ဝါယ် အန် တီ ဇဝ်ဖြာ ဝီ တဝ်း ဒီ အာမုဝ်ဆဲ၊ “ဒေါ တီ နီ မဲ ဒီ ယိုဝ် ပီ ဒီ ဘူင် အုဝ် ဒီ ခုန်ဒီခမ် ဖာရုဝ်။ အုဝ် ဒီ ဘျ ပွုန် အုဝ် ဒီ အန်၊ တဲး အန် ခ့ဝါင် ဂေ ဒူအီ အီဆာရေလ လေး ခဲင် မိူင် အန်။ အန် ဟီ ယိုဝ် ပွုန် အုဝ်၊ အန် ဒီ ဆုတ့် ဂေ လေး ဟဲ ဟဲ ခဲင် မိူင် အန်။”

2 ဇဝ်ဖြာ ဝီ တဝ်း ဒီ အာမုဝ်ဆဲ၊ “အုဝ် မုး အန် ဇဝ်။ 3 အုဝ် ဟဲ့ ဒွိုမ် ကာပ့လုး ဒီ အာဘြာဟမ်၊ ဒီ အာဆဲက် ဘော ဒီ အာကူပ်၊ တဲး ဂေ နပ်၊ န့ မုး အုဝ် ဇဝ်ဖြာ၊ အီ အိုပ် တူတ့် ဒွန် မျုဝ်။ အုဝ် ယီ တူ ဒွိုမ် ကာလာင် ဒီ ဂေ လွင် စိူဝ် အုဝ် အီ မုး အန် ဇဝ်။ 4 ဒဲင် တီ၊ အုဝ် ဟဲ့ ဒွါ ကာဒိက် ဆတ်ဇာ ဒီ ဂေ။ အုဝ် ဟဲ့ တဝ်း ဒီ ဒွါ မိူင် ကာနန့် ဒီ ဂေ၊ တဲး န့ ဘဲန် မိူင် ဂေ။ ခါ အာတ့် မိူင် တီ ဟဲ့ မုး မိူင် အီ ဟဝ်။ ဂေ ဟဲ့ ဟာဝ် ဝိန် ဒီ လဲ ခဲင် မိူင် တီ ဘဲန် ခဲတ့် ခဲင် မိူင် တီ။ 5 ဒေါ တီ နီ အုဝ် မိူဝ် ဟဲ့ နပ် လွင် ပီ လုဝ် ခမ် ကာဆဝ် ဂေ ဒူအီ အီဆာရေလ ဒေါ ဘဲန် ဂေ မှာယ် ခဲင် မိူင် အဲဂိုပ် တွိုန်။ အုဝ် မိူဝ် တူ ပိဝ် ကာဒိက် ဆတ်ဇာ ပီ ဒွါ အုဝ် ဒီ ဂေ ခါ အာတ့်။

6 ခုဝ် အန် တီ၊ မဲ လုဝ် ကာလာင် ဂြုဝ်း အုဝ် ဒီ ဂေ ဒူအီ အီဆာရေလ။ မဲ လုဝ် တဝ်း၊ ‘ဇဝ်ဖြာ တဝ်း ဒီ ဘေ၊ “အုဝ် မုး အန် ဇဝ်။ အုဝ် ဒီ တဲး ဘေ လေး ခဲင် ဒုက် ပီ ဒွါ ဂေ ဒူအီ အဲဂိုပ် ဒီ ဘေ။ အုဝ် အာဝ် ဟူ တဲး ဘေ ဘဲန် မှာယ် ဂေ။ အုဝ် ဒီ ဘျ ဒီ ဂေ ခဲ့ တာင် ပွုန် အုဝ်၊ တဲး အုဝ် ထုတ် လေး ဘေ ဒီ ဂေ။ အုဝ် ဒီ ဆုင်ဖျာတ် ဒါရာ ဒီ ဂေ ဒူအီ အဲဂိုပ် တွိုန်၊ တဲး ဂေ ခမ် မှာပ် ဂေ။

7 အုဝ် ဒီ တဲး ဘေ ဘဲန် ဒူအီ အာမျုဝ် ပီ အိုပ် အုဝ်။ အုဝ် မိူဝ် ဘဲန် ဇဝ်ဖြာ ပီ ကြိုပ် ဘေ။ ပန် ဒီ တဲး အုဝ် ဘေ လေး ခဲင် မိူင် အဲဂိုပ် တီ၊ ဘေ ဒီ ဘော နပ် ဆီချာ၊ န့ မုး အုဝ် အန် ဇဝ် အီ မုး ဇဝ်ဖြာ ပီ ကြိုပ် ဘေ၊ အုဝ် ဟဲ့ တဲး ဘေ လေး။ 8 ပန် တီ အုဝ် ဒီ ဘော တိုယ် ဘေ ဟာဝ် ဇမ် ခဲင် မိူင် ပေါ မိူင်။ လွင် မိူင် တီ အုဝ် ဟဲ့ ဒွိုမ် ဒွါ ကာဒိက် ဆတ်ဇာ ဒီ အာဘြာဟမ်၊ ဘော အာဆဲက် ဂေ အာကူပ်။ အုဝ် ဟဲ့ တဝ်း၊ မိူင် တီ ဒီ ဘဲန် မိူင် ဘေ။ န့ မုး အုဝ် အန် ဇဝ် အီ ဒီ ဘူင် ပါယ် တီ။”’”

9 ဇဝ်ဖြာ ဟဲ့ ဟွတ့် ကာလာင် ဂြုဝ်း တီ၊ အာမုဝ်ဆဲ ဝီ ကာလာင် တူတ့် ဂြုဝ်း တီ၊ တဲး ဂေ ဒူအီ အီဆာရေလ ဝီ ထူမ်။ ဂေ ယီ ဟဲ့ ဘဲန် မှာယ် ဒူအီ ဟဝ်၊ ခမ် ဒုက် တာင်၊ တဲး န့ ဘော ဘဲန် နဝ်း တျီ့ ဒီ ဂေ။ ခုဝ်၊ ဂေ တူ ပွိုန် ညှိုမ် ပီ တဝ်း အန်။

10 ဒေါ အန် တီ ဇဝ်ဖြာ ဝီ ကာလာင် ဒီ အာမုဝ်ဆဲ တဝ်း၊ 11 “တဲး မဲ ဟာဝ် ဒူင် ကွယ် ခုန်ဒီခမ် ဖာရုဝ် အီ အိုပ် မိူင် အဲဂိုပ်၊ တဲး မဲ စ်ု အန် ခ့ဝါင် ဂေ ဒူအီ အီဆာရေလ လေး ခဲင် မိူင် အန်။”

12 အာမုဝ်ဆဲ ဝီ တဝ်း ဒီ ဇဝ်ဖြာ၊ “အုဝ် ဟဲ့ ဟွတ့် တဝ်း ဒီ မဲ၊ အုဝ် တူ မုး ဒူအီ အီ ကျ ဒီ ကာလာင် ဂြုဝ်း ဒီ အီ။ ဒေါ တီ နီ၊ ဂေ ဒူအီ အီဆာရေလ တူ ဝီ ထူမ် ဂြုဝ်း အုဝ်။ ပါယ် တီ ဘော ခုန်ဒီခမ် ဖာရုဝ် ဒီ ဘော ဝဲန် ဂြုဝ်း အုဝ်။”

13 ဇဝ်ဖြာ ယီ တဝ်း ဒီ အာမုဝ်ဆဲ ဂါယ် အာရူန်၊ တဲး ဂါယ် ဟာဝ် ကာလာင် ဒီ ဂေ ဒူအီ အီဆာရေလ ဘော ဒီ ခုန်ဒီခမ် ဖာရုဝ်၊ တဲး ဂေ နပ် လွင် ဇဝ်ဖြာ ဒီ တိုယ် ဂေ ဒူအီ အီဆာရေလ လေး ခဲင် မိူင် အဲဂိုပ်။

14 အာနီ မုး ဇာရာင် ဂေ ဂိန့် န့ကြိုဝ်း အာမုဝ်ဆဲ ဂါယ် အာရူန် တွိုန်၊ ဂေ အီ ဟဲ့ ကွယ် အာတ့် ကွယ် ဂါယ်။ ဂေ ဂွန် အီမာယ် အာရူဘေန် အီ မုး ဂွန် ဂိန့် အာကူပ် တွိုန်၊ ဂေ စိူဝ် အာဟာန်၊ အာဖာလူ၊ အာဟေဇာရူန် ဘော အာခါမီ။ ဂေ ဒူအီ တီ ဝီ ဘဲန် ဂိန့် ခဲင် န့ဟူမ် ဂေ အီ မုး ဂွန် အာရူဘေန် တွိုန်။

15 ဂေ ဂွန် အီမာယ် အာဆီမေအူန် စိူဝ် အာယေမူအေန်၊ အာယာမိန်၊ အာဇုဝ်ဟာန်၊ အာယာခိန်၊ အာဇုဝ်အာန် ဘော အာဆာအုန်။ ဒူအီ ဂေ တီ ဝီ ဘဲန် ဂိန့် န့ကြိုဝ်း ဂေ အီ မုး ဂွန် အာဆီမေအူန်။ မာ အာဆာအူန် တွိုန် မုး အာမျုဝ် ဒူအီ ကာနန့်။

16 ဂေ ဂွန် အီမာယ် အာလေဝီ စိူဝ် အာဂေန်ရာဆူန်၊ အာခုဝ်ဟာတ် ဘော အာမေန်ရာရီ။ ဒေါ အာဆာက် အာလေဝီ ဟဲ့ နုဝ့် အူ မာယဝ်း ဒီ အူယ် ဂိုဝ် ဒီ ဘူ ဆီနမ် အန် ဘော ယမ်။

17 ဂွန် အီမာယ် အာဂေန်ရာဆူန် စိူဝ် အာလီဘာနီ ဘော အာဆီမီ။ ဂါယ် ဘော ဘဲန် ဂိန့် န့ကြိုဝ်း ဂါယ်။

18 ဂွန် အီမာယ် အာခုဝ်ဟာတ် တွိုန် မုး အာမာရမ်၊ အာအီဇာဟာ၊ အာဟေဘြုဝ် ဘော အာအူဆီအေန်။ အာခုဝ်ဟာတ် တွိုန်၊ ဒေါ နုဝ့် အာဆာက် အန် အူ မာယဝ်း ဒီ အူယ် ဂိုဝ် ဒီ အူယ် ဆီနမ်၊ အန် ဘော ယမ်။

19 ဂွန် အီမာယ် အာမေန်ရာရီ တွိုန် မုး အာမာလီ ဘော အာမူဆီ။

အာနီ မုး န့ကြိုဝ်း ဂေ ဂွန် အာလေဝီ အီ ဟဲ့ ဒဲမ် အုန် ခဲင် ဇာရာင်။

20 အာမာရမ် တွိုန် ဝီ လာယ် နာင် ယုဝ်ခေဘေတ်၊ အီ မုး ဝါ ဂုန့် အန်၊ တဲး အန် ဘဲန် အီဘိုန့် အန်။ နာင် ယုဝ်ခေဘေတ် တွိုန် ဘော မိုဝ်း ဂွန် အီမာယ် အီ စိူဝ် အာရူန် ဂါယ် အာမုဝ်ဆဲ။ အာမာရမ် တွိုန်၊ အာဆာက် အန် ဘော နုဝ့် အူ မာယဝ်း ဒီ အူယ် ဂိုဝ် ဒီ ဘူ ဆီနမ်၊ အန် ဘော ယမ်။

21 ဂွန် အီမာယ် အာအီဇာဟာ တွိုန် မုး အာခုဝ်ရာ၊ အာနေဖေက် ဘော အာဇီခါရီ။

22 ဂွန် အီမာယ် အာအူဆီအေန် တွိုန် မုး အာမီဆာအေန်၊ အာအေန်ဆာဖာန် ဘော အာဆီထာရီ။

23 အာရူန် တွိုန် လာယ် နာင် အေလီဆေဘာ၊ တဲး အန် ဘဲန် အီဘိုန့် အန်။ အီဘိုန့် အန် တီ မုး ဂွန် အာမီနာဒါပ် ဘော ဝါ အာနာစှူန်။ နာင် အေလီဆေဘာ တွိုန် မိုဝ်း ဂွန် အီမာယ် ဖွုန် ဝီ။ ဂေ စိူဝ် အာနာဒါပ်၊ အာဘီဟူ၊ အာလေအာဆာ ဘော အာအီထာမာ။

24 ဂွန် အီမာယ် အာခုဝ်ရာ မုး အာဆီရာ၊ အာအေန်ခါနာ ဘော အာဘီယာဆာပ်။ ဒူအီ ဂေ တီ၊ ဟဲ့ ဝီ ဘဲန် ဂိန့် န့ဟူမ် ဂေ ဒူအီ အာခုဝ်ရာတ် တွိုန်။

25 အာလေအာဆာ အီ မုး ဂွန် အီမာယ် အာရူန် တွိုန်၊ အန် လာယ် ဂွန် အီဘိုန့် အာပူထီအေန်၊ တဲး အန် ဘဲန် အီဘိုန့် အန်။ အီဘိုန့် အန် တီ၊ အန် မိုဝ်း ဂွန် အီမာယ် အူ ဝီ အီ စိူဝ် အာဖီနေဟာတ်။ အာတီ မုး ဇာရာင် ဂေ ဒွန် အီ အီ မုး လှုက်လှာန် အာလေဝီ တွိုန်။ န့ ဒူပ် ဘဲန် န့ကြိုဝ်း ဘဲန် န့ကြိုဝ်း။

26 န့ ယီ မုး အာရူန် ဂါယ် အာမုဝ်ဆဲ၊ ဂါယ် ဟဲ့ ဒွိုမ် ထူမ် ဂြုဝ်း ဇဝ်ဖြာ။ ဇဝ်ဖြာ ဟဲ့ ဒွိုမ် တဝ်း ဒီ ဂါယ်၊ “ဘာယ် လုဝ် ယဲတ့် ဂေ ဒူအီ အီဆာရေလ တဲး ဂေ လေး ခဲင် မိူင် အဲဂိုပ်၊ တဲး ဂေ ဟာဝ် ဘဲန် ဖိုင် ဘဲန် ဖိုင်။”

27 န့ ဘော မုး အာမုဝ်ဆဲ ဂါယ် အာရူန်၊ ဂါယ် ဟဲ့ ဟာဝ် ဒူင် ကွယ် ခုန်ဒီခမ် ခဲင် မိူင် အဲဂိုပ် ဘော မှာန့်၊ တဲး အန် တဲး ဂေ ဒူအီ အီဆာရေလ လေး ဟာဝ် ခဲင် မိူင် အန်။ န့ ဘော မုး အာမုဝ်ဆဲ ဂါယ် အာရူန် အီ ဟဲ့ ဘူင် ဇိုဝ် တီ ဒွန် မျုဝ်။

28 ခါ အာတ့် ဒေါ ကာလာင် ဇဝ်ဖြာ ဒီ အာမုဝ်ဆဲ၊ ဒေါ ကွယ် အန် ခဲင် မိူင် အဲဂိုပ်၊ ဇဝ်ဖြာ ဟဲ့ ဟွတ့် တဝ်း၊ 29 “အုဝ် မုး အန် ဇဝ်။ မဲ လုဝ် ကာလာင် ဂြုဝ်း အုဝ် ဒီ ခုန်ဒီခမ် ဖာရုဝ် အီ အိုပ် မိူင် အဲဂိုပ်၊ တဲး အန် နပ် ဂြုဝ်း ပီ တဝ်း အုဝ် ဒွန် ဒဲ။”

30 အာမုဝ်ဆဲ ယီ ဝီ တဝ်း ဒီ ဇဝ်ဖြာ၊ “အုဝ် တူ မုး ဒူအီ အီ ကျ ဒီ ကာလာင် ဂြုဝ်း ဒီ အီ။ ကူပ် န့ ပါယ် တီ မှဝ် ခုန်ဒီခမ် ဖာရုဝ် ဒီ ပါယ် ဒီ ထူမ် ဂြုဝ်း ပီ ဒီ ကာလာင် အုဝ် ဒီ အန်။း”