1 ဂွန် အာကူပ် တွိုန် ဘော န့ဟူမ် ဂေ၊ ဂေ ဟဲ့ ဒွိုမ် ဟာဝ် ရိုမ် ဒူပ် အာကူပ်၊ ဟာဝ် ကွယ် ခဲင် မိူင် အဲဂိုပ်။ ဂေ စိူဝ် ပါယ် နီ။ 2 အာရူဘေန်၊ အာဆီမေအူန်၊ အာလေဝီ၊ အာယူဒါ၊ 3 အာအီဆာခါ၊ အာဇေဘူလူန်၊ အာဘေန်ယာမ် 4 အာဒါန်၊ အာနာပ်ထာလီ၊ အာဂတ်၊ ဘော အာဆေန်။ 5 ဒေါ ဟာဝ် ဂေ လှုက်လှာန် အာကူပ် တွိုန် ဇမ် မိူင် အဲဂိုပ်၊ ဂေ ဘောကာဂ့လျီတ် ကွယ် ဘူ ဂိုဝ် ဝီ။ အာယုဝ် ယီ ဟဲ့ ကွယ် ခဲင် မိူင် အဲဂိုပ် အာတ့် တး ဂေ။

6 ဝါယ် အန် တီ ဟဲ့ လှေန့်၊ န့ ဘော ဇမ် အာခြာဝ် ဒေါ ဟဲ့ ယမ် ဂေ ဘောကာဂ့လျီတ်။ ဘော အာယုဝ် ဂေ အူကတ် အူဝါ အန်၊ ဘော ဂေ ဒူအီ ဒွန် အီ အီ ဟဲ့ ဒွိုမ် ကွယ် ဇာတ် တွိုန်၊ ဂေ ဒွန် အီ ဟဲ့ ဟွတ့် ယမ်။ 7 ဂေ လှုက်လှာန် ဒူအီ ဇာတ် တွိုန်၊ ဂေ အီ ဟဲ့ မုး အာမျုဝ် ဒူအီ အီဆာရေလ၊ ဂေ ဟဲ့ ဘဲန် ဒူအီ ကိူန် ကာဆဝ်၊ တဲး ဂေ ကော နုဝ့် ခဲင် မိူင် ဘော မိူင်။

8 ဝါယ် အန် တီ န့ ဝီ မိုဝ်း ခုန်ဒီခမ် ကာမာယ် အူ ကာဒင် အီ အိုပ် မိူင် အဲဂိုပ်။ ခုန်ဒီခမ် တီ တူ နပ် မာဆေ လွင် အာယုဝ် တွိုန်။ 9 အန် တဝ်း ဒီ ဂေ ဒူအီ အာမျုဝ် အန်၊ “အိုယ်၊ ဂေ ဒူအီ အီဆာရေလ နီ၊ ဂေ ဟဲ့ ဘဲန် ဒူအီ ကိူန် ကာဆဝ်။ ပွုန် ဂေ တာင် လွှိုမ် ပွုန် အေ။ 10 ဆေ န့ ဒီ မိုဝ်း ဒူအီ ဒီ ကာဂုဝ်း ဒီ အေ၊ ဂေ ဒီ ဘော နပ် ဒီ စွယ် ရန်ဆူ အေ။ ဂေ ဒီ ဘော ကာဂုဝ်း ပဲ အေ။ ဟဲ့ ဟွတ့်၊ ဂေ ဒီ ဘော တဝ် လေး ခဲင် မိူင် အေ။ ခုဝ် အန် တီ၊ အေ လုဝ် ပီလွှက့် ဒီ ဂေ၊ ကွဲ့ တဲး ဂေ ဘြဲ ပေါ မ့ပွါ။”

11 ပန် တီ ဂေ ဒူအီ အဲဂိုပ် စ်ု ဒူအီ မင် အီ၊ တဲး ဂေ ဘ်ု ဒူအီ အီဆာရေလ၊ တဲး ဂေ ဘူင် နာ စီစိဝ် ဒီ ဂေ၊ ခါနှာပ် ဂေ ဘူင် ဂါန် ကိူန် ကာဆဝ်။ ခုန်ဒီခမ် ဝီ စ်ု ဂေ ဒူအီ အီဆာရေလ ဒဲ မိူင် တျီ့ ပေါ အာ မိူင် အာဒါ အန်။ မိူင် တီ စိူဝ် မိူင် ဖီထူမ် ဂါယ် မိူင် ရာမာဆေတ်။ န့ မုး ဒူင် ပီ ဘ့လေး အုန် ခုန်ဒီခမ် ဖာရုဝ် ကြုဝ်ကြာမ် အန်။ 12 ဂေ ဒူအီ အဲဂိုပ် ဘော ဘူင် နာ စီစိဝ် ခဲ့ မှဝ် ဒီ ဂေ၊ ဒူအီ အီဆာရေလ တွိုန် ဘော ဝဲ ကာပွါ ကိူန်။ ခုဝ်၊ ဒူအီ အဲဂိုပ် ကော ယုဝ် ကာဆဝ် ဂေ။ 13-14 ဂေ ဘော ဝီ ခါနှာပ် ဂေ ဒူအီ အီဆာရေလ ဘူင် ဂါန်၊ တဲး ဂေ ကာဝ်ု ကာဒါယ် ကာပိတ်၊ ဘူင် မာ မာအုတ်၊ ဆမ် ကာင် ဘော ဘူင် ဂါန် ဘဲန် မျုဝ် ဘဲန် မျုဝ် ခဲင် ဒူင် နာ။ ပါယ် တီ ဂေ ဒူအီ အဲဂိုပ် စ်ု ကာဆဝ် ဂေ ဒူအီ အီဆာရေလ၊ တဲး ဂေ ဘူင် ကိူန်၊ ကွဲ့ ဟူ တဲး နဝ်း ဂေ ဒါခိုယ်။

15 ကာတဲ ဂေ ဒူအီ အီဆာရေလ န့ ယီ မိုဝ်း ယာ မောမိပ် အာ ဝီ။ ဂါယ် စိူဝ် နာင် ဆီဖြာ ဂါယ် နာင် ဖူဝါ။ ခုန်ဒီခမ် ခဲင် မိူင် အဲဂိုပ် ဘော စ်ု ယာ အာ ဝီ တီ ဟာဝ် ဇမ် ဒူင် ကွယ် အန်။ အန် တဝ်း ဒီ ဂါယ်၊ 16 “ဆေ ဘာယ် လိုမ်လာ အီဘိုန့် ဟဲဘြဲ ဒေါ ဂွန် ဂေ၊ ဆေ ဂွန် ဂေ မုး ဂွန် အီမာယ်၊ ဘာယ် လုဝ် တဲး အန် ယမ်။ ဆေ န့ ယီ မုး ဂွန် အီဘိုန့်၊ ဘာယ် လုဝ် တဲး အန် အိမ်။”^a 17 ယာ မောမိပ် အာ ဝီ တွိုန် ယီ မိုဝ်း နဝ်း ယုဝ် ဇဝ်ဖြာ။ ခုဝ်၊ ဂါယ် တူ ဘူင် ပီ တဝ်း ခုန်ဒီခမ် တွိုန်။ ဂါယ် တဲး ဂွန် အီမာယ် အိမ်။ 18 ပန် တီ ခုန်ဒီခမ် ဝီ စ်ု ယာ မောမိပ် အာ ဝီ တွိုန်၊ တဲး ဂါယ် တး ဇမ် ဒူင် ကွယ် အန်။ အန် ဒီမွှတ် ဂါယ် တဝ်း၊ “မှဝ် န့ ပါယ် ပီ ဘူင် ဘာယ် ပါယ် နီ။း မှဝ် မ့ပါယ် ပီ တူ ငဝ်း ယမ် ဘာယ် ဂွန် အာင အီ မုး အီမာယ်။း”

19 ယာ မောမိပ် တွိုန် ဝီ တဝ်း ဒီ အန်၊ “ဂေ အီဘိုန့် အာမျုဝ် ဟဲဘြဲ တူ ပီ အီဘိုန့် အာမျုဝ် အဲဂိုပ်။ ဂေ မိုဝ်း ပ့လူမ်၊ တဲး ဂေ စေဝ် ဂွန် အာတ့် ဒန် တး ဇမ် ယာယ် ဒူင် ကွယ် ဂေ။”

20-21 ဇဝ်ဖြာ ဘော အိုင် ယာ မောမိပ် ဂါယ် တီ။ အန် တဲး ဘော ဂါယ် မိုဝ်း ဂွန် ကူပ် ယုဝ် ဂါယ် ဇဝ်ဖြာ။ ဂေ ဒူအီ အီဆာရေလ ဘော ကြဲ ဒီ ကိူန် လွှိုမ် ခါ အာတ့်။ 22 ပန် တီ ခုန်ဒီခမ် ဖာရုဝ် ဘော ဒွါ အာမိင် ဒီ ဒူအီ ဒွန် အီ တဝ်း၊ “ဆေ ဂေ ဒူအီ ဟဲဘြဲ ဟဲ့ ဂွိုတ် ဂွန် အာင အီ မုး အီမာယ်၊ ဘေ လုဝ် ဝဲန် ဒွန် အီ ခဲင် ဘ့လဲင်။ ဂွန် အာင အီ မုး အီဘိုန့်၊ ဘေ လုဝ် တဲး အန် ကွယ်၊ တဲး အန် အိမ်။” ခုန်ဒီခမ် တဝ်း ပါယ် တီ ဒီ ဒူအီ ဒွန် အီ။