1 ပန် တီ အာမုဝ်ဆဲ ဝီ တဝ်း ဒီ ဇဝ်ဖြာ၊ “ဆေ ဂေ ဒူအီ အီဆာရေလ တူ ဝီ ထူမ်၊ တူ ဝီ ညှိုမ် ဂြုဝ်း ပီ ကာလာင် အုဝ် ဒီ ဂေ၊ မာဆေ ပီ လုဝ် ဘူင် အုဝ်။း ဆေ ဂေ ဘော တဝ်း၊ ‘န့ တူ မှာန်၊ ဇဝ်ဖြာ တူ တး ကာပ့လုး ဒီ မဲ။’”

2 ဇဝ်ဖြာ ဝီ တဝ်း၊ “မာဆေ န့ မုး ပီ ဂူင့် မဲ ဒီ ဒဲ မဲ တီ။း” အန် ဝီ တဝ်း၊ “န့ မုး န့ကြွုန်။”

3 ပန် တီ ဇဝ်ဖြာ ဝီ တဝ်း၊ “တဲး မဲ ဇတ့် န့ကြွုန် တီ ဒဲင် ကာဒါယ် ဒီ အာတ့် မဲ။” အာမုဝ်ဆဲ ဝီ ဘူင် ပီ စ်ု ဇဝ်ဖြာ။ ဟဲ့ ဟွတ့် ပန် တီ န့ကြွုန် တွိုန် ဟဲ့ ဘဲန် မာဟန့် အူ ဇေန့်။ အာမုဝ်ဆဲ ဝီ တဝ်။

4 ဝါယ် အန် တီ ဇဝ်ဖြာ ဝီ စ်ု အန် တဝ်း၊ “တဲး မဲ တာ ဒဲ မဲ၊ ဇဝ်း ဆီဒါ ဟန့် တီ။” ဟဲ့ ဟွတ့်၊ အာမုဝ်ဆဲ ဘော ဇဝ်း ဆီဒါ ဟန့်။ ဒေါ ပါ အန် ဒီ ဟန့် တီ၊ န့ ဝီ ဘဲန် န့ကြွုန် အန် ပီ ဘြိမ်။ 5 ဇဝ်ဖြာ မိူဝ် တဝ်း၊ “အာတီ အုဝ် ဒီ ဘူင် တဲး ဂေ ဒူအီ အီဆာရေလ ညှိုမ်၊ န့ မုး အုဝ်၊ အီ ဟဲ့ စ်ု မဲ။ န့ မုး အုဝ် ဇဝ်ဖြာ ပီ ကြိုပ် ဂေ ဂုန့် ဒင် ဘေ၊ ဇဝ်ဖြာ ပီ ကြိုပ် အာဘြာဟမ်၊ အာဆဲက် ဘော အာကူပ်၊ အုဝ် ဟဲ့ ကာပ့လုး ဒီ မဲ။”

6 ဟဲ့ ဟွတ့် ပန် တီ ဇဝ်ဖြာ ဝီ တဝ်း၊ “တဲး မဲ ဘ့လိုပ် ဒဲ မဲ ခဲင် ဆီတုဝ် မဲ။” အာမုဝ်ဆဲ ဝီ ဘ့လိုပ် ဒဲ အန် ခဲင် ဆီတုဝ် အန်။ ဟဲ့ ဟွတ့်၊ အန် ဝီ ဒိုဝ်း လေး ဒဲ အန်။ ဆဝ် ဒု ဟဲ့ ဝီ နုဝ့် ဒဲင် ဒဲ အန်၊ တဲး န့ လုယ် ပီ ဘျြီ။

7 ဇဝ်ဖြာ ဝီ တဝ်း၊ “တဲး မဲ ဝီ ဘ့လိုပ် ဒဲ မဲ ခဲင် ဆီတုဝ် မဲ ပေါ အူ ဇေန့်။” ဟဲ့ ဟွတ့်၊ အန် ဝီ ဘူင် ပါယ် တီ။ ဒေါ ဝီ ဒိုဝ်း လေး အန် ဒဲ အန်၊ ဆဝ် ဟဲ့ ဝီ ဟြာယ် တူတ့်။ ဒဲ အန် ဝီ ဘဲန် ပီ ဘြိမ်။

8 ဇဝ်ဖြာ ဝီ တဝ်း ပေါ အူ ဇေန့်၊ “ဆေ ဒူအီ တူ ညှိုမ် မဲ ဒေါ ယိုဝ် ဂေ နာ မွှိုမ် အာမ် ကာဆဝ် ပီ ဘျ အုဝ် ခါ အာတ့်၊ ဂေ ဒီ ဘော နပ် ဒီ ညှိုမ် ဝါယ် ဟဲ့ ယိုဝ် ဂေ နာ မွှိုမ် အာမ် ကာဆဝ် ပေါ အူ မျုဝ် တီ။ 9 ဆေ ဂေ ယီ တူ ညှိုမ် ဝါယ် ဟဲ့ ယိုဝ် ဂေ နာ မွှိုမ် အာမ် ကာဆဝ် ဘော အာ မျုဝ် တီ၊ ဆေ ဂေ ညှမ် မိုဝ်း နဝ်း ဆီ ထူမ် ဒူပ် ပီ တဝ်း မဲ၊ မဲ လုဝ် ဟာဝ် တဝ့် အိုမ် ခဲင် ဘ့လဲင် နီလာ။ ဟဲ့ ဟွတ့်၊ မဲ လုဝ် လှုဝ် အိုမ် တီ ဒီ ကာဒါယ် ကာဟဝ်း။ အူ ဇေန့် အိုမ် တီ ဒီ ဘဲန် နှာမ် အီ ကွယ် ဒဲင် ကာဒါယ် ကာဟဝ်း တီ။”

10 ဇဝ်ဖြာ ဟဲ့ ဟွတ့် တဝ်း ပါယ် တီ အာမုဝ်ဆဲ ဝီ တဝ်း ဒီ ဇဝ်ဖြာ၊ “အိုယ် ဇဝ်ဖြာ၊ အုဝ် အီ မုး ဒဲစေန့် မဲ၊ အုဝ် တူ မုး ဒူအီ ကျ ဒီ ကာလာင် ဂြုဝ်း ဒီ အီ ဟဝ်။ ဘော ဒေါ တီ နီ ဝါယ် ဟဲ့ ဟွတ့် ကာလာင် မဲ ဂြုဝ်း ဒီ အုဝ် မိူဝ်၊ န့ ဘော ပီ ဘြိမ်။ အုဝ် တူ နပ် ဒီ ကာလာင် ဂြုဝ်း ဒီ အီ ဟဝ်။”

11 ဇဝ်ဖြာ ဝီ တဝ်း၊ “အာဆေ ဟဲ့ တဲး ဒူအီ ပွိုန် ကာလာင် ဂြုဝ်း။း အာဆေ ဘူင် တဲး ဒူအီ တူ နပ် ဒီ ထူမ်၊ တူ နပ် ဒီ ဂြုဝ်း။း အာဆေ နပ် ဒီ ဘူင် တဲး ငါယ် ဒူအီ လိုဝ်း၊ ဝီ တဲး မင် အီ တူ လိုဝ်း။း န့ မုး အုဝ်။ အုဝ် ဇဝ်ဖြာ ဟဲ့ နပ် ဒီ ဘူင် တူတ့် ဒွန် မျုဝ် ဇိုဝ် တီ။ 12 တဲး မဲ ဟာဝ် ဒေါ တီ နီ။ အုဝ် ဒီ စွယ် မဲ တဲး မဲ ပွိုန် ခဲ၊ တဲး မဲ ပွိုန် ကာလာင်။ အုဝ် ဒီ မာနုဝ် မဲ၊ တဲး မဲ နပ် ပီ ဒီ လုဝ် ကာလာင် မဲ။”

13 အာမုဝ်ဆဲ ယီ တဝ်း၊ “မဲ ဇဝ်၊ အုဝ် မှာန့်၊ တဲး မဲ စ်ု ဒူအီ ဟဝ် ဟာဝ် ဘူင် ပီ လုဝ် မဲ။”

14 ဝါယ် အန် တီ ဇဝ်ဖြာ ကော ဝီ ရူ ခဲင် နဝ်း အန် ကူပ် ကာလာင် အာမုဝ်ဆဲ ဂြုဝ်း တီ။ အန် ဝီ တဝ်း ဒီ အာမုဝ်ဆဲ၊ “န့ မိုဝ်း အီကတ် မဲ၊ အီ စိူဝ် အာရူန်၊ အီ မုး ခြိုဝ် အာလေဝီ။ အုဝ် ဟဲ့ နပ်၊ အာရူန် ဟဲ့ နပ် ဒီ ကာလာင် ဆီချာ ဒီ အီ။ ဒေါ တီ နီ အန် ဟဲ့ ဟွတ့် လေး ဒူင် ကွယ် အန်၊ ဟာဝ် ဒူပ် န့တေန့်၊ တဲး အန် တး ဇမ် ဒူင် ကွယ် မဲ နီ။ ဆေ အန် ယိုဝ် မဲ၊ အန် ဒီ ဘော မိုဝ်း နဝ်း ဒါခိုယ်။ 15 ပန် တီ မဲ လုဝ် ကာလာင် ဒီ အန် ခဲ့ ပီ လုဝ် အန် ကာလာင် ဒီ အီ ဟဝ်။ အုဝ် ဒီ ဘော စွယ် ဘော မဲ ဘော အာရူန်။ အုဝ် ဒီ မာနုဝ် ဘာယ်၊ တဲး ဘာယ် နပ် ပီ လုဝ် ဘူင် ဘာယ်။ 16 အာရူန် ဒီ ကာလာင် ဒီ ဒူအီ ဒါင် မဲ။ န့ ပီ၊ အန် ဒီ ဘဲန် ဆီဒ ဘော မူတ့် မဲ။ ပီ တဝ်း မဲ ဒီ အန်၊ န့ ယီ ပီ ဇဝ်ဖြာ ဟဲ့ ကာလာင် ဂြုဝ်း ဒီ အန်။ 17 မဲ ယီ လုဝ် ဂူင့် န့ကြွုန် တီ ဘော တာ န့ကြွုန် တီ၊ ဘူင် နာ မွှိုမ် အာမ် ကာဆဝ်။”

18 ဇဝ်ဖြာ ဟဲ့ ဟွတ့် ကာလာင် ဂြုဝ်း တီ၊ အာမုဝ်ဆဲ ဘော ဝေန့် တး ဇမ် ဒူင် ကွယ် ဘိုဝ် အန် အီ စိူဝ် အာယေထာရုဝ်။ အန် တဝ်း ဒီ ဘိုဝ် အန်၊ “အုဝ် မှာန့်၊ တဲး မဲ ခ့ဝါင် အုဝ် ဝိဝ်။ တဲး အုဝ် ဝီ ဟာဝ် ဇမ် ခဲင် မိူင် အဲဂိုပ်။ အုဝ် ဆီ ဝိဝ် ဒူင် ကွယ် ဝေါဝဲ အုဝ်၊ တဲး အုဝ် နပ် ယုဝ် န့ မိုဝ်း မင် အီ ဆီ ကွယ်၊ ယုဝ် ဂေ ဟဲ့ ယမ်၊ ညှမ် ယမ်။” အန် ဟဲ့ ဟွတ့် မှာန့် ပါယ် တီ အာယေထာရုဝ် ဝီ ခ့ဝါင် အန် ဝိဝ်။ အန် ဘော တဝ်း၊ “တဲး မဲ ဟာဝ် ဒါခိုယ်။”

19 ဒေါ ဆီ ကွယ် အာမုဝ်ဆဲ ခဲင် မိူင် မီဒီအာန် တွိုန်၊ ဇဝ်ဖြာ ဟဲ့ စ်ု အန် ဝီ ဝိဝ် ခဲင် မိူင် အဲဂိုပ်။ ဇဝ်ဖြာ ဟဲ့ တဝ်း၊ “ဂေ ဒူအီ အီ ဆီ ငဝ်း ယမ် မဲ တွိုန်၊ ဂေ ဒွန် အီ ဟဲ့ ဟွတ့် ယမ်။” 20 ခုဝ် အန် တီ၊ အာမုဝ်ဆဲ ဟဲ့ ဒဲ့ ဘော အီဘိုန့် အန် ဘော ဂွန် အန်။ တဲး ဂေ ပဝ့် မာလုဝ်၊ ဒူပ် အန်၊ ဟာဝ် ဝိဝ် ဒီ မိူင် အဲဂိုပ်။ အန် ဘော ဒိုဝ်း န့ကြွုန် ပီ ဒွါ ဇဝ်ဖြာ ဒီ အန်၊ ဂူင့် ဟာဝ် ဒူပ် န့တေန့်။

21 ဇဝ်ဖြာ ဝီ ကာလာင် ဂြုဝ်း ဒီ အန် တဝ်း၊ “မဲ ဟီ တး ဇမ် ခဲင် မိူင် အဲဂိုပ်၊ မဲ လုဝ် ဘျ နာ မွှိုမ် အာမ် ကာဆဝ် ပီ ဒွါ အုဝ် မဲ ဘူင်။ ခဲ့ ပီ ဒွါ အုဝ် ပွုန် ဒီ မဲ၊ မဲ လုဝ် ဘျ တူတ့် ဒွန် မျုဝ် ဒီ ခုန်ဒီခမ် ဖာရုဝ်။ အုဝ် ယီ ဒီ ဘူင် ကွဲ့ တဲး အန် ဘျွင် နဝ်း၊ တူ ခ့ဝါင် တဲး ဘေ ဟာဝ်။ 22 ပန် တီ မဲ လုဝ် တဝ်း ဒီ ခုန်ဒီခမ် ဖာရုဝ်၊ ‘ဇဝ်ဖြာ တဝ်း ဒီ မဲ၊ ဂေ ဒူအီ အီဆာရေလ ပီ ဂွန် အုဝ်။ ဂေ ပီ ဂွန် ဂိန့် အုဝ်။ 23 အုဝ် မိူဝ် စ်ု မဲ၊ တဲး မဲ ခ့ဝါင် ဂွန် အုဝ် ဂေ တီ၊ တဲး ဂေ ဟာဝ် ကြိုပ် အုဝ်။ မဲ ယီ တူ ခ့ဝါင် ဂေ ဟာဝ်။ ခုဝ်၊ အုဝ် ဒီ ဘူင် တဲး ဂွန် ဂိန့် မဲ ယမ်။’”

24 ဒေါ ဟာဝ် အန် ဒူပ် န့တေန့်၊ ဒေါ တး ဇမ် အန် ဒီ ဇေရူပ် အူ ပ့လုဝ့်၊ ဇဝ်ဖြာ တး ဒူင် ကွယ် အန်၊ တဝ်း ဒီ ငဝ်း ယမ် အာမုဝ်ဆဲ။ 25-26 ဒေါ အန် တီ နာင် ဆီပုဝ်ရာ၊ အီ မုး အီဘိုန့် အာမုဝ်ဆဲ၊ အန် ဟြေတ့် မာဝ် လမ် အူ ဘူင့်၊ ဆွာ့ ဝဲန် ဟုန် လခါနာ အီမာယ် ဒီ ဂွန် အန်။ ဟဲ့ ဟွတ့်၊ အန် ဘော ဇတ့် ဟုန် တီ ဒီ ပ့လဝ် အာမုဝ်ဆဲ။ အန် ဘော တဝ်း ဒီ အာမုဝ်ဆဲ၊ “အိုယ်၊ အီမာယ် အုဝ်၊ မဲ လုဝ် ဘူင် တဲး နှာမ် လေး။” ဝါယ် အန် တီ ဇဝ်ဖြာ တူ ဝီ ငဝ်း ယမ် အာမုဝ်ဆဲ။

27 ဒေါ အန် တီ ဇဝ်ဖြာ ယီ တဝ်း ဒီ အာရူန် တွိုန်၊ “တဲး မဲ ဟာဝ် ဟြေတ့် အာမုဝ်ဆဲ အီ ကွယ် ခဲင် ပြဲ ငွင့်။” ပန် တီ အာရူန် တွိုန် မိူဝ် ဟာဝ် ဟြေတ့် ဝါ အန်။ ဒေါ လာယ် ကာတုန့် ဂါယ်၊ အာမုဝ်ဆဲ ကွယ် ဒီ နွန် ဇဝ်ဖြာ တွိုန်။ အန် ဟဲ့ ယိုဝ် ဝါ အန်၊ အန် ဘော အုး ဝါ အန်။ 28 ဒေါ အန် တီ အာမုဝ်ဆဲ ဝီ ခဲ တူတ့် ဒွန် မျုဝ်၊ တဲး အာရူန် ဝီ ထူမ် လွင် ဂြုဝ်း ပီ စ်ု ဇဝ်ဖြာ အန် ကာလာင်။ အန် ဘော ခဲ လွင် နာ မွှိုမ် အာမ် ကာဆဝ် ပီ စ်ု ဇဝ်ဖြာ အန် ဘူင်။

29 ဝါယ် အန် တီ အာမုဝ်ဆဲ ဂါယ် အာရူန်၊ ဂါယ် ဘော ဟာဝ် ဇမ် ဒူင် ကွယ် ဂေ ဒါ တာင် ဒူအီ အီဆာရေလ။ ဂါယ် မိူဝ် ဒဲ့ ဂေ တး ကာဇု အူ ပ့လုဝ့်။ 30 အာရူန် ဝီ ကာလာင် တူတ့် ဒွန် မျုဝ် ဒီ ဂေ လွင် ဂြုဝ်း ပဲ့ ဟဲ့ ကာလာင် ဇဝ်ဖြာ ဒီ အာမုဝ်ဆဲ။ အာမုဝ်ဆဲ ဘော ဘူင် နာ မွှိုမ် အာမ် ကာဆဝ် ပီ ဒွိုမ် ဘျ ဇဝ်ဖြာ ဒီ အန်၊ တဲး ဂေ ယိုဝ်။ 31 ပန် တီ ဂေ ဒါ တာင် ညှိုမ် ဂြုဝ်း ပီ ကာလာင် ဂါယ်။ ဂေ ဘော နပ်၊ ဇဝ်ဖြာ ဟဲ့ မိုဝ်း နဝ်း ကာဝေ ဂေ ဒူအီ အီဆာရေလ။ ဂေ ဘော နပ်၊ ဇဝ်ဖြာ ဟဲ့ ယိုဝ် ဒုက် တာင် ပီ လုဝ် ခမ် ဂေ။ ဝါယ် အန် တီ ဂေ ခြိုပ်ခြဝ် ဘော ကြိုပ် ဇဝ်ဖြာ။