1 အူ ဆီငဲ အာမုဝ်ဆဲ ဟာဝ် ဟျီင် မာဘူ ဘိုဝ် အန်။ ဘိုဝ် အန် စိူဝ် အာယေထာရုဝ်။^a အန် မုး အာမျုဝ် ဒူအီ မီဒီအာန်။ အာမုဝ်ဆဲ ဟဲ့ တိုယ် မာဘူ တဲး ဂေ ဟာဝ် ပွုန် ဒူင် ကာဟဝ်း ဇမ် နာ ဂေတ့် ဆီငဲ၊ ဇမ် ကာတတ် နွန် ဟုဝ်ရေပ်။ ဂေ ဒူအီ ဘော တဝ်း၊ နွန် တီ မုး နွန် ဇဝ်ဖြာ။^b 2 ဒေါ အန် တီ န့ မုး အာမူ အာမာတ် ဇဝ်ဖြာ၊ အန် ကွယ် ခဲင် ငဝ်။ ငဝ် ယီ လေး ခဲင် ယွုန်။ အာမူ အာမာတ် ဇဝ်ဖြာ တွိုန်၊ အန် တး ကာပ့လုး ဒီ အာမုဝ်ဆဲ။ အာမုဝ်ဆဲ ဘော ယိုဝ် ငဝ် ကွယ် ခဲင် ယွုန်၊ ယွုန် ယီ တူ ကာဆိုမ်။ 3 အန် တဝ်း ခဲင် နဝ်း အန်၊ “အုဝ် ဒီ ဟာဝ် ယွတ် မာဆေ န့ မုး။ န့ မွှိုမ် အာမ် ကာဆဝ်၊ ယွုန် တူ ကာဆိုမ်။”

4 ဇဝ်ဖြာ ကွယ် ခဲင် ငဝ် အီ လေး ခဲင် ယွုန်၊ အန် ဘော ယိုဝ် အာမုဝ်ဆဲ တး၊ တဝ်း ဒီ ယွတ် ငဝ် တွိုန်၊ အန် ဇဝ် ဝီ ကာလာင် ဂြုဝ်း ဒီ အန်၊ တဲး ဂြုဝ်း ဇဝ်ဖြာ လေး ခဲင် ယွုန် တွိုန်။ အန် တဝ်း၊ “အိုယ် အာမုဝ်ဆဲ။” အာမုဝ်ဆဲ ဝီ ယဝ်း၊ “အိုဝ်၊ အုဝ် ကွယ် ဒီ နီ။”

5 ဇဝ်ဖြာ ဝီ တဝ်း၊ “ကွဲ့ တး ချြီ့ ဒူင် ကွယ် အုဝ် နီ။ မဲ လုဝ် ဘုတ့် ခူဒိန့် မဲ။ ခုဝ်၊ ဒူင် ကွယ် မဲ နီ၊ န့ မုး ဒူင် ဘွတ်။ 6 အုဝ် မုး ဇဝ်ဖြာ ပီ ကြိုပ် ဂုန့် ဂေ ဒါ မဲ။ အုဝ် မုး ဇဝ်ဖြာ ပီ ကြိုပ် ဘော အာဘြာဟမ်၊ အာဆဲက် ဘော အာကူပ်။” အန် ဇဝ် ဟဲ့ ဟွတ့် ကာလာင် ပါယ် တီ ဒီ အာမုဝ်ဆဲ၊ အာမုဝ်ဆဲ ဝီ ကာဘိတ် နာ အန် ကူပ် ယုဝ် ကာဆဝ် အန်၊ တူ ယ ယွတ် ဇဝ်ဖြာ။

7 ပန် တီ ဇဝ်ဖြာ ဝီ တဝ်း ဒီ အန်၊ “အုဝ် ဟဲ့ ယိုဝ် ဒုက် တာင် ပီ လုဝ် ခမ် ဂေ ဒူအီ ပီ အိုပ် အုဝ်၊ အီ ကွယ် ခဲင် မိူင် အဲဂိုပ်။ အုဝ် ဟဲ့ ထူမ် လွင် ပီ ဒတ် တာင် ဂေ ကူပ် ခမ် ကာဆဝ် ဂေ ဒီ ဒူအီ အီ အိုပ် ဂေ ဘော ခါနှာပ် ဂေ ဘူင် ဂါန်။ 8 ခုဝ်၊ အုဝ် ဟဲ့ လေး ခဲင် ဂါင်ဟြာဝ်၊ လူင် တး ဇမ် ဒီ နီ၊ တဲး အုဝ် စွယ် ဂေ၊ တဲး ဂေ ပွိုန် ဒီ လေး ခဲင် မိူင် အဲဂိုပ်၊ ကွဲ့ ဟူ တဲး ဒူအီ အဲဂိုပ် ပွိုန် ဒီ အိုပ် ဂေ။ အုဝ် ဒီ တိုယ် ဂေ ဟာဝ် ဇမ် ခဲင် မိူင် ပေါ မိူင်၊ အီ မုး မိူင် တာင်၊ မိူင် ကာဝဝ်း။ ကာဒါယ် ခဲင် မိူင် တီ၊ န့ ဘွတ်၊ တဲး ဂေ မိုဝ်း ဟေ ဘော ဘ့လေ ဒွန် မျုဝ်၊ တဲး ဂေ မိုဝ်း ပီ ဒီ လုဝ် ဂေ ဒွန် မျုဝ်။ ဂေ ဒူအီ အီ ကွယ် ခဲင် မိူင် တီ၊ န့ မုး ဒူအီ ဘဲန် မျုဝ် ဘဲန် မျုဝ်။ ဘော ဂေ ဒူအီ ကာနန့်၊ ဒူအီ ဟေထိတ်၊ ဒူအီ အာမုဝ်ရိတ်၊ ဒူအီ ဖေရေဆိတ်၊ ဒူအီ ဟီဝိတ်၊ ဘော ဂေ ဒူအီ ယေဘူဆိတ်၊ ဂေ ဘောကာဂ့လျီတ် ကွယ် ခဲင် မိူင် တီ။ အုဝ် ဟဲ့ ဟွတ့် နပ် တူတ့် လွင် ခမ် ကာဆဝ် ဂေ ဒူအီ အီဆာရေလ။ 9 အုဝ် ဘော ဟဲ့ ယိုဝ် တူတ့် နာ စီစိဝ် ပီ ဘူင် ဂေ ဒူအီ အဲဂိုပ် ဒီ ဂေ။ 10 ခုဝ် အန် တီ၊ အုဝ် စ်ု မဲ၊ တဲး မဲ ဟာဝ် ဇမ် ဒူင် ကွယ် ခုန်ဒီခမ် ဖာရုဝ်၊ တဲး မဲ ယဲတ့် ဂေ ဒူအီ အီဆာရေလ အီ မုး ဒူအီ ပီ အိုပ် အုဝ်၊ တဲး ဂေ လေး ခဲင် မိူင် အဲဂိုပ်။”

11 ဇဝ်ဖြာ ဟဲ့ ဟွတ့် တဝ်း ပါယ် တီ အာမုဝ်ဆဲ ဝီ ဝျီ့ ဂြုဝ်း ဇဝ်ဖြာ တဝ်း၊ “အုဝ် တူ ယ ဟာဝ် ဇမ် ဒူင် ကွယ် ခုန်ဒီခမ် ဖာရုဝ် တွိုန်။ အာဝ် ကာအာပ် အုဝ် ဘူင် ပါယ် တီ။ အုဝ် မိူဝ် ယုဝ် အုဝ် တူ ပဲ ဒီ ယဲတ့် ဂေ ဒူအီ အီဆာရေလ၊ တဲး ဂေ လေး ခဲင် မိူင် အဲဂိုပ်။”

12 ဇဝ်ဖြာ ဝီ တဝ်း၊ “အုဝ် ဒီ ဟာဝ် ရိုမ် ဒူပ် မဲ။ ဝါယ် ဟဲ့ ယဲတ့် မဲ ဒူအီ လေး ခဲင် မိူင် အဲဂိုပ်၊ ဘေ ဒီ ဝီ တး ဇမ် ဒီ နီ။ ဘေ ဒီ ဘော ကြိုပ် အုဝ် ဒဲင် နွန် နီ။ ပါယ် တီ မဲ ဒီ ဘော နပ် ဆီချာ၊ န့ မုး အုဝ် ဇဝ်ဖြာ၊ အီ ဟဲ့ စ်ု မဲ ဟာဝ်။”

13 ပန် တီ အာမုဝ်ဆဲ ဝီ တဝ်း ဒီ ဇဝ်ဖြာ၊ “ဆေ အုဝ် ဟီ တး ဇမ် ဒူင် ကွယ် ဂေ ဒူအီ အီဆာရေလ၊ ဆေ အုဝ် ဒီ ဘော တဝ်း ဒီ ဂေ၊ ‘န့ မုး ဇဝ်ဖြာ ပီ ကြိုပ် ဂုန့် ဒင် ဘေ၊ အန် ဟဲ့ စ်ု အုဝ် တး ဇမ် ဒူင် ကွယ် ဘေ၊’ ဆေ အုဝ် တဝ်း ပါယ် တီ ဂေ ဒီ ဘော နပ် ဒီ ဒီမွှတ် အုဝ်၊ နပ် ဒီ တဝ်း၊ ‘ဇဝ်ဖြာ အီ တိုယ် မဲ တီ၊ မာဆေ အန် စိူဝ်။း’ ဆေ ဂေ တဝ်း ပါယ် တီ မာဆေ ပီ ဒီ လုဝ် ဝီ ဝျီ့ အုဝ် ဒီ ဂေ။း”

14 ဇဝ်ဖြာ ဝီ တဝ်း၊ “အုဝ် မုး အန် ဇဝ် အီ မုး အုဝ်။ မဲ လုဝ် တဝ်း ဒီ ဂေ ဒူအီ အီဆာရေလ၊ ‘ဇဝ်ဖြာ တီ၊ အန် စိူဝ် “အုဝ် မုး အန် ဇဝ် အီ မုး အုဝ်၊” အန် ဇဝ် တီ ဟဲ့ တိုယ် အုဝ် တး ဇမ် ဒူင် ကွယ် ဘေ။’”^c

15 ဟဲ့ ဟွတ့် ပန် တီ ဇဝ်ဖြာ ဝီ တဝ်း၊ “မဲ ဘော လုဝ် ကာလာင် ဒီ ဒူအီ အီဆာရေလ၊ ‘အန် ဇဝ် အီ မုး ဇဝ်ဖြာ ပီ ကြိုပ် ဂုန့် ဒင် ဘေ၊ ဇဝ်ဖြာ ပီ ကြိုပ် အာဘြာဟမ်၊ အာဆဲက် ဘော အာကူပ်၊ အန် ဇဝ် တီ ဟဲ့ တိုယ် အုဝ် တး ဇမ် ဒူင် ကွယ် ဘေ။’ စိူဝ် အုဝ် ပါယ် တီ။ ဂေ ဒူအီ လုဝ် လှုဝ်း စိူဝ် အုဝ် တီ ဒွန် ဇာတ် ဒွန် ဘာန်။ 16 တဲး မဲ ဟာဝ် ဘာင် ဂေ ဒါ တာင် ဒူအီ အီဆာရေလ၊ တဲး ဂေ ဘောကာဂ့လျီတ် တး ကာဇု။ ဟဲ့ ဟွတ့်၊ မဲ လုဝ် ကာလာင် ဒီ ဂေ၊ ‘ဇဝ်ဖြာ ဟဲ့ တး ကာပ့လုး ဒီ အုဝ်။ အန် မုး ဇဝ်ဖြာ ပီ ကြိုပ် ဂုန့် ဒင် ဘေ။ အန် မုး ဇဝ်ဖြာ ပီ ကြိုပ် အာဘြာဟမ်၊ အာဆဲက် ဘော အာကူပ် တွိုန်။’ အန် ဟဲ့ တဝ်း၊ ‘အုဝ် ဟဲ့ တး ယွတ် ဘေ။ အုဝ် မိူဝ် ဟဲ့ ယိုဝ် တူတ့် ပီ ဘူင် ဂေ ဒူအီ အဲဂိုပ် ဒီ ဘေ ဒေါ ကွယ် ဘေ ခဲင် မိူင် ဂေ။ 17 အုဝ် မိူဝ် ဟဲ့ ဒွါ ကာဒိက် ဆတ်ဇာ ဒီ ဘေ၊ တဲး အုဝ် တိုယ် ဘေ လေး ခဲင် ဒုက် တာင် ပီ လုဝ် ခမ် ဘေ ခဲင် မိူင် အဲဂိုပ်။ အုဝ် ဒီ တိုယ် ဘေ ဟာဝ် ဇမ် ခဲင် မိူင် ဒူင် ကွယ် ဒူအီ ကာနန့်၊ ဒူအီ ဟေထိတ်၊ ဒူအီ အာမုဝ်ရိတ်၊ ဒူအီ ဖေရေဆိတ်၊ ဒူအီ ဟီဝိတ် ဘော ဒူအီ ယေဘူဆိတ်။ မိူင် တီ၊ န့ မုး မိူင် ဘွတ်။ န့ တဲး ဘေ မိုဝ်း ဟေ ဘော ဘ့လေ ဒွန် မျုဝ်၊ တဲး ဘေ မိုဝ်း ပီ ဒီ လုဝ် ဘေ ဒွန် မျုဝ်။’

18 ဆေ မဲ တဝ်း ပါယ် တီ ဂေ ဒါ တာင် ဒူအီ အီဆာရေလ ဒီ ထူမ် ဂြုဝ်း မဲ တီ။ ဝါယ် အန် တီ ဘော မဲ ဘော ဂေ၊ ဘေ လုဝ် ဟာဝ် ဇမ် ဒူင် ကွယ် ခုန်ဒီခမ် ခဲင် မိူင် အဲဂိုပ်။ ဘေ လုဝ် တဝ်း ဒီ အန်၊ ‘ဇဝ်ဖြာ ပီ ကြိုပ် ဒူအီ ဟဲဘြဲ၊ အန် ဟဲ့ ဟွတ့် ကာပ့လုး ဒူင် ကွယ် ယေ။ ယေ မှာန့် ဒီ မဲ၊ တဲး မဲ ခ့ဝါင် ယေ ဟာဝ် ဒူပ် န့တေန့် အာဒါ အူယ် ဆီငဲ၊ တဲး ယေ ဟာဝ် ဇမ် ခဲင် ပြဲ ဒူင် ငွင့်၊ တဲး ယေ လှူ ပီ ဒီ လုဝ် လှူ ယေ ဒီ အန် ဇဝ်၊ အီ မုး ဇဝ်ဖြာ ပီ ကြိုပ် ယေ။’ ဆေ ဘေ ကာလာင် ဒီ ခုန်ဒီခမ် ပါယ် တီ 19 အုဝ် ဟဲ့ နပ်၊ အန် တူ ဆီ တဲး ဘေ ဟာဝ်။ အန် လုဝ် ယိုဝ် ခဲ့ တာင် ပွုန် အုဝ် အာတ့် ခ့ဝါင် အန် ဘေ ဟာဝ်။ 20 ခုဝ်၊ အုဝ် ဒီ ဒွါ ဒုက် တာင် ဘဲန် မျုဝ် ဘဲန် မျုဝ်၊ ဘူင် နာ မွှိုမ် ယုဝ် ခဲင် မိူင် အဲဂိုပ်၊ တဲး ဂေ ကော နပ် ခဲ့ တာင် ပွုန် အုဝ်။ ဝါယ် အန် တီ ခုန်ဒီခမ် ဒီ ခ့ဝါင် ဘေ ဟာဝ်။

21 ဒဲင် တီ၊ အုဝ် မိူဝ် ဘူင် တဲး ဂေ ဒူအီ အဲဂိုပ် ကာပ့လု နဝ်း၊ တဲး ဂေ ကော အိုင် ဘေ။ ပါယ် တီ ဂေ ဒီ ဒွါ ကြုဝ်ကြာမ် ကိူန် ဒီ ဘေ ဒေါ လေး ဟာဝ် ဘေ ခဲင် မိူင် ဂေ။ 22 ဒေါ အန် တီ ဂေ အီဘိုန့် ဘေ ဒွန် အီ၊ ဂေ လုဝ် မှာန့် ဒီ ဒူအီ အဲဂိုပ် အီ ကွယ် ဒီ ရိုမ် ဒူပ် ဂေ၊ တဲး ဂေ ဒွါ ခြိဝ် ဂေ ရွိုန်၊ တဲး ဂေ ဒွါ ဘော ခြိုင် တာ၊ ခြိုင် ပီ ဒီ စှိုပ် ဂွန် အီမာယ် ဘော ဂွန် အီဘိုန့် ဘေ။ ပါယ် တီ ဘေ ဒီ ပွိုန် ကြုဝ်ကြာမ် ဂေ ဒူအီ အဲဂိုပ်၊ တဲး ဘေ မိုဝ်း ပီ ဒီ လုဝ် ဘေ။” ဇဝ်ဖြာ ဟဲ့ တဝ်း ပါယ် တီ ဒီ အာမုဝ်ဆဲ။