1 ခဲင် ဒူအီ အီဆာရေလ န့ ယီ မိုဝ်း အီမာယ် အူ ဝီ ခဲင် ခြိုဝ် အာလေဝီ။ ဘော အီဘိုန့် အန် မုး ခြိုဝ် အာလေဝီ ပီ အန်။ 2 ပန် တီ အီဘိုန့် အန် ဘော မိုဝ်း ဂွန် အီမာယ်။ ဒေါ ယိုဝ် အန်၊ ဂွန် အန် ဟဲ့ မိုဝ်း ပ့လူမ်၊ ဟဲ့ ခ၊ အန် ဝီ ချြီင် ဂွန် အန် တီ အာဒါ အူယ် မာဂျီန်။ 3 ဟဲ့ ဟွတ့် ပန် တီ အန် အာဝ် ဟူ ပွိုန် ချြီင်။ အန် ဝီ ဒိုဝ်း ဂုဝ်�လင်၊ ဒါန့် ခြူင်၊ ဖဝ်း ဂြဲ၊ ကွဲ့ တဲး အိုမ် လိုပ် နာ ခဲင်။ ဟဲ့ ဟွတ့် ပန် တီ အန် ဝီ ဒိုဝ်း ဂွန် အန်၊ ဘ့လေး ခဲင် ခြူင် တီ။ အန် ဘော ဟာဝ် ဘ့လေး ဒီ ကာတဲ ကာဘာင် ဂုဝ်�လင် အီ ကွယ် ဒီ ခူပ် ဘ့လဲင် အိုမ် အီ စိူဝ် နီလာ။ 4 န့ ယီ မိုဝ်း ဂွန် အီဘိုန့် အီ မုး အီကတ် ဂွန် င တီ၊ အန် ကွယ် ကာတူင့်၊ ဘ်ု ဒီ ယွတ် ဝါ အန် တီ၊ ယုဝ် အန် ဒီ ပါယ် မှဝ်။

5 ဒေါ အန် တီ နာင် အူ ဝီ အီ မုး ဂွန် ခုန်ဒီခမ် ဖာရုဝ်၊ အန် ဟဲ့ တး ဇမ် ဘာင် အိုမ်၊ တဝ်း ဒီ တာ အိုမ်။ ဘော မှာယ် အန် ဟဲ့ ကွယ် ရိုမ် ဒူပ် အန်၊ ဟာဝ် ခူပ် ဘာင် အိုမ်။ နာင် တွိုန် ဘော ယိုဝ် ခြူင် တွိုန် အီ ကွယ် ခဲင် ကာဘာင် ဂုဝ်�လင်၊ အန် တိုယ် မှာယ် အန် အူ ဝီ၊ တဲး အန် ဟာဝ် ဒိုဝ်း ခြူင် တွိုန်။ 6 မှာယ် အန် ဟဲ့ ဟွတ့် ဒိုဝ်း၊ နာင် တွိုန် ဝီ ဝိုဝ်း။ အန် ဘော ယိုဝ် ဂွန် အာင ကွယ် နာ ခဲင် ဘော ယာမ်။ ပန် တီ နာင် ဝီ ကာဝေ ဂွန် တီ။ အန် တဝ်း၊ “ဂွန် နီ မုး ဂွန် အာင ဂေ ဒူအီ ဟဲဘြဲ။”

7 ဒေါ အန် တီ အီကတ် ဂွန် အာင တွိုန်၊ အန် ဝီ တး ဇမ် ဒူင် ကွယ် ဂေ၊ ဒီမွှတ် နာင် တွိုန် တဝ်း၊ “မဲ ဆီ တဲး အုဝ် ဟာဝ် ဟြေတ့် အီဘိုန့် အာမျုဝ် ဟဲဘြဲ အူ ဝီ၊ တဲး အန် ဘဲန် မာ အီ ဟျီင် ဂွန် နီ။း”

8 “ဟဲ့ ပွိုန်၊” နာင် တွိုန် ဝီ တဝ်း။ ဟဲ့ ဟွတ့် တဝ်း ပါယ် တီ အီကတ် ဂွန် အာင ဝီ ဟာဝ် ဟဲ ဟဲ၊ ဒဲ့ မာ အန်၊ တဲး အန် တး ဇမ် ဒူင် ကွယ် နာင် တွိုန်။ 9 မာ အန် ဟဲ့ ဟွတ့် ဇမ်၊ နာင် ဝီ တဝ်း ဒီ အန်၊ “တဲး မဲ ဒိုဝ်း ဂွန် အာင နီ၊ ဝေန့် ခဲင် ကာင် မဲ။ တဲး မဲ ဟျီင် အန်။ အုဝ် ဒီ ဇာင် မဲ ဟျီင် အန်။” နာင် ဟဲ့ ဟွတ့် တဝ်း ပါယ် တီ မာ အန် ဝီ ဒိုဝ်း ဂွန် အာင အန်၊ ဟျီင် ခဲင် ကာင် အန်။ 10 ဝါယ် အန် တီ ဒေါ ဟဲ့ ကြဲ အန် ဒီ တာင်၊ မာ အန် ဝီ တိုယ် အန် ဟာဝ် ဇမ် ဒူင် ကွယ် နာင် တွိုန်၊ အီ မုး ဂွန် ခုန်ဒီခမ် ဖာရုဝ်၊ တဲး ဂွန် အန် ဝီ ဘဲန် ဂွန် နာင် တွိုန်။ နာင် ဝီ တဲး အန် စိူဝ် အာမုဝ်ဆဲ။ နာင် ဟဲ့ တဲး ဂွန် စိူဝ် ပါယ် တီ ခုဝ်၊ အန် တဝ်း၊ “အုဝ် ဟဲ့ ဒိုဝ်း လေး အန် ခဲင် အိုမ်။”^a

11 အူ ဆီငဲ၊ အာမုဝ်ဆဲ ဟဲ့ ဟွတ့် တာင်၊ အန် ဟာဝ် ဇမ် ဒူင် ကွယ် ဂေ ဒူအီ ဟဲဘြဲ အီ မုး အာမျုဝ် အန်။ အန် ဘော ဟာဝ် ယွတ် ဂေ ဒေါ ဘူင် ဂေ ဂါန် အီ ဒုက် ကာဆဝ် ဒွန် မျုဝ် ပီ လုဝ် ဘူင် ဂေ။ ဒေါ အန် တီ အန် ဘော ယိုဝ် ဒူအီ အဲဂိုပ် အူ ဝီ။ ဒူအီ အဲဂိုပ် တီ ဝီ မး ကာဆဝ် ဒူအီ ဟဲဘြဲ အူ ဝီ အီ မုး အာမျုဝ် အန်။ 12 အန် ဝီ ယွတ် ကာဘတ်၊ တူ ယိုဝ် အီ ဟဝ်၊ အန် ဝီ ငဝ်း ယမ် ဒူအီ အဲဂိုပ် တွိုန် အူ ဇေန့်။ ဟဲ့ ဟွတ့် ပန် တီ အန် ဝီ ဒိပ် ဝဲန် ဒူအီ တွိုန် ခဲင် ကာဟာတ့်။ 13 ပါ ခဲညှာ အန် ဝီ ဟာဝ် ဇမ် ဒူင် တွိုန် ပေါ အူ ဇေန့်။ ဒေါ အန် တီ အန် ဝီ ယိုဝ် ဒူအီ အာမျုဝ် ဟဲဘြဲ အာ ဝီ၊ ဂါယ် လာယ် ကာမး။ အာမုဝ်ဆဲ ဝီ တဝ်း ဒီ ဒူအီ အီ ဘူင် နာ တူ မွှိုမ်၊ “မှဝ် န့ ပါယ် ပီ လာယ် ကာမး ဘာယ်။း ဘာယ် ဘော အာ ဝီ မုး ဘီနွင် ဟဲဘြဲ။”

14 အာမုဝ်ဆဲ ဟဲ့ ဟွတ့် ကာလာင် ပါယ် တီ ဒူအီ တွိုန် ဝီ ဝျီ့ ဂြုဝ်း အာမုဝ်ဆဲ တဝ်း၊ “အာဆေ ဟဲ့ တဲး မဲ ဘဲန် ဒါ ကာညာ အီ အိုပ် ယာယ်၊ အီ ပွိုန် ဆုင်ဖျာတ် အာမူ ယာယ်။း မဲ ဒီ ဘော ငဝ်း ယမ် ဘော အုဝ်၊ တဲး န့ ပီ မဲ ဟဲ့ ငဝ်း ယမ် ဒူအီ အဲဂိုပ် တွိုန်။း” အန် ဟဲ့ ဟွတ့် တဝ်း ပါယ် တီ အာမုဝ်ဆဲ ဘော ဝီ ယုဝ် ကာဆဝ်။ အန် ထာင် ခဲင် နဝ်း အန်၊ “ဂေ ဒူအီ ဟဝ် ဟဲ့ နပ် လွင် ပဲ့ ဟဲ့ ဘူင် အုဝ် အာမှိုဝ်။”

15 ပန် တီ ဘော ခုန်ဒီခမ် ဖာရုဝ် တွိုန်၊ အန် ဝီ ထူမ် လွင် ပဲ့ ဟဲ့ ဘူင် အာမုဝ်ဆဲ၊ အန် ဝီ တဝ်း ဒီ ငဝ်း ယမ် အာမုဝ်ဆဲ။ ပန် တီ အာမုဝ်ဆဲ တဝ် လေး ဒူင် ကွယ် ခုန်ဒီခမ် ဖာရုဝ်၊ ဟာဝ် ကွယ် ခဲင် မိူင် မီဒီအာန်။ ဒေါ တး ဇမ် အန် ခဲင် မိူင် မီဒီအာန် တွိုန်၊ အန် ဘော တုတ့် ဒီ ခူပ် အိုမ် ခိုမ် အူ ပ့လုဝ့်။ 16 ဒေါ အန် တီ န့ ယီ မိုဝ်း အာမျုဝ် ဒူအီ မီဒီအာန် အူ ဝီ။ အန် မိုဝ်း ဂွန် အီဘိုန့် ဘူ ဝီ။ အန် မုး ဒါ အီ လှူ ဒီ ဇဝ်ဖြာ ပီ ကြိုပ် ဂေ။ ဂွန် အီဘိုန့် ဂေ တီ၊ ဟဲ့ တိုယ် မာဘူ ဂုန့် ဂေ၊ တဲး ဂေ တး ဇမ် ဒီ ခူပ် အိုမ် ခိုမ် တွိုန်၊ တဲး ဂေ တဝ့် အိုမ်၊ လှုဝ် ခဲင် ကာလတ့်၊ တဲး မာဘူ ဂေ ဒျီင်။ 17 ဒေါ အန် တီ ဘော ဂေ အီမာယ်၊ အီ ဟျီင် မာဘူ ပေါ အူ ဖိုင်၊ ဟဲ့ ဝီ တး၊ တဝ်း ဒီ ဆုတ့် တဝ် အီဘိုန့် ဒူင် ကွယ် အိုမ် ခိုမ်။ အာမုဝ်ဆဲ ယီ ယိတ့် စွယ် အီဘိုန့် ဂေ တွိုန်၊ ကွဲ့ တဲး ဂေ အီမာယ် ပွိုန် ဒီ ဘူင် မာဆေ။ အန် ဘော တဝ့် အိုမ် ဒွါ ဒီ ဂေ၊ တဲး မာဘူ ဂေ ပွိုန် ဒီ ဒျီင် ဖဲ အိုမ်။

18 ပန် တီ ဂွန် ဒီဘျာ ဂေ တွိုန် ဘော ဝေန့် ဇမ် ဒူင် ကွယ် အာရေအူအေန် အီ မုး ဂုန့် ဂေ။ ဂုန့် ဂေ တီ၊ အန် ဝီ ဒီမွှတ် ဂေ တဝ်း၊ “မှဝ် န့ ပါယ် ပီ စေဝ် ဝေန့် ဘေ အာတိုဝ်။း”

19 ဂွန် အန် ဝီ တဝ်း၊ “န့ မိုဝ်း အီမာယ် အာမျုဝ် အဲဂိုပ် အူ ဝီ၊ အန် ဟဲ့ စွယ် ယေ၊ ခြဲ ဂေ အီမာယ် အီ ဟျီင် မာဘူ ဂေ၊ ကွဲ့ တဲး ဂေ ပွိုန် ဒီ ဘူင် မာဆေ။ အန် မိူဝ် ဟဲ့ တဝ့် အိုမ် ဒွါ မာဘူ ယေ ဒျီင်။”

20 ဂေ ဟဲ့ ဟွတ့် တဝ်း ပါယ် တီ ဂုန့် ဂေ ဝီ တဝ်း၊ “ဒူအီ ပီ တဝ်း ဘေ၊ အန် ကွယ် နာ မှဝ်။း မှဝ် န့ ပါယ် ပီ ဝဲန် ဘေ ဒူအီ တီ။း တဲး ဘေ ဟာဝ် ဘာင် အန်၊ တဲး အန် တး ဟူမ် ဘူမ် ခဲင် ကာင် အေ။”

21 ဝါယ် အန် တီ ဂွန် အန် ဝီ ဟာဝ် ဘာင် အာမုဝ်ဆဲ တး ဇမ် ခဲင် ကာင် ဂေ။ အာမုဝ်ဆဲ ဘော ဟာဝ် ဇမ် ခဲင် ကာင် ဂေ။ ဟဲ့ ဟွတ့်၊ အန် ဘော ဖြူမ် ဒီ ကွယ် ရိုမ် ဒူပ် ဂေ။ အာရေအူအေန် ဘော ဒွါ ဂွန် အီဘိုန့် အန် အူ ဝီ ဒီ အာမုဝ်ဆဲ၊ တဲး ဂါယ် လာယ် ခတ်။ ဂွန် အန် တီ၊ အန် စိူဝ် နာင် ဆီပုဝ်ရာ။ 22 ဝါယ် အန် တီ နာင် ဆီပုဝ်ရာ တွိုန် မိုဝ်း ဂွန် အီမာယ် အူ ဝီ။ အာမုဝ်ဆဲ တဲး အန် စိူဝ် အာဂေဆူမ်။ အန် ဘော တဝ်း၊ “အုဝ် ဟဲ့ ဘဲန် ခဲတ့် အီ ကွယ် ခဲင် မိူင် အီ ဟဝ်။” ခုဝ်၊ အန် တဲး ဂွန် အန် စိူဝ် ပါယ် တီ။^b

23 ဝါယ် အန် တီ ဟဲ့ လှေန့်၊ ခုန်ဒီခမ် ခဲင် မိူင် အဲဂိုပ် ဘော ယမ်။ ဒေါ အန် တီ ဂေ ဒူအီ အီဆာရေလ ဟဲ့ ခမ် ကာဆဝ် ဒီ ဘဲန် မှာယ် အီ ဟဝ်။ ဂေ ဘော မှာန့် တဲး ဇဝ်ဖြာ စွယ် ဂေ။ ဂြုဝ်း ပီ မှာန့် ဂေ တွိုန်၊ ဇဝ်ဖြာ မိူဝ် ထူမ်။ 24 အန် ဟဲ့ နပ် ဒုက် ပီ လုဝ် ခမ် ဂေ။ အန် ဘော ထူမ် ပီ ဆာခိုဝ် ဂေ။ အန် ဘော ဝီ လှုဝ်း ကာဒိက် ဆတ်ဇာ ပီ ဒွိုမ် ဒွါ အန် ဒီ အာဘြာဟမ် တွိုန် ဘော ဒီ အာဆဲက် ဂါယ် အာကူပ်။ 25 ဇဝ်ဖြာ ဘော ယိုဝ် ဂေ ဒူအီ အီဆာရေလ၊ အန် ဘော မိုဝ်း နဝ်း မှဲ နဝ်း ကာဝေ ဂေ ဘောကာဂ့လျီတ်။