ဝါယ် အန် တီ ဇဝ်ဖြာ ဝီ တဝ်း ဒီ အာမုဝ်ဆဲ၊ “တဲး မဲ ထူမ် ဆီချာ။ အုဝ် ဒီ တဲး အီကတ် မဲ ဟာဝ် ကာလာင် ဒီ ခုန်ဒီခမ် ဖာရုဝ်။ အုဝ် ဒီ တဲး အာရူန် ကာလာင် ဂြုဝ်း မဲ ဒီ ခုန်ဒီခမ်၊ တဲး န့ ပီ ဒူအီ ဘျာန် ဂြုဝ်း ဇဝ်ဖြာ ဝီ ခဲ ဂြုဝ်း ဇဝ်ဖြာ ဒီ အီ ဟဝ်။ 2 ပါယ် တီ ပီ ဒီ ကာလာင် မဲ ဒီ ခုန်ဒီခမ်၊ န့ ပီ အုဝ် ကာလာင် ဂြုဝ်း ဒီ အန်။ ခဲ့ ပီ တဝ်း အုဝ် ဒီ မဲ ဒွန် မျုဝ် မဲ လုဝ် ဝီ ကာလာင် ဒီ အာရူန်။ ဟဲ့ ဟွတ့်၊ အာရူန် ဒီ ဝီ ခဲ ဒီ ခုန်ဒီခမ်၊ တဲး အန် တဲး ဂေ ဒူအီ အီဆာရေလ လေး ခဲင် မိူင် အန်။ 3 အုဝ် ဒီ ဘျ နာ မွှိုမ် အာမ် ကာဆဝ် ဒီ ဂေ ဒူအီ အဲဂိုပ်၊ တဲး န့ ဘဲန် နဝ်း ယုဝ် ဒီ ဂေ။ အုဝ် ယီ ဒီ ဝီ တဲး နဝ်း ခုန်ဒီခမ် ဖာရုဝ် တူ ဘျွင် ဒေါ မှဝ်။ 4 အန် တူ ဝီ ထူမ် ဂြုဝ်း မဲ။ ဒေါ အန် တီ အုဝ် ဒီ ဝီ တဲး ဂေ ဒူအီ ခဲင် မိူင် အဲဂိုပ် ဝီ ကာဒုး ဒုက် တာင်၊ တဲး ဂေ ခမ် မှာပ် ဂေ၊ တဲး ဂေ နပ် ပွုန် အုဝ်။ ပန် တီ အုဝ် ဒီ တိုယ် ဂေ ဒူအီ အီဆာရေလ ဒွန် ခြိုဝ်၊ တဲး ဂေ လေး ဟာဝ် တ မိူင် အဲဂိုပ်။ 5 ဒေါ အန် တီ ဂေ ဒူအီ အဲဂိုပ် ဒီ ဘော နပ်၊ န့ မုး အုဝ် အန် ဇဝ်၊ အုဝ် ဟဲ့ ဘျ ပွုန် တာင် ဒီ ဂေ၊ ဘူင် နာ တူ မွှိုမ် ဒီ ဂေ။ ခုဝ်၊ ဂေ ဒီ တဲး ဂေ ဒူအီ အီဆာရေလ လေး ဟာဝ် တ မိူင် ဂေ။”

6 ဝါယ် အန် တီ အာမုဝ်ဆဲ ဂါယ် အာရူန် ဘူင် တူတ့် ဒွန် မျုဝ် ပီ ကာလာင် ဇဝ်ဖြာ ဒီ ဂါယ်။ 7 ဒေါ ဟာဝ် ကာလာင် ဂါယ် ဂြုဝ်း ဒီ ခုန်ဒီခမ် ဖာရုဝ် တွိုန်၊ အာဆာက် အာမုဝ်ဆဲ ဟဲ့ နုဝ့် ဒါ ဂိုဝ် ဆီနမ်။ အာဆာက် အာရူန် ယီ ဟဲ့ နုဝ့် ဒါ ဂိုဝ် ဒီ အူယ် ဆီနမ်။

8 ဝါယ် အန် တီ ဇဝ်ဖြာ ဝီ တဝ်း ဒီ အာမုဝ်ဆဲ ဂါယ် အာရူန်၊ 9 “ဆေ ခုန်ဒီခမ် စ်ု ဘာယ် ဘူင် နာ မွှိုမ် အာမ် ကာဆဝ်၊ တဲး မဲ ကာလာင် ဒီ အာရူန်။ တဲး အန် ဇတ့် န့ကြွုန် ပီ ဂူင့် အန်၊ တဲး န့ စုဝ်း နာ အာတ့် ခုန်ဒီခမ် ဖာရုဝ်။ န့ကြွုန် တီ ဒီ ဝီ ဘဲန် မာဟန့် အူ ဇေန့်။”

10 ပန် တီ အာမုဝ်ဆဲ ဂါယ် အာရူန် ဘော ဟာဝ် ကာလာင် ဒီ ခုန်ဒီခမ် ဖာရုဝ်၊ ဘူင် တူတ့် ပီ စ်ု ဇဝ်ဖြာ ဂါယ် ဘူင်။ အာရူန် မိူဝ် ဇတ့် န့ကြွုန် အန် နာ အာတ့် ခုန်ဒီခမ် ဖာရုဝ် ဘော နာ အာတ့် ဂေ အာမူ အာမာတ် အန်။ ဟဲ့ ဟွတ့်၊ န့ကြွုန် တီ ဝီ ဘဲန် မာဟန့်။ 11 ခုန်ဒီခမ် ဖာရုဝ် ဒဲ့ ဂေ ဒူအီ အီ မိုဝ်း အာငျာန် ဘော ဂေ ဒူအီ အီ နပ် ဒီ ဘူင် မျလှယ့်။ ဂေ ဘော ဂါဝ် ပွုန် ပီ ညှိုမ် ဂေ၊ ညိုင် ပီ ဘူင် အာရူန် တွိုန်။ 12 ဒွန် အီ ဘော ဇတ့် န့ကြွုန် အန်၊ တဲး န့ ဘော ဘဲန် မာဟန့်။ န့ကြွုန် အာရူန် တွိုန် ယီ မဲင် ဘ့လွိုပ် န့ကြွုန် ဂေ ဒူအီ ဟဝ် ဒွန် ညွင့်။ 13 ခုန်ဒီခမ် ဖာရုဝ် မိူဝ် ယိုဝ် ဒွန် မျုဝ် ပါယ် တီ။ န့ ယီ တူ တဲး အန် ဘျွင် နဝ်း။ အန် တူ ထူမ် ပီ တဝ်း အာမုဝ်ဆဲ ဂါယ် အာရူန် တွိုန်။ န့ ဘဲန် တူတ့် ဒွန် မျုဝ် ပီ ဒွိုမ် ကာလာင် ဇဝ်ဖြာ ဒီ ဂါယ်။

14 ဝါယ် အန် တီ ဇဝ်ဖြာ ဝီ ကာလာင် ဒီ အာမုဝ်ဆဲ၊ “ခုန်ဒီခမ် ဖာရုဝ် မိုဝ်း နဝ်း ဒိူဝ် ပီ ဘြိမ်။ အန် တူ ဆီ တဲး ဒူအီ လေး ဟာဝ်။ 15 ခဲညှာ ဆိန့်ဝး မဲ လုဝ် ဟာဝ် နှဝ့် အန် ဒေါ ဟာဝ် အန် ဝိန် ဒီ လဲ ကာတတ် ဘာင် အိုမ်။ တဲး မဲ နှဝ့် အန် ကာတတ် ဘ့လဲင် အိုမ် နီလာ တွိုန်။ တဲး မဲ ဝီ ဂူင့် န့ကြွုန် အီ ဒွိုမ် ဘဲန် မာဟန့် တွိုန်။ 16 မဲ ဟီ ယိုဝ် ခုန်ဒီခမ်၊ မဲ လုဝ် တဝ်း ဒီ အန်၊ ‘ဇဝ်ဖြာ ပီ ကြိုပ် ဂေ ဒူအီ ဟဲဘြဲ၊ အန် ဟဲ့ စ်ု အုဝ် တး ဇမ် ဒူင် ကွယ် မဲ။ အန် စ်ု အုဝ် ကာလာင် ဒီ မဲ၊ “တဲး မဲ တဲး ဂေ ဒူအီ အာမျုဝ် အုဝ် ဟာဝ်၊ တဲး မဲ တဲး ဂေ ဟာဝ် လှူ ဒီ အုဝ် ခဲင် ပြဲ ငွင့်။” ကော ဇမ် အာတိုဝ် မဲ ယီ တူ ထူမ် ပီ တဝ်း အုဝ် ဒီ မဲ။ 17 ဒေါ တီ နီ ဇဝ်ဖြာ ဝီ တဝ်း၊ အန် ဒီ တဲး မဲ နပ်၊ အန် မုး အန် ဇဝ်။ အန် ဇဝ် တဝ်း၊ အုဝ် ဒီ မး အိုမ် ခဲင် ဘ့လဲင် အိုမ် တီ၊ တာ န့ကြွုန် နီ။ အိုမ် ဒီ ဘျွင် ဘဲန် နှာမ် အူ ဇေန့်။ 18 ပန် တီ ဂေ မာဂါ အီ ကွယ် ခဲင် အိုမ်၊ ဂေ ဒီ ယမ်။ အိုမ် န့ ဒီ ဘော အုး ခဲဝ်၊ ကွဲ့ တဲး ဂေ ဒူအီ အဲဂိုပ် ပွိုန် ဒီ ဒျီင်။’”

19 ပန် တီ ဇဝ်ဖြာ စ်ု အာမုဝ်ဆဲ ကာလာင် ဒီ အာရူန်၊ တဲး အန် တဝ်း၊ “ဒိုဝ်း န့ကြွုန် မဲ၊ စုဝ့် ဆူင့် နာ ဒဲင် အိုမ် ဒွန် ပ့လုဝ့် အီ မိုဝ်း ခဲင် မိူင် အဲဂိုပ်။ ဘော မုး အိုမ် ခဲင် ဘ့လဲင်၊ အိုမ် ခဲင် ရူင်၊ အိုမ် ဒိုင် ဘော အိုမ် ကင် ဒွန် မျုဝ်၊ တဲး မဲ စုဝ့် န့ကြွုန် မဲ နာ ဒဲင်။ ဟဲ့ ဟွတ့်၊ အိုမ် ဒီ ဘျွင် ဘဲန် နှာမ် အူ ဇေန့်။ ပါယ် တီ န့ ဒီ မိုဝ်း နှာမ် ခဲင် မိူင် အဲဂိုပ် ဘော မိူင်။ န့ ဒီ ဘော ကွယ် ခဲင် န့တိန့် ဘော ခဲင် ကာလုဝ့် ကာဒါယ် ဘေ။”

20 အာမုဝ်ဆဲ ဂါယ် အာရူန် မိူဝ် ဘူင် ပီ ကာလာင် ဇဝ်ဖြာ ဒီ ဂါယ်။ အာရူန် ဝီ စုဝ့် န့ကြွုန် အန် တဲး ဘော ခုန်ဒီခမ် ဖာရုဝ် ဘော ဂေ အာမူ အာမာတ် အန် ပွိုန် ဒီ ယိုဝ်။ အန် ဘော မး အိုမ် ခဲင် ဘ့လဲင် အိုမ် နီလာ တွိုန်။ ပန် တီ အိုမ် ဝီ ဘျွင် ဘဲန် နှာမ် အူ ဇေန့်။ 21 မာဂါ အီ ကွယ် ခဲင် အိုမ် တွိုန်၊ ဂေ ဘော ယမ် တူတ့်။ အိုမ် ခဲင် ဘ့လဲင် အိုမ် နီလာ မိူဝ် အုး ခဝဲ ကာဆဝ်၊ ကွဲ့ ဟူ တဲး ဒူအီ ပွိုန် ဒီ ဒျီင်။ နှာမ် ဘော မိုဝ်း ဒွန် နာ ဒွန် ပ့လုဝ့် ခဲင် မိူင် အဲဂိုပ်။

22 ဂေ ဒူအီ အီ နပ် ဒီ ဘူင် မျလှယ့် ခဲင် မိူင် အဲဂိုပ် ဝီ ဂါဝ် ပွုန် ကာနမ် ပီ ဘိုင် ဂေ၊ ဝီ ညိုင် ဒီ ဘူင် နှာမ်။ ခုန်ဒီခမ် ဖာရုဝ် ယီ တူ ဘျွင် နဝ်း အန်။ အန် တူ ဝီ ထူမ် ဂြုဝ်း အာမုဝ်ဆဲ ဂါယ် အာရူန်၊ တဲး န့ ဘဲန် တူတ့် ဒွန် မျုဝ် ပီ ဒွိုမ် ကာလာင် ဇဝ်ဖြာ။ 23 အန် ဝီ ဝေန့် ခဲင် ဟုဝ် အန်၊ ကွဲ့ တဲး န့ လိုပ် ခဲင် နဝ်း အန်။ အန် ဘော ဘ့လေး နဝ်း အန်၊ ကွဲ့ တဲး အန် ထူမ် ဒေါ မှဝ်။ 24 ဂေ ဒူအီ အဲဂိုပ် ဒွန် အီ ယီ ဟာဝ် ဂိုဝ်း ဒီဂ့လုဝ့် ခူပ် ဘ့လဲင် အိုမ်၊ တဲး အိုမ် လေး ကူပ် တူ ပွိုန် ဂေ ဒီ ဒျီင် အိုမ် ခဲင် ဘ့လဲင် အိုမ် တွိုန်။

25 န့ ကော နုဝ့် ဘူ ဆီငဲ ဇဝ်ဖြာ ဟဲ့ တဲး ဂေ ကာဒုး ဒုက် တီ။