ပါယ် တီ အာဘေဇာလေန် ဘော အာအုဝ်ဟုဝ်လီအာပ် ဘော ဒူအီ ဟဝ် အီ လှဲဝ် ဒီ ဘူင် ဘဲန် မျုဝ် ဘဲန် မျုဝ်၊ ဂေ လုဝ် ဘူင် ဒွန် မျုဝ် တဲး န့ ပီ ပီ စ်ု ဇဝ်ဖြာ ဂေ ဘူင်။ န့ မုး ဇဝ်ဖြာ အီ တဲး ဂေ မိုဝ်း အာငျာန် ပီ လုဝ် ဂေ၊ တဲး ဂေ ပွိုန် ဒီ ဘူင် ထိုပ် ဘိက် ဘွတ်။

2 အာမုဝ်ဆဲ ဟဲ့ ဟွတ့် ကာလာင် ဂြုဝ်း တီ ဒီ ဒူအီ ကိူန်၊ အန် ဝီ ဒဲ့ အာဘေဇာလေန် ဂါယ် အာအုဝ်ဟုဝ်လီအာပ် ဘော ဂေ ဒူအီ ဟဝ် အီ ပီ ဒွါ ဇဝ်ဖြာ အာငျာန်၊ တဲး ဂေ ပွိုန် ဒီ ဘူင် ဘဲန် မျုဝ် ဘဲန် မျုဝ်။ အန် ဒဲ့ ဂေ တး ဇမ် ဒူင် ကွယ် အန်။ အန် ဘော ဒဲ့ ဒွန် အီ အီ မိုဝ်း နဝ်း ဆီ ဘူင် ဂါန် တွိုန်။ 3 အာမုဝ်ဆဲ ဝီ အာပ် ဒီ ဂေ ကြုဝ် ဒွန် မျုဝ် ပီ လှူ ဂေ ဒူအီ အီဆာရေလ၊ တဲး ဂေ ဝီ ဘူင် ထိုပ် ဘိက် ဘွတ် တွိုန်။ ဒွန် ဆီငဲ ဆိန့်ဝး ဂေ ဒူအီ ဝီ တး လှူ ဒွန် မျုဝ် ခဲ့ ဆီ လှူ ဂေ။ 4 ပန် တီ ဂေ ဒူအီ အီ ဘူင် ဂါန် ဘဲန် မျုဝ် ဘဲန် မျုဝ်၊ ဂေ ဝီ တး ဇမ် ဒူင် ကွယ် အာမုဝ်ဆဲ။ 5 ဂေ ဝီ တဝ်း ဒီ အန်၊ “ဂေ ဒူအီ တိုယ် ကြုဝ်ကြာမ် ကိူန် ကာဆဝ်၊ တဲး ယေ ဘူင် ဂါန် ပီ စ်ု ဇဝ်ဖြာ ယေ ဘူင် ဒွန် မျုဝ်။ ပဲ့ ဟဲ့ တိုယ် ဂေ၊ န့ ဟဲ့ ကာလွှိုမ် ခဲ့ ပီ လုဝ် ယေ။”

6 ပန် တီ အာမုဝ်ဆဲ စ်ု ဂေ ဒူအီ၊ တဲး ဂေ ဝီ ဟာဝ် ဒွန် ပ့လုဝ့် ခဲင် ဒူင် ချ ဂေ ကာလာင်၊ တဲး ဒူအီ အီဆာရေလ ဒွန် အီ ကော နပ်။ ဂေ လုဝ် တဝ်း၊ “ဘေ အာဝ် ဟူ လုဝ် လှူ မာဆေ၊ တဲး အီ ဘူင် ထိုပ် ဘိက် ဘွတ် တွိုန်။ ဘော အီဘိုန့် ဘော အီမာယ် အာဝ် ဟူ လုဝ် လှူ မာဆေ။” 7 ပါယ် တီ ဂေ ဒူအီ အာဝ် ဟူ လှူ။ ခဲ့ ဟဲ့ လှူ ဂေ၊ န့ ဟဲ့ ကာလွှိုမ် ခဲ့ ပီ လုဝ် ဂေ။

8 ဝါယ် အန် တီ ဂေ လက်ဆာမာ အီ မိုဝ်း အာငျာန်၊ ဂေ ဝီ ဘူင် ထိုပ် ဘိက် ဘွတ် တွိုန်။ ဂေ ဘူင် ဘိက် ဂိုဝ် ဖိူန်။ န့ မုး ဘိက် ပီ ဒဝ့် ဂေ တာ ဆေန့် ကာတမ် လုယ် အီ ဘတ်။ ဂေ တာ ဆေန့် အီ ခွင်၊ အီ ဂုယ် ခွန် ဘော အီ ရေန့် ဂဲ။ ဂေ ဒူအီ လှဲဝ် ဒီ ဒဝ့်၊ လှဲဝ် ဒီ စိန့်၊ ဂေ ဝီ ဘူင် အာရိုပ် အာမူ အာမာတ် ဇဝ်ဖြာ အီ မိုဝ်း ဖျီင် ဒဲင် ဘိက် တီ။ 9 ဘိက် ဂွင့် ဒွန် ဖိူန်၊ ဂေ ဘူင် တဲး န့ ကာရမ်။ နာ တူင့် အာ ဂိုဝ် ဒီ ဒါ ကာနိး၊ နာ ကာဝဝ်း ဖွုန် ကာနိး။ 10 ဘိက် ဖန် ဖိူန် ဂေ ဝီ စိန့် တဲး န့ ကာဒိုက် ဘော ဘဲန် ဖိူန် တာင် အူ ဖိူန်။ ဘိက် ပေါ ဖန် ဖိူန် ဂေ စိန့် တဲး ကာဒိုက် ဘဲန် ဖိူန် တာင် ပေါ အူ ဖိူန်။ 11 ဟဲ့ ဟွတ့်၊ ဂေ ဝီ ဒိုဝ်း ဘိက် အီ ခွင်၊ ဘူင် ဟျုဝ့် အန်၊ ဒိုက် ဒီ ဘ့လာက် နာ ရေတ့် ဘိက် ဖိူန် တာင် ဘော အာ ဖိူန်။ 12 ဟျုဝ့် ဘိက် တွိုန် ဂေ ဘူင် အူ ဘ့လာက် ဖန် ဂိုဝ် ဘူင့်။ ဂေ ဒိုက် ဟျုဝ့် တီ ဒီ ခူပ် ဘိက် တာင် အာ ဖိူန်၊ တဲး န့ ကွယ် ကာဆိူဝ်။ 13 ဝါယ် အန် တီ ဂေ ဝီ ဒိုဝ်း ခြိဝ် ဘူင် မင် ကာကျီပ် ဖန် ဂိုဝ် ဘူင်၊ တဲး ဂေ ပွိုန် ဒီ ကာကျီပ် ဟျုဝ့် ဘိက် တာင် အာ ဖိူန်၊ တဲး ဂါယ် ကာဒိုက်၊ တဲး န့ ဘဲန် ထိုပ် ဘိက် ဘွတ်။

14 ဟဲ့ ဟွတ့်၊ ဂေ ဘော ဘူင် ဘိက် တာ ဟိုက် မာ ပဲ ဂိုဝ် ဒီ အူ ဖိူန်၊ တဲး န့ ဝီ ဆီဘ့လိုက် ထိုပ် ဘိက် ဘွတ် တွိုန်။ 15 ဘိက် ဂိုဝ် ဒီ အူ ဖိူန် တီ၊ တာင် ဂေ ကာရမ်။ နာ တူင့် အူယ် ဂိုဝ် ကာနိး၊ နာ ကာဝဝ်း ဖွုန် ကာနိး။ 16 ဘိက် တီ ဖန် ဖိူန်၊ ဂေ ဝီ စိန့် တဲး ဂေ ကာဒိုက် ဘဲန် ဖိူန် တာင်။ ဘိက် ပေါ ဒဝ် ဖိူန်၊ ဂေ ဝီ စိန့် တဲး န့ ကာဒိုက် ဘဲန် ဖိူန် တာင် ပေါ အူ ဖိူန်။ 17 ဂေ ဘော ဘူင် ဟျုဝ့် အန် ဖန် ဂိုဝ် ဘူင့်၊ ဒိုက် ဒီ ခူပ် ဘိက် ဖိူန် တာင် အာ ဖိူန် တွိုန်၊ အူ ဖိူန် ဖန် ဂိုဝ် ဘူင့်။ ဂေ ဒိုက် တဲး ဂေ ကွယ် ကာဆိူဝ် ဒီ ပေါ အာ ဖိူန်။ 18 ဝါယ် အန် တီ ဂေ ဝီ ဒိုဝ်း ဘွင့်၊ ဘူင် မင် ကာကျီပ် ဖန် ဂိုဝ် ဘူင့်၊ တဲး ဂေ ဝီ ကာကျီပ် ဟျုဝ့် ဘိက် တွိုန်၊ တဲး အန် ဘဲန် ဘိက် တာင် အူ ဖိူန်။ 19 နာ ဒဲင် ဘိက် ဟိုက် မာပဲ တီ၊ ဂေ ဝီ ဘူင် ဘ့လေး ဟုန် မာဘူ အာလူင့်၊ အီ စုတ် ဆီနမ် ရေန့်။ ဝါယ် အန် တီ ဂေ ဝီ ဆီဘ့လိုက် ပေါ အူ ထာပ်၊ တာ ဟုန် မာမက် အိုမ်။

20 ဝါယ် အန် တီ ဂေ ဝီ ဒိုဝ်း ဟေ ကာထိန်၊ ဘူင် ဘဲန် ဝီ ဘ့လေး ကာစွင့်၊ တဲး န့ ဘဲန် ရဲင် ထိုပ် ဘိက် ဘွတ်။ 21 ဘဲန် အူ ဘ့လ ဂေ ဘူင် နာ စာ အန် ဂိုဝ် ကာနိး၊ နာ ကာဝဝ်း အန် အူ ကာနိး ဒီ အူ ကာဆာန်။ 22 ဘဲန် ဒွန် ဘ့လ ဘော မိုဝ်း ဒူတ့် အာ ဒူတ့်၊ တဲး ဂါယ် ကွယ် လာယ် ကာဆိူဝ်၊ တဲး န့ လာယ် ကာစှိုပ်။ ပါယ် တီ ဂေ ဘူင် ဘဲန် ဒွန် ဘ့လ တဲး လာယ် ကာရမ်။ 23 ဘ့လာက် နာ တေတ့် ဂေ ဘူင် ဘဲန် အာ ဂိုဝ် ဘ့လ။ 24 ဂေ ဘော ဒိုဝ်း ရွိုန်၊ ဝီ ဘူင် စေန့် ဒီ ဒင် ဘဲန် တွိုန် ဖွုန် ဂိုဝ် ဘူင့်၊ တဲး ဘဲန် အူ ဘ့လ မိုဝ်း စေန့် အာ ဘူင့်။ 25 ဘ့လာက် နာ ကွာ ဂေ ဘော ဘူင် ဘဲန် ပေါ အာ ဂိုဝ် ဘ့လ။ 26 ဟဲ့ ဟွတ့် ဂေ ဝီ ဘူင် စေန့် ဒီ ဒင် အန် ဖွုန် ဂိုဝ် ဘူင့်။ 27 ဘဲန် အီ ကွယ် ဘ့လာက် နာ ဂေတ့် ဆီငဲ၊ ဂေ ဝီ ဘူင် ဒဝ် ဘ့လ။ 28 ဘဲန် ပေါ အာ ဘ့လ ဂေ ဝီ ဘူင်၊ တဲး ဂါယ် ကွယ် ဒီ ကာတုဝ့် နာ ဂေတ့် ဆီငဲ။ 29 ပါယ် တီ န့ မိုဝ်း ဘဲန် အာ ဘ့လ ကွယ် ဒီ ကာတုဝ့် အူ ကာတုဝ့်၊ တဲး ဂါယ် လာယ် ကာဒိုက် ဒီ ကာဒမ် အန် ကော ဇမ် ဒီ ကာဒဲ့။ ဒီ ကာဒဲ့ အန် အာ ဘ့လ အီ လာယ် ကာဒိုက် တွိုန်၊ ဂါယ် ဝီ ဒိုက် ခ့ဝင် အူ ခ့ဝင်။ ဘော အာ ကာတုဝ့် ဂေ ဘူင် ပါယ် တီ။ 30 န့ မိုဝ်း ဘဲန် ဒါ ဘ့လ ဘော စေန့် ရွိုန် ဂိုဝ် ဒီ ဒဝ် ဘူင့်။ ဘဲန် အူ ဘ့လ မိုဝ်း စေန့် အန် အာ ဘူင့်။

31-32 ဝါယ် အန် တီ ဂေ ဝီ ဒိုဝ်း ဟေ ကာထိန်၊ ဘူင် ရဲပ် ကာလင်၊ တဲး ဂေ ဒိုက် ဒီ ဘဲန်။ ဂေ ဘူင် ဖန် ညွင့် အာဒါ ဘ့လာက် ဘြေတ့် အူ ဘ့လာက်၊ ပေါ ဖန် ညွင့် အာဒါ ဘ့လာက် ဘြေတ့် ပေါ ဘ့လာက်၊ ပေါ ဖန် ညွင့် အာဒါ ဒီ ပန် အီ မုး ဘ့လာက် နာ ဂေတ့် ဆီငဲ။ 33 ရဲပ် ကာလင် အီ ကွယ် ဒီ ကာတဲ ဘဲန်၊ ဂေ ဘူင် တဲး အန် တူင့် ခဲ့ ကာဝဝ်း ရဲင်၊ တဲး အန် ကွယ် ကာတဲ နာ စာ ဘဲန် ရဲင်။ 34 ဘဲန် တွိုန် ဂေ ဝီ ပိတ် ခြိဝ် ဘော ဘူင် ခ့ဝင် ခြိဝ်၊ ဒိုက် နာ ရေတ့် ဘဲန် တွိုန်၊ တဲး ဂေ ပွိုန် ဒီ ပ့လွ့ ရဲပ်၊ တဲး ရဲင် မိုဝ်း ပ့လူမ်။ ဂေ ဘော ပိတ် ခြိဝ် ဒီ ရဲပ်။

35 ဟဲ့ ဟွတ့် ပန် တီ ဂေ ဘော ဘူင် ဘိက် ဂွင့်၊ တာ ဆေန့် ကာတမ် လုယ် အီ ခွင်၊ အီ ဂုယ် ခွန် ဘော အီ ရေန့် ဂဲ။ ဂေ ဒဝ့် တဲး န့ မိုဝ်း ရာင် အာမူ အာမာတ် ဇဝ်ဖြာ အီ မိုဝ်း ဖျီင်။ 36 ဂေ ဘော ဒိုဝ်း ဟေ ကာထိန် ဘူင် ရွင့် ဖွုန် ညွင့်။ ဘော ရွင့် တီ၊ ဂေ ပိတ် ခြိဝ်။ ဟဲ့ ဟွတ့်၊ ဂေ ဝီ ဒိုဝ်း ခြိဝ် ဘူင် ခ့ဝင်။ ဂေ ဘော ဘူင် စေန့် ရွင့် တွိုန် ဖွုန် ဘူင့်၊ တာ ရွိုန်။ 37 ဂေ ဘော ဒိုဝ်း ဆေန့် အီ ခွင်၊ အီ ဂုယ် ခွန်၊ အီ ရေန့် ဂဲ ဘော ဆေန့် ကာတမ် လုယ်၊ ဘူင် ဘိက် ဂွင့် ပီ ဘ့လေး ဂေ ဒီ အာတ့် မာလုဝ်း ထိုပ် ဘိက် ဘွတ်။ န့ မုး ဒူအီ အီ လှဲဝ် ဒီ ဒဝ့် ဘော လှဲဝ် ဒီ စိန့် ဘုဝ်း ဂေ ပယ့်၊ ဂေ ဘူင် ဘော ဘိက် ဂွင့် တီ။ 38 ဝါယ် အန် တီ ဂေ ဘော ဘူင် ရွင့် ဖန် ညွင့်၊ ဘော ခ့ဝင် အီ ဒိုက် ဒီ ရွင့် တီ။ ဂေ ပိတ် ခြိဝ် ဒီ ရွင့် တီ။ စေန့် ရွင့် ဖန် ဘူင့် တွိုန်၊ ဂေ ယီ ဘူင် တာ ဘွင့်။