1 ဇဝ်ဖြာ ဟဲ့ ကွယ် ခဲင် ထိုပ် ဘိက် ဘွတ်၊ ဝီ စ်ု အာမုဝ်ဆဲ၊ 2 တဲး အန် ဝီ ကာလာင် ဒီ ဂေ ဒူအီ အီဆာရေလ တဝ်း၊ “ဆေ ဘေ ဆီ လှူ ဒီ ဇဝ်ဖြာ၊ တဲး ဘေ ဒိုဝ်း မာမက်၊ မာဘူ ဘော မာပဲ အီ ကွယ် ခဲင် ဖိုင် ဒုဝ် ဆတ်ဒါဝါ ပီ ဟျီင် ဘေ၊ တဲး ဘေ လှူ ဒုဝ် ဂေ တီ။

3 ဆေ န့ ဘော မုး မာမက် အီ ဘဲန် ပီ ဒီ လှူ အီ ဒုဝ့် ဒီ ငဝ်၊ ဘေ လုဝ် လှူ ဒုဝ် အာလူင့် အီ တူ မိုဝ်း ဒူင် ဒီ နဲ။ ဘေ ဘော လုဝ် တး လှူ နာ အာတ့် မာလုဝ်း ထိုပ် ဘိက် ဘွတ် တွိုန်၊ တဲး န့ လဝ့် နဝ်း ဇဝ်ဖြာ။ 4 ဒူအီ အီ လှူ တီ၊ အန် လုဝ် ဒါင် ဒဲ အန် ဒဲင် ဂိန့် ဒုဝ် ပီ ဒီ လှူ အန် တီ၊ တဲး ဇဝ်ဖြာ ရပ် ပီ လှူ အန် တီ၊ တဲး အန် ဝီ ကာလဝ့် ဒီ ဇဝ်ဖြာ။ 5 အန် လုဝ် ငဝ်း ဒုဝ် တီ၊ ဆွာ့ မဲင် အန် ဒီ အာတ့် ဇဝ်ဖြာ။ ဂွန် အီမာယ် အာရူန် ဂေ အီ မုး ဒူအီ လှူ ဒီ ဇဝ်ဖြာ၊ ဂေ လုဝ် ဒိုဝ်း နှာမ် ဒုဝ် တီ၊ ဟုး ပ ဒီ ရဲင် ကာစှူင့် လှူ အီ ကွယ် ဒီ အာတ့် မာလုဝ်း ထိုပ် ဘိက် တွိုန်။ ဂေ လုဝ် ဟုး ပ နှာမ် တီ ဘော ဖွုန် ဘ့လာက်။ 6 ဝါယ် တီ အန် လုဝ် လိတ် လေး ဟုန် အန် ဘော ကာဒဲပ် တဲး န့ ဘဲန် ပွတ် ဒီတာင်။ 7 ဂေ ဒါ အီ လှူ ဒီ ဇဝ်ဖြာ လုဝ် ဒိုဝ်း ဟေ၊ ဒါင် ဒဲင် ကာစှူင့် လှူ ဘော ကာဒိုင် ငဝ် ဒီ ဟေ တီ။ 8 ဂေ လုဝ် ဒိုဝ်း ဒီဂ်ု ယင် ဂေ တွိုန် ဘော ဂိန့် အန် ဘော ဘျြီင် အန်၊ ဘ့လေး ဆီချာ ခဲင် ငဝ် အီ ဟဲ့ ကုး တီ။ 9 မာလဲ၊ ခူင်န်ု အန် ဘော ပ့လဝ် အန်၊ ဒူအီ တွိုန် လုဝ် ဘာယ် ခဲင် အိုမ်။ ဟဲ့ ဟွတ့်၊ ဒါ အီ လှူ ဒီ ဇဝ်ဖြာ လုဝ် ဒိုဝ်း တူတ့် ဒွန် မျုဝ်၊ ဝီ ဒုဝ့် ခဲင် ငဝ်၊ လှူ ဒဲင် ကာစှူင့် တွိုန်၊ တဲး န့ ဘဲန် ပီ လှူ အီ ဒုဝ့် ဒီ ငဝ်။ အုး ငှုန် အန် ဒီ လဝ့် နဝ်း ဇဝ်ဖြာ။

10 ဆေ န့ မိုဝ်း ဒူအီ အီ ဆီ လှူ ဒုဝ် ဆတ် ခဲင် ဖိုင် ပီ ဟျီင် အန်၊ န့ ဘော မုး မာဘူ ဂေ မာပဲ၊ တဲး န့ ဘဲန် ပီ ဒီ လှူ အီ ဒုဝ့် ဒီ ငဝ်၊ အန် လုဝ် ဒိုဝ်း ဒုဝ် အာလူင့် အီ တူ မိုဝ်း ဒူင် ဒီ နဲ၊ တး လှူ။ 11 အန် လုဝ် ငဝ်း ဒုဝ် တီ၊ ဆွာ့ မဲင် အန် နာ ကွာ ကာစှူင့် လှူ။ ဟဲ့ ဟွတ့်၊ ဂေ ဒါ အီ လှူ ဒီ ဇဝ်ဖြာ ဝီ လုဝ် ဒိုဝ်း နှာမ် ဒုဝ် တီ၊ ဝီ ဟုး ပ ဒီ ရဲင် ကာစှူင့် ဘော ဖွုန် ဘ့လာက်။ 12 ဝါယ် တီ အန် လုဝ် ကာဒဲပ် ဒုဝ် တီ၊ တဲး န့ ဘဲန် ပွတ် ဒီတာင်။ ဒါ အီ လှူ ဒီ ဇဝ်ဖြာ လုဝ် ဝီ ဒိုဝ်း ယင် ဒုဝ် တီ ဘော ဂိန့် အန် ဘော ဘျြီင် အန်၊ ဝီ ဘ့လေး ဆီချာ ခဲင် ငဝ် အီ ဟဲ့ ကုး ဒဲင် ကာစှူင့် လှူ တွိုန်။ 13 မာလဲ၊ ခူင်န်ု အန် ဘော ပ့လဝ် အန် ဒူအီ တီ လုဝ် ဘာယ် ခဲင် အိုမ်။ ဒါ အီ လှူ ဒီ ဇဝ်ဖြာ ဘော လုဝ် ဒိုဝ်း တူတ့် ဝီ ဒုဝ့် ခဲင် ငဝ်၊ လှူ ဒဲင် ကာစှူင့် လှူ တွိုန်၊ တဲး န့ ဘဲန် ပီ လှူ အီ ဒုဝ့် ဒီ ငဝ်၊ တဲး အုး ငှုန် အန် လဝ့် နဝ်း ဇဝ်ဖြာ။

14 ဆေ ဒူအီ ဆီ ဒိုဝ်း မာဆိမ် တဲး န့ ဘဲန် ပီ ဒီ လှူ ဒီ ဇဝ်ဖြာ အီ ဒုဝ့် ဒီ ငဝ်၊ တဲး အန် ဒိုဝ်း မာဘ့လူယ် ပြဲ။ ဆေ အာဝ် ပါယ် တီ မိူဝ်၊ တဲး အန် ဒိုဝ်း မာဘ့လူယ် ဒီတဲတ်။ 15 ဒါ အီ လှူ ဒီ ဇဝ်ဖြာ လုဝ် ဒိုဝ်း တး ဒီ ကာစှူင့် လှူ၊ ကာဝျီ့ ကာဒတ် မဲင် အန်။ ဟဲ့ ဟွတ့်၊ ဝီ ဒိုဝ်း ဂိန့် အန်၊ ဒုဝ့် ခဲင် ငဝ် ဒဲင် ကာစှူင့် လှူ။ နှာမ် အန် လုဝ် ဝီ ကာစွတ် ဒီ ဘြေတ့် ကာစှူင့် လှူ။ 16 အန် လုဝ် ဒိုဝ်း မျီမ် အန် ဘော အီ ကွယ် ခဲင် မျီမ် အန်၊ ဝီ ဝဲန် နာ လေး ဆီငဲ ကာစှူင့် လှူ ဒီ ဒူင် ဘ့လေး အုန် ဂေ ကာဝှါင်။ 17 အန် လုဝ် ပါ ဖျီင် အန် ဒိူတ် တဲး ဒုဝ် အန် ကာဘ့လး၊ ယီ တူ တဲး န့ ကာဒတ်။ ဟဲ့ ဟွတ့်၊ အန် လုဝ် ဒိုဝ်း ဒုဝ် မာဘ့လူယ် တီ၊ ဒုဝ့် ခဲင် ငဝ်၊ လှူ ဒဲင် ကာစှူင့် လှူ၊ တဲး န့ ဘဲန် ပီ လှူ အီ ဒုဝ့် ဒီ ငဝ်၊ တဲး အုး ငှုန် အန် လဝ့် နဝ်း ဇဝ်ဖြာ။”