1 ဒေါ အန် တီ ဇဝ်ဖြာ ဘော တိုယ် အာမုဝ်ဆဲ ဟာဝ် ဇမ် ဒူင် ကွယ် ခုန်ဒီခမ် ဖာရုဝ်၊ တဲး အန် တဝ်း ဒီ အန်၊ “ဇဝ်ဖြာ တဝ်း၊ ‘တဲး မဲ ခ့ဝါင် ဒူအီ အီဆာရေလ၊ တဲး ဂေ လေး ဟာဝ် လှူ ဒီ အုဝ်။ 2 ဆေ မဲ တူ တဲး ဂေ လေး ဟာဝ်၊ အုဝ် ဒီ တဲး မဲ ကာဒုး ဒုက် တာင်။ အုဝ် ဒီ တဲး မာရုဝ့် ဂေ ကိူန် တး ဇမ် ခဲင် မိူင်၊ တဲး ဂေ ကော နုဝ့် ခဲင် မိူင် ဘော မိူင်။ 3 ခဲင် ဘ့လဲင် အိုမ် နီလာ တွိုန်၊ မာရုဝ့် ဒီ ဘော နုဝ့် နာ ခဲင်။ ဂေ ဒီ ဘော လေး ခဲင် အိုမ် တွိုန်၊ ဟာဝ် ဟုဝ့် လိုပ် ခဲင် ကာင် မဲ၊ ဟာဝ် လိုပ် ခဲင် န့အိတ် မဲ။ ဂေ ဒီ ဘော ကွယ် ဒီ ကာစှူင့် အိတ် မဲ။ မာရုဝ့် ဂေ တီ၊ ဂေ ဒီ ဘော လိုပ် ခဲင် ကာင် အာမူ အာမာတ် မဲ ဘော ခဲင် ကာင် ဒူအီ ဒွန် အီ အီ ကွယ် ခဲင် မိူင် မဲ။ ဂေ ဒီ ဘော နပ် ဒီ ဟာဝ် လိုပ် ခဲင် ကာဝှါင် ဘော ခဲင် မ့ပါန် ပီ တာ ဘေ ဘူင် ပီ ဒီ ဟူမ် ဘေ။ 4 ဂေ ဒီ ဘော ဒန့် ဟုဝ့် ဒီ ဒုဝ် ဘူင့် မဲ ဘော ဒီ ဒုဝ် ဘူင့် ဂေ အာမူ အာမာတ် မဲ၊ ဘော ဒီ ဂေ ဒူအီ ဒွန် အီ အီ မုး ဒူအီ အာမျုဝ် မဲ။’”

5 ဟဲ့ ဟွတ့် ကာလာင်၊ ဇဝ်ဖြာ စ်ု အာမုဝ်ဆဲ တဲး အန် ကာလာင် ဒီ အာရူန်၊ “တဲး မဲ ဒိုဝ်း န့ကြွုန် မဲ၊ စုဝ့် နာ ဒဲင် အိုမ် ခဲင် မိူင် အဲဂိုပ်။ ဘော အိုမ် ခဲင် ဘ့လဲင်၊ အိုမ် ခဲင် ရူင် ဘော အိုမ် ဒိုင် ဒွန် မျုဝ်၊ တဲး မဲ စုဝ့် ဒဲ မဲ။ မာရုဝ့် ဒီ ဘော လေး ခဲင် အိုမ်၊ ဟာဝ် လိုပ် ဒွန် ပ့လုဝ့် ခဲင် မိူင် အဲဂိုပ်။”

6 အာရူန် မိူဝ် ဘူင် ပါယ် တီ။ ဟဲ့ ဟွတ့်၊ မာရုဝ့် ဘော လေး ခဲင် အိုမ်၊ ဟာဝ် ဒွန် ပ့လုဝ့်၊ တဲး ကော နုဝ့် ခဲင် မိူင် အဲဂိုပ် ဘော မိူင်။ 7 ဂေ ဒူအီ အီ နပ် ဒီ ဘူင် မျလှယ့် ခဲင် မိူင် အဲဂိုပ်၊ ဂေ ယီ ဂါဝ် ပွုန် ပီ ဘိုင် ဂေ၊ ညိုင် ပီ ပါယ် အာရူန် ဒီ ဘူင်၊ တဲး မာရုဝ့် လေး ခဲင် အိုမ်။

8 ပန် တီ ခုန်ဒီခမ် ဖာရုဝ် ဒဲ့ အာမုဝ်ဆဲ ဂါယ် အာရူန်၊ တဲး ဂါယ် တး ဇမ် ဒူင် ကွယ် အန်။ အန် မိူဝ် တဝ်း၊ “တဲး ဘာယ် ဆာခိုဝ် ဒီ ဇဝ်ဖြာ။ မှာန့်၊ တဲး အန် ဒိုဝ်း ဝဲန် မာရုဝ့် နီ ခဲင် ဒူင် ကွယ် အုဝ်။ ဟဲ့ ဟွတ့်၊ အုဝ် ဒီ တဲး ဒူအီ အာမျုဝ် ဘာယ် လေး ဟာဝ်၊ တဲး ဘေ ပွိုန် ဒီ လှူ ဒီ ဇဝ်ဖြာ ပီ ကြိုပ် ဘေ။”

9 အာမုဝ်ဆဲ ဝီ တဝ်း၊ “အုဝ် ဘော ရုဝ်ဆေ မဲ၊ တဲး မဲ ပွိုန် ကာလာင် ဒီ အုဝ်၊ ဒေါ မှဝ် အုဝ် ဒီ လုဝ် ဆာခိုဝ် ဒါင် မဲ ဘော ဆာခိုဝ် ဒါင် ဂေ အာမူ အာမာတ် မဲ၊ ဘော ဒါင် ဂေ ဒူအီ ခဲင် မိူင် မဲ၊ ကွဲ့ ဟူ တဲး န့ မိုဝ်း မာရုဝ့် ခဲင် ကာင် ဘော ခဲင် မိူင်၊ တဲး န့ မိုဝ်း မီ မာရုဝ့် အီ ကွယ် ခဲင် အိုမ် ဘ့လဲင် နီလာ။ ဆေ မဲ ဘော တဝ်း အာခြာဝ် အန်၊ အုဝ် ဒီ ဘော ဆာခိုဝ် ဒေါ အန် တီ။”

10 “တဲး မဲ ဆာခိုဝ် ခဲညှာ၊” ခုန်ဒီခမ် ဖာရုဝ် ဝီ တဝ်း။ အာမုဝ်ဆဲ တဝ်း၊ “အုဝ် ဒီ ဘူင် ပီ တဝ်း မဲ တီ၊ တဲး မဲ နပ်၊ အာဝ် မိုဝ်း ဇဝ်ဖြာ ပေါ ကာဒင် အီ ပီ ဇဝ်ဖြာ ပီ ကြိုပ် ယေ နီ။ 11 ဂေ မာရုဝ့် ဒီ ဟြာယ် ဒီ ဒုဝ် မဲ။ ဂေ ဒီ ဘော ဟြာယ် ခဲင် ကာင် မဲ ဘော ခဲင် ကာင် ဂေ အာမူ အာမာတ် မဲ၊ ဘော ခဲင် ကာင် ဂေ ဒူအီ ခဲင် မိူင် မဲ။ န့ ဒီ ဂိတ် မီ မာရုဝ့် အီ ကွယ် ခဲင် ဘ့လဲင် အိုမ် နီလာ တွိုန်။”

12 အာမုဝ်ဆဲ ဂါယ် အာရူန် ဟဲ့ ဟွတ့် လေး ဒူင် ကွယ် ခုန်ဒီခမ် ဖာရုဝ် တွိုန်၊ အာမုဝ်ဆဲ ဝီ ဆာခိုဝ် ဒီ ဇဝ်ဖြာ၊ မှာန့်၊ တဲး အန် ဒိုဝ်း ဝဲန် မာရုဝ့် ပီ ဘ့လေး အန်၊ အီ ဘဲန် ဒုက် ဒီ ခုန်ဒီခမ် ဖာရုဝ် တွိုန်။ 13 ပန် တီ ဇဝ်ဖြာ မိူဝ် ထူမ် ပီ မှာန့် အန်။ မာရုဝ့် တွိုန် ဘော ယမ် တူတ့်၊ ဂေ အီ ကွယ် ခဲင် မိူင် ဘော ခဲင် ကာင် ဘော ခဲင် မာန် ဒွန် ပ့လုဝ့်။ 14 ဂေ ဒူအီ အဲဂိုပ် ဝီ ဂ့ဝါ ကာဇု မာရုဝ့်၊ ဘဲန် မ့ပိုမ် ဘဲန် မ့ပိုမ်။ ခဲင် မိူင် ဘော မိူင် န့ အုး အမ် ကူပ် ယမ် မာရုဝ့်။ 15 န့ ယီ မုး ခုန်ဒီခမ် ဖာရုဝ် တွိုန်၊ ဒေါ ယိုဝ် အန် လွင် ဒုက် မာရုဝ့် တွိုန် အာဝ် ဟူ မိုဝ်း၊ အန် တူ ဝီ ဘျွင် နဝ်း အန်။ အန် ဝီ ကွယ် ပီ ဘြိမ်။ အန် တူ ဝီ ထူမ် ဂြုဝ်း ဇဝ်ဖြာ၊ တူ ဝီ ဘူင် ပီ တဝ်း အန် ဒီ အာမုဝ်ဆဲ ဂါယ် အာရူန် တွိုန်။ ပါယ် တီ န့ ဘဲန် တူတ့် ဒွန် မျုဝ် ပီ ဒွိုမ် ကာလာင် ဇဝ်ဖြာ ဒီ အာမုဝ်ဆဲ ဂါယ် အာရူန်။

16 ဝါယ် အန် တီ ဇဝ်ဖြာ ဝီ တဝ်း ဒီ အာမုဝ်ဆဲ၊ “တဲး အာရူန် ဒိုဝ်း န့ကြွုန် အန်၊ မး ကာပုး အီ ကွယ် ဒဲင် ကာဒါယ်။ ဝါယ် အန် တီ ကာပုး ခဲင် မိူင် အဲဂိုပ် ဒီ ဘဲန် မာကာမုတ် အီ ကဝ့် အီ။” 17 ပန် တီ အာရူန် မိူဝ် မး ကာပုး တာ န့ကြွုန် အန်။ ဟဲ့ ဟွတ့်၊ ကာပုး ခဲင် မိူင် အဲဂိုပ် ဘော မိူင် ဝီ ဘဲန် မာကာမုတ် အီ ဝီ တး ကဝ့် ဘော ဒူအီ ဘော ဒုဝ် ဆတ်ဒါဝါ ဘောကာဂ့လျီတ်။ ဂေ ဝီ ကွယ် ဒွန် နာ ဒွန် ပ့လုဝ့်။ 18 ဂေ ဒူအီ အီ နပ် ဒီ ဘူင် မျလှယ့်၊ ဂေ ဝီ တဝ်း ဒီ ဂါဝ် ပွုန် ကာနမ် ပီ ဘိုင် ဂေ၊ တဲး ဂေ ဝီ ဘူင် ဘဲန် မာကာမုတ်။ ဂေ ယီ တူ ပဲ ဒီ ဘူင်။

19 ဂေ ဝီ တဝ်း ဒီ ခုန်ဒီခမ် ဖာရုဝ်၊ “ဇိုဝ် တီ ဟဲ့ မုး ပွုန် ဇဝ်ဖြာ။” ဂေ ပီ ဘော ကာလာင် ပါယ် တီ န့ ယီ တူ လိုပ် ခဲင် နဝ်း ခုန်ဒီခမ် ဖာရုဝ်၊ တူ တဲး အန် ဘျွင် နဝ်း။ န့ တူ တဲး အန် ထူမ် ဘူင် ပီ တဝ်း အာမုဝ်ဆဲ ဂါယ် အာရူန် တွိုန်။ န့ ဘဲန် တူတ့် ပီ ဒွိုမ် ကာလာင် ဇဝ်ဖြာ လွင် အန် တီ။

20 ဟဲ့ ဟွတ့် ပန် တီ ဇဝ်ဖြာ ဝီ တဝ်း ဒီ အာမုဝ်ဆဲ၊ “ဆိန့်ဝး တဲး မဲ စေဝ် ယိတ့် ဟာဝ် ကာတုန့် ခုန်ဒီခမ် ဖာရုဝ် ဒေါ ဟာဝ် အန် ဇမ် ဒီ ခူပ် ဘ့လဲင် အိုမ်။ တဲး မဲ တဝ်း ဒီ အန်၊ ‘ဇဝ်ဖြာ တဝ်း ဒီ မဲ၊ မဲ လုဝ် ခ့ဝါင် ဒူအီ အာမျုဝ် ပီ အိုပ် အန်၊ တဲး ဂေ ဟာဝ် လေး ခဲင် မိူင် မဲ၊ တဲး ဂေ ပွိုန် ဒီ ကြိုပ် အန် ဇဝ်။ 21 ဆေ မဲ ယီ တူ တဲး ဂေ ဟာဝ်၊ အန် ဒီ တဲး မာရွယ် ကိူန် တး ရူပ် ဘေ။ ဂေ ဒီ တး ကာဒိုမ် နုဝ့် ဘော ဒုဝ် မဲ၊ ဘော ဒုဝ် ဂေ အာမူ အာမာတ် မဲ၊ ဘော ဒုဝ် ဂေ ဒူအီ ဘောကာဂ့လျီတ် ခဲင် မိူင် မဲ။ မာရွယ် တီ၊ ဂေ ဒီ ဘော နုဝ့် ခဲင် ကာင် ဘေ ဒွန် ပ့လုဝ့်။ ဘော ကာဒါယ် ဒူင် ကွယ် ဘေ၊ မာရွယ် ဒီ ဘော နုဝ့်။

22 ဆီငဲ ပီ ဘူင် အန် ပါယ် တီ အန် ယီ တူ တဲး မိူင် ဂုဝ်ဆေန် ပီ ဒွန် ပ့လုဝ့်။ န့ မုး ဒူင် ကွယ် ဒူအီ အာမျုဝ် ပီ အိုပ် အန်။ ခုဝ်၊ အန် တူ တဲး မာရွယ် လိုပ်။ ပါယ် တီ ဘေ ဒီ ဘော နပ်၊ န့ မုး ဇဝ်ဖြာ၊ အီ ကွယ် ခဲင် မိူင် ဘေ။ 23 အန် ဒီ ကာယဝ်း ဒူအီ အာမျုဝ် အန် ဘော ဒူအီ အာမျုဝ် မဲ၊ ကွဲ့ တဲး ဂေ လုဝ် ခမ် ဒုက် အူ မျုဝ်။ ခဲညှာ အန် ဒီ ဘူင် နာ မွှိုမ် အာမ် ပါယ် တီ တဲး ဘေ ဘော နပ် ခဲ့ တာင် ပွုန် အန်။’”

24 ဇဝ်ဖြာ ဟဲ့ ဟွတ့် ကာလာင် ပါယ် တီ အန် မိူဝ် ဘူင် ပီ တဝ်း အန်။ မာရွယ် တွိုန် တး ဘဲန် ဖိုင် ဘဲန် ဖိုင်။ ဂေ တး ကာဒိုမ် ကာင် ခုန်ဒီခမ် ဖာရုဝ် ဘော ကာင် ဂေ အာမူ အာမာတ် အန်။ မာရွယ် ဂေ တီ၊ ဂေ ဘူင် တဲး န့ လိုဝ် တူတ့် ဒွန် မျုဝ် ခဲင် မိူင် ဘော မိူင်။ 25 ဒေါ အန် တီ ခုန်ဒီခမ် ဖာရုဝ် ဒဲ့ အာမုဝ်ဆဲ ဂါယ် အာရူန် တး ဇမ် ဒူင် ကွယ် အန်။ အန် တဝ်း ဒီ ဂါယ်၊ “တဲး ဘေ ဒွန် အီ ဟာဝ် လှူ ဒီ ဇဝ်ဖြာ ပီ ကြိုပ် ဘေ၊ တဲး ဘေ ယီ လှူ ဒီ အန် ခဲင် မိူင် ဒူင် ကွယ် ဘေ တီ။”

26 အာမုဝ်ဆဲ ဝီ တဝ်း၊ “ယေ တူ ပွိုန် ဘူင် ပါယ် တီ။ ပီ ပါယ် ယေ ဒီ ကြိုပ်၊ ဒုဝ် ဆတ်ဒါဝါ ပီ ဒီ လုဝ် လှူ ယေ ဒီ ဇဝ်ဖြာ၊ ဂေ ဒူအီ အဲဂိုပ် တူ အိုင်။ ဆေ ဂေ ယိုဝ် ပီ လှူ ယေ၊ ဂေ ယီ ထာင် အာဝ် မွှိုမ်။ ယုဝ် ဂေ ဒီ ဘော ဒိုဝ်း မာဝ်၊ ဝိုန့် ယေ၊ ငဝ်း ယမ် အာဆာက် ယေ။ 27 ယေ လုဝ် ဟာဝ် ဒူပ် န့တေန့် အာဒါ အူယ် ဆီငဲ၊ တဲး ယေ ဟာဝ် ဇမ် အူ ပ့လုဝ့် ခဲင် ပြဲ ငွင့်။ ဟဲ့ ဟွတ့်၊ ယေ လုဝ် လှူ ဒီ ဇဝ်ဖြာ ပီ ကြိုပ် ယေ၊ တဲး န့ ပီ ပဲ့ ဟဲ့ ဒမ် ဇဝ်ဖြာ ယေ ဘူင်။”

28 ပန် တီ ခုန်ဒီခမ် ဖာရုဝ် ဝီ တဝ်း၊ “အုဝ် ဒီ တဲး ဘေ ဟာဝ် ခဲင် ပြဲ ငွင့် တီ၊ တဲး ဘေ လှူ ဒီ ဇဝ်ဖြာ ပီ ကြိုပ် ဘေ။ အုဝ် ယီ တူ တဲး ဘေ ဟာဝ် တူင့်။ ဒေါ တီ နီ၊ အုဝ် ယီ မှာန့်၊ တဲး မဲ ဆာခိုဝ် ဒါင် အုဝ်။”

29 အာမုဝ်ဆဲ ဝီ တဝ်း၊ “အုဝ် ဟီ ဟွတ့် လေး ခဲင် ဒူင် ကွယ် မဲ နီ၊ အုဝ် ဒီ ဆာခိုဝ် ဒါင် မဲ အူ ဇေန့်။ ခဲ့ ကိူန် မာရွယ် ဒေါ တီ နီ၊ ခဲညှာ ဂေ ဒီ ဘော ဟြာယ်၊ ကွဲ့ ဟူ တဲး ဂေ မိုဝ်း ဒူင် ကွယ် မဲ၊ ဘော ဒူင် ကွယ် ဂေ အာမူ အာမာတ် မဲ၊ ဘော ဒူင် ကွယ် ဂေ ဒူအီ ကိူန်။ မဲ ယီ လုဝ် ဆာဒိက်၊ ကွဲ့ တဲး မဲ ဝီ ကာလုဝ် ယေ၊ ကွဲ့ ဟူ တဲး မဲ ဘျွင် နဝ်း၊ တူ ဝီ ခ့ဝါင် ယေ ဟာဝ် လှူ ဒီ ဇဝ်ဖြာ။”

30 ပန် တီ အာမုဝ်ဆဲ လေး ဒူင် ကွယ် ခုန်ဒီခမ် ဖာရုဝ်၊ ဝီ ဆာခိုဝ် မှာန့် ဒီ ဇဝ်ဖြာ။ 31 ဇဝ်ဖြာ မိူဝ် ထူမ် ပီ ဆာခိုဝ် အန်။ မာရွယ် တွိုန် ဘော ဟြာယ် ဒူင် ကွယ် ခုန်ဒီခမ် ဖာရုဝ် ဘော ဒူင် ကွယ် ဂေ အာမူ အာမာတ် အန် ဘော ဒူင် ကွယ် ဂေ ဒူအီ ကိူန်။ ခဲ့ ကိူန် ဂေ အာတ့် ဆာခိုဝ် အန်၊ အူ ဒုဝ် မိူဝ် အာဝ် ဟူ ဝီ မိုဝ်း။ 32 ပေါ အူ ဇေန့် ခုန်ဒီခမ် ဖာရုဝ် တွိုန် ဘ့လေး နဝ်း အန် ပီ ခါ အာတ့်။ အန် တူ ဝီ ခ့ဝါင် ဂေ ဒူအီ အီဆာရေလ လေး ဟာဝ်။