1 ဝါယ် အန် တီ ဇဝ်ဖြာ တဝ်း ဒီ အာမုဝ်ဆဲ၊ 2 “ဆေ န့ ဇမ် မာဂျီန် လှေး ဒေါ ဇမ် ဆီငဲ ဟာလှေး၊ မဲ လုဝ် ဘျိတ့် ထိုပ် ဘိက် ဘွတ် အီ မုး ဒူင် ဒီ ပွိုန် ဂေ ဒူအီ တး ကာတုန့် အုဝ်။ 3 မဲ လုဝ် ဒိုဝ်း ဇီဒိူက် တဲး အီ နပ် လွင် အုဝ်၊ ဘ့လေး အုန် အန် နာ ခဲင် ထိုပ် ဘိက် တွိုန်၊ တဲး ဘိက် ဂွင့် ဝီ ကာဘိတ် ဇီဒိူက်။ 4 မဲ လုဝ် ဒိုဝ်း ကာစှူင့် ခါမုန် ဘော ကြုဝ်ကြာမ် အီ ကွယ် ဒဲင် ကာစှူင့်၊ တဲး န့ ကွယ် ခဲင် ထိုပ် ဘိက် တွိုန်။ တဲး မဲ ဘော ဒိုဝ်း ဒင် ငဝ် အွမ်၊ ဘ့လေး ဘော အန် ခဲင် ထိုပ်။ 5 ဘော ကာစှူင့် ခြိဝ် ပီ လုဝ် ဒူအီ လှူ ဆီနမ် အုး ငှုန်၊ တဲး မဲ ဘ့လေး ဒီ အာတ့် ဇီဒိူက်။ ဘော ဘိက် ဂွင့် မဲ လုဝ် ဘ့လေး ဒီ အာတ့် မာလုဝ်း ထိုပ် ဘိက် ဘွတ် တီ။

6 ကာစှူင့် ပီ လုဝ် လှူ မဲ ဒုဝ် ဆတ်ဒါဝါ၊ မဲ လုဝ် ဘ့လေး အုန် ဒီ အာတ့် မာလုဝ်း ထိုပ် ဘိက် ဘွတ်။ 7 ဘော မ့ပါန် တာင် တွိုန်၊ မဲ လုဝ် တဲး န့ ကွယ် နာ ကာတဲ ထိုပ် ဘိက် ဂါယ် ကာစှူင့် လှူ။ ဟဲ့ ဟွတ့်၊ မဲ လုဝ် လှုဝ် အိုမ် နာ ခဲင်၊ တဲး န့ ကော နုဝ့်။ 8 မဲ လုဝ် ဝီ ဘူင် ဝဲင် ထိုပ် ဘွတ် ဘော ဘ့လေး ဘိက် ဂွင့် ဒီ အာတ့် မာလုဝ်း ဝဲင် တီ။

9 ဝါယ် အန် တီ မဲ လုဝ် ဒိုဝ်း နာမန် ဘွတ် တွိုန်၊ ဖဝ်း ဒီ ထိုပ် ဘိက် ဂေ ဒွန် မျုဝ် အီ ကွယ် နာ ခဲင်၊ တဲး န့ ဘဲန် အီ ဆီငါ ဘွတ်။ 10 ပန် တီ မဲ လုဝ် ဖဝ်း နာမန် တွိုန် ဒီ ကာစှူင့် လှူ ဒုဝ် ဆတ်ဒါဝါ ဘော ဒီ အာဇ ပီ တာ ဒူအီ ဒေါ လှူ ဂေ။ ပါယ် တီ န့ ဒီ ဘဲန် အီ ဆီငါ ဘွတ် လွှိုမ် တူတ့်။ 11 မဲ ဘော လုဝ် ဖဝ်း နာမန် တွိုန် ဒီ မ့ပါန် တာင် တွိုန် ဂါယ် စေန့် အန်၊ တဲး ဘော အန် ဘဲန် အီ ဆီငါ ဘွတ်။

12 တဲး မဲ ဒဲ့ အာရူန် ဂေ ဂွန် အီမာယ် အန် တး ဇမ် ဒီ အာတ့် မာလုဝ်း ထိုပ် ဘိက် ဘွတ်။ ဟဲ့ ဟွတ့်၊ မဲ လုဝ် တဲး ဂေ ဘာယ် ဒုဝ် ဂေ။ 13 ဂေ ဟဲ့ ဟွတ့် ဘာယ်၊ မဲ လုဝ် တဲး အာရူန် စှိုပ် ခြိုင် ဘွတ် တွိုန်။ ဝါယ် အန် တီ မဲ လုဝ် ဖဝ်း နာမန် တွိုန်၊ တဲး အန် ဘဲန် ဒူအီ ဆီငါ ဘွတ် ဒီ အာတ့် ဇဝ်ဖြာ၊ တဲး အန် ပွိုန် ဒီ လှူ ဒီ အုဝ်။ 14 ပန် တီ မဲ ဒဲ့ ဘော ဂွန် အန် တး၊ တဲး ဂေ စှိုပ် ဆီတုဝ် ဘွတ် ဂေ။ 15 မဲ လုဝ် ဝီ ဖဝ်း နာမန် ဘော ဒီ ဂေ၊ တဲး န့ ပီ ပီ ဖဝ်း မဲ နာမန် ဒီ ဂုန့် ဂေ၊ တဲး ဘော ဂေ ပွိုန် ဒီ ဘူင် ဂါန် အုဝ်၊ တဲး ဂေ ဘဲန် ဒူ အီ လှူ ဒီ အုဝ်။ ပီ ဖဝ်း မဲ နာမန် ဒီ ဂိန့် ဂေ၊ န့ တဲး ဘော ဂေ ဘော ဂွန် ဂေ ဝီ ဘဲန် ဒူအီ လှူ ဒီ အုဝ် ဟာဝ် နာ အာတ့် ဒွန် စုဝ် ဒွန် ဘာန်။” 16 ဇဝ်ဖြာ ဟဲ့ ဟွတ့် ကာလာင် ဂြုဝ်း တီ၊ အာမုဝ်ဆဲ ဝီ ဘူင် တူတ့် ဒွန် မျုဝ် ပဲ့ ဟဲ့ စ်ု ဇဝ်ဖြာ အန် ဘူင်။

17 ဒေါ ဟဲ့ နုဝ့် အူ ဆီနမ် ဝါယ် လေး ဂေ ခဲင် မိူင် အဲဂိုပ် တွိုန်၊ ဝီ ဇမ် ဆီငဲ လှေး ဒေါ မာဂျီန် လှေး ဆီနမ် ကာမာယ်၊ အာမုဝ်ဆဲ ဟဲ့ တဲး ဒူအီ ဘျိတ့် ထိုပ် ဘိက် ဘွတ် တွိုန်။ 18 ဒေါ ဘျိတ့် အန် ထိုပ် ဘိက် ဘွတ် တွိုန်၊ အန် ဝီ အုန် စေန့် ရွင့် ဒီ အာတ့်။ ဝါယ် အန် တီ အန် ဘော ကာစွင့် ဘဲန် ဘော ကာဆျီ့ ရဲပ် အန် ခဲင် ခ့ဝင် အီ ကွယ် ဒီ ဘဲန်။ ဟဲ့ ဟွတ့်၊ အန် ဝီ ဘ့လေး ရွင့် ဒူင် လုဝ် ကွယ် ရွင့်။ 19 ဝါယ် အန် တီ အန် ဝီ တပ် ဘိက် နာ ဒဲင်၊ ဘော ကာဘိတ် ဘိက် တီ၊ တာ ဟုန် ဒွန် မျုဝ်၊ တဲး န့ ကွယ် နာ ဒဲင် ဘိက်။ အန် ဘူင် တူတ့် ပီ ဒွိုမ် ကာလာင် ဇဝ်ဖြာ ဒီ အန်။

20 ဟဲ့ ဟွတ့် ပန် တီ အာမုဝ်ဆဲ ဝီ ဒိုဝ်း မာဝ် အာ ဒီဖ့လာင်၊ အီ တဲး ဒူအီ နပ် လွင် ဇဝ်ဖြာ၊ ဝီ အုန် ခဲင် ဇီဒိူက် တွိုန်။ အန် ဝီ ပ့လွ့ မင် ဂွတ် အန် ခဲင် ခ့ဝင် အီ ဒိုက် ဒီ ခူပ် ဇီဒိူက် တွိုန်၊ ဝီ ဘ့လေး ဆီဘ့လိုက် နာ ဒဲင် ဇီဒိူက် အီ မုး ဒူင် ကွယ် ဇဝ်ဖြာ အီ ဂဝ်း ဝဲန် မှာပ် ဒူအီ။ 21 အန် ဝီ ဘ့လေး ဇီဒိူက် တွိုန် တဲး န့ ကွယ် နာ ခဲင် ထိုပ် ဘိက်၊ ဝီ ဂွင့် ဘိက် ဒီ အာတ့် ဇီဒိူက်၊ ကွဲ့ တဲး အီ ယိုဝ်။ အန် ဘူင် တူတ့်၊ တဲး န့ ပီ ပဲ့ ဟဲ့ စ်ု ဇဝ်ဖြာ အန် ဘူင်။

22 အန် ဘော အုန် ကာစှူင့် ခါမုန် နာ ခဲင် ထိုပ် ဘိက် ဘွတ် တွိုန်၊ တဲး န့ ကွယ် ဘ့လာက် နာ ကွာ နာ ရေတ့် ဘိက် ဂွင့် တွိုန်။ 23 အန် ဘော အုန် ခါမုန် နာ ဒဲင်၊ တဲး န့ ကွယ် ဒီ အာတ့် ဇဝ်ဖြာ၊ တဲး န့ ပီ ပဲ့ ဟဲ့ စ်ု ဇဝ်ဖြာ အန် ဘူင်။

24 အန် ဘော အုန် ဒင် ငဝ် အွမ်၊ တဲး န့ ကွယ် နာ တေတ့်၊ တဲး ကာစှူင့် ပီ ဘ့လေး ဂေ ခါမုန် ဘော ငဝ် ရာင် တာင် တီ ကွယ် လာယ် ကာဆိူဝ်။ 25 အန် ဝီ ပီဒဝ့် ငဝ် အွမ် တွိုန်၊ တဲး န့ ဘ့လာင် ဒီ အာတ့် ဇဝ်ဖြာ၊ တဲး အန် ဘူင် ပီ ဒွိုမ် စ်ု ဇဝ်ဖြာ အန် ဘူင်။

26 ဟဲ့ ဟွတ့်၊ အန် ဝီ အုန် ကာစှူင့် ခြိဝ် ခဲင် ထိုပ် ဘိက် ဘွတ်၊ တဲး န့ ကွယ် နာ ရေတ့် ဘိက် ဂွင့်။ 27 အန် ဘ့လေး ဆီနမ် အုး ငှုန် နာ ဒဲင်၊ တဲး န့ ကာဆိုမ် ခဲင် ငဝ်။ ဘော အာတီ အန် ဘူင် ပီ ဒွိုမ် စ်ု ဇဝ်ဖြာ အန် ဘူင်။ 28 ပန် တီ အန် ဝီ ဂွင့် ဘိက် ဒီ မာလုဝ်း ထိုပ် ဘိက် ဘွတ် တွိုန်။

29 အာမုဝ်ဆဲ ဝီ အုန် ကာစှူင့် လှူ ဒုဝ် ဆတ်ဒါဝါ တွိုန်၊ တဲး န့ ကွယ် နာ ရေတ့် ထိုပ် ဘိက် ဘွတ် ခဲင် ဝဲင်၊ တဲး န့ ကွယ် ကာတတ် မာလုဝ်း ထိုပ် ဘိက် ဘွတ်။ ဟဲ့ ဟွတ့်၊ အန် ဝီ လှူ ဒုဝ် ဆတ်ဒါဝါ ပီ ဒုဝ့် ကာဆိုမ် ငဝ်၊ ဘော လှူ ငှုဝ်၊ တဲး န့ ပီ ပီ စ်ု ဇဝ်ဖြာ အန် ဘူင်။

30 အန် ဝီ အုန် မ့ပါန် တာင် ဒီ ကာတဲ ကာစှူင့် လှူ ဂါယ် ထိုပ် ဘိက် ဘွတ် တွိုန်၊ ဝီ လှုဝ် အိုမ် နာ ခဲင်၊ တဲး ဂေ ပွိုန် ဒီ ဘာယ် ဒုဝ် ဂေ။ 31 ဘော အာမုဝ်ဆဲ ဘော အာရူန် ဂေ ဂွန် အာရူန်၊ ဂေ ဒိုဝ်း အိုမ် တီ၊ တဲး ဂေ ဘာယ် ဒဲ ဂေ ပ့လဝ် ဂေ။ 32 ဒွန် ဇေန့် ဒွန် ဇေန့်၊ အာတ့် လိုပ် ဂေ ခဲင် ထိုပ် ဘိက် ဘွတ်၊ အာတ့် တး ကာတတ် ဂေ ကာစှူင့် လှူ၊ ဂေ ဘာယ် ဒဲ ဂေ ပ့လဝ် ဂေ၊ တဲး န့ ပီ ပီ စ်ု ဇဝ်ဖြာ ဂေ ဘူင်။

33 ဝါယ် အန် တီ အာမုဝ်ဆဲ ဝီ ဘ့လေး အုန် ဘိက် ဝဲင် ထိုပ် ဘိက် ဘွတ် တွိုန် ဘော ဘ့လေး ဘိက် ဂွင့် ဒီ မာလုဝ်း ဝဲင် တွိုန်။ အန် ဟဲ့ ဟွတ့် ဘူင် ပါယ် တီ အာမုဝ်ဆဲ ဟဲ့ ဟွတ့် ဘူင် တူတ့် ဒွန် မျုဝ်၊ ဟဲ့ ဟွတ့် ဘျိတ့် တူတ့် ထိုပ် ဘိက် ဘွတ် တွိုန်။

34 ဂေ ဟဲ့ ဟွတ့် ဘူင် တူတ့်၊ န့ ဝီ မိုဝ်း န့အု တွိုန်၊ ဝီ တး ပ့လိုက် ထိုပ် ဘိက် ဘွတ်။ အာရူင် ဘ့လာင် ဇဝ်ဖြာ ဘော လိုပ် ကွယ် နာ ခဲင် ထိုပ် ဘိက် ဘွတ်၊ တဲး န့ ကော နုဝ့် နာ ခဲင်။ 35 ဒေါ အန် တီ အာမုဝ်ဆဲ တူ ပွိုန် ဒီ လိုပ် နာ ခဲင် ထိုပ် ဘိက် ဘွတ် ကူပ် မိုဝ်း န့အု ပ့လိုက်။ ဘော အာရူင် ဘ့လာင် ဇဝ်ဖြာ ဟဲ့ ကွယ် နာ ခဲင် ထိုပ် ဘိက် ဘွတ် ကော နုဝ့်။

36 န့ ယီ မုး န့အု တွိုန်၊ ဒေါ ဟာဝ် ဂေ ဒူအီ အီဆာရေလ ဘဲန် ပ့လုဝ့် ဘဲန် ပ့လုဝ့်၊ ဂေ ယွတ် န့အု အီ ကွယ် ဒီ ထိုပ် ဘိက် ဘွတ်။ ဆေ န့အု ဟဲ့ ဟုဝ့် နာ ဒဲင်၊ ဂေ ပွိုန် ဒီ လေး ဟာဝ် ဒူပ် န့တေန့် ဂေ။ 37 ဆေ န့အု ယီ တူ ဟုဝ့် နာ ဒဲင်၊ ဂေ တူ ပွိုန် ဒီ ဟာဝ် နာ မှဝ်။ ဂေ ဝီ ကွယ် နှဝ့် န့အု၊ တဲး အန် ဝီ ဟုဝ့် နာ ဒဲင်။ 38 ပါယ် တီ ဒေါ ကာတဲ ဆီငဲ၊ န့အု ဇဝ်ဖြာ ကွယ် ဒဲင် ထိုပ် ဘိက် တွိုန်။ ခဲင် မှိုဝ်၊ န့ ယီ မိုဝ်း ငဝ်၊ ကွယ် ခဲင် န့အု တွိုန်။ ဒေါ ဟာဝ် ဂေ ဒူအီ အီဆာရေလ ဒူပ် န့တေန့် ဂေ၊ ဆေဆေ ဂေ ပွိုန် ဒီ ယွတ် န့အု ပါယ် တီ။