1 အာဘေဇာလေန် ဘူင် ဇီဒိူက် တာ ဟေ ကာထိန်။ နာ တူင့် အန် အာ ကာနိး ဒီ အူ ကာဆာန်၊ နာ ကာဝဝ်း အန် အူ ကာနိး ဒီ အူ ကာဆာန် ဘော နာ စာ အန် အူ ကာနိး ဒီ အူ ကာဆာန်။ 2 ဇီဒိူက် တီ အန် ဝီ ပိတ် ခြိဝ် ဘွတ်၊ ဘော နာ ရေတ့် နာ ခဲင်။ အန် ဘော ဒိုဝ်း ခြိဝ် ဘူင် ဘာင် အီ ရူပ် ဇီဒိူက်။ 3 အန် ဘော ဘူင် ခ့ဝင် ခြိဝ် ဖွုန် ခ့ဝင်၊ ဒိုက် ဒီ စေန့် အန် ဘော ဖွုန် စေန့်၊ တဲး န့ ကွယ် အူ ဘ့လာက် အာ ခ့ဝင်။ 4 ဟဲ့ ဟွတ့်၊ အန် ဒိုဝ်း ဟေ ကာထိန်၊ ဘူင် ဘော မင် ဂွတ်၊ ဝီ ပိတ် ခြိဝ်။ 5 မင် ဂွတ် တီ၊ အန် ဝီ ပ့လွ့၊ တဲး န့ စျှီပ် ဟာဝ် ခဲင် ခ့ဝင် တွိုန်၊ တဲး ဂေ ပွိုန် ဒီ ဂွတ် ဇီဒိူက်။

6 ဝါယ် အန် တီ အန် ဝီ ဘူင် ဆီဘ့လိုက် ကာဘိတ် ဇီဒိူက်၊ တာ ခြိဝ် ဘွတ် ဒီလူယ်။ နာ တူင့် ဝီ မုး အာ ကာနိး ဒီ အူ ကာဆာန် ဘော နာ ကာဝဝ်း အန် အူ ကာနိး ဒီ အူ ကာဆာန်။ 7 ဟဲ့ ဟွတ့်၊ အန် ဝီ ဒွက် ခြိဝ်၊ ဘူင် ရာင် အာမူ အာမာတ် ဇဝ်ဖြာ အီ မိုဝ်း ဖျီင် ဘော အာ ကာဒင်၊ တဲး ဂါယ် ကွယ် နာ ဒဲင် ဆီဘ့လိုက်။ 8 အန် ဘ့လေး နာ ဒဲင် ဆီဘ့လိုက် ဒီ ခူပ် အန်၊ အူ ခူပ် အူ ကာဒင်။ ဘော ရာင် အာမူ အာမာတ် ဇဝ်ဖြာ ဘော ဆီဘ့လိုက်၊ အန် ဘူင် တဲး န့ ဘဲန် အူ ဆိ၊ ကွဲ့ တဲး န့ ကာဒိုက်။ 9 ရာင် အာမူ အာမာတ် ဇဝ်ဖြာ ဘော အာ ကာဒင်၊ ဂါယ် စုဝ့် ဖျီင် ဂါယ် ဆူင့် နာ အာတ့်၊ တဲး ဖျီင် ဝီ ကွယ် နာ ဒဲင် ဆီဘ့လိုက်။ ဂါယ် ဝီ လာယ် မာငး၊ မုတ် ယွတ် ဆီဘ့လိုက်။

10 ဝါယ် အန် တီ ဂေ ဘော ဘူင် ကာစှူင့် အူ ဘူင့်။ ဂေ ဘူင် တာ ဟေ ကာထိန်။ နာ တူင့် အန် အာ ကာနိး၊ နာ ကာဝဝ်း အန် အူ ကာနိး၊ နာ စာ အန် အူ ကာနိး ဒီ အူ ကာဆာန်။ 11 ဂေ ဝီ ပိတ် ခြိဝ် ဘွတ် ဒီ ကာစှူင့် တီ။ ဂေ ဘော ဘူင် ဘာင် ကာစှူင့် တီ၊ ဝီ တာ ခြိဝ်။ 12 ဟဲ့ ဟွတ့်၊ ဂေ ဘူင် ဘာင် အန် ပေါ အူ ဘာင်၊ တဲး နာ တျီမ် အန် အူ ကာဘာ ဒဲ၊ ဝီ ဒိုဝ်း ခြိဝ် ဒိုက် ဒီ ခူပ် ဘာင် တီ၊ တဲး န့ ရူပ် ကာစှူင့်။ 13 ဝါယ် အန် တီ ဂေ ဘူင် ခ့ဝင် ခြိဝ် ဖွုန် ခ့ဝင်။ ဟဲ့ ဟွတ့်၊ ဂေ ဝီ ဒိုက် ဒီ စေန့် ကာစှူင့် တွိုန်၊ တဲး ဂေ ကွယ် ဘော ဖွုန် ကာတုဝ့်။ 14 ဂေ ဒိုက် ခ့ဝင် တီ နာ ခြိုမ် ဘာင် အန်၊ တဲး ဂေ ပွိုန် ဒီ ပ့လွ့ မင် ဂွတ် ခဲင် ခ့ဝင်၊ တဲး ဂေ ပွိုန် ဒီ ဂွတ် ဘော ကာစှူင့် တီ။ 15 ဂေ ဝီ ဘူင် မင် ဂွတ် အန်၊ တာ ဟေ ကာထိန်၊ ပိတ် ခြိဝ်။ 16 ဂေ ဘော ဒိုဝ်း ခြိဝ် ဘူင် ဆီလယ့် ဘော ဖာန်၊ ကာပဝ် ဘော မ့ပါန် ပီ လုဝ် တာ ဂေ ဒေါ လှူ ဂေ ဒီ ကာစှူင့် တီ။

17 ဝါယ် အန် တီ ဂေ ဘော ဘူင် ဒင် ငဝ် အွမ် အူ ဘူင့်။ ဂေ ဝီ တာ ခြိဝ် ဘွတ်၊ ဒွက် တဲး အန် ဘဲန် ဘော ဒင် ဘော ဂဲန် အန် ဘော ရာင် ဘုဝ်း ဘော ဘုဝ်း ဒိုမ် ဘော ဘုဝ်း ဘြး။ ဂေ ဘော ဘူင် တူတ့် ဒွန် မျုဝ် တဲး န့ ဘဲန် အူ ဆိ၊ ကွဲ့ တဲး န့ ကာဒိုက်။ 18 ဒင် ငဝ် အွမ် တီ မိုဝ်း ရာ ဒဝ် ရာ အီ လေး ခဲင် ဂဲန် အန်၊ အူ ဘ့လာက် အူယ် ရာ။ 19 ရာ အန် အူ ရာ၊ ဂေ ဝီ ဘူင် အာရိုပ် ဘုဝ်း အူယ် ဘုဝ်း။ ဂေ ပီ ဘုဝ်း ဆာခေတ်။ ဘုဝ်း တွိုန် ဒွန် ပ့လုဝ့် အန် မိုဝ်း ဘော ဘုဝ်း ဒိုမ် ဘော ဘုဝ်း ဘြး။ ဂေ ဘူင် တဲး ဘော ဒဝ် ရာ ကာရမ်။ 20 ဒီ ဂဲန် ဒင် ငဝ် အွမ် တွိုန် ဂေ ယီ ဘူင် ရာင် ပီ ဘုဝ်း ဆာခေတ် ဖွုန် ဘုဝ်း၊ ဘော ဘုဝ်း ဒိုမ် ဘော ဘုဝ်း ဘြး။ 21-22 ဂေ ဘ့လေး ဘုဝ်း တီ နာ ခြိုမ် ရာ အန် အူယ် ဂူ၊ အူ ဂူ အူ ဘုဝ်း။ န့ ဘဲန် ရာ အန် ဒဝ် ရာ။ ဘော ဂဲန် ဂေ ရာ တီ ဘော ဘုဝ်း၊ ဂေ ဟဲ့ ဘူင် တဲး န့ ဘဲန် အူ ဆိ၊ ဒွက် ခြိဝ် ဘွတ်၊ ကွဲ့ တဲး န့ ကာဒိုက် မာဆေ။

23 ဟဲ့ ဟွတ့်၊ ဂေ ဘော ဘူင် ဒူင် ဒီ ဘ့လေး ငဝ် အီ ကွယ် နာ ဒဲင် ဂဲန် ဂေ ရာ ဒီ ဒင် ငဝ် အွမ် တီ။ န့ မိုဝ်း ဒူင် ဒီ ဘ့လေး ငဝ် အွမ် ဘူ ဘူင့်။ ဂေ ဘော ဘူင် န့ကျီပ် ဘော မ့ပါန် ပီ အုန် ဒူအီ အာဇ တွိုန်၊ ဂေ ဘူင် တူတ့် ဒွန် မျုဝ်၊ တာ ခြိဝ် ဘွတ်။ 24 ဘော ဒင် ငဝ် အွမ် ဘော အာဇ ပီ တာ ဂေ ဒေါ လိုမ်လာ ဂေ ဒင် ငဝ် အွမ် တွိုန်၊ ဂေ ဘူင် တူတ့် ဒွန် မျုဝ် တာ ခြိဝ် ဘွတ် အာဒါ အူ ထာလေန်။^a

25 ဝါယ် အန် တီ ဂေ ဝီ ဘူင် ကာစှူင့် လှူ ဆီနမ် အုး ငှုန် ဒီ ဇဝ်ဖြာ။ ဂေ ဝီ တာ ဟေ ကာထိန်၊ ဘူင် ကာစှူင့် တီ၊ နာ တူင့် အူ ကာနိး၊ နာ ကာဝဝ်း အူ ကာနိး၊ တဲး အန် မိုဝ်း ဖွုန် ဘ့လာက် ကာလင်။ ဂေ ဘော ဘူင် နာ စာ အန် အာ ကာနိး။ ဒူင် ကာတူတ့် ဘတ့် အီ ကွယ် ဒီ ကာတုဝ့် ကာစှူင့် တွိုန်၊ ဘော ကာစှူင့်၊ ဂေ ဝီ ဘူင် တဲး န့ ဘဲန် အူ ဆိ။ 26 ဂေ ပိတ် ခြိဝ် ဘွတ် ဘော ဘ့လာက် နာ ဒဲင်၊ နာ ရေတ့် ဖွုန် ဘ့လာက် အန် တွိုန် ဘော ဒူင် ကာတူတ့် ဘတ့် အန် တွိုန်။ ပန် တီ ဂေ ဘူင် ဘာင် ခြိဝ် ဘ့လေး ရူပ် ကာစှူင့် တွိုန်။ 27 ဂေ ဝီ ဘူင် ခ့ဝင် ခြိဝ် ဘော အာ ဘ့လာက် အာ ဘူင့်၊ တဲး ဂါယ် လာယ် ကာဆိူဝ်၊ ဝီ ဒိုက် နာ ခြိုမ် ဘာင် အန်၊ တဲး ဂေ ပွိုန် ဒီ ပ့လွ့ မင် ဂွတ်၊ တဲး ဂေ ပွိုန် ဒီ ဂွတ် ကာစှူင့် တီ။ 28 ဘော မင် ဂွတ် အန် ဂေ ဘူင် တာ ဟေ ကာထိန်၊ ဝီ ပိတ် ခြိဝ်။

29 ဝါယ် အန် တီ ဂေ ဝီ ဘူင် နာမန် ဘွတ် ပီ လုဝ် ဖဝ်း။ ဟဲ့ ဟွတ့်၊ ဂေ ဘူင် ဘော ဆီနမ် အုး ငှုန် ပီ လုဝ် ဒုဝ့် ခဲင် ငဝ်။ ဒူအီ လှဲဝ် ဒီ ဘူင် ဆီနမ် အုး ငှုန်၊ အန် ဟဲ့ ဘူင် ဘော ဆီနမ် တီ။