အာကူပ် တွိုန် ဟဲ့ ဟွတ့် ယမ်၊ အာယုဝ် ဝီ ဂိုပ် ဒီ ဒုဝ် ဂုန့် အန်၊ ယာမ် တာင်၊ ဝီ အုး ဂုန့် အန်။ 2 အာယုဝ် ဝီ စ်ု ဒဲစေန့် အန်၊ ဂေ အီ မုး ဆာရာဝူန် အန်၊ တဲး ဂေ ဖဝ်း ဆီနမ် ဒီ ဒုဝ် ဂုန့် အန်၊ ကွဲ့ တဲး အန် အုး၊ ကွဲ့ တဲး အန် အမ်။ ဟဲ့ ဟွတ့် ဂေ ဆာရာဝူန် ဝီ ဘူင် ပါယ် တီ။ 3 ဂေ လုဝ် ဖဝ်း ဆီနမ် ဒီ ဒုဝ် အန် အာဒါ ဖွုန် ဂိုဝ် ဆီငဲ။ န့ လုဝ် လှေန့် ခဲ့ တီ။ ဂေ ဒူအီ အာမျုဝ် အဲဂိုပ် ဝီ က့လိုဝ် အာဒါ ဘူ ဂိုဝ် ဆီငဲ။

4 ဝါယ် ဟဲ့ တူတ့် အာခြာဝ် ဒီ လုဝ် က့လိုဝ် ဂေ၊ အာယုဝ် ဝီ ကာလာင် ဒီ အာမူ အာမာတ် ခုန်ဒီခမ် တဝ်း၊ “တဲး ဘေ ကာလာင် ဒီ ခုန်ဒီခမ် ပါယ် နီ၊ 5 ‘ဒေါ ဟဲ့ ငှာ ဒီ ယမ် ဂုန့် အုဝ်၊ အန် ဟဲ့ တဲး အုဝ် ဒွါ ကာဒိက် ဆတ်ဇာ ဒီ အန်၊ တဲး အုဝ် ဘ့လေး ဒုဝ် ဘူင့် အန် ခဲင် ဘာရေဝ် အန် ခဲင် မိူင် ကာနန့်။’ ခုဝ်၊ အုဝ် မှာန့် မဲ ခုန်ဒီခမ်၊ တဲး မဲ ခ့ဝါင် အုဝ် ဟာဝ် ဒိပ် ဂုန့် အုဝ်။ ဟဲ့ ဟွတ့် အုဝ် ဒီ ဝီ တး ဒီ နီ။” 6 ခုန်ဒီခမ် ဘော ဝျီ့ ဂြုဝ်း အန် တဝ်း၊ “တဲး မဲ ဟာဝ် ဒိပ် ဒုဝ် ဘူင့် ဂုန့် မဲ၊ တဲး မဲ ဘူင် ပီ ဒွါ မဲ ကာဒိက် ဆတ်ဇာ ဒီ အန်။” 7 ပန် တီ အာယုဝ် ဝီ ဟာဝ်၊ တဲး အန် ဒိပ် ဂုန့် အန်။ န့ ယီ မိုဝ်း ဂေ အာမူ အာမာတ် ခုန်ဒီခမ်၊ ဂေ ဒါ တာင် ခဲင် မိူင်၊ ဂေ အီ မိုဝ်း ပွုန် ခဲင် မိူင် အဲဂိုပ်၊ ဂေ ဒွန် အီ ဇိုဝ် တီ ဟာဝ် ရိုမ် ဒူပ် အာယုဝ် တွိုန် 8 ဘော ဂေ န့ဟူမ် အန်၊ ဂေ အီကတ် အန်၊ ဘော ဒွန် အီ အီ ကွယ် ခဲင် န့ ဟူမ် ဂုန့် အန်၊ ဂေ ဒွန် အီ ဘော ဒူပ် အန်။ ဂိတ် မီ ဂေ ဂွန် ဒီတဲတ် ဘော မာဘူ ဘော မာပဲ အီ ကွယ် ဒီ ပန် ခဲင် မိူင် ဂုဝ်ဆေန် တွိုန်။ 9 ဂေ ဒူအီ မင် အီ ဘော ဟာဝ် ပဝ့် ရာထာ၊ မင် အီ ပဝ့် မင်ပြွင့်။ န့ ဘော မိုဝ်း ဒူအီ ကိူန် အီ ဟာဝ် ရိုမ် ဒူပ် အန်။

10 ဂေ ဟဲ့ တး ဇမ် ဒီ ကာင်နဝ်း အီ မုး ဒူင် မး အီ ငှုဝ်။ န့ စိူဝ် အာထာတ်၊ ဂေ ဒွန် အီ ဝီ စုး ဒီ ယာမ် တာင်၊ ယာမ် လှေန့်။ အာဒါ ဘူ ဆီငဲ၊ အာယုဝ် တွိုန် ဝီ ဘူင် ဘ့လွယ် ဒူအီ ယမ်။ 11 ဂေ ဒူအီ အီ ကွယ် ခဲင် မိူင် ကာနန့် တွိုန်၊ ဂေ ယီ ယိုဝ် ဒူအီ က့လိုဝ် ဒီ ကာင်နဝ်း အာထာတ် တွိုန်၊ ဂေ ဘော တဝ်း၊ “အိုယ်၊ ဂေ ဒူအီ အာမျုဝ် အဲဂိုပ် ဘူင် ဘ့လွယ် က့လိုဝ် ကာဆဝ်။ ခုဝ်၊ ဂေ ဝီ တဲး ဒူင် တီ စိူဝ် အာဘေန်မီရာတ်။^a”

12 ပါယ် တီ ဂေ ဂွန် အာကူပ် တွိုန်၊ ဂေ ဟဲ့ ဘူင် ပီ မှာန့် ဂုန့် ဂေ။ 13 ဂေ တိုယ် ဒုဝ် ဘူင့် အန် ဇမ် မိူင် ကာနန့်၊ ဒိပ် အန် ခဲင် ကာဒဝ် မာဝ် အီ ကွယ် ကာတတ် ဒူင် စိူဝ် မာတ်ပေန်လာ အီ ကွယ် နာ လေး ဆီငဲ ဒူင် စိူဝ် မမ်ရေ။ ကာဒဝ် မာဝ် တီ ကွယ် ခဲင် ဒူင် နာ ပီ စိုဝ်း အာဘြာဟမ် တွိုန် ဒီ အာအေဖာရူန် တွိုန်၊ အီ မုး ဒူ အီ အာမျုဝ် ဟေထိတ်။ အန် ဟဲ့ တဲး န့ ဘဲန် ဒူင် ဒိပ် ဂေ ဒူအီ ယမ်။ 14 အာယုဝ် ဟဲ့ ဟွတ့် ဒိပ် ဂုန့် အန်၊ အန် ဝီ ဝေန့် မိူင် အဲဂိုပ်။ ဘော အန် ဘော အူကတ် အူဝါ အန်၊ ဂေ ဒွန် အီ အီ ဟဲ့ ဟာဝ် ဒူပ် အန်၊ ဂေ ဝီ ဝေန့်။

15 ဂုန့် ဂေ ဟဲ့ ဟွတ့် ယမ်၊ အီကတ် အာယုဝ် တွိုန် လာယ် ကာလာင် တဝ်း၊ “အေ ယုဝ် အာယုဝ်၊ ယုဝ် အန် ဆီ မိုဝ်း နဝ်း ရူ ဒီ အေ၊ ခြာမ် ဒီ ဝီ ဘူင် နာ တူ မွှိုမ် ဒီ အေ ကူပ် ဟဲ့ ဘူင် အေ နာ တူ မွှိုမ် ဒီ အန် ခါ အာတ့်။” 16 ပန် တီ ဂေ ဝီ ဒဲ့ ဒါ အူ ဝီ၊ တဲး အန် ကာလာင် ဒီ အာယုဝ် တဝ်း၊ 17 “အာတ့် ယမ် ဂုန့် မဲ၊ အန် ဟဲ့ တဝ်း ဒီ ယေ၊ ‘တဲး ဘေ မှာန့် ဒီ အာယုဝ်၊ တဲး အန် ဂဝ်း ဝဲန် မှာပ် ပီ ဘူင် ဘေ ဒီ အန်။’ ဒေါ တီ နီ၊ ယေ ဝီ တး မှာန့်၊ တဲး မဲ ဘ့လွာ့ ဝဲန် မှာပ် ယေ။ ဘော ယေ မုး မှာယ် ဇဝ်ဖြာ ပီ ကြိုပ် ဂုန့် မဲ။” အာယုဝ် တွိုန် ယီ ယိုဝ် ပီ မှာန့် ဂေ တီ၊ အန် ဝီ ယာမ်။

18 ဟဲ့ ဟွတ့် ပန် တီ ဂေ အီကတ် အန် ဘော တး ဇမ် ဒူင် ကွယ် အန်။ ဂေ တး ဂူမ် ဒီ အာတ့် အန် တဝ်း၊ “ယေ ဟဲ့ တး ဒူင် ကွယ် မဲ၊ တဲး ယေ ဘဲန် မှာယ် မဲ။”

19 အာယုဝ် တွိုန် ဝီ တဝ်း၊ “ကွဲ့ တဲး ဘေ ဝီ ယုဝ်။ အုဝ် တူ မုး ဇဝ်ဖြာ။ 20 ဘေ ဟဲ့ ဒွိုမ် ဘူင် နာ တူ မွှိုမ် ဒီ အုဝ်။ ဇဝ်ဖြာ ယီ ဟဲ့ တဲး န့ ဘဲန် နာ မွှိုမ်။ အန် ဇဝ် ဟဲ့ ဆီ ချွတ် အာဆာက် ဂေ ဒူအီ ကိူန်။ ကူပ် ပဲ့ ဟဲ့ ဘူင် ဘေ၊ ဂေ ဒူအီ ကိူန် တီ၊ ဂေ ဆီ ကွယ် ကော ဇမ် အာတိုဝ်။ အာဝ် မိုဝ်း အာဆေ အီ ဟဲ့ ယမ်။ 21 ဘေ မိူဝ် အာဝ် လုဝ် ယုဝ် မာဆေ။ အုဝ် ဒီ ဝီ ဟျီင် ဘော ဘေ ဘော ဂွန် ဘေ။” ပါယ် တီ အာယုဝ် ဝီ ကာလာင် ဂြုဝ်း မွှိုမ် ဒီ ဂေ၊ တဲး န့ ဒိုဝ် နဝ်း ဂေ။

22 အာယုဝ် ဘော ကွယ် ဟာဝ် ခဲင် မိူင် အဲဂိုပ် တွိုန်၊ ဘော အန် ဘော န့ဟူမ် ဂုန့် အန်။ အာဆာက် အန် ဘော နုဝ့် အူ မာယဝ်း ဒီ ဂိုဝ် ဆီနမ်။ ပန် တီ အန် ဘော ယမ်။ 23 အာဆာက် အန် ဟဲ့ တူင့်၊ တဲး အန် ကော ယိုဝ် လှုက်လှာန် အန်။ ဒေါ ကွယ် အန်၊ အန် ဘော စုဝ့် ငျီမ် လှဲန် အန်၊ အီ မုး ဂွန် အာမာခီရာ။ အာမာခီရာ မုး ဂွန် အာမာနာဆေ။

24 အန် ဝီ တဝ်း ဒီ အူကတ် အူဝါ အန်၊ “အိုယ်၊ အုဝ် ငှာ ဒီ ယမ် ဒေါ တီ နီ။ ဇဝ်ဖြာ ယီ ဒီ ဟျီင် ဘေ၊ အန် ဒီ ဘော တိုယ် ဘေ၊ တဲး ဘေ ဝီ လေး တ မိူင် တီ၊ ဟာဝ် ဇမ် ခဲင် မိူင် ပီ ဒွါ အန် ဒီ အာဘြာဟမ် ဘော အာဆဲက် ဘော အာကူပ် တွိုန်။ အန် ဇဝ် ဟဲ့ ဟွတ့် ဒွါ ကာဒိက် ဆတ်ဇာ လွင် အန် တီ။ အန် ဒီ ဘော ဘူင် ပီ တဝ်း အန်။” 25 အန် ဟဲ့ ဟွတ့် ကာလာင် ပါယ် တီ အန် ဝီ မှာန့် တဲး ဂေ အူကတ် အူဝါ အန် ဝီ ဒွါ ကာဒိက် ဆတ်ဇာ ဒီ အန်။ အန် တဝ်း၊ “တဲး ဘေ ဒွါ ကာဒိက် ဆတ်ဇာ ဒီ အုဝ်။ ဆေ ဇဝ်ဖြာ ဒီ ဝီ တိုယ် ဘေ ဟာဝ် ဇမ် ခဲင် မိူင် ဘေ၊ တဲး ဘေ ဒိုဝ်း ဟာဝ် ဘော ဒုဝ် ယမ် အုဝ်၊ တဲး အုဝ် ဝီ ကွယ် ခဲင် မိူင် ဘေ တီ။”

26 ပန် တီ အာယုဝ် ဘော ယမ် ခဲင် မိူင် အဲဂိုပ်။ ဒေါ အန် တီ အာဆာက် အန် ဟဲ့ နုဝ့် အူ မာယဝ်း ဒီ ဂိုဝ် ဆီနမ်။ ဝါယ် ဟဲ့ ယမ် အန်၊ ဂေ ဝီ ဖဝ်း ဆီနမ် ဒီ ဒုဝ် အန်၊ ကွဲ့ တဲး အန် အမ်။ ဟဲ့ ဟွတ့် ဂေ ဘ့လေး ဒုဝ် အန် ခဲင် ကွမ်။