1 ဝါယ် အန် တီ ဂေ ဝီ ဒဝ့် ခြိုင် ပီ တာ ဂေ ဒူအီ အီ လှူ ဒီ ဇဝ်ဖြာ။ ဂေ ဒိုဝ်း ဆေန့် အီ ခွင်၊ အီ ဂုယ် ခွန် ဘော အီ ရေန့် ဂဲ၊ ဘူင် ခြိုင် တီ။ ဂေ ဒူအီ အီ လှူ ဒီ ဇဝ်ဖြာ စှိုပ် ခြိုင် တီ ဒေါ ဘူင် ဂေ ဂါန် ဇဝ်ဖြာ ခဲင် ထိုပ် ဘိက် ဘွတ် တွိုန်။ ဂေ ဘော ဘူင် ခြိုင် ဘွတ် တဲး အာရူန် စှိုပ်၊ တဲး န့ ပီ ပီ ဒွိုမ် ကာလာင် ဇဝ်ဖြာ ဒီ အာမုဝ်ဆဲ။

2 ဂေ ဒိုဝ်း ဘော ခြိဝ် ဘော ဆေန့် အီ ခွင်၊ အီ ဂုယ် ခွန်၊ အီ ရေန့် ဂဲ ဘော ကာတမ် လုယ် ပီ ဘတ် ဘဲန် ဆေန့် ဘတ်။ ဂေ ဒိုဝ်း ကြုဝ် တီ၊ ဘူင် ဆီတုဝ် အေဖူတ်။ 3 ဂေ စိုမ် ခြိဝ် တဲး န့ ဘဲန် ဘ့လ ဒီဟြေဝ်။ ဟဲ့ ဟွတ့်၊ ဂေ ဝီ ကပ် တဲး န့ ဘဲန် ဝန် ဒီတဲတ်၊ တဲး ဂေ ဝီ ဒဝ့် ခဲင် ခြိုင် တွိုန် အီ မုး ခြိုင် အီ ခွင်၊ အီ ဂုယ် ခွန် ဘော အီ ရေန့် ဂဲ။ 4 ဂေ ဘော ဘူင် ဘိက် အီ ကွယ် ဒီ ယ အီ မုး ဘိက် အီ ကာဒိုက် ဘ့လာက် နာ အာတ့် ဂေ ဘ့လာက် နာ ပန် ဒီ ဆီတုဝ် အေဖူတ် တွိုန်၊ စိန့် ဒီ ကာတုဝ့် နာ ဒဲင် အာ ကာတုဝ့်၊ တဲး န့ ဘဲန် ဆီတုဝ် ဟွယ် ဒီကြး။ 5 ဂေ ဘော ဒဝ့် ဆီဘြွတ် စှိတ်၊ အီ ပက် ဒီ ညွယ်၊ တဲး ဘော အန် ဘော ဆီတုဝ် အေဖူတ် ဘဲန် အူ ဘူင့်။ ဘော ဆီဘြွတ် တီ၊ ဂေ ဘူင် ပီ ဆီတုဝ် အေဖူတ်၊ တာ ဆေန့် ခြိဝ်၊ ဆေန့် အီ ခွင်၊ အီ ဂုယ် ခွန်၊ အီ ရေန့် ဂဲ ဘော ကာတမ် လုယ် ပီ ဘတ် ဂေ တဲး န့ ဘဲန် ဆေန့် ဘတ်။ ဂေ ဝီ ဘူင် တူတ့် ဇိုဝ် တီ၊ တဲး န့ ပီ ပီ ဘျ ဇဝ်ဖြာ ဒီ အာမုဝ်ဆဲ။

6 ဂေ ဝီ ဘ့လေး ဆဲန့် ဝွင့် လုယ် အာ ဘူင့် ခဲင် ကာင် ဆဲန့် အီ မုး ခြိဝ် ပီ ဒွက် ဂေ ဘဲန် ဘုဝ်း။ ဂေ ဘော ဒဲမ် စိူဝ် ဂေ ဂွန် အီမာယ် အာကူပ် နာ ဒဲင် ဆဲန့် တီ၊ တဲး န့ ပီ ဇိုမ် ဂေ။ 7 ဟဲ့ ဟွတ့်၊ ဂေ ဝီ ဒိုက် ဆဲန့် ဘော ကာင် အန် တီ ဒဲင် ယ ဆီတုဝ် အေဖူတ် တွိုန်၊ တဲး ဇဝ်ဖြာ လှုဝ်း ဂေ ဒူအီ အီဆာရေလ ဂိုဝ် ဒီ အာ ခြိုဝ်။ ဂေ ဘူင် တူတ့် ဇိုဝ် တီ၊ ဒူပ် ဆီချာ ပီ ဒွိုမ် ကာလာင် ဇဝ်ဖြာ ဒီ အာမုဝ်ဆဲ။ 8 ဝါယ် အန် တီ ဂေ ဘော ဘူင် ဟူ ပီ ဒိုက် အာရူန် ဒီ ဘင်နဝ်း အန်။ ဘော အာတီ မုး ဂါန် ဒူအီ အီ လှဲဝ် ဒီ ဘူင် ဒွန် မျုဝ်။ ဂေ ဝီ ဘူင် ဟူ တီ၊ တဲး န့ ပီ ပီ ဘူင် ဂေ ဆီတုဝ် အေဖူတ် တွိုန်။ ဂေ ဝီ ဒိုဝ်း ခြိဝ် ဘော ဆေန့် အီ ခွင်၊ အီ ဂုယ် ခွန်၊ အီ ရေန့် ဂဲ။ ဂေ ဒိုဝ်း ဘော ကာတမ် လုယ် ပီ ဘတ် ဂေ ဘဲန် ဆေန့် ဘတ်။ 9 ဟူ တီ ဘဲန် ဖွုန် ဆီနာ ကာလင်။ ဘော နာ တူင့် နာ တျီမ် အန် ဘဲန် အူ ကာဆာန်။ ဂေ ဘူင် တဲး န့ ပွိုန် ဒီ ဘ့လး၊ ဘဲန် အာ ထာပ်။ 10 ဘ့လာက် နာ ဒဲင် ဟူ တီ၊ ဂေ ဝီ ဘ့လေး ဆဲန့် ဖွုန် မ့ပြဲင်။ မ့ပြဲင် လှေး၊ န့ မုး ဆဲန့် ရေန့် ဒေန့်၊ ဆဲန့် ဒေန့် ဘ့လာင် ဘော ဆဲန့် ရေန့်။ 11 မ့ပြဲင် ဟာအာ အန် မုး ဆဲန့် ငျီန် ခွင်၊ ဆဲန့် ငျီန် ဘ့လေန့် ဘော ဆဲန့် ရေန့် ဝွင့်။ 12 မ့ပြဲင် ဟာအူယ် န့ မုး ဆဲန့် မာဘြိဝ်၊ ဆဲန့် ပယ့် ဘော ဆဲန့် ဂုယ် ခွန်။ 13 မ့ပြဲင် မ့ဖွုန်၊ န့ မုး ဆဲန့် ငျီန် ဝွင့်၊ ဆဲန့် ဝွင့် လုယ် ဘော ဆဲန့် ငျီန် ဒေန့် ဒီပုန်။ ဆဲန့် ဂေ တီ၊ ဘောကာဂ့လျီတ် မိုဝ်း ကာင် ခြိဝ် ပီ ဒွက် ဂေ ဘုဝ်း။ 14 ဆဲန့် ဂိုဝ် ဒီ အာ ဘူင့် တီ၊ ဂေ မိုဝ်း စိူဝ် ဂေ ခြိုဝ် အီဆာရေလ ဘော ဂိုဝ် ဒီ အာ ခြိုဝ်။ ဆဲန့် အူ ဘူင့် မိုဝ်း ဒီ ဒဲမ် စိူဝ် ခြိုဝ် ဂေ ဒူအီ အီဆာရေလ အူ ခြိုဝ်။

15 ဝါယ် အန် တီ ဂေ ဝီ ဘူင် ဝန် ခြိဝ် ဘွတ်၊ တဲး ဂေ ဒိုက် ဒီ ဟူ ပီ လုဝ် ဒိုက် ဒီ ဘင်နဝ်း။ 16 ဂေ ဝီ ဒိုဝ်း ခြိဝ်၊ ဘူင် ကာင် ဆဲန့် အာ ကာင် ဘော ခ့ဝင် အာ ခ့ဝင်။ ခ့ဝင် တီ ဂေ ဒိုက် ဒီ ကာတုဝ့် ဟူ။ 17 ဟဲ့ ဟွတ့်၊ ဂေ ဝီ ဒိုဝ်း ဝန် ခြိဝ် ဘော အာ ညွင့်၊ ဒိုက် ဒင် အန် ဒီ ခ့ဝင် အာ ခ့ဝင် တီ။ 18 ကာဒဲ့ ဝန် ခြိဝ် ဂေ ဝီ ဒိုက် ဒီ ကာင် ဆဲန့် အီ ကွယ် ဒီ ယ ဆီတုဝ် အေဖူတ်၊ တဲး န့ ကွယ် ဘ့လာက် နာ အာတ့်။ 19 ဝါယ် အန် တီ ဂေ ဝီ ဒိုဝ်း ခြိဝ် ဘူင် ခ့ဝင် အာ ခ့ဝင်၊ ဒိုက် ဒီ ကာတုဝ့် ဟူ ဘ့လာက် နာ တေတ့်၊ တဲး အန် ကွယ် ဘ့လာက် နာ ပန် ဟူ ဘော ကွယ် ကာတတ် ဆီတုဝ် အေဖူတ် တွိုန်။ 20 ဂေ ဘူင် ခ့ဝင် ခြိဝ် ဘော အာ ခ့ဝင်၊ ဒိုက် ဒီ ဆီတုဝ် အေဖူတ်၊ တဲး အန် ကွယ် ဘ့လာက် နာ အာတ့်၊ ကွယ် ကာတတ် ဆီဘြွတ် အီ ပက် ဒီ ညွယ်၊ အီ ကွယ် ဒီ ဆီတုဝ် အေဖူတ်။ 21 ဝါယ် အန် တီ ဂေ ဝီ ဘူင် ဝန် ဘိက် အီ ခွင်၊ တဲး ဂေ ပက် အန် ဒီ ခ့ဝင် အီ ဒိုက် ဒီ ဟူ ဂါယ် ခ့ဝင် အီ ဒိုက် ဒီ ဆီတုဝ် အေဖူတ် တွိုန်၊ ကွဲ့ တဲး ဟူ ရး။ ဂေ ဘူင် တူတ့် ဇိုဝ် တီ၊ ဝီ ဒူပ် ဆီချာ ပီ ဒွိုမ် ကာလာင် ဇဝ်ဖြာ ဒီ အာမုဝ်ဆဲ။

22 ဝါယ် အန် တီ ဂေ ဒိုဝ်း ဆေန့် အီ ခွင်၊ ဘူင် ဆီတုဝ် တိူ့ အီ စှိုပ် နာ ခဲင် ဆီတုဝ် အေဖူတ် တွိုန်။ 23 ဒီ ကာတဲ အန် ဂေ ဝီ ဂွဲ့ မဲင် အန်။ ဝါယ် အန် တီ ဂေ ဝီ ဘူင် ပြာင်၊ ဝီ စိန့် ဒီ မဲင် အန်၊ ကွဲ့ တဲး အန် ကာယာတ့် လိုဝ်။ 24 ဂေ ဘော ဘူင် ရာင် ဘ့လေ မာစက်၊ တာ ဆေန့် အီ ခွင်၊ အီ ဂုယ် ခွန်၊ အီ ရေန့် ဂဲ ဘော ကာတမ် လုယ် ပီ ဘတ် ဂေ ဘူင် ဆေန့် ဘတ်။ ရာင် ဂေ တီ၊ ဂေ ဝီ ဒိုက် ဒီ ဘြုဝ် ဆီတုဝ် တိူ့။ 25 ဝါယ် အန် တီ ဂေ ဘော ဘူင် ဟိင်၊ တာ ခြိဝ် ဘွတ်၊ ဝီ ဒိုက် ဒီ ကာတဲ ရာင် ဘ့လေ မာစက် အီ ကွယ် ရူပ် ဒီ ဘြုဝ် ဆီတုဝ် တွိုန်။

26 ဘော ရာင် ဘ့လေ မာစက် ဂေ ဟိင် ခြိဝ် ဂေ လာယ် ကာခန်၊ ကွယ် ဒီ ဘြုဝ် ဆီတုဝ်။ န့ မုး ဆီတုဝ် ပီ စှိုပ် အာရူန် ဒေါ ဘူင် အန် ဂါန် ဇဝ်ဖြာ။ ဂေ ဘူင် ဆီတုဝ် တီ၊ ဒူပ် ဆီချာ ပီ ဒွိုမ် ကာလာင် ဇဝ်ဖြာ ဒီ အာမုဝ်ဆဲ။ 27 ဂေ ဘူင် ဆီတုဝ် တုန် အာဒါ အာရူန် ဘော ဆီတုဝ် တုန် အာဒါ ဂွန် အီမာယ် အာရူန်၊ တာ ကာတမ် လုယ်။ 28 ဂေ ဘော ဘူင် ကာမဲ့ ဘော ဆီလာ ဘွာ့၊ တာ ကာတမ် လုယ် ပီ ဘတ် ဂေ ဘဲန် ဆေန့် ဘတ်။ 29 ဘော ဆာဘြွတ် ဂေ ဘူင် တာ ဘိက် ကာတမ် လုယ် ဘော ဆေန့် အီ ခွင်၊ အီ ဂုယ် ခွန် ဘော အီ ရေန့် ဂဲ။ ဒူအီ ဘူင် ဆာဘြွတ် တီ မုး ဒူအီ အီ လှဲဝ် ဒီ စိန့် ဘုဝ်း ဂေ ပယ့်။ ဂေ ဝီ ဘူင် တူတ့် တဲး န့ ပီ ပီ ကာလာင် ဇဝ်ဖြာ ဒီ အာမုဝ်ဆဲ။

30 ဂေ ဝီ ဘူင် ဘ့လ ခြိဝ် ပီ ပက် အာရူန် ဒီ ကာတဝ်း အန်။ ဂေ ဝီ ဒွက် နာ ဒဲင် တဲး န့ လေး ဒုဝ် ပဲ့၊ တဲး န့ ပီ ဇိုမ်။ ပယ့် ပီ ဒဲမ် ဂေ တီ၊ န့ တဝ်း၊ “ဟဲ့ ဘွတ် မီ အာဒါ ဇဝ်ဖြာ။” 31 ဝါယ် အန် တီ ဂေ ဝီ ဒိုဝ်း ဝန် အီ ခွင်၊ ဒိုက် ဒီ ဘ့လ ခြိဝ် ဘွတ် တီ၊ တဲး ဂေ ပွိုန် ဒီ ပက် နာ ရေတ့် ကာမဲ့ တွိုန်၊ တဲး န့ ပီ ပီ ဒွိုမ် ကာလာင် ဇဝ်ဖြာ ဒီ အာမုဝ်ဆဲ။

32 ပန် တီ ဂေ ဒူအီ ဟဲ့ ဟွတ့် ဘူင် တူတ့် ဒွန် မျုဝ် ပီ လုဝ် ဘူင် ဂေ၊ တဲး န့ ဘဲန် ထိုပ် ဘိက် ဘွတ် အီ မုး ဒူင် ကွယ် ဇဝ်ဖြာ။ ဂေ ဟဲ့ ဘူင် တူတ့် ဒွန် မျုဝ်၊ ဒူပ် ဆီချာ ပီ ကာလာင် ဇဝ်ဖြာ ဒီ အာမုဝ်ဆဲ၊ တဲး န့ ကော ဟွတ့်။ 33 ဝါယ် အန် တီ ဂေ ဒူအီ ဝီ အာပ် ထိုပ် ဘိက် ဘွတ် တွိုန် ဒီ အာမုဝ်ဆဲ။ ဂေ ဒိုဝ်း ဘော ထိုပ် ဘိက်၊ ဘော အာဇ ပီ လုဝ် တာ ဒူအီ ခဲင် ထိုပ် ဘိက် တွိုန်၊ ဒွါ ဒီ အန်။ န့ ဘော မုး မင် ကာကျီပ်၊ ဘဲန်၊ ရဲပ် အီ ပ့လွ့ ခဲင် ခ့ဝင် ပီ ဒိုက် ဒီ ဘဲန် ဘော ရွင့် ဂေ စေန့် ရွင့်။ 34 န့ မုး ဘော ဟုန် မာဘူ အီ ဘဲန် ကာတု ပီ စုတ် ဂေ ဆီနမ် ရေန့်၊ ဘော ဟုန် မာမက် အိုမ်၊ ဘော ဘိက် ဂွင့် အီ ကွယ် ဒီ အာတ့် ဇီဒိူက်၊ 35 ဘော ဇီဒိူက် အီ တဲး အီ နပ် လွင် ဇဝ်ဖြာ ဘော မင် ဂွတ် ဇီဒိူက် ဘော ဆီဘ့လိုက် ဒဲင် ဇီဒိူက် အီ မုး ဒူင် ပီ ကာတုန့် ဇဝ်ဖြာ ဒီ ဒူအီ။ 36 န့ မုး ဘော ကာစှူင့် ပီ ဘ့လေး ဂေ ခါမုန် ဘော ကြုဝ်ကြာမ် အီ ကွယ် ဒဲင် ကာစှူင့် တွိုန် ဘော ခါမုန် ပီ အုန် ဒူအီ ဒီ အာတ့် ဇဝ်ဖြာ နာ ဒဲင် ကာစှူင့် တွိုန် 37 ဘော ဒင် ငဝ် အွမ် အီ မိုဝ်း ရာ ဘူ ရာ၊ အီ မုး ခြိဝ် ဘွတ် ဘော ဒူင် ဒီ ဘ့လေး ငဝ် အွမ် အီ ကွယ် ဒဲင် ရာ အန် တွိုန် ဘော ကြုဝ် ဘဲန် မျုဝ် ဘဲန် မျုဝ် ပီ တာ ဂေ ဒေါ လိုမ်လာ ဂေ ဒင် ငဝ် အွမ် ဘော နာမန် ပီ လုဝ် ဟပ် ဂေ ခဲင် ငဝ် အွမ်။ 38 န့ မုး ဘော ကာစှူင့် ခြိဝ် ဘော နာမန် ပီ ဒီ ဖဝ်း ဘော ဆီနမ် အုး ငှုန် ပီ ပီဒဝ့် ငဝ် ဘော ဘိက် ဂွင့် နာ အာတ့် မာလုဝ်း ထိုပ် ဘိက် တွိုန်။ 39 န့ မုး ဘော ကာစှူင့် လှူ ပီ ဘူင် ဂေ တာ ဘွင့် ဘော ကာဘဲး ဘွင့် ပီ ဟပ် ဂေ ခဲင် ကာစှူင့် တွိုန် ဘော မင် ဂွတ် ဘော အာဇ ပီ တာ ဂေ ဒေါ လှူ ဂေ၊ ဘော မ့ပါန် တာင် ပီ ဟပ် အိုမ်၊ ဘော စေန့် မ့ပါန် တွိုန်။ 40 န့ မုး ဘော ဘိက် ဂွင့် ပီ ဘ့လေး ဂေ ဒီ ခူပ် ဝဲင် ဘော ရွင့် အန် ဘော စေန့် ရွင့် တီ ဘော ဘိက် ဂွင့် အီ ကွယ် ဒီ အာတ့် မာလုဝ်း ဝဲင် ဘော ဝန် ထိုပ် ဂေ လွှက့် ဝန် ပီ တာ ဂေ ဒီ ရဲင် ဝဲင် ဘော ကြုဝ်ကြာမ် ဒွန် မျုဝ် ပီ ဘ့လေး ဂေ ခဲင် ထိုပ် ဘိက် ဘွတ် တွိုန်။ 41 န့ မုး ဘော ခြိုင် ပီ ဒဝ့် ဂေ၊ တဲး ဂေ ဒူအီ လှူ ဒီ ဇဝ်ဖြာ စှိုပ် ဒေါ လိုပ် ဂေ ခဲင် ထိုပ် ဘိက် ဘွတ်၊ ဘူင် ဂါန် ဇဝ်ဖြာ။ န့ မုး ဘော ခြိုင် ပီ စှိုပ် အာရူန် ဘော ခြိုင် ပီ စှိုပ် ဂွန် အာရူန် ဒေါ လှူ ဂေ ဒီ ဇဝ်ဖြာ။

42 ပါယ် တီ ဂေ ဒူအီ အီဆာရေလ ဟဲ့ ဟွတ့် ဘူင် တူတ့် ဒွန် မျုဝ်၊ တဲး န့ ပီ ပီ ကာလာင် ဇဝ်ဖြာ ဒီ အာမုဝ်ဆဲ တွိုန်။ 43 အာမုဝ်ဆဲ ဝီ ယွတ် ဆီချာ ပဲ့ ဟဲ့ ဘူင် ဂေ။ အန် ဘော ယိုဝ် တူတ့်။ န့ ဟဲ့ မုး ဟဲ့ မှာန်။ ဂေ ဟဲ့ ဒူပ် ဘူင် တူတ့် ဒွန် မျုဝ်၊ တဲး န့ ပီ ပီ ဒွိုမ် ကာလာင် ဇဝ်ဖြာ ဒီ အန်။ ဟဲ့ ဟွတ့်၊ အာမုဝ်ဆဲ ဝီ မွင့်ကာရာ တဲး ဒီ ဂေ ဒူအီ အီ ဘူင် ဂါန် တွိုန်။