1 ဆေ န့ မိုဝ်း ဒူအီ အီ ဆီ လှူ ဒီဂါဝ် ဘဲန် မျုဝ် ဘဲန် မျုဝ် ဒီ ဇဝ်ဖြာ၊ အန် လုဝ် ဒိုဝ်း ကာပဲ့ အီ ဟဲ့ ကာမွတ့် ဆီချာ။ အန် ဘော လုဝ် ဟုး နာမန်၊ ဝီ ဟပ် ဘော ကာညန် လေဘူန် နာ ဒဲင် ကာပဲ့ တီ။ 2 အန် လုဝ် ဝီ ဒိုဝ်း တး ဒွါ ဒီ ဂေ ဂွန် အာရူန် အီ မုး ဒါ အီ လှူ ဒီ ဇဝ်ဖြာ။ ဒါ အီ လှူ ဒီ ဇဝ်ဖြာ အီ ဒီ လုဝ် လှူ တီ၊ အန် လုဝ် ဒိုဝ်း ကာပဲ့ အီ ဟဲ့ ဟွတ့် ကာဝ်ု နာမန် တီ အာဒါ အူ ကာတိုင် ဒဲ အန်။ အန် လုဝ် ဒိုဝ်း ဘော ကာညန် လေဘူန် ဘော တူတ့်၊ ဝီ ဒုဝ့် ခဲင် ငဝ် ဒဲင် ကာစှူင့် လှူ။ န့ ဘော ဘဲန် ပီ လှူ အီ ဒုဝ့် ဒီ ငဝ် အီ တဲး ဇဝ်ဖြာ လှုဝ်း ဒူအီ အီ လှူ တီ။ အုး ငှုန် အန် ဘော လဝ့် နဝ်း ဇဝ်ဖြာ။ 3 ကာပဲ့ ပီ လှူ အန် အီ ဆီ ဂိတ် တွိုန် ဟဲ့ ဝီ ဘဲန် ကြုဝ် ဂေ ဒါ အီ လှူ ဒီ ဇဝ်ဖြာ။ န့ ဘော ဘဲန် ကြုဝ် အီ ဘွတ် ကာဆဝ်။ ခုဝ်၊ န့ မုး အီ ဟဲ့ ကာယဝ်း လေး ဒီ ပီ လှူ ဒီ ဇဝ်ဖြာ အီ ဟဲ့ ဒုဝ့် ဒီ ငဝ်။

4 ဆေ န့ မိုဝ်း အီ ဆီ လှူ ခါမုန် အီ ဟဲ့ ဟွတ့် ဂိုမ် ခဲင် ကာဝှါင်၊ အန် လုဝ် ဒိုဝ်း ကာပဲ့ အီ ဟဲ့ ကာမွတ့် ဆီချာ၊ ဝီ ကာဝ်ု နာမန်၊ ယီ တူ ဟပ် ဆီနမ် ဘြး၊ လုဝ် ဘူင် ခါမုန် အီ ဒီဖ့လ။ ဆေ အာဝ် ပါယ် တီ မိူဝ်၊ တဲး အန် ဘူင် ခါမုန် အီ ခြဲမ်။ 5 ဆေ န့ မိုဝ်း အီ ဆီ လှူ ခါမုန် အီ ဟဲ့ ခုဝ် ဒဲင် ဒီဖ့လ ဟိန်၊ အန် လုဝ် ဒိုဝ်း ကာပဲ့ ခဝ်ချုင် အီ ဟဲ့ ကာမွတ့် ဆီချာ၊ ကာဝ်ု နာမန်၊ ယီ တူ ဟပ် ဆီနမ် ဘြး၊ ခုဝ် ဘဲန် ခါမုန်။ 6 အန် လုဝ် ကာဘတ် ခါမုန် တီ၊ ဝီ ဟုး နာမန် နာ ဒဲင် ဘော လှူ၊ တဲး န့ ဘဲန် ပီ ဒီ လှူ ကာပဲ့ အူ မျုဝ်။

7 ဆေ န့ မိုဝ်း ဒူအီ အီ ဆီ လှူ ခါမုန် အီ ခုဝ် ခဲင် ကာလုဝ့် မာခါင်၊ တဲး အန် ဒိုဝ်း ကာပဲ့ အီ ဟဲ့ ကာမွတ့် ဆီချာ၊ ဝီ ကာဝ်ု နာမန်။ 8 ဆေ ဘေ လှူ ဒီဂါဝ် ဘဲန် မျုဝ် ဘဲန် မျုဝ်၊ ဒီဂါဝ် မျုဝ် မှဝ် အာဝ် တဝ်း၊ တဲး ဘေ ဒိုဝ်း တး ဒီ အာတ့် ဇဝ်ဖြာ၊ ဒွါ ပီ ဒီ လှူ ဇိုဝ် တီ ဒီ ဒါ အီ လှူ ဒီ ဇဝ်ဖြာ၊ တဲး အန် ဒိုဝ်း ဟာဝ် ဒီ ကာစှူင့် လှူ။ 9 ဒါ အီ လှူ ဒီ ဇဝ်ဖြာ လုဝ် ဒိုဝ်း အာဒါ အူ ဘုန် အီ ဒီ တဲး ဇဝ်ဖြာ လှုဝ်း ဒူအီ အီ လှူ တီ၊ ဝီ ဒုဝ့် ခဲင် ငဝ် ဒဲင် ကာစှူင့် လှူ၊ တဲး န့ ဘဲန် ပီ လှူ အီ ဒုဝ့် ဒီ ငဝ်၊ တဲး အုး ငှုန် အန် လဝ့် နဝ်း ဇဝ်ဖြာ။ 10 ပီ လှူ အီ ဆီ ဂိတ် ဆီ ကွယ် တွိုန်၊ ဟဲ့ ဘဲန် တူတ့် ကြုဝ် ဂေ ဒါ အီ လှူ ဒီ ဇဝ်ဖြာ။ န့ ဟဲ့ ဘဲန် အီ ဘွတ် ကာဆဝ်။ ခုဝ်၊ န့ မုး အီ ဟဲ့ ကာယဝ်း လေး ခဲင် ပီ လှူ ဒီ ဇဝ်ဖြာ အီ ဟဲ့ ဒုဝ့် ဒီ ငဝ်။

11 ပီ လှူ ဘေ ဒီ ဇဝ်ဖြာ တီ၊ အီ မုး ပီ လှူ ဒီဂါဝ် ဘဲန် မျုဝ် ဘဲန် မျုဝ်၊ အာဝ် လုဝ် ဟပ် ဆီနမ် ဘြး။ ခုဝ်၊ အာဝ် လုဝ် ဟပ် ဆီနမ် ဘြး ခဲင် ပီ လှူ ဒွန် မျုဝ် အီ ဒုဝ့် ဒီ ငဝ်။ ငါမ် မာဖျီန် မိူဝ်၊ အာဝ် ပွိုန် ဟပ် ခဲင် ပီ လှူ အီ ဒုဝ့် ဒီ ငဝ်။ 12 ဆေ ဘေ ဆီ လှူ ဆီနမ် ဘြး ဘော ငါမ် မာဖျီန်၊ တဲး န့ ဘဲန် ပီ ဒီ လှူ အီ မုး ဘ့လေ ဒင် အီ ဘ့လေ ဒီ အာတ့်။ မာလဲ၊ အာဝ် ပွိုန် ဟပ် ခဲင် ပီ လှူ အီ ဒုဝ့် ဒီ ငဝ် ဒဲင် ကာစှူင့် လှူ၊ ဆေ န့ လုဝ် ဘဲန် အီ အုး ငှုန် ဒီ ဇဝ်ဖြာ၊ တဲး န့ လဝ့် နဝ်း ဇဝ်ဖြာ။ 13 ဒီဂါဝ် ဘဲန် မျုဝ် ဘဲန် မျုဝ် ပီ လှူ ဘေ တီ လုဝ် ဟပ် ဆယ့် ဆေဆေ။ ခုဝ်၊ ဆယ့် န့ ဘော ဘျ ကာဒိက် ဆတ်ဇာ ပီ ဒွါ ဇဝ်ဖြာ ဒီ ဒူအီ ဟဲ့ ကွယ် ဆေဆေ။ ကူပ် န့ ပါယ် တီ ခဲ့ ကွယ် ပီ ဒီ လှူ ဘောကာဂ့လျီတ် လုဝ် ဟပ် ဆယ့် ဆေဆေ။

14 ဆေ ဘေ ဒိုဝ်း ဘ့လေ အူ မျုဝ် အီ မုး ဘ့လေ ဒင်၊ လှူ ဒီ ဇဝ်ဖြာ၊ ဘေ လုဝ် ဒိုဝ်း ငှုဝ် အီ ဆီ ငျီန်၊ ဘော ခုဝ် ဒီ ငဝ်။ ဟဲ့ ဟွတ့်၊ ဘေ လုဝ် ဝီ ကြိတ်။ ဆေ ဘေ တူ ကြိတ်၊ လုဝ် ဒုး၊ တဲး န့ ဘဲန် ကာပဲ့၊ ဝီ ပွိုန် လှူ။ 15 ဘေ လုဝ် ဟပ် နာမန်၊ ဟပ် ဘော ကာညန် လေဘူန် နာ ဒဲင်။ ပါယ် တီ န့ ဟဲ့ ဘဲန် ပီ ဒီ လှူ ဒီဂါဝ် အူ မျုဝ်။ 16 ဒါ အီ လှူ ဒီ ဇဝ်ဖြာ ဒီ ဘော ဒိုဝ်း ကာပဲ့ ဘော နာမန် အာဒါ အူ ဘုန် ဘော ကာညန် လေဘူန် ဘော တူတ့်၊ ဝီ ဒုဝ့် ခဲင် ငဝ်၊ တဲး န့ တဲး ဇဝ်ဖြာ လှုဝ်း ဒူအီ အီ လှူ တီ။