1 ပန် တီ ဂေ ဝီ ဒိုဝ်း ဟေ ကာထိန်၊ ဘူင် ကာစှူင့် ဒီ လှူ ဘဲန် မျုဝ် ဘဲန် မျုဝ် ပီ ဒုဝ့် ကာဆိုမ် ငဝ်။ နာ တူင့် အန် ဖန် ကာနိး၊ နာ ကာဝဝ်း အန် ဖန် ကာနိး ဘော နာ စာ အန် အူယ် ကာနိး၊ တဲး န့ မိုဝ်း ဖွုန် ဘ့လာက် ကာလင်။ 2 ဒီ ကာတုဝ့် အန် ဂေ ဘော ဘူင် တဲး န့ ဘတ့် ဘော ဖွုန် ကာတုဝ့်၊ တဲး ဂေ ဘူင် တဲး န့ ဘဲန် အူ ဆိ။ ဝါယ် အန် တီ ဂေ ဝီ ပိတ် ဘွင့်။ 3 ဂေ ဘော ဒိုဝ်း ဘွင့်၊ ဘူင် န့ကြိုဝ်း ပီ ဒီ တာ ဒေါ လှူ ဂေ။ န့ မုး ဘော ကာလုဝ့် ဘော ပုင် ဒီ ဂိတ် ဝဲန် ကာဝှါင် ငဝ်၊ ဘော မင် ဆူက် ဂေ ဆီလယ့် ဟပ် နှာမ် အီ ခြဝ်း ဒီ ကာစှူင့်၊ ဂေ မင် ဇဲတ့် ယင် ဘော ဖာန် ပီ အုန် ငဝ် နာ ခဲင်။ ကြုဝ် ဇိုဝ် တီ ဒွန် မျုဝ်၊ ဂေ ဘူင် တာ ဘွင့်။ 4 ဂေ ဘော ဘူင် ကာဘဲး တာ ဘွင့်၊ ဝီ ဘ့လေး နာ ခဲင် ကာစှူင့် တွိုန်၊ တဲး အန် ကွယ် နာ ခြိုမ် ခြွင့် အီ ကွယ် ရူပ် ကာစှူင့် တွိုန်။ ဂေ တဲး အန် ကွယ် ဒီ ကာတဲ နာ စာ ကာစှူင့် တွိုန်။ 5 ဘော ခ့ဝင် ဘွင့် ဖွုန် ခ့ဝင် ဂေ ဝီ ဘူင်။ ဂေ ဝီ ဒိုက် ခ့ဝင် တီ ဒီ ကာတုဝ့် ကာဘဲး တွိုန် ဘော ဖွုန် ကာတုဝ့်၊ တဲး ဂေ ပွိုန် ဒီ ပ့လွ့ မင် ဂွတ် နာ ခဲင်။ 6 ဟဲ့ ဟွတ့်၊ ဂေ ဘော ဘူင် မင် ဂွတ် အန်၊ ဝီ တာ ဟေ ကာထိန်၊ ဝီ ပိတ် ဘွင့်။ 7 ဝါယ် အန် တီ ဂေ ဘော ပ့လွ့ အုန် မင် ဂွတ် တွိုန် ခဲင် ခ့ဝင် အီ ကွယ် ဘ့လာက် ဒီ ခူပ် ကာစှူင့် တွိုန်၊ တဲး ဂေ ပွိုန် ဒီ ဂွတ် အန်။ ဂေ ဘူင် ကာစှူင့် တွိုန်၊ တာ ဘဲန်၊ တဲး န့ ကာအူင့်။

8 ဝါယ် အန် တီ ဂေ ဘူင် မ့ပါန် ပီ ဟပ် အိုမ် ဘော စေန့် အန်၊ ဝီ တာ ဘွင့်။ ဘွင့် ပီ တာ ဂေ တီ၊ န့ မုး ပီ လှူ ဂေ အီဘိုန့် အီ ဘူင် ဂါန် ဇဝ်ဖြာ ဒီ အာတ့် မာလုဝ်း ထိုပ် ဘိက် ဘွတ်။ ဂေ ဟဲ့ လှူ ဘ့လ ဘွင့်၊ ပီ တာ ဂေ ဘဲန် အဲပ် ဇမ်။

9 ဂေ ဟဲ့ ဟွတ့် ဘူင် ဇိုဝ် တီ ဒွန် မျုဝ်၊ ဂေ ဘော ဘူင် ဝဲင် ထိုပ် ဘိက် ဘွတ်။ ဘ့လာက် နာ တေတ့် အန် ဂေ ဘူင် တဲး န့ မိုဝ်း ဘိက် ဂွင့် တာ ကာတမ် လုယ်။ နာ တူင့် အန် ဂေ ဘူင် တဲး န့ ဘဲန် အူ မာယဝ်း ကာနိး။ 10 ဂေ ဘော ဘူင် ရွင့် အန် အာ ဂိုဝ် ညွင့် ဂေ စေန့် ရွင့် ဘော အာ ဂိုဝ် ဘူင့်။ ဂေ ဘူင် ဘော ရွင့် ဘော စေန့် အန် တာ ဘွင့်။ ဂေ ယီ ဒိုဝ်း ရွိုန်၊ ဘူင် လာဝယ့် ဂေ ဝန် ရွိုန်၊ တဲး န့ ကွယ် ဒီ ကာတဲ ရွင့်၊ တဲး န့ ပ့လူမ်။ 11 ဘ့လာက် နာ ကွာ ဘော တူင့် အူ မာယဝ်း ကာနိး။ ဘော ဘ့လာက် တီ ဟဲ့ မိုဝ်း ရွင့် အာ ဂိုဝ် ညွင့်၊ ဘော စေန့် ရွင့် အီ မုး ဘွင့်၊ မိုဝ်း အာ ဂိုဝ် ဘူင့်။ ရွင့် ဂေ တီ ဘော မိုဝ်း လာဝယ့် ရွိုန် ဂေ ဝန် ရွိုန်။

12 ဘ့လာက် နာ ဂေတ့် ဆီငဲ ဂေ ဘော ဘူင် ဘိက် ဂွင့်၊ တဲး အန် တူင့် ဖန် ဂိုဝ် ကာနိး။ ဂေ ဘော ဘူင် ရွင့် အန် ဂိုဝ် ညွင့် ဘော စေန့် ရွင့် ဂိုဝ် ဘူင့်၊ ဘော လာဝယ့် ရွိုန် ဂေ ညွင့် ရွိုန်၊ အီ ကွယ် ဒီ ရွင့် တွိုန်။ 13 ဝဲင် ဘ့လာက် လေး ဆီငဲ ဘဲန် နာ တျီမ်၊ အန် မုး ဖန် ဂိုဝ် ကာနိး။ 14-15 ဘိက် ဂွင့် အီ ကွယ် ဒီ ခူပ် မာလုဝ်း အူ ဘ့လာက်၊ နာ တူင့် အန် ဟဲ့ မုး ဂိုဝ် ဒီ ဖန် ကာနိး။ ဂေ ဘော ဘူင် ရွင့် အူယ် ညွင့် အာဒါ ဘိက် တီ၊ ဘော စေန့် ရွင့် အူယ် ဘူင့်။ ဒီ ခူပ် မာလုဝ်း ပေါ ဘ့လာက်၊ ဂေ ဘူင် ဘော ဘိက် ဂွင့် ဘော ရွင့် ဂေ စေန့် ရွင့်၊ တဲး န့ ကာရမ် ဘော အာ ဘ့လာက်။ 16 ဘိက် ဂွင့် ပီ ဘ့လေး ဂေ ဒီ ဝဲင် တဲး အန် ပီ လူင့် ဝဲင်၊ ဂေ ဘူင် တူတ့် တာ ဘိက် ကာတမ် လုယ်။ 17 စေန့် ရွင့် ဂေ ဘူင် တာ ဘွင့်၊ ဘော ရွင့် ဂေ ဘူင် တာ ဘွင့်။ ဘော လာဝယ့် ရွင့် ညွင့် ပီ ဒိုက် ဂေ ဒီ ရွင့်၊ ဂေ ဘူင် တာ ရွိုန်။ ဘော ကာဒဲ့ ရွင့် တွိုန် ဒွန် ညွင့်၊ ဂေ ဝီ ပိတ် ရွိုန်။ ပါယ် တီ ရွင့် ဒွန် ရွင့် ဒီ ဝဲင် ဟဲ့ မိုဝ်း ညွင့် ရွိုန်။

18 ဘိက် ဂွင့် ဒီ အာတ့် မာလုဝ်း ဝဲင်၊ ဂေ ဟဲ့ ဘူင် ဝီ တာ ဆေန့် အီ ခွင်၊ အီ ဂုယ် ခွန်၊ အီ ရေန့် ဂဲ ဘော ကာတမ် လုယ်။ န့ မုး ဂါန် ပီ ဘူင် ဒူအီ လှဲဝ် ဒီ စိန့် ဘုဝ်း ဂေ ပယ့်။ ဘိက် ဂွင့် တွိုန် မုး နာ တူင့် အာ ဂိုဝ် ကာနိး၊ နာ စာ အန် ဖန် ကာနိး။ ပါယ် တီ ဘော ဘိက် ဂွင့် ဒီ အာတ့် မာလုဝ်း ဘော ဘိက် ဒီ ခူပ် ဝဲင် ဘော ဝဲင်၊ ဂေ ဟဲ့ ကာရမ်။ 19 ဒီ အာတ့် မာလုဝ်း ဝဲင် န့ ဘော မိုဝ်း ရွင့် ဖွုန် ညွင့် ဘော စေန့် ရွင့် ဖွုန် ဘူင့်။ ဂေ ဘူင် အာတီ၊ တာ ဘွင့်။ ဘော လာဝယ့် အန် ဂေ ဘူင် တာ ရွိုန်။ ကာဒဲ့ ရွင့် တွိုန်၊ ဂေ ဘော ပိတ် ရွိုန်။ 20 ဘော လွှက့် ဝန် ထိုပ် ဘော လွှက့် ဝန် လူင့်၊ ဂေ ဝီ ဘူင် တူတ့် တာ ဘွင့်။

21 အာတီ မုး ကြုဝ် ဘဲန် မျုဝ် ဘဲန် မျုဝ် ပီ တာ ဂေ တဲး ဂေ ပွိုန် ဒီ ဘူင် ထိုပ် ဘိက် ဘွတ်၊ အီ မုး ဒူင် ကွယ် ဇီဒိူက် အီ တဲး ဒူအီ နပ် လွင် ဇဝ်ဖြာ။ န့ မုး ပီ ဒဲမ် ဂေ ခြိုဝ် အာလေဝီ အုန် ဒေါ စ်ု အာမုဝ်ဆဲ ဂေ ဒဲမ် အုန်။ ဒူအီ အီ ဘ်ု ဂေ ဒူအီ ဘူင် ဂါန်၊ အန် မုး အာအီထာမာ အီ မုး ဂွန် အီမာယ် အာရူန် တွိုန်။

22 န့ ယီ မုး အာဘေဇာလေန်၊ အန် ဟဲ့ ဘူင် တူတ့် ဒွန် မျုဝ်၊ ပီ စ်ု ဇဝ်ဖြာ ဒီ အာမုဝ်ဆဲ။ အာဘေဇာလေန် မုး ဂွန် အာအူရီ။ အာအူရီ တွိုန် မုး ဂွန် အာဟူရာ၊ အီ မုး ခြိုဝ် အာယူဒါ။ 23 ဘော အာအုဝ်ဟုဝ်လီအာပ် ဝီ ဘူင် ဂါန် ဒီ ရိုမ်။ အာအုဝ်ဟုဝ်လီအာပ် မုး ဂွန် အာဟီဆာမာတ် အီ မုး ခြိုဝ် အာဒါန်။ ဒူအီ တွိုန်၊ ဂါယ် မုး လက်ဆာမာ အီ လှဲဝ် ဒီ ဘူင် ဒွန် မျုဝ် ဘော လှဲဝ် ဒီ ဘူင် ဘ့လေး ဘုဝ်း ဂေ ပယ့်။ ဂါယ် ဘော လှဲဝ် ဒီ စိန့် ဘုဝ်း ဂေ ပယ့် တာ ဆေန့် အီ ခွင်၊ အီ ဂုယ် ခွန်၊ အီ ရေန့် ဂဲ ဘော ကာတမ် လုယ်။ 24 ခြိဝ် ပီ လှူ ဂေ ဒူအီ တဲး န့ ဘဲန် ပီ လှူ မာဝတ် ဝိဝ် မာဝတ် ဝေန့်၊ န့ မုး ခြိဝ် ပီ တာ ဂေ ဘူင် ဒွန် မျုဝ် ခဲင် ထိုပ် ဘိက် ဘွတ် တွိုန်။ စန် အန် အာ ဂိုဝ် ဒီ ဒိမ် ထာလေန် ဒီ ဘူ မာယဝ်း ဒီ အူယ် ဂိုဝ် ဆေခေန်။ ဂေ ဆ ခြိဝ် တီ၊ တာ ဘ့လေ ဆ ခဲင် ထိုပ် ဘွတ်။^a

25 ရွိုန် ပီ တိုယ် ဒူအီ လှူ၊ စန် အန် ဘောကာဂ့လျီတ် မုး အူ မာယဝ်း ထာလေန် ဒီ အူ ဟြဲန့် ဒီ ဘူ မာယဝ်း ဒီ ဘူ ဂိုဝ် ဒီ ဖန် ဆေခေန်။ ဂေ ဆ ရွိုန် တီ၊ တာ ဘ့လေ ဆ ခဲင် ထိုပ် ဘိက် ဘွတ်။^b 26 ရွိုန် တီ န့ မုး ရွိုန် ပီ ဒွါ အီမာယ် ဒွန် အီ။ အူ ဝီ လုဝ် ဒွါ အူ ဘေခါ။ န့ ပီ ရွိုန် အူ ခွါယ်။ ရွိုန် တွိုန် မုး ပီ ဂဲပ် ဂေ ဒီ အီမာယ် အီ ဟပ် စိူဝ် ဂေ ခဲင် ဇာရာင် ဒေါ နုဝ့် အာဆာက် ဂေ အာ ဂိုဝ် ဆီနမ် ဟုဝ့် နာ ဒဲင်။ အီမာယ် တွိုန်၊ ဂေ ဘောကာဂ့လျီတ် ဟဲ့ မိုဝ်း ဒဝ် ဆဲန် ဒီ အူယ် ဟြဲန့် ဒီ ဖန် မာယဝ်း ဒီ ဖန် ဂိုဝ် ဝီ။ 27 ရွိုန် အာဒါ အူ မာယဝ်း ထာလေန် တွိုန်၊ ဂေ ဟဲ့ တာ ဘူင် စေန့် ရွင့် အီ ကွယ် ခဲင် ထိုပ် ဘိက် ဘွတ် တွိုန် ဘော စေန့် ရွင့် ပီ ဟွယ် ဂေ ဘိက် ဂွင့် ခဲင် ထိုပ် ဘိက် ဘွတ် တွိုန်။ စေန့် ရွင့် တွိုန် န့ မိုဝ်း အူ မာယဝ်း ဘူင့်။ ဂေ ဘော တာ ရွိုန် အူ မာယဝ်း ထာလေန်၊ တာ အူ ဘူင့် အူ ထာလေန်။^c 28 န့ ယီ မုး ရွိုန် အူ ဟြဲန့် ဒီ ဘူ မာယဝ်း ဒီ ဘူ ဂိုဝ် ဒီ ဖန် ဆေခေန် တွိုန်၊ ဂေ တာ ဘူင် လာဝယ့် အီ ဒိုက် ဒီ ရွင့် တွိုန်။ ဒဲင် နီ၊ ဂေ ဘော တာ ရွိုန် တီ၊ ပိတ် ဒီ ကာဒဲ့ ရွင့် ဘော ဘူင် ဝန် ရွိုန် အီ ကွယ် ဒီ ရွင့် တွိုန်။

29 ဘွင့် တွိုန် ပီ လှူ ဒူအီ၊ န့ စန် ဘူ ဂိုဝ် ထာလေန် ဒီ အာ ဟြဲန့် ဒီ ဖွုန် မာယဝ်း ဆေခေန်။^d 30 ဘွင့် တီ၊ ဂေ တာ ဒေါ ဘူင် ဂေ စေန့် ရွင့် ဒီ မာလုဝ်း ထိုပ် ဘိက် ဘွတ်။ ဂေ ဘော တာ ဘွင့် တီ ဘူင် ကာစှူင့် လှူ ဒီ ဇဝ်ဖြာ ဘော ကာဘဲး ပီ ဘ့လေး ဂေ နာ ခဲင် ကာစှူင့် လှူ တွိုန် ဘော အာဇ ဒွန် မျုဝ် ပီ တာ ဂေ ဒေါ လှူ ဂေ ဒီ ကာစှူင့် တွိုန်။ 31 ဂေ ဘော ဘူင် စေန့် ရွင့် အီ ကွယ် ဒီ ဝဲင် ထိုပ် ဘိက် ဘွတ် တွိုန်၊ ဘော စေန့် ရွင့် အီ ကွယ် ဒီ မာလုဝ်း ဝဲင် ဘော ဒီ လွှက့်။ ဂေ ဘူင် ဘော ဝန် ထိုပ် ဂေ လွှက့် ဒီ ရဲင် ဝဲင် တွိုန်။ ဂေ ဘူင် တူတ့် ဇိုဝ် တီ၊ တာ ဘွင့် တီ။