1 အာကူပ် တွိုန် ဝီ ဒဲ့ ဂွန် အန် ဒွန် အီ တး ဒူင် ကွယ် အန်။ အန် တဝ်း၊ “တဲး ဘေ တး ဒီ နီ၊ တဲး အုဝ် ပွိုန် ဒီ ခဲ ဒီ ဘေ ပီ ဒီ ကာဒုး ဘေ နာ အာတ့် ဟာဝ်။

2 တဲး ဘေ တး ကာဇု၊ ဘေ ဂွန် အာကူပ်၊ တဲး ဘေ ထူမ် ဂြုဝ်း အာအီဆာရေလ အီ မုး ဂုန့် ဘေ။

3 မဲ အာရူဘေန်၊ မဲ မုး ဂွန် ဂိန့် အုဝ်။ မဲ ဟဲ့ ပွိုန် ပ့လူမ် အုဝ်၊ ဒေါ ညှမ် ကိူန် အာဆာက် အုဝ်။ မဲ ဒီ ယဲတ့် ဒီ အာတ့် အီ၊ မဲ ဘော မိုဝ်း ဆာရေ တာင် လွှိုမ် အီ။ 4 မဲ ယီ တူ ပွိုန် အိုပ် ပ့လူမ် မဲ၊ ပီ အီ တူ ပွိုန် အိုပ် အိုမ် နမ်မုက်ဆာရာ။ ခုဝ်၊ နာ အာတ့် နီ ဟာဝ် မဲ အာဝ် ဟူ မွှိုမ် လွှိုမ် အီ။ မဲ ဟဲ့ တး ဒူင် အိတ် ဂုန့် မဲ၊ ဟဲ့ ပီ လိုဝ် ဆာရေ အုဝ်၊ တဲး အုဝ် ဝီ က့လိုဝ်။

5 အာဆီမေအူန် ဂါယ် အာလေဝီ၊ ဘာယ် ပီ အူ ဂူ။ ဘာယ် ဟဲ့ ဘူင် အီ ဟာယ် ကာဆဝ်။ 6 အုဝ် တူ ဆီ နပ် လွင် ပီ ဒီ ခြာမ် ဘာယ်။ အုဝ် တူ ဆီ ကွယ် ရိုမ် ဒူပ် ဘာယ်။ ခုဝ်၊ ဒေါ ရူ ကာဆဝ် ဘာယ်၊ ဘာယ် ဟဲ့ ငဝ်း ယမ် အီ။ ဘာယ် မိူဝ် ဟဲ့ ဒါခိုယ် ဘော တဲး မာမက် မိုဝ်း ဆဝ်၊ အာဝ် ဟူ ပွိုန် ဟာဝ်။ 7 အုဝ် ဒိူင် ဘာယ်၊ ကူပ် နဝ်း ရူ ဘာယ် တူ နပ် ဒီ စူ။ အုဝ် တူ တဲး ဘာယ် ကွယ် ရိုမ်၊ တဲး ဘာယ် ဝီ ဟာဝ် ဘဲန် ပ့လုဝ့် ဘဲန် ပ့လုဝ့် ခဲင် မိူင် အီဆာရေလ။

8 မဲ အာယူဒါ၊ မဲ ယီ ဒီ ထူမ် အူကတ် အူဝါ အီ အိူပ် မဲ။ မဲ ဝီ ပဲ ရန်ဆူ မဲ ဆေဆေ။ ဂေ ဂွန် ဂုန့် မဲ ဒီ ဝီ ဂူမ် ဒီ အာတ့် မဲ။ 9 အာယူဒါ ယီ ပီ ဂွန် မာခြင်ဆီ အီ ဟဲ့ ဟွတ့် ဟူမ် ယင် ဒုဝ် ပီ ငဝ်း အန်။ ဟဲ့ ဟွတ့် အန် ဝီ အိတ်။ အာဝ် မိုဝ်း အာဆေ အီ ယ ဘျိတ့် အန်။ 10 အာယူဒါ ဒီ ဘဲန် ဒါ ကာညာ အီ အိုပ် အီ ဆေဆေ။ ပွုန် အန် အာဝ် တူတ့် ဒေါ မှဝ်။ ဂေ ဒီ ဂူမ် ဒီ အာတ့် အန်၊ ဂေ ဘော အိူပ် မျုက် အန် ဆေဆေ။ 11 အန် ဒီ ခြမ် ကာဆဝ်၊ တဲး အန် ပွိုန် ဒီ ပက် မာလုဝ် အန် ဒီ ဟေ မာငုန်၊ တဲး အန် ပွိုန် ဒီ ပက် မင်ပြွင့် အန် ဒီ ဟေ ဘွတ်။ အန် ဘော ပွိုန် ဒီ လး ခြိုင် အန် ခဲင် အိုမ် မာငုန်။ 12 အန် ဒီ ပွိုန် ဒီ ဒျီင် အိုမ် မာငုန်၊ တဲး ငါယ် အန် ကော ရေန့်။ ဟြာင် အန် ကော လုယ် ပီ အိုမ် ပူ မာမက်။

13 မဲ အာဇေဘူလူန်၊ မဲ ယီ ကွယ် ဒီ ခူပ် အိုမ် နမ်မုက်ဆာရာ။ ဒူင် ကွယ် မဲ ဘော မုး ဒူင် ချ ဂေ ရိုဝ် ဆင်ဖုဝ်။ ဒူင် ကွယ် မဲ ဒီ ဇမ် မိူင် ဆီဒူန်။

14 အာအီဆာခါ ပီ မာလုဝ် အီ မိုဝ်း ပ့လူမ်။ အန် ပီ မာလုဝ် ဒီ ကွယ် ကာတဲ ကြုဝ်ကြာမ် ပီ ဒီ ပး အန်။ 15 အန် ဘော ယိုဝ် ဒူင် ဒီ ချ အန် ဟဲ့ မွှိုမ်၊ ကာဒါယ် အီ ကွယ် ကာတတ် အန် ဟဲ့ ဘွတ်။ ခုဝ်၊ အန် ဘော တဝ်း ဒီ ပး ကြုဝ် စန်၊ ဘဲန် မှာယ် အီ ဟဝ်။

16 မဲ အာဒါန်၊ မဲ ဒီ အိုပ် အာမျုဝ် မဲ ပီ ဂေ ခြိုဝ် အာမျုဝ် အီဆာရေလ ဒီ အိုပ် ခြိုဝ် ဂေ။ 17 ဂွန် အာဒါန်၊ အန် ဒီ ဘဲန် ပီ ဟန့် အီ ကွယ် ဒီ ခူပ် န့တေန့်။ အန် ပီ ဟန့် ဒီ ဘ်ု ဒီ ဇုဝ့် ကာနှုတ့် မင်ပြွင့်၊ တဲး အီ ပဝ့် မင်ပြွင့် ဝီ စုဝ်း။”

18 ပန် တီ အာကူပ် ဝီ တဝ်း၊ “အိုယ် မဲ ဇဝ်ဖြာ၊ အုဝ် ဒီကေန် မဲ၊ တဲး မဲ တး ချွတ် ယေ။”

19 အာကူပ် ဝီ တဝ်း၊ “ဂေ ဖိုင် ဒါ ပြာ ဂေ တဝ်း ဒီ တး ပြာ ခဲ့ ပီ မိုဝ်း အာဂတ်။ အန် ယီ ဒီ ဒူပ် ဂေ၊ တဲး အန် ဝီ ဒိုဝ်း ဝိဝ် ကြုဝ် ပီ ပြာ ဂေ။

20 မဲ အာဆေန်၊ မဲ ဒီ မိုဝ်း ငှုဝ် ကိူန် လေး ခဲင် နာ မဲ။ မဲ ဒီ ဘော မိုဝ်း ပီ ဒီ ဟူမ် ဆီငဲး ကာဆဝ် ပီ ပီ ဒီ ဟူမ် ခုန်ဒီခမ်။

21 မဲ အာနာပ်ထာလီ၊ မဲ ပီ မာဘွုး အီ လေး ဟာဝ် ခဲင် ပြဲ။ ဂွန် အန် ယီ စှိတ် ကာဆဝ်။

22 မဲ အာယုဝ်၊ မဲ ပီ ရာ ဟေ အီ မိုဝ်း ဘ့လေ ကိူန်။ မဲ ကွယ် ခူပ် အိုမ် တုဝ်း။ ရာ အန် ယီ တာင် တူင့်။ 23 ဒါ အီ ဂူင့် အ ဒီ ဘော ရူ ဒီ အန်။ ဂေ ဘော ဘန့် အန်။ 24 ဂေ ယီ တူ အွင်။ ဇဝ်ဖြာ တဲး အာယုဝ် ဂူင့် ဆီချာ အ အန်၊ တဲး အန် ဘော လိင် ဘ့လာ အီ။ ဇဝ်ဖြာ ပီ ဒူအီ ဟျီင် မာဘူ။ အန် ဇဝ် ဘော ပီ မာဝ်၊ အာဝ် နပ် ဒီ ရ်ု။ ပွုန် အန် တာင်၊ အန် ဝီ ဘ်ု အာကူပ် ဘော ဂွန် အန်။ 25 ဇဝ်ဖြာ အီ စွယ် မဲ၊ အီ မုး ဇဝ်ဖြာ အီ အိုပ် တူတ့် ဒွန် မျုဝ်၊ ဇဝ်ဖြာ တီ ဒီ မွင့်ကာရာ ဒွါ ဒီ မဲ၊ တဲး နာ မွှိုမ် ပီ ဒွါ အန် ဒီ မဲ လေး ခဲင် ဂါင်ဟြာဝ်၊ လေး ဘော နာ ခြိုမ် ခဲင် ကာဒါယ်။ တဲး နာ မွှိုမ် ပီ ဒွါ ဇဝ်ဖြာ ဒီ မဲ လေး ခဲင် ဝတ့် ဘော ခဲင် ပူ အီဘိုန့် မဲ။ 26 ခဲ့ ပီ မွင့်ကာရာ တဲး ဂုန့် ဒင် မဲ ဒီ မဲ၊ တဲး န့ တာင် လွှိုမ် ပီ မွင့်ကာရာ တဲး ဂေ အီ ကွယ် ဒီ အာတ့် အုဝ်။ နာ မွှိုမ် ပီ ဒီ ဒွါ ဇဝ်ဖြာ ဒီ အာယုဝ် တွိုန် ဟဲ့ တာင် လွှိုမ် နွန် အီ ကွယ် ဆေဆေ ဒွန် နာ ဒွန် ပ့လုဝ့်။ တဲး အာယုဝ် ပွိုန် တူတ့် ဇိုဝ် တီ။ ခုဝ်၊ အန် ဟဲ့ ကွယ် ကာယဝ်း ဒီ အီကတ် အန်။

27 မဲ အာဘေန်ယာမ်၊ မဲ ပီ မာဆုဝ် ပြဲ အီ ဟြေတ့် ပီ ဒီ ဟူမ် အန်။ ဆိန့်ဝး အန် ဟာဝ် ဟြေတ့် ပီ ဒီ ဟူမ် အန်၊ ဘာ ဒီ အပ် အန် ဘော ကွယ် ကာဆာင် ခဲ့ ပီ ပွိုန် အန်။”

28 အာ တီ မုး ဂေ ခြိုဝ် အာမျုဝ် အီဆာရေလ ဂိုဝ် ဒီ အာ ခြိုဝ်။ ဂုန့် ဂေ ဟဲ့ ကာလာင် ဂြုဝ်း တီ ဒေါ မွင့်ကာရာ ဒွါ အန် ဒီ ဒွန် အီ။ အန် ဟဲ့ မွင့်ကာရာ ဒွါ ဒီ ဂေ အူ ဝီ အူ မျုဝ်၊ တဲး န့ ဒူပ် ပီ ဒီ ကာအာပ် ဂေ ပွိုန်။

29 အာကူပ် ဟဲ့ ဟွတ့် ကာလာင် တူတ့် ဒွန် မျုဝ်၊ အန် ဝီ မှာန့် ဒီ ဂေ တဝ်း၊ “အုဝ် ငှာ ဒီ ယမ်၊ အုဝ် ဒီ ဝီ ကွယ် ရိုမ် ဒူပ် ဂေ အီ ဟဲ့ ဟွတ့် ယမ် ဒီ အာတ့်။ တဲး ဘေ ဒိပ် အုဝ် ဒူင် ဒိပ် ဂေ ဂုန့် အုဝ် အီ မုး ကာဒဝ် မာဝ် အီ ကွယ် ခဲင် ဒူင် နာ အာအေဖေရူန်၊ အီ မုး အာမျုဝ် ဟေထိတ် တွိုန်။ 30 န့ မုး ကာဒဝ် မာဝ် အီ ကွယ် ခဲင် ဒူင် နာ အီ စိူဝ် မာတ်ပေန်လာ။ န့ ကွယ် အာတ့် ဇမ် ဘေ ဒူင် စိူဝ် မမ်ရေ ခဲင် မိူင် တာင် ကာနန့်။ ကာဒဝ် မာဝ် တီ၊ အာဘြာဟမ် တွိုန် ဟဲ့ စိုဝ်း ဒီ ဒါ အီ စိူဝ် အာအေဖေရူန်၊ အီ မုး အာမျုဝ် ဟေထိတ်။ အာဘြာဟမ် တွိုန် ဟဲ့ စိုဝ်း ကာဒဝ် မာဝ် တီ ဘော ဒူင် နာ အီ ကွယ် ကာတတ် အန်၊ တဲး န့ ဘဲန် ဘာရေဝ်။ 31 ခဲင် ကာဒဝ် မာဝ် တီ၊ ဂေ ဟဲ့ ဘ့လေး အာဘြာဟမ် တွိုန် ဂါယ် အီဘိုန့် အန် အီ စိူဝ် နာင် ဆာရာ။ ဟဲ့ ဟွတ့် ဂေ ဝီ ဘ့လေး ဘော အာဆဲက် ဘော အီဘိုန့် အန် အီ စိူဝ် နာင် ဘဲက်။ အုဝ် မိူဝ် ဟဲ့ ဘ့လေး နာင် လေအာ ခဲင် ကာဒဝ် မာဝ် တီ။ 32 န့ မုး ဒူင် နာ ဘော ကာဒဝ် မာဝ် ပီ စိုဝ်း ဂုန့် ဒင် အေ ဒီ ဒူအီ အာမျုဝ် ဟေထိတ်။”

33 အာကူပ် တွိုန် ဟဲ့ ဟွတ့် ကာလာင် ပါယ် တီ အန် ဝီ အိတ် ဒဲင် ကာစှူင့် အိတ် အန်။ ဟဲ့ ဟွတ့်၊ ဖွိုမ် အန် ဘော တူတ့်။ အန် ဟဲ့ ဟာဝ် ကွယ် ရိုမ် ဒူပ် ဂေ ဒူအီ အာမျုဝ် အန် အီ ဟဲ့ ယမ် ဒီ အာတ့် အန်။