝီ ဘူင် ခါမုန်၊ ခုဝ် ဒဲင် ဒီဖ့လ ဟိန်၊ ပီ ဝီ ကာဘတ် တဲး န့ ဒီရွယ်။ ဟဲ့ ဟွတ့်၊ ဘော လှူ။ အာတီ မုး ပီ လှူ ဒီဂါဝ် ဘဲန် မျုဝ် ဘဲန် မျုဝ်။ အုး ငှုန် အန် ဒီ ဘော လဝ့် နဝ်း ဇဝ်ဖြာ။ 22 ဆိန့် ဒေါ ကာစုး ဂေ ဒီ လှူ ပါယ် တီ ဟာဝ် နာ အာတ့်၊ ဂွန် အာရူန် ဝီ ပဲ့ ဟဲ့ ဖဝ်း နာမန်၊ တဲး အန် ပ့လု ဂုန့် အန်၊ အန် လုဝ် လှူ ပါယ် တီ ဆေဆေ၊ လုဝ် ဒုဝ့် တူတ့် ခဲင် ငဝ်။ 23 ဒီဂါဝ် ဘဲန် မျုဝ် ဘဲန် မျုဝ် ပီ လှူ ဂေ ဒါ အီ လှူ ဒီ ဇဝ်ဖြာ တီ၊ အာဝ် ပွိုန် ဟူမ် ဒေါ မှဝ်။ လုဝ် ဒုဝ့် ကာဆိုမ် တူတ့် ခဲင် ငဝ်။”

24 ဝါယ် အန် တီ ဇဝ်ဖြာ ပီ ဝီ စ်ု အာမုဝ်ဆဲ 25 တဲး အန် ဟာဝ် ကာလာင် ဒီ အာရူန် ဂေ ဂွန် အန် တဝ်း၊ “အာနီ န့ မုး ဒါရာ လွင် ပီ ဒီ လုဝ် လှူ တဲး ဇဝ်ဖြာ ဂဝ်း ဝဲန် မှာပ်။ ဘေ လုဝ် ဒိုဝ်း ဒုဝ် ပီ ဒီ လှူ တီ၊ ငဝ်း ဒီ အာတ့် ဇဝ်ဖြာ ဒူင် ငဝ်း ဘေ ဒုဝ် ပီ လှူ အီ ဒုဝ့် ဒီ ငဝ်။ အာတီ ဟဲ့ ဘဲန် ပီ လှူ အီ ဟဲ့ ဘွတ် ကာဆဝ်။ 26 ဒါ အီ လှူ ဒီ ဇဝ်ဖြာ ဝီ အီ လှူ တီ၊ အန် လုဝ် ဟူမ် ယင် ဒုဝ် ဆတ် တီ ဒူင် ဆီငါ ဘွတ် အီ ကွယ် ခဲင် ဝဲင် ထိုပ် ဘိက် ဘွတ်။ 27 ဒူအီ ဝီ မှဝ် အာဝ် တဝ်း၊ ဘော မုး မာဆေ အာဝ် တဝ်း၊ ဟီ တာ ဒိုဝ် ယင် ဒုဝ် ဆတ် တီ၊ အန် ဟဲ့ ဟွတ့် ဘဲန် အီ ဆီငါ ဘွတ်။ ဆေ နှာမ် ဒုဝ် ဆတ် တီ တာ ဒိုဝ် ဒိုက် ဒီ ခြိုင် တာ၊ လုဝ် ဝီ လး ခြိုင် တီ ဒူင် ဆီငါ ဘွတ်။ 28 ကာလုဝ့် ကာဒါယ် ဘူင့် ပဲ့ ဟဲ့ ဒင် ဂေ ယင် တီ၊ လုဝ် မး ကာလာတ့်။ ဆေ ဂေ ဘော ဒင် ခဲင် ကာလုဝ့် ဘွင့်၊ လုဝ် ဝီ ဖ ဝီ ခူတ့်။ 29 အီမာယ် ဒွန် အီ ခဲင် န့ဟူမ် ဒါ အီ လှူ ဒီ ဇဝ်ဖြာ ပွိုန် ဟူမ် ယင် တီ။ န့ မုး အီ ဘွတ် ကာဆဝ်။ 30 မာလဲ၊ ဆေ န့ ဘဲန် ပီ လှူ အီ တဲး ဇဝ်ဖြာ ဂဝ်း ဝဲန် မှာပ်၊ ဆေ ဟီ ဒိုဝ်း နှာမ် ဒုဝ် ဆတ် တီ၊ လိုပ် ခြဝ်း ခဲင် ထိုပ် ဘိက် ဘွတ် တဲး ဒူအီ အီ လှူ ဝီ ကာလဝ့် ဒီ ဇဝ်ဖြာ၊ အာဝ် ပွိုန် ဟူမ် ယင် တီ ဒေါ မှဝ်။ လုဝ် ဒုဝ့် ကာဆိုမ် တူတ့် ခဲင် ငဝ်။”