1 ဇဝ်ဖြာ ဝီ တဝ်း၊ “ဆေ န့ မိုဝ်း ဒူအီ အီ ဒိုဝ်း မာမက် ဘဲန် ပီ ဒီ လှူ အီ ကွယ် ကာဇု ဟူမ် ရိုမ်၊ အန် လုဝ် ဒိုဝ်း ဒုဝ် အာလူင့်။ ဆေ အာဝ် ပါယ် တီ ဒိုဝ်း ဒုဝ် အာဟျာင် အီ တူ မိုဝ်း ဒူင် စှေ ဒူင် နဲ၊ လှူ ဒီ ဇဝ်ဖြာ။ 2 ဒူအီ အီ လှူ တီ လုဝ် ဒိုဝ်း ဒဲ အန်၊ ဒါင် ဒဲင် ဂိန့် မာမက် ပီ ဒီ လှူ အန် တီ။ အန် လုဝ် ဆွာ့ မဲင် အန် ခူပ် မာလုဝ်း ထိုပ် ဘိက် ဘွတ်။ ဂွန် အီမာယ် အာရူန် အီ ဘဲန် ဒါ အီ လှူ ဒီ ဇဝ်ဖြာ၊ ဂေ လုဝ် ဒိုဝ်း နှာမ် မာမက် တီ၊ ခြဝ်း ဒီ ရဲင် ကာစှူင့် လှူ ဘော ဖွုန် ဘ့လာက်။ 3 ခဲင် ပီ လှူ ဒီ ဇဝ်ဖြာ အီ မုး ပီ လှူ အီ ကွယ် ကာဇု ဟူမ် ရိုမ် တီ၊ ဂေ လုဝ် ဒိုဝ်း မင် မျုဝ်၊ တဲး န့ ဘဲန် ပီ ဒီ လှူ အီ ဒုဝ့် ဒီ ငဝ်။ အီ မုး ဘျြီင် အီ ဒိုက် ဒီ ခူင်န်ု အန် ဘော တူတ့် 4 ဘော ဘ့လေ လမ် အန် အာ ဘူင့် ဘော ဘျြီင် အီ ဒိုက် ဒီ ဘ့လေ လမ် အန် တီ ဘော ဒီ ကာဒူမ် အန်၊ ဂေ လုဝ် ဒိုဝ်း တူတ့်။

5 ဂေ လုဝ် ဒုဝ့် ဒဲင် ကာစှူင့် လှူ ဒူပ် ပီ လှူ အီ ဒုဝ့် ဒီ ငဝ် ဆေဆေ။ အုး ငှုန် အန် ဒီ လဝ့် နဝ်း ဇဝ်ဖြာ။ 6 ဆေ န့ ယီ မုး မာဘူ ဂေ မာပဲ အီ ဘဲန် ပီ ဒီ လှူ အီ ကွယ် ကာဇု ဟူမ် ရိုမ်၊ ဘေ လုဝ် ဒိုဝ်း ဒုဝ် အာလူင့်။ ဆေ အာဝ် ပါယ် တီ ပွိုန် ဒိုဝ်း ဒုဝ် အာဟျာင် အီ တူ မိုဝ်း ဒူင် စှေ ဒူင် နဲ။ 7 ဆေ န့ မုး မာဘူ၊ ဒူအီ အီ လှူ တီ လုဝ် ဒိုဝ်း ဒုဝ် တီ၊ တး ဒီ အာတ့် ဇဝ်ဖြာ။ 8 ဒူအီ အီ လှူ ဒုဝ် တီ၊ အန် လုဝ် ဒိုဝ်း တး ဒုဝ် တီ ဒီ အာတ့် ဇဝ်ဖြာ။ အန် လုဝ် ဒိုဝ်း ဒဲ အန်၊ ဒါင် ဒဲင် ဂိန့် မာဘူ တီ၊ ဝီ ဆွာ့ မဲင် အန် နာ အာတ့် ထိုပ် ဘိက် ဘွတ်။ ဂေ ဒါ အီ လှူ ဒီ ဇဝ်ဖြာ လုဝ် ဒိုဝ်း နှာမ် မာဘူ တီ၊ ဝီ ခြဝ်း ဒီ ရဲင် ကာစှူင့် လှူ ဘော ဖွုန် ဘ့လာက်။ 9 ခဲင် ပီ လှူ တီ အီ မုး ပီ လှူ အီ ကွယ် ကာဇု ဟူမ် ရိုမ်၊ ဂေ လုဝ် ဒိုဝ်း မင် မျုဝ်၊ တဲး န့ ဘဲန် ပီ လှူ အီ ဒုဝ့် ဒီ ငဝ်။ အီ မုး ဘျြီင် အန် ဘော တူတ့်၊ ဘော ဆီဒါ ပီ ဒဲပ် ကာဒတ် ဒီ ကာအာင် ကာတု အန် ဘော ဘျြီင် အန်၊ ဘော ဘျြီင် အီ ဒိုက် ဒီ ခူင်န်ု အန် 10 ဘော ဘ့လေ လမ် အန် အာ ဘူင့်၊ ဘော ဘျြီင် အီ ဒိုက် ဒီ ဘ့လေ လမ် အန် ဘော ဒီ ကာဒူမ် အန်၊ ဂေ လုဝ် ဒိုဝ်း တူတ့်။ 11 ဂေ လုဝ် ဒုဝ့် ဇိုဝ် တီ ဒဲင် ကာစှူင့် လှူ။ န့ မုး ပီ ဒီ ဟူမ် ပီ လှူ ဂေ ဒီ ဇဝ်ဖြာ အာတ့် ဟူမ် ရိုမ် ဂေ။

12 ဆေ န့ မုး မာပဲ ပီ ဆီ လှူ အီ၊ ဒူအီ အီ လှူ တီ လုဝ် ဒိုဝ်း တး ဒုဝ် တီ ဒီ အာတ့် ဇဝ်ဖြာ။ 13 အန် လုဝ် ဒါင် ဒဲ အန် ဒဲင် ဂိန့် မာပဲ တီ၊ ဝီ ဆွာ့ မဲင် အန် ဒီ အာတ့် ထိုပ် ဘိက် ဘွတ်။ ဂေ ဒါ အီ လှူ ဒီ ဇဝ်ဖြာ လုဝ် ဒိုဝ်း နှာမ် မာပဲ တီ၊ ခြဝ်း ဒီ ရဲင် ကာစှူင့် လှူ ဘော ဖွုန် ဘ့လာက်။ 14 ခဲင် ဒုဝ် ပီ လှူ အန် တီ၊ ဒူအီ အီ လှူ တွိုန်၊ အန် လုဝ် ဒိုဝ်း မင် မျုဝ် တဲး န့ ဘဲန် ပီ လှူ အီ ဒုဝ့် ဒီ ငဝ်။ န့ မုး ဘျြီင် အီ ဒိုက် ဒီ ခူင်န်ု အန် 15 ဘော ဘ့လေ လမ် အန် အာ ဘူင့် ဘော ဘျြီင် အီ ဒိုက် ဒီ ကာဒူမ် အန်၊ အန် လုဝ် ဒိုဝ်း တူတ့် ဇိုဝ် တီ။ 16 ဒါ အီ လှူ ဒီ ဇဝ်ဖြာ လုဝ် ဝီ ဒုဝ့် ခဲင် ငဝ် ဒဲင် ကာစှူင့် လှူ။ န့ မုး ပီ ကာယဝ်း လေး ဂေ၊ လှူ ဒီ ဇဝ်ဖြာ အာတ့် ဟူမ် ရိုမ် ဂေ။ ပီ လှူ အန် အီ ဒုဝ့် ခဲင် ငဝ် တီ၊ န့ ဒီ လဝ့် နဝ်း ဇဝ်ဖြာ။ ခဲ့ ကွယ် ဘျြီင် ခဲင် ဒုဝ် ဆတ်ဒါဝါ ပီ လှူ အီ၊ န့ ဘဲန် တူတ့် ကြုဝ် ဇဝ်ဖြာ။

17 ဒူအီ အီဆာရေလ ဒွန် အီ အာဝ် ပွိုန် ဟူမ် ဘျြီင် ဒုဝ် ဆတ် ဘော နှာမ် ဒုဝ် ဆတ် ဒေါ မှဝ်။ န့ မုး ဒါရာ ပီ လုဝ် ဒူပ် ဂေ ဒူအီ အာမျုဝ် အီဆာရေလ ဆေဆေ။ ဂေ ဘော ကွယ် ဒီ မှဝ်၊ အာဝ် ပွိုန် ဝဲန် ဒွန် စုဝ် ဒွန် ဘာန်။” ခဲ့ တီ ဇဝ်ဖြာ ဟဲ့ ကာလာင် ဒီ အာမုဝ်ဆဲ လွင် ပီ လှူ အီ ဒုဝ့် ဒီ ငဝ် ဘော လွင် ပီ လှူ အီ ကွယ် ကာဇု ဟူမ် ရိုမ်။