1 ဝါယ် အန် တီ အာဝ် လှေန့် ဂေ ဝီ တး ဒီ အာယုဝ် တွိုန် တဝ်း၊ “ဂုန့် မဲ ဟဲ့ ကာတတ် ဒီ ယမ်။” ပန် တီ အာယုဝ် ဝီ ဒဲ့ ဂွန် အီမာယ် အန် အာ ဝီ၊ အီ စိူဝ် အာမာနာဆေ ဂါယ် အာအေဖာရိမ်။ အန် ဘော တဲး ဂါယ် ဒူပ် အန်၊ ဟာဝ် ဒူင် ကွယ် ဂုန့် အန်။ 2 ဂေ ဝီ တဝ်း ဒီ အာကူပ် တွိုန်၊ “ဂွန် မဲ အီ စိူဝ် အာယုဝ် ဟဲ့ တး။” အန် ဝီ ရိန် ကာဆဝ်၊ တဲး အန် ပွိုန် ဒီ ယိတ့် တုတ့် ဒီ ကာစှူင့် အိတ် အန်။

3 အာကူပ် ဝီ တဝ်း ဒီ အာယုဝ်၊ “ဇဝ်ဖြာ အီ မုး အန် ဇဝ် အီ အိုပ် တူတ့် ဒွန် မျုဝ်၊ အန် ဟဲ့ ကာပ့လုး ဒီ အုဝ် ဒေါ ကွယ် အုဝ် ခဲင် မိူင် ကာနန့် တွိုန်။ အန် ဇဝ် ဟဲ့ မွင့်ကာရာ ဒွါ ဒီ အုဝ်။ 4 အန် ဟဲ့ တဝ်း၊ ‘အုဝ် ဒီ တဲး မဲ မိုဝ်း လှုက်လှာန် ကိူန်၊ တဲး အာမျုဝ် မဲ ကိူန်၊ တဲး မဲ ဘဲန် ဂုန့် ဒင် ဂေ အာမျုဝ် ဒူအီ ကိူန်။ ကာဒါယ် ဒူင် ကွယ် မဲ ဒေါ တီ နီ၊ အုဝ် ဒီ ဒွါ ဒီ လှုက်လှာန် မဲ၊ တဲး န့ ဘဲန် ကာဒါယ် ဂေ ဆေဆေ။’

5 အူ ပူင့် အာတိုဝ် အုဝ် တဝ်း၊ ဂွန် မဲ အီ ဂွိုတ် ခဲင် မိူင် အဲဂိုပ် နီ အာတ့် တး ဇမ် အုဝ် ဒီ နီ၊ အုဝ် ဒီ တဲး ဂါယ် ဘဲန် ဂွန် အုဝ်။ ဂါယ် ဒီ ဘဲန် ဂွန် အုဝ် ပီ အာရူဘေန် ဂါယ် အာဆီမေအူန် မုး ဂွန် အုဝ်။ 6 ဆေ မဲ ဘော ဝီ မိုဝ်း ဂွန် ပေါ မ့ပွါ၊ ဂေ ဒီ ဝီ ဘဲန် ဂွန် မဲ။ ဂေ ဒီ ဝီ ပ့လု အီကတ် ဂေ။ 7 အုဝ် ဆီ ဘူင် ပါယ် တီ ကူပ် ဟဲ့ လှုဝ်း အုဝ် မာ မဲ။ ဒေါ တး အေ လေး ခဲင် မိူင် ဖာဒါန် တွိုန်၊ မာ မဲ ဟဲ့ ယမ်၊ တဲး အုဝ် က့လိုဝ် ကာဆဝ်။ ဒေါ အန် တီ အေ ဟာဝ် ဒူပ် န့တေန့် အီ ဇမ် မိူင် ကာနန့် အီ မုး ဒူင် ကာတတ် မိူင် အေဖာရာတ် တွိုန်။ အုဝ် မိူဝ် ဟဲ့ ဒိပ် အန် ဒီ တီ အီ ကွယ် ခူပ် မိူင် ဘေတ်လဲမ်။”

8 ဒေါ တဝ်း အန် ပါယ် တီ အန် ဘော ယိုဝ် ဂွန် အီမာယ် အာယုဝ် တွိုန်၊ အန် ဒီမွှတ်၊ “ဂါယ် အာ ဝီ တီ၊ အာဆေ ဂါယ် မုး။း”

9 အာယုဝ် ဝီ တဝ်း၊ “ဂါယ် မုး ဂွန် အီမာယ် အုဝ် အီ မုး ပီ ဒွါ ဇဝ်ဖြာ ဒီ အုဝ်။” အန် ဝီ တဝ်း၊ “တဲး မဲ တိုယ် ဂါယ် တး ဒီ ခူပ် အုဝ်၊ တဲး အုဝ် မွင့်ကာရာ ဒွါ ဒီ ဂါယ်။”

10 အာကူပ် ယီ ကတ် ကာဆဝ်။ ငါယ် အန် ဟဲ့ ကာပျွယ်၊ အာဝ် ဟူ လိုဝ်း ဆီချာ။ ခုဝ်၊ အာယုဝ် တဲး ဂွန် အန် တး ကာတတ် ဒီ အာတ့် ဒါ ဂါယ်။ အန် ဝီ ငျီမ် ဂါယ်၊ ဝီ အုး ဂါယ်။

11 ပန် တီ အာကူပ် တွိုန် ဝီ တဝ်း ဒီ အာယုဝ်၊ “အုဝ် တူ ဒွိုမ် ထာင် အုဝ် ဒီ ဝီ ယိုဝ် မဲ ပေါ အူ ဇေန့်။ ဒေါ တီ နီ ဇဝ်ဖြာ တဲး အုဝ် ဝီ ယိုဝ် ဘော ဂွန် မဲ။”

12 ပန် တီ အာယုဝ် ဝီ တဲး ဂါယ် လေး ဒဲင် ဘိုမ် ဂုန့် အန်။ အန် ဝီ ဂူမ် ဒီ အာတ့် အန်၊ ခြိုပ်ခြဝ်။ 13 ဟဲ့ ဟွတ့်၊ အာယုဝ် တွိုန် ဘော ဒိုဝ်း ဒဲ အာအး အန်၊ ပါ အာအေဖာရိမ်၊ တိုယ် အန် ကွယ် ဒီ ခူပ် ဒဲ အာဂ အာကူပ်။ အန် ဘော ဒိုဝ်း ဒဲ အာဂ အန် ပါ အာမာနာဆေ၊ တိုယ် အန် ကွယ် ဒီ ခူပ် ဒဲ အာအး အာကူပ်။ 14 အာကူပ် တွိုန် ယီ ဘ့လေး ဒဲ အာအး အန် ဒဲင် ဂိန့် အာအေဖာရိမ် တွိုန် အီ မုး ဝီ တျီ့။ အန် ဝီ ဘ့လေး ဒဲ အာဂ အန် ဒဲင် ဂိန့် အာမာနာဆေ တွိုန် အီ မုး ဝီ တာင်။ ပါယ် တီ အန် ကာဝဲ့ ဒဲ အန်။

15 ပန် တီ အန် မွင့်ကာရာ ဒွါ ဒီ ဂါယ်။ အန် တဝ်း၊ “ဇဝ်ဖြာ ပီ ဒူပ် ဂုန့် ဒင် အုဝ်၊ အီ စိူဝ် အာဘြာဟမ် ဘော ဂုန့် အုဝ်၊ အီ စိူဝ် အာဆဲက်၊ ဇဝ်ဖြာ တီ ပီ ဒါ အီ ဟျီင် မာဘူ။ အန် ဟဲ့ ဘ်ု အုဝ် အူ ဆိန့် ဒေါ ဂွိုတ် အုဝ်၊ ကော ဇမ် အာတိုဝ်။ 16 ဘော အာမူ အာမာတ် ဇဝ်ဖြာ အီ ဟဲ့ ဘ်ု အုဝ်၊ ကွဲ့ တဲး အုဝ် ဇမ် ဒုက် မာဆေ၊ တဲး အန် ဇဝ် တီ မွင့်ကာရာ ဒွါ ဂွန် အီမာယ် အာ ဝီ နီ၊ တဲး ဂါယ် ဝီ လှုဝ်း ဘော အာဘြာဟမ် တွိုန် ဘော အာဆဲက် အီ မုး ဂုန့် အုဝ်။ တဲး လှုက်လှာန် ဂါယ် ဝီ ဘဲန် ဒူအီ အာမျုဝ် ကိူန်၊ ဝီ ဘြဲ ဒဲင် ကာဒါယ် ဒွန် ပ့လုဝ့်။”

17 အာယုဝ် တွိုန် ဘော ယိုဝ် ဂုန့် အန် ဟဲ့ ဘ့လေး ဒဲ အာအး အန် ဒဲင် ဂိန့် အာအေဖာရိမ်၊ အန် ထာင် န့ တူ မှာန်။ ခုဝ်၊ အန် ဝီ ဒိုဝ်း ဒဲ အာအး ဂုန့် အန်၊ တဝ်း ဒီ ဘ့လေး ဒဲင် ဂိန့် အာမာနာဆေ တွိုန်။ 18 အန် ဘော တဝ်း ဒီ ဂုန့် အန်၊ “ဂုန့်၊ ကွဲ့ တဲး မဲ ဘူင် ပါယ် တီ။ ဝီ တီ ဟဲ့ မုး ဂွန် ဂိန့်။ တဲး မဲ ဘ့လေး ဒဲ အာအး မဲ ဒဲင် ဂိန့် အန်။”

19 ဂုန့် အန် ယီ တူ ဆီ ဘူင် ပါယ် တီ။ အန် ဝီ တဝ်း၊ “အိုယ် ဂွန် အုဝ်၊ အုဝ် ဟဲ့ နပ်။ ဂွန် ဝီ တာင် ဒီ ဘဲန် အာမျုဝ် ဒူအီ ကိူန်၊ ဘော ဝါ အန် ဒီ ဘဲန် ဒူအီ ကိူန်။ ဝါ ယီ ဒီ တာင် လွှိုမ် အီကတ် အန်။ ဂေ လှုက်လှာန် အန် ဒီ ဘဲန် အာမျုဝ် ဒူအီ ဘဲန် မျုဝ် ဘဲန် မျုဝ်။” 20 ဒေါ အန် တီ အာကူပ် ဝီ မွင့်ကာရာ ဒွါ ဒီ ဂါယ်။ အန် တဝ်း၊

“ဂေ ဒူအီ အီဆာရေလ ဂေ ဒီ လာယ် မွင့်ကာရာ ဒွါ၊ ဂေ ဒီ တဝ်း၊ ‘တဲး ဇဝ်ဖြာ တဲး မဲ ပီ အာအေဖာရိမ် ဂါယ် အာမာနာဆေ တွိုန်။’”

ပါယ် တီ အန် ဘူင် တဲး အာအေဖာရိမ် တာင် လွှိုမ် အာမာနာဆေ။

21 ဝါယ် အန် တီ အာကူပ် ဝီ တဝ်း ဒီ အာယုဝ်၊ “အုဝ် ဟဲ့ ကာတတ် ဒီ ယမ်။ ဇဝ်ဖြာ ယီ ဒီ ကွယ် ရိုမ် ဒူပ် မဲ။ အန် ဒီ ဝီ တဲး ဘေ ဝီ တး ဇမ် မိူင် ပီ ဒွိုမ် ကွယ် ဂုန့် ဒင် ဘေ။ 22 အုဝ် ဒီ တဲး မဲ မိုဝ်း ကာဒါယ် အူ ပ့လုဝ့်၊ တဲး န့ ကိူန် လွှိုမ် ပီ ပွိုန် အူကတ် အူဝါ မဲ။ အုဝ် ဒီ ဒွါ ဒီ မဲ မိူင် ဆေခေမ် ပဲ့ ဟဲ့ ပဲ အုဝ် ဒေါ ကာဂုဝ်း အုဝ် ဒီ ဂေ ဒူအီ အာမျုဝ် အာမုဝ်ရိတ် တွိုန်။ ဒေါ လာယ် ကာဂုဝ်း ယေ၊ အုဝ် ဟဲ့ တာ မာပွါ့ လာင် ဘော အ။”