1 ပန် တီ ဇဝ်ဖြာ ဝီ တဝ်း ဒီ အာမုဝ်ဆဲ၊ “တဲး မဲ ဝီ ဟာဝ် ဇမ် ဒူင် ကွယ် ခုန်ဒီခမ် ဖာရုဝ်၊ ကာလာင် ဒီ အန် လွင် မုး အုဝ် ဇဝ်ဖြာ ပီ ကြိုပ် ဂေ ဒူအီ ဟဲဘြဲ။” အုဝ် တဝ်း ဒီ အန်၊ “မဲ လုဝ် တဲး ဂေ လေး ဟာဝ်၊ တဲး ဂေ လှူ ဒီ အုဝ်။ 2 ဆေ မဲ ဘူင် ဟာဝ် ပီ ဘူင် မဲ၊ ဆေ မဲ တူ ဝီ ခ့ဝါင် ဂေ ဟာဝ်၊ 3 အုဝ် ဒီ တဲး ဒုဝ် ဆတ်ဒါဝါ မဲ မိုဝ်း ဆဝ် ကာဆဝ်။ ဂေ ဒုဝ် ဆတ်ဒါဝါ မဲ၊ အီ ကွယ် ခဲင် နာ၊ ဂေ မင်ပြွင့်၊ မာလုဝ်၊ မင်ပြွင့် ကာဟာတ့်၊ မာမက်၊ မာဘူ ဘော မာပဲ၊ ဂေ ဘောကာဂ့လျီတ် ဒီ ဆဝ် ကာဆဝ်။ 4 အုဝ် ယီ ဒီ ကာယဝ်း ဂေ ဒုဝ် ဆတ်ဒါဝါ ဒူအီ အီဆာရေလ၊ ကွဲ့ တဲး ဂေ ကာဒုး ဒုက် ပီ ကာဒုး ဂေ ဒုဝ် ဆတ်ဒါဝါ ခဲင် မိူင် အဲဂိုပ်။ ဒုဝ် ဆတ်ဒါဝါ ပီ ဟျီင် ဒူအီ အီဆာရေလ၊ အာဒါ အူ ဒုဝ် မိူဝ် တူ လုဝ် ယမ်။” 5 ပန် တီ ဇဝ်ဖြာ ဝီ တဝ်း အာခြာဝ် ဒီ ဘူင် အန် ပါယ် နီ။ အန် တဝ်း၊ “ခဲညှာ အုဝ် ဒီ ဘူင် တူတ့် ဒွန် မျုဝ် ပီ ကာလာင် အုဝ် ဇိုဝ် တီ။”

6 ပါ ခဲညှာ ဇဝ်ဖြာ မိူဝ် ဘူင် ပီ တဝ်း အန် တီ။ ဂေ ဒုဝ် ဆတ်ဒါဝါ ပီ ဟျီင် ဂေ ဒူအီ အဲဂိုပ်၊ ဂေ ဘော ယမ် တူတ့် ဒွန် မျုဝ်။ ဒုဝ် ဆတ်ဒါဝါ ဒူအီ အီဆာရေလ ယီ ကွယ် ဒါခိုယ်။ အာဒါ အူ ဒုဝ် မိူဝ် တူ ယမ်။ 7 ခုန်ဒီခမ် ဖာရုဝ် ယီ တိုယ် ဒူအီ မင် အီ၊ တဲး ဂေ လေး ဟာဝ် ယွတ် ဒုဝ် ဆတ်ဒါဝါ ပီ ဟျီင် ဂေ ဒူအီ အီဆာရေလ။ အန် ဘော နပ်၊ အူ ဒုဝ် မိူဝ် အာဝ် ယမ်။ အန် ဟဲ့ ဟွတ့် နပ် လွင် အန် တီ၊ န့ ယီ တူ တဲး အန် ဘျွင် နဝ်း အန်။ အန် ညှမ် တဲး ဂေ ဒူအီ အီဆာရေလ လေး ဟာဝ် ခဲင် မိူင် အန်။

8 ဝါယ် အန် တီ ဇဝ်ဖြာ ဝီ တဝ်း ဒီ အာမုဝ်ဆဲ ဂါယ် အာရူန်၊ “တဲး ဘာယ် ကာတူမ် ဘြဝ် ငဝ် ခဲင် ကာဝှါင်၊ ဟာဝ် ဇမ် ဒူင် ကွယ် ခုန်ဒီခမ် ဖာရုဝ်၊ တဲး အာမုဝ်ဆဲ ဝီ ဘြတ် ဘြဝ် ငဝ် တီ ဒီ အာတ့် အန်။ 9 န့ ဒီ ဝီ ဘဲန် ကာပုး ကွယ် ဒွန် ပ့လုဝ့် ခဲင် မိူင် အဲဂိုပ်။ န့ ဒီ တဲး ဘော ဂေ ဒူအီ ဘော ဂေ ဒုဝ် ဆတ်ဒါဝါ ခဲင် မိူင် ဘော မိူင် ဘဲန် ဘိုပ် အီ လေး ကာတိုမ် အန် ဘော ဘဲန် ကာဒွါ့၊ ဘဲန် ဒိမ်။”

10 ပန် တီ ဂါယ် ဝီ ဒိုဝ်း ဘြဝ် ငဝ် ခဲင် ကာဝှါင်၊ ဟာဝ် ဇမ် ဒီ အာတ့် ခုန်ဒီခမ် ဖာရုဝ်။ အာမုဝ်ဆဲ ဘော ဘြတ် ဘြဝ် ငဝ်။ ဟဲ့ ဟွတ့်၊ ဂေ ဒူအီ အဲဂိုပ် ဘော ဒုဝ် ဆတ်ဒါဝါ ဂေ၊ ဂေ ဘောကာဂ့လျီတ် ဟဲ့ ဘဲန် ဘိုပ် ဂေ ကာဒွါ့၊ ဘဲန် ဒိမ် ဒီ ဒုဝ် ဘူင့် ဂေ။ 11 ဂေ ဒူအီ အီ ဘူင် မျလှယ့် ခဲင် မိူင် အဲဂိုပ်၊ ဂေ ယီ တူ ပွိုန် တး ဇမ် ဒူင် ကွယ် အာမုဝ်ဆဲ ကူပ် ဘိုပ် အီ ကာဒွါ့ ဒီ ဒုဝ် ဘူင့် ဂေ။ ဘော ဂေ ဒူအီ အီ ဘူင် မျလှယ့် ဘော ဂေ ဒူအီ အဲဂိုပ်၊ ဂေ ဘောကာဂ့လျီတ် လုဝ် ခမ် ဒုက် ဇိုဝ် တီ။ 12 ဇဝ်ဖြာ ယီ တဲး ခုန်ဒီခမ် ဖာရုဝ် ဘ့လေး နဝ်း အန် ပီ ခါ အာတ့်၊ ကွဲ့ တဲး အန် ထူမ် ဂြုဝ်း ပီ ကာလာင် အာမုဝ်ဆဲ ဂါယ် အာရူန် ဒေါ မှဝ်။ န့ ဘဲန် တူတ့် ပီ ဒွိုမ် ကာလာင် ဇဝ်ဖြာ ဒီ အာမုဝ်ဆဲ။

13 ဝါယ် အန် တီ ဇဝ်ဖြာ ဝီ စ်ု အာမုဝ်ဆဲ၊ တဲး အန် စေဝ် ယိတ့်၊ ဟာဝ် ဇမ် ဒူင် ကွယ် ခုန်ဒီခမ် ဖာရုဝ်၊ တဲး အန် ဝီ ကာလာင် ဒီ ဖာရုဝ် တဝ်း၊ “ဇဝ်ဖြာ ပီ ကြိုပ် ဂေ ဒူအီ ဟဲဘြဲ ဟဲ့ တဝ်း၊ ‘မဲ လုဝ် တဲး ဒူအီ အာမျုဝ် အုဝ် ဟာဝ်၊ တဲး ဂေ ပွိုန် ဒီ ကြိုပ် အုဝ်။’ 14 ဆေ မဲ တူ တဲး ဂေ ဟာဝ် ခါ နီ၊ အုဝ် ဒီ ဝီ တဲး ဘေ ကာဒုး ဒုက် တာင်။ ဘော မဲ ဘော ဂေ အာမူ အာမာတ် မဲ ဘော ဂေ ဒူအီ ကိူန် ခဲင် မိူင် မဲ၊ ဘေ ဘောကာဂ့လျီတ်၊ ဘေ ဒီ ဘော နပ် ဆီချာ၊ အာဝ် မိုဝ်း ဇဝ်ဖြာ အီ ပီ အုဝ် ဒဲင် ကာဒါယ် နီ။ 15 ဟဲ့ လှေန့်၊ မဲ တူ ထူမ် ဂြုဝ်း အုဝ်။ ခုဝ်၊ အုဝ် ဟဲ့ နပ် ဒီ ဘူင် တဲး မဲ ခမ် ဒုက် တာင်။ ဘော မဲ ဘော ဂေ ဒူအီ ကိူန် ပီ အိုပ် မဲ၊ အုဝ် ဟဲ့ ပွိုန် ဘူင် တဲး ဘေ ဟြာယ်၊ ကွဲ့ တဲး ဘေ မိုဝ်း အာဆာက်။ မာလဲ၊ အုဝ် ညှမ် ဘူင် ပါယ် တီ။ 16 ကော ဇမ် အာတိုဝ် န့ ယီ မုး အုဝ်၊ အုဝ် ဟဲ့ တဲး မဲ ဆီ ကွယ်၊ တဲး အုဝ် ပွိုန် ဒီ ဘျ ပွုန် အုဝ် ဒီ မဲ။ ပါယ် တီ ဂေ ဒူအီ အီ ကွယ် ဒဲင် ကာဒါယ် ဒွန် နာ ဒွန် ပ့လုဝ့်၊ ဂေ ဒီ ဘော နပ် လွင် အုဝ်။ 17 မဲ ယီ ဆီ မိုဝ်း နဝ်း ဘြိမ် မဲ။ မဲ တူ ဆီ တဲး ဂေ ဒူအီ အာမျုဝ် အုဝ် လေး ခဲင် မိူင်။ 18 ခုဝ်၊ ခဲညှာ အာခြာဝ် နီ အုဝ် ဒီ တဲး ဘျြီ စုဝ်း ဒီ မိူင် အဲဂိုပ် နီ။ အူ ဆိန့် ဒေါ ဂုဝ် အန် ကော ဇမ် ဒေါ တီ နီ၊ န့ တူ ဒွိုမ် မိုဝ်း ဘျြီ တာင် ခဲ့ တီ အီ စုဝ်း ခဲင် မိူင် အဲဂိုပ်။ 19 ဒေါ တီ နီ၊ တဲး မဲ စ်ု ဒူအီ ဆုတ့် ဒုဝ် ဆတ်ဒါဝါ ပီ ဟျီင် ဂေ၊ တဲး ဂေ လိုပ် ကွယ် နာ ခဲင် ကာပိုမ်၊ တဲး ဂေ လိုပ် ကွယ် နာ ခြိုမ် ယာပ် ထိုပ်။ ဆေ မဲ တူ ဘူင် ပါယ် တီ ဘျြီ ဒီ စုဝ်း ဒဲင် ဒူအီ အီ ကွယ် နာ ရေတ့်၊ တဲး ဂေ ယမ် ဒွန် အီ။ ဘော ဂေ ဒုဝ် ဆတ်ဒါဝါ အီ ဆီ ကွယ် နာ ရေတ့် ဒီ ယမ် ဘောကာဂ့လျီတ်။”

20 ပန် တီ ဂေ အာမူ အာမာတ် ခုန်ဒီခမ် ဂေ အီ ယုဝ် ဂြုဝ်း ဇဝ်ဖြာ၊ ဂေ ပီခြန် ဂေ တဲး ဂေ ဟြေတ့် ကာဇု ဘော မှာယ် ဂေ ဘော ဒုဝ် ဆတ်ဒါဝါ ဂေ၊ တဲး ဂေ လိုပ် ကွယ် နာ ခဲင်၊ နာ ခြိုမ် ယာပ် ထိုပ်။ 21 ဂေ ဒူအီ၊ အီ တူ ဆီ ထူမ် ဂြုဝ်း ဇဝ်ဖြာ၊ ဂေ ဝီ တဲး ဘော ဒူအီ ဘော ဒုဝ် ဆတ်ဒါဝါ ကွယ် နာ ရေတ့်။

22 ပန် တီ ဇဝ်ဖြာ ဝီ တဝ်း ဒီ အာမုဝ်ဆဲ၊ “တဲး မဲ စုဝ့် ဆူင့် ဒဲ မဲ နာ ဂါင်ဟြာဝ်၊ တဲး ဘျြီ ဘော စုဝ်း ခဲင် မိူင် အဲဂိုပ်၊ တဲး န့ ဒိုဝ် ဘော ဒူအီ ဘော ဒုဝ် ဆတ်ဒါဝါ၊ တဲး န့ ဘော ဒိုဝ် ဒွန် မျုဝ် ပီ ဆမ် ဒူအီ ခဲင် မာန် ခဲင် မိူင် ဂေ။” 23 ဇဝ်ဖြာ ဟဲ့ ဟွတ့် ကာလာင်၊ အာမုဝ်ဆဲ ဝီ စုဝ့် န့ကြွုန် အန် နာ ဂါင်ဟြာဝ်။ ဟဲ့ ဟွတ့်၊ ဇဝ်ဖြာ တဲး ဘျြီ စုဝ်း။ ဘော ပ့လ မ့ပ့လေတ့် ဘော ဟမ် ကာနမ် ဟဲ့ မိုဝ်း။ 24 ခဲင် မိူင် အဲဂိုပ် ဘော မိူင် ဘျြီ တာင် ဘော စုဝ်း။ ဘော ဘျြီ ဘော ပ့လ မ့ပ့လေတ့် ဟဲ့ ကိူန် ကာဆဝ်၊ ဘဲန် ခုန် တာင် တး။ အူ ဆိန့် ဒေါ ဂုဝ် အန်၊ ခဲင် မိူင် အဲဂိုပ် န့ တူ ဒွိုမ် မိုဝ်း ဘျြီ အီ စုဝ်း ပါယ် တီ။ 25 ဘျြီ တွိုန် စုဝ်း ခဲင် မိူင် အဲဂိုပ်၊ ဒိုဝ် ဒွန် အီ အီ ကွယ် နာ ရေတ့်။ ဘော ဒူအီ ဘော ဒုဝ် ဆတ်ဒါဝါ ဘော ဒွန် မျုဝ် ပီ ဆမ် ဒူအီ ခဲင် မာန် ခဲင် မိူင်၊ န့ စှိုမ် တူတ့် ဒွန် မျုဝ်။ ဘော ဟေ ဒွန် ကာဒင် အီ ကွယ် ခဲင် မာန် ခဲင် မိူင်၊ ဂေ ဟဲ့ ကာပျာတ့် လိုဝ် တူတ့်။ 26 ခဲင် မိူင် ဂုဝ်ဆေန် အီ မုး ဒူင် ကွယ် ဂေ ဒူအီ အီဆာရေလ၊ န့ ယီ ဒါခိုယ်။ ဘျြီ တူ စုဝ်း ခေါ အူ ဘူင့်။

27 ဝါယ် အန် တီ ခုန်ဒီခမ် ဖာရုဝ် တိုယ် ဒူအီ ဟာဝ် ဒဲ့ အာမုဝ်ဆဲ ဂါယ် အာရူန်၊ တဲး ဂါယ် တး ဇမ် ဒူင် ကွယ် အန်။ အန် ဝီ တဝ်း ဒီ ဂါယ်၊ “ခါ နီ၊ အုဝ် ဟဲ့ နပ်၊ အုဝ် ဟဲ့ ဘူင် နာ တူ မွှိုမ်။ ဘော အုဝ် ဘော ဒူအီ ခဲင် မိူင် အုဝ် ဟဲ့ မိုဝ်း မှာပ်။ န့ မုး ဇဝ်ဖြာ၊ အီ မှာန်။ 28 တဲး မဲ ဆာခိုဝ် ဒီ ဇဝ်ဖြာ ကူပ် ဟဲ့ ကိူန် ဘျြီ ဂေ ဟမ် ကာနမ်။ အုဝ် မိူဝ် ဟူ တဲး ဘေ ကွယ်၊ အုဝ် ဒီ ခ့ဝါင် ဘေ ဟာဝ်။”

29 အာမုဝ်ဆဲ ဝီ တဝ်း၊ “ပန် ဒီ လေး ဟာဝ် အုဝ် နာ ရေတ့် မိူင် ဒူင် ကွယ် မဲ နီ၊ အုဝ် ဒီ စုဝ့် ဒဲ အုဝ်၊ ဆာခိုဝ် ဒီ ဇဝ်ဖြာ။ ဒေါ အန် တီ မဲ တူ ဝီ ယိုဝ် ဟမ် ကာနမ် ဂေ ပ့လ မ့ပ့လေတ့်။ ဘျြီ မိူဝ် အာဝ် ဟူ စုဝ်း။ န့ ဒီ တဲး မဲ နပ်၊ န့ မုး ဇဝ်ဖြာ၊ အီ အိုပ် ကာဒါယ် နီ။ 30 အုဝ် ယီ နပ်၊ ဘော မဲ ဘော ဂေ အာမူ အာမာတ် မဲ၊ ဘေ ညှမ် ညှိုမ်၊ ညှမ် နပ်၊ ဇဝ်ဖြာ ပီ ကြိုပ် ယေ ဟဲ့ မွှိုမ် ယုဝ်။”

31 ဒေါ ဟဲ့ စုဝ်း ဘျြီ ကာတမ် လုယ် ပီ ဆမ် ဒူအီ ဘော ဆီဂူင့်ရာ ပီ ဆမ် ဂေ၊ န့ ဟဲ့ ဟွတ့် စှိုမ် တူတ့်။ ခုဝ်၊ ဆီဂူင့်ရာ ဟဲ့ ဟွတ့် မိုဝ်း ကာယူင့်၊ ကာတမ် လုယ် မိူဝ် ဟဲ့ ဟွတ့် မိုဝ်း ဘုဝ်း။ 32 န့ ယီ မုး ခဝ်ချုင် ဘော ငှုဝ် ဆာပေတ်၊ န့ တူ စှိုမ်။ ခုဝ်၊ န့ ဆီ ဒီတဲတ်၊ ညှမ် လေး တာင်။

33 ပန် တီ အာမုဝ်ဆဲ လေး ဒူင် ကွယ် ခုန်ဒီခမ် ဖာရုဝ်၊ ဟာဝ် နာ ရေတ့် မိူင်။ အန် ဘော စုဝ့် ဒဲ အန်၊ ဆာခိုဝ် မှာန့် ဒီ ဇဝ်ဖြာ။ ပန် တီ ဂ့လာယ် တာင် ဘော ခုန် ဘော ဘျြီ ဘော ဟမ် ကာနမ် ဘော ဟး အူ ဇေန့်။

34 ခုန်ဒီခမ် ဖာရုဝ် ဘော ယိုဝ် ဟဲ့ ဟး၊ အာဝ် ဟူ မိုဝ်း ဘျြီ အီ စုဝ်း၊ အာဝ် ဟူ မိုဝ်း ဟမ် ကာနမ်၊ အန် ဝီ ဘူင် နာ တူ မွှိုမ် ပီ ဘြိမ်။ ဘော အန် ဘော အာမူ အာမာတ် အန်၊ ဂေ တူ ဝီ တဲး န့ ဘျွင် နဝ်း။ 35 နဝ်း ခုန်ဒီခမ် ဖာရုဝ် အာဝ် မွှိုမ် လွှိုမ် ခါ အာတ့်။ အန် တူ ဘ့လေး ဂေ ဒူအီ အီဆာရေလ၊ တူ တဲး ဂေ ဟာဝ်။ န့ ဘဲန် ပီ ဒွိုမ် ကာလာင် ဇဝ်ဖြာ ဒီ အာမုဝ်ဆဲ။