ဇဝ်ဖြာ ဝီ စ်ု အာမုဝ်ဆဲ ကာလာင် ပေါ န့ ပွါ တဝ်း၊ “ဆေ န့ မိုဝ်း ဒူအီ အီ ဟဲ့ ယိုဝ် အီ ဟဝ် ဘူင် မှာပ်၊ ဆေ ဒါ တာင် ဆုင်ဖျာတ် အာမူ တီ၊ ဝီ ဒဲ့ အန် ဘဲန် ဆက်ဆေ၊ အန် မိူဝ် ဟဲ့ ဟွတ့် ထူမ် ဂြုဝ်း ဒါ တာင် တီ အီ ဒိူင် အန်၊ ဆေ အန် တူ ကာလာင် ဂြုဝ်း မှာန်၊ ဆေ ဒူအီ ဝီ တီ ယီ တူ ခဲ ခဲ့ ပီ နပ် အန် လွင် အာမူ တီ၊ န့ ဘဲန် မှာပ် ဒီ အန်။

2 ဆေ န့ ဘော မိုဝ်း ဒူအီ ပေါ ဝီ၊ အန် ဟဲ့ တာ ဒိုဝ် တာ ပါ မျုဝ် အီ တူ ဆီငါ ဘွတ်၊ န့ ဘော မုး ဒုဝ် ဆတ် ပီ ဟျီင် အီ၊ ဒုဝ် ဆတ် အီ ကွယ် ခဲင် ပြဲ ဘော ဒုဝ် ဆတ် အီ မွိုန် အီ လှန် ဒဲင် ကာဒါယ် အီ ဟဲ့ ယမ်၊ ဒူအီ ဝီ တီ ပီ ဆ နပ် လွင် တူ ဆီငါ ဘွတ် ဒူပ် ပီ ဒမ် ဒါရာ တီ မိူဝ်၊ အန် ယီ ဟဲ့ ဟွတ့် မိုဝ်း မှာပ်။

3 ဆေ န့ ဘော မိုဝ်း ဒူအီ အီ တာ ဒိုဝ် တာ ပါ မျုဝ် အီ တူ ဆီငါ ဘွတ် အီ ဒိုက် ဒီ ဒူအီ ဟဝ်၊ အန် ဟဲ့ ဘူင် ဇိုဝ် တီ၊ အန် ပီ ဆ နပ် မိူဝ်၊ ဒေါ ဝီ နပ် အန်၊ န့ ဟဲ့ ဟွတ့် ဘဲန် မှာပ် ဒီ အန်။

4 ဆေ န့ ဘော မိုဝ်း ဒူအီ အီ ကာလာင် ဂြုဝ်း ဒိူင် ဒီ အာတ့် ဇဝ်ဖြာ အာတ့် နပ် ဆီချာ အန်၊ ဟဲ့ ဟွတ့်၊ အန် ဝီ နပ် ဆီချာ လွင် ပီ ဒိူင် အန်၊ ဘော မုး အီ မွှိုမ် အီ တူ မွှိုမ်၊ အာရေ တူ တာင်။ အန် ယီ ဟဲ့ ဟွတ့် မိုဝ်း မှာပ်။

5 ဒွန် အီ အီ ဟဲ့ ဘူင် မှာပ် ဇိုဝ် တီ၊ အန် လုဝ် ဝီ ကာလာင် ပီ လုတ့် အန် တီ။ 6 ဟဲ့ ဟွတ့်၊ အန် လုဝ် ဒိုဝ်း မာဘူ ဒုဝ် မာ။ ဆေ အာဝ် ပါယ် တီ မာပဲ ဒုဝ် မာ၊ ဒိုဝ်း တး လှူ ဒီ ဇဝ်ဖြာ၊ တဲး န့ ဂဝ်း ဝဲန် မှာပ် ပီ လုဝ် ခမ် အန်။ ဒါ အီ လှူ ဒီ ဇဝ်ဖြာ လုဝ် လှူ ပီ လှူ အန် တီ၊ တဲး ဒူအီ ဝီ တီ ဝီ ကာလဝ့် ဒီ ဇဝ်ဖြာ။

7 မာလဲ၊ ဆေ ဒူအီ တီ တူ ပဲ ဒီ လှူ မာဘူ ဂေ မာပဲ၊ အန် လုဝ် လှူ မာဘ့လူယ် ပြဲ အာ ဒုဝ်။ ဆေ အာဝ် မုး မာဘ့လူယ် ပြဲ၊ အန် လုဝ် ဒိုဝ်း မာဘ့လူယ် ဒီတဲတ် အာ ဒုဝ်၊ တး လှူ ဒီ ဇဝ်ဖြာ၊ တဲး န့ ဂဝ်း ဝဲန် မှာပ် ပီ လုဝ် ခမ် အန်။ မာဘ့လူယ် အာဒါ အူ ဒုဝ် ဘဲန် ပီ လှူ အီ တဲး ဇဝ်ဖြာ ဂဝ်း ဝဲန် မှာပ်။ အာဒါ ပေါ ဒုဝ်၊ န့ ဒီ ဘဲန် ပီ လှူ အီ ဒုဝ့် ဒီ ငဝ်။ 8 အန် လုဝ် ဒိုဝ်း တး မာဘ့လူယ် တီ၊ ဒွါ ဒီ ဒါ အီ လှူ ဒီ ဇဝ်ဖြာ။ ဒါ အီ လှူ ဒီ ဇဝ်ဖြာ လုဝ် လှူ အီ တဲး ဇဝ်ဖြာ ဂဝ်း ဝဲန် မှာပ် တီ ဒီ အာတ့်။ အန် လုဝ် ကာဝျီ့ မဲင် မာဘ့လူယ် တီ၊ ယီ တူ ပွိုန် တဲး ဂိန့် အန် ကာဒတ်။ 9 အန် လုဝ် ဒိုဝ်း နှာမ် အန် မင် ကာလဝ့်၊ ခြဝ်း ဒီ ရဲင် ကာစှူင့် လှူ။ နှာမ် အီ ဆီ ဂိတ် ဆီ ကွယ် တွိုန် လုဝ် ဝီ ဆာနျီ့ ဒီ စေန့် ကာစှူင့် လှူ။ ပါယ် တီ န့ ဟဲ့ ဘဲန် ပီ လှူ အီ တဲး ဇဝ်ဖြာ ဂဝ်း ဝဲန် မှာပ်။ 10 မာဘ့လူယ် ပေါ အူ ဒုဝ် တွိုန် လုဝ် ဘဲန် ပီ လှူ အီ ဒုဝ့် ဒီ ငဝ်၊ တဲး န့ ဒူပ် ပီ လုဝ် လှူ ဘေ ပီ လှူ အီ ဒုဝ့် ဒီ ငဝ် ဘဲန် မျုဝ် ဘဲန် မျုဝ်။ ဒါ အီ လှူ ဒီ ဇဝ်ဖြာ လုဝ် လှူ ပီ လှူ တီ၊ တဲး ဒူအီ ဝီ တီ ဝီ ကာလဝ့် ဒီ ဇဝ်ဖြာ။ အန် ဟဲ့ ဟွတ့် လှူ၊ ဇဝ်ဖြာ မိူဝ် ဒီ ဂဝ်း ဝဲန် မှာပ် အန် တီ။

11 ဆေ အန် ယီ တူ ပဲ ဒီ လှူ မာဘ့လူယ် ပြဲ အာ ဒုဝ် ဘော မာဘ့လူယ် ဒီတဲတ် အာ ဒုဝ် တွိုန်၊ အန် လုဝ် ဒိုဝ်း ကာပဲ့ အီ ဟဲ့ ကာမွတ့် ဆီချာ အာဒါ အူ ဘ့လဲ ဒီ အူ ခ့ဝါက်၊ တဲး န့ ဘဲန် ပီ လှူ အီ တဲး ဇဝ်ဖြာ ဂဝ်း ဝဲန် မှာပ်။ ယီ တူ ပွိုန် ဟပ် နာမန် ဘော ကာညန် လေဘူန် နာ ခဲင်။ ခုဝ်၊ န့ မုး ပီ လှူ အီ တဲး ဇဝ်ဖြာ ဂဝ်း ဝဲန် မှာပ်။ အာဝ် မုး ပီ လှူ ဒီဂါဝ် ဘဲန် မျုဝ် ဘဲန် မျုဝ်။ 12 အန် လုဝ် ဒိုဝ်း တး ပီ လှူ တီ၊ ဒွါ ဒီ ဒါ အီ လှူ ဒီ ဇဝ်ဖြာ။ ဒါ အီ လှူ ဒီ ဇဝ်ဖြာ လုဝ် ဒိုဝ်း ကာပဲ့ တီ အာဒါ အူ ကာတိုင် ဒဲ အန်၊ ဝီ ဒုဝ့် ဒဲင် ကာစှူင့် လှူ ဒူပ် ပီ လှူ မျုဝ် ဟဝ် အီ ဒုဝ့် ဒီ ငဝ်၊ တဲး ဇဝ်ဖြာ လှုဝ်း ဒူအီ အီ လှူ တီ။ ပါယ် တီ န့ ဘဲန် ပီ လှူ အီ တဲး ဇဝ်ဖြာ ဂဝ်း ဝဲန် မှာပ်။ 13 ပါယ် တီ ဒါ အီ လှူ ဒီ ဇဝ်ဖြာ လုဝ် လှူ၊ တဲး ဒူအီ ဝီ တီ ဝီ ကာလဝ့် ဒီ ဇဝ်ဖြာ။ ဇဝ်ဖြာ မိူဝ် ဒီ ဂဝ်း ဝဲန် မှာပ် အန်။ ကာပဲ့ အီ ဆီ ဂိတ် ဆီ ကွယ် တွိုန် ဘော ဘဲန် ကြုဝ် ဂေ ဒါ အီ လှူ ဒီ ဇဝ်ဖြာ၊ တဲး န့ ပီ ပီ လှူ ဒီဂါဝ် ဘဲန် မျုဝ် ဘဲန် မျုဝ်။” ခဲ့ တီ ဇဝ်ဖြာ ဟဲ့ စ်ု ဂေ ဒူအီ အီဆာရေလ ဘူင်။

14 ဇဝ်ဖြာ ပီ ဝီ ကာလာင် ဒီ အာမုဝ်ဆဲ ပေါ အူ ဇေန့် တဝ်း၊ 15 “ဆေ ဒူအီ အူ ဝီ ဟဲ့ ပိဝ် ဒီ ဒွါ ခဲ့ ပီ လုဝ် ဒွါ အန် ဒီ ဇဝ်ဖြာ၊ ဆေ အန် မိူဝ် တူ လှုဝ်း ပီ ကာလိုပ် အန် တီ၊ အန် လုဝ် လှူ ဒုဝ် ဆတ် အူ ဒုဝ် ဒီ ဇဝ်ဖြာ၊ တဲး န့ ဘဲန် ပီ ဝီ ဆေ ဝိဝ် အန် ကူပ် ဟဲ့ ကာလိုပ် အန်။ အန် လုဝ် ဒိုဝ်း မာဘူ ဒီတဲတ် ဒုဝ် အာလူင့်။ ဆေ အာဝ် ပါယ် တီ လုဝ် ဒိုဝ်း မာပဲ ဒုဝ် အာလူင့် အီ တူ မိုဝ်း ဒူင် နဲ။ ငဝ်း ဒုဝ် တီ လုဝ် ကာဒါန် ရွိုန် ခဲ့ ပီ လုဝ် ဒွါ အန် ဒီ ဇဝ်ဖြာ။ ဂေ လုဝ် ဆုင်ဖျာတ် ငဝ်း အန် တီ ဒူပ် ဘ့လေ ဆ အီ ကွယ် ဒီ ထိုပ် ဘိက် ဘွတ် အီ မုး ဒူင် ကွယ် ဇဝ်ဖြာ။ 16 အန် ဘော လုဝ် ဝီ ဝျီ့ ဘော ပီ တူ မိုဝ်း အန် ဒီ ဒွါ တွိုန်။ ဒဲင် တီ န့ ဘော လုဝ် ဒိုဝ်း ငဝ်း အန် ဖန် ဘုန် အူ ဘုန်၊ ဝီ ပွါ။ ခဲ့ တီ အန် လုဝ် ဒွါ တူတ့် ဒီ ဒါ အီ လှူ ဒီ ဇဝ်ဖြာ။ ဒါ အီ လှူ ဒီ ဇဝ်ဖြာ ဘော လုဝ် လှူ ဒုဝ် ဆတ် တီ၊ တဲး ဒူအီ ဝီ တီ ဝီ ကာလဝ့် ဒီ ဇဝ်ဖြာ။ ဆေ အန် ဟဲ့ ဟွတ့် လှူ၊ ဇဝ်ဖြာ မိူဝ် ဒီ ဂဝ်း ဝဲန် မှာပ် ဒူအီ ဝီ တီ။

17 ဆေ န့ မိုဝ်း ဒူအီ အီ ဟဲ့ လုတ့် ဒါရာ ဇဝ်ဖြာ မျုဝ် မှဝ် အာဝ် တဝ်း၊ ပီ ဆ နပ် မိူဝ်၊ န့ ဟဲ့ ဟွတ့် ဘဲန် မှာပ် ဒီ အန်။ အန် လုဝ် ခမ် မှာပ် အန် တီ။ 18 အန် လုဝ် တး လှူ ပီ လှူ အီ တဲး ဇဝ်ဖြာ ဂဝ်း ဝဲန် ပီ ကာလိုပ် အန် တီ။ အန် လုဝ် ဒိုဝ်း မာဘူ အာလူင့် အီ တူ မိုဝ်း ဒူင် နဲ။ ငဝ်း အန် လုဝ် တဲး န့ ကာဒါန် ပဲ့ ဟဲ့ လုတ့် အန်။ ဒါ အီ လှူ ဒီ ဇဝ်ဖြာ လုဝ် လှူ ဒုဝ် တီ၊ တဲး ဒူအီ ဝီ တီ ဝီ ကာလဝ့် ဒီ ဇဝ်ဖြာ ဝါယ် ဟဲ့ ကာလိုပ် အန်။ အန် ဟဲ့ ဟွတ့် လှူ၊ ဇဝ်ဖြာ မိူဝ် ဒီ ဂဝ်း ဝဲန် ပီ ကာလိုပ် အန် တွိုန် ပီ တူ နပ် အန်။ 19 ပါယ် တီ ဒူအီ ဒွန် အီ လုဝ် လှူ ဆေ အန် ဟဲ့ လုတ့် ဒါရာ ဇဝ်ဖြာ။”