1 ဝါယ် အန် တီ အာမုဝ်ဆဲ ဂါယ် အာရူန် ဟာဝ် ဇမ် ဒူင် ကွယ် ခုန်ဒီခမ် ဖာရုဝ်။ ဂါယ် တဝ်း ဒီ ခုန်ဒီခမ်၊ “ဇဝ်ဖြာ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ၊ အန် တဝ်း ဒီ မဲ၊ ‘မဲ လုဝ် ခ့ဝါင် အာမျုဝ် ဒူအီ အုဝ် တဲး ဂေ ဟာဝ် လေး ခဲင် မိူင် မဲ၊ လေး ဟာဝ် ခဲင် ပြဲ ငွင့် တဲး ဂေ ပွိုန် ဒီ ဘူင် ဘ့လွယ် ကြိုပ် အုဝ်။’”

2 ခုန်ဒီခမ် ဖာရုဝ် ယီ တဝ်း၊ “ဇဝ်ဖြာ ပီ တဝ်း ဘာယ်၊ အာဆေ အန် မုး။း မှဝ် န့ ပါယ် ပီ လုဝ် အုဝ် ထူမ် ပီ စ်ု အန်။း မှဝ် န့ ပါယ် ပီ လုဝ် အုဝ် ခ့ဝါင် ဂေ ဒူအီ အီဆာရေလ ဟာဝ် လေး ခဲင် မိူင် အုဝ်။း အုဝ် တူ နပ် ဇဝ်ဖြာ တီ။ အုဝ် တူ တဲး ဂေ ဒူအီ အီဆာရေလ ဟာဝ် ဒေါ မှဝ်။”

3 ဂါယ် ဝီ တဝ်း၊ “ဇဝ်ဖြာ ပီ ကြိုပ် ယေ ဒူအီ ဟဲဘြဲ၊ အန် ဟဲ့ တး ဇမ် ဒူင် ကွယ် ယာယ်။ ခုဝ်၊ ယာယ် မှာန့် တဲး မဲ တဲး ယေ ဟာဝ် ခဲင် ပြဲ ငွင့်၊ ဟာဝ် ဒူပ် န့တေန့် အာဒါ အူယ် ဆီငဲ၊ တဲး ယေ ပွိုန် ဒီ လှူ ပီ ဒီ လုဝ် လှူ ယေ ဒီ ဇဝ်ဖြာ ပီ ကြိုပ် ယေ။ ဆေ ယေ တူ ဘူင် ပါယ် တီ ယေ ယုဝ် ဇဝ်ဖြာ ဒီ တဲး ယေ ယမ် ဒီ ဆဝ် ရောဂါ။ ယေ ဘော ယုဝ် ဇဝ်ဖြာ ဒီ ငဝ်း ဝဲန် ယေ၊ တဲး ယေ ယမ် ဒီ မာပွါ့ လာင်။”

4-5 ခုန်ဒီခမ် ဝီ တဝ်း၊ “အိုယ် အာမုဝ်ဆဲ ဘာယ် အာရူန်၊ ပီ ဘူင် ဘာယ် န့ တဲး ဂေ ဒူအီ တူ ဘူင် ဆီချာ ဂါန် ပီ လုဝ် ဘူင် ဂေ။ ဂေ ဒူအီ အာမျုဝ် ဘာယ်၊ ဂေ ဟဲ့ ဘြဲ၊ ဟဲ့ ကိူန် ကာဆဝ်။ ဘာယ် ယီ ကာဆုး ဂေ၊ ကွဲ့ ဟူ တဲး ဂေ ဘူင် ဂါန် ဂေ။ ဘာယ် ဟာဝ် ဝေန့် ဒေါ တီ နီ၊ တဲး ဘေ ဘောကာဂ့လျီတ် ဘူင် ဂါန် ဘေ။”

6 န့ ယီ မိုဝ်း ဒူအီ အီ အိုပ် ဒူအီ အီ ရန့် ဂါန်၊ အီ မုး ဒူအီ အဲဂိုပ်။ န့ ဘော မိုဝ်း ဂေ ဒူအီ ယဲတ့် ရန့် ဂါန် အီ မုး ဒူအီ အီဆာရေလ။ ဝါယ် ဟဲ့ ဟွတ့် လေး အာမုဝ်ဆဲ ဂါယ် အာရူန် ဒူင် ကွယ် ခုန်ဒီခမ် တွိုန်၊ ခုန်ဒီခမ် ဝီ ဒဲ့ ဂေ ဒူအီ အီ အိုပ် ဒူအီ အီ ရန့် ဂါန် ဘော ဂေ ဒူအီ အီ ယဲတ့် ရန့် ဂါန် တွိုန်၊ တဲး ဂေ တး ဇမ် ဒူင် ကွယ် အန်။ 7 အန် တဝ်း ဒီ ဂေ၊ “စုး ပုင် အာတိုဝ် နီ၊ ဒေါ ဘူင် ဂေ မာအုတ်၊ ကွဲ့ ဟူ ဒွါ ဟျြီင် ဒီ ဂေ၊ တဲး ဂေ ဘော ဟာဝ် ဟြေတ့် ရာင် ဂေ ဟျြီင် ပီ လုဝ် ဂေ၊ ကွဲ့ တဲး ဘေ စွယ် မာဆေ။ 8 ဘေ ယီ လုဝ် စ်ု ဂေ ဘူင် မာဝ် မာအုတ် ခဲ့ ပီ ဒွိုမ် လုဝ် ဂေ ဘူင်။ ကွဲ့ တဲး န့ ယူမ် ပီ လုဝ် ဘူင် ဂေ ဒေါ မှဝ်။ ခုဝ်၊ ဂေ မုး မှာယ် အီ ဘူင် ဂါန် တီ။ ဂေ ယီ ဟဲ့ ကြာန်။ ဂေ ဟဲ့ မှာန့် တဲး ဂေ လေး ဟာဝ်၊ လှူ ဒီ ဇဝ်ဖြာ ပီ ကြိုပ် ဂေ။ 9 ဘေ လုဝ် တဲး ဂါန် ဂေ ကိူန် လွှိုမ် ခါ အာတ့်။ ကွဲ့ တဲး ဂေ ဒန် ထူမ် ဂြုဝ်း ပီ ကာလုဝ် ဒူအီ ဟဝ် ဒီ ဂေ။” 10 ခုန်ဒီခမ် ဟဲ့ ဟွတ့် ကာလာင် ဂြုဝ်း တီ၊ ဂေ ဒူအီ အီ အိုပ် ဒူအီ အီ ရန့် ဂါန် ဘော ဂေ ဒူအီ အီ ယဲတ့် ရန့် ဂါန်၊ ဂေ မိူဝ် လေး၊ ကာလာင် ဂြုဝ်း ပီ ကာလာင် ခုန်ဒီခမ် ဖာရုဝ် ဒီ ဂေ၊ တဲး ဂေ ဒူအီ ဘောကာဂ့လျီတ် ပွိုန် ဒီ ထူမ်။ ဂေ တဝ်း၊ “ခုန်ဒီခမ် ဖာရုဝ် တူ ဝီ ဒွါ ဟျြီင် ဒီ ဘေ၊ တဲး ဘေ ပွိုန် ဒီ ဘူင် မာဝ် မာအုတ်။ 11 အန် စ်ု ဘေ ဟာဝ် ဟြေတ့် ရာင် ဘေ၊ တဲး ဘေ ဟြေတ့် ဒူင် အီ မိုဝ်း ဟျြီင် ပီ လုဝ် ဘေ တီ။ အန် ယီ တူ တဲး ဘေ ရန့် ယူမ် ဂါန်။ ယူမ် ခေါ အီ စဲက် မိူဝ်၊ အန် တူ တဲး။” 12 ပန် တီ ဂေ ဒူအီ ဘော လုဝ် ဟာဝ် ဝိန် ဒီ လဲ ခဲင် မိူင် ဘော မိူင်၊ တဲး ဂေ ဟြေတ့် ဒင် ဟျြီင် ပီ လုဝ် ဂေ၊ တဲး န့ ကာဒါင် ဟျြီင် ပီ ဒွိုမ် တာ ဂေ။ 13 ဂေ ဒူအီ အီ အိုပ် ဒူအီ အီ ရန့် ဂါန်၊ ဂေ ဘော ခါနှာပ် ဒူအီ အီဆာရေလ။ စ်ု ဂေ ဘူင် ခဲ့ ပီ ဒွိုမ် လုဝ် ဘူင် ဂေ။ ဂေ တဝ်း ဒီ ဒူအီ အီဆာရေလ၊ “တဲး ဘေ ဘူင် ခဲ့ ပီ ဒွိုမ် ပွိုန် ဘေ ဒေါ ဟဲ့ မိုဝ်း ဘေ ဟျြီင်။ ကွဲ့ တဲး မာဝ် မာအုတ် ယူမ်။” 14 န့ ဘော မိုဝ်း ဒူအီ အီ ယဲတ့် ရန့် ဂါန် ပီ ဒါင် ဂေ ဒူအီ အဲဂိုပ်။ ဒူအီ ဂေ တီ၊ ဂေ ဘော ကာဒုး ဒူအီ အဲဂိုပ် မး ဂေ။ ဂေ ဒူအီ အဲဂိုပ် ဘော တဝ်း ဒီ ဂေ၊ “ဘော အာမှိုဝ် ဘော အာတိုဝ် ဘေ တူ ဘူင် မာဝ် မာအုတ် ခဲ့ ပီ လုဝ် ဘူင် ဘေ။ မှဝ် န့ ပါယ် ပီ ဘူင် ဘေ တဲး န့ ယူမ် လူင်။း”

15 ပန် တီ ဂေ ဒူအီ အီ ယဲတ့် ရန့် ဂါန် တွိုန်၊ ဂေ ဘော ဟာဝ် ဇမ် ဒူင် ကွယ် ခုန်ဒီခမ် ဖာရုဝ်။ ဂေ ဝီ တဝ်း ဒီ အန်၊ “မာဆေ ပီ ဘူင် မဲ ဒီ ယေ ဒူအီ အီ ဟဲ့ ဘဲန် မှာယ် မဲ နီ။း 16 ယေ အာဝ် ဟူ ပွိုန် ဟျြီင် ပီ ခါ အာတ့်။ ဂေ ယီ စ်ု ယေ ဘူင် မာဝ် မာအုတ် ခဲ့ ပီ ဒွိုမ် ဘူင် ယေ။ ဂေ ဒူအီ အီ အိုပ် ယေ၊ ဂေ ဘော မး ယေ။ န့ ယီ တူ မုး မှာပ် ယေ။ န့ မုး မှာပ် ဂေ ဒူအီ အိုပ်။ ဂေ ခါနှာပ် ယေ ဘူင် ခဲ့ တူ ပဲ မှာယ် မဲ ဘူင်။”

17 ခုန်ဒီခမ် ဖာရုဝ် ဝီ ဝျီ့ ဂြုဝ်း ဂေ တီ။ အန် တဝ်း၊ “အာဝ် မုး၊ ဘေ တူ ခမ် ဒီ ဘူင်။ ယီ မုး၊ ဘေ ကြာန် ဒီ ဘူင်။ ခုဝ် အန် တီ၊ ဘေ ဟဲ့ ဒန် ဒီ မှာန့်၊ တဲး အုဝ် ခ့ဝါင် ဘေ လေး ဟာဝ် လှူ ဒီ ဇဝ်ဖြာ။ ဆေ ဘေ တူ ကြာန် ဘေ တူ ဒန် ဒီ ဇေန့်ဇာ ဇိုဝ် တီ။ 18 အုဝ် တူ ဝီ စ်ု ဒူအီ တဲး ဂေ ဝီ ဒွါ ဟျြီင် ဒီ ဘေ။ ဘေ ယီ လုဝ် ဘူင် မာဝ် မာအုတ် ခဲ့ ပီ ဒွိုမ် လုဝ် ဘူင် ဘေ။ အာဝ် ပွိုန် တဲး န့ ယူမ်။ ဟာဝ်၊ ဘေ ဟာဝ်၊ ဘူင် ခဲ့ ပီ စ်ု ဒူအီ အီ အိုပ် ဘေ ဘူင်။”

19 ဂေ ဒူအီ အီ လုဝ် ယဲတ့် ရန့် ဂါန် တွိုန်၊ ဒေါ ထူမ် ဂေ ဂြုဝ်း ပီ ကာလာင် ခုန်ဒီခမ် ဒီ ဂေ၊ ဂေ ဘော နပ်၊ ဂေ ဟဲ့ ကာဒုး ဒုက် တာင် လွှိုမ် ခါ အာတ့်။ ခုန်ဒီခမ် ဟဲ့ တဝ်း ဆီချာ ဒီ ဂေ၊ ဂေ လုဝ် ဘူင် မာဝ် မာအုတ် ခဲ့ ပီ ဒွိုမ် ဘူင် ဂေ ဆေဆေ။ 20 ဂေ ဟဲ့ ဟွတ့် လေး ဒူင် ကွယ် ခုန်ဒီခမ် ဖာရုဝ် တွိုန်၊ ဂေ ဝီ ယိုဝ် အာမုဝ်ဆဲ ဂါယ် အာရူန်။ ဂါယ် ဟဲ့ နှဝ့် ဂေ ဝီ တး ဇမ် ဒူင် ကွယ် ဂါယ်။ 21 ဂေ ဝီ တဝ်း ဒီ အာမုဝ်ဆဲ ဂါယ် အာရူန်၊ “ဇဝ်ဖြာ လုဝ် ဆုင်ဖျာတ် အာမူ တီ။ တဲး အန် ဒမ် မှာပ် ဒီ ဘာယ်။ ဘာယ် ဟဲ့ ဘူင် တဲး ဘော ခုန်ဒီခမ် ဘော ဂေ အာမူ အာမာတ် အန် ရူ ဒီ ယေ။ ဘာယ် ဟဲ့ ဘူင် တဲး ဂေ ဒီ ဘော ဒိုဝ်း မာပွါ့ လာင် ဂေ၊ တဲး ဂေ ငဝ်း ယမ် ယေ ဘောကာဂ့လျီတ်။”

22 အာမုဝ်ဆဲ ဝီ ဟာဝ် ဆာခိုဝ် ဒီ ဇဝ်ဖြာ အူ ဇေန့်။ အန် တဝ်း၊ “အိုယ် မဲ ဇဝ်ဖြာ၊ မှဝ် န့ ပါယ် ပီ ဒွါ မဲ ဒုက် တာင် ဒီ ဒူအီ ဂေ နီ။း မှဝ် န့ ပါယ် ပီ တိုယ် မဲ ဒီ အုဝ်၊ တဲး အုဝ် စွယ် ဒူအီ ဂေ နီ။း 23 အူ ဆိန့် ဒေါ ဟာဝ် အုဝ် ဒူင် ကွယ် ခုန်ဒီခမ် ဖာရုဝ်၊ ကာလာင် ဂြုဝ်း မဲ ဒီ အန်၊ အန် ဟဲ့ ဒွါ ဒုက် လွှိုမ် ခါ အာတ့် ဒီ ဂေ။ မဲ ယီ တူ ဘူင် မာဆေ ပီ ဒွိုမ် ကာလာင် မဲ တဲး ဂေ ဒူအီ လေး ခဲင် ဒုက် တာင် ပီ ကာဒုး ဂေ။”