1 ဝါယ် အန် တီ အာမုဝ်ဆဲ ဝီ ဒဲ့ ဂေ ဒူအီ အီဆာရေလ၊ တဲး ဂေ တး ကာဇု။ ဟဲ့ ဟွတ့်၊ အန် ဝီ တဝ်း ဒီ ဂေ၊ “ဒေါ တီ နီ အုဝ် ဒီ ဝီ ကာလာင် ဒီ ဘေ ဒွန် မျုဝ် ပီ စ်ု ဇဝ်ဖြာ ဘေ ဘူင်။ 2 ဒဝ် ဆီငဲ ဘေ လုဝ် ဘူင် ဂါန် ဘေ။ ဆီငဲ မ့ဘူ မုး ဆီငဲ ဒီလှဝ်၊ ဆီငဲ ဘွတ်။ ဘေ လုဝ် အုန် ဂါန် ဘေ၊ ဒီလှဝ် ဘော ကြိုပ် ဇဝ်ဖြာ။ ဆေ န့ ယီ မိုဝ်း ဒူအီ ဘူင် ဂါန် ဆီငဲ မ့ဘူ၊ ဘေ လုဝ် ငဝ်း ယမ် အာဆာက် အန်။ 3 ဒေါ ဆီငဲ ဒီလှဝ် ကွဲ့ ဘုတ် ငဝ် ခဲင် ကာင် ဘေ။”

4 ဝါယ် အန် တီ အာမုဝ်ဆဲ ဝီ တဝ်း ဒီ ဂေ ဒူအီ အီဆာရေလ၊ “ဇဝ်ဖြာ ဝီ စ်ု ဘေ ဘူင် ပေါ အူ မျုဝ်။ 5 ဘေ လုဝ် တိုယ် ကြုဝ်ကြာမ် ဘေ ဒွါ ဒီ ဇဝ်ဖြာ။ အာဆေ မိုဝ်း နဝ်း ဆီ လှူ ဒီ ဇဝ်ဖြာ၊ တဲး အန် ဒိုဝ်း လှူ ဘော ခြိဝ်၊ ရွိုန် ဂေ ဘွင့်။ 6 ဘော ဆေန့် အီ ခွင်၊ အီ ဂုယ် ခွန် ဘော အီ ရေန့် ဂဲ၊ ဘော ဘိက် ပီ တာ ဂေ ကာတမ် လုယ် ဂေ ဟိုက် မာပဲ 7 ဘော ဟုန် မာဘူ အီ စုတ် ဆီနမ် ရေန့်၊ ဘော ဟုန် မာမက် အိုမ်၊ ဘော ဟေ ကာထိန်။ 8 ဘေ ပွိုန် ဒီ လှူ ဘော နာမန် ပီ လုဝ် ဟပ် ခဲင် ငဝ် ရာင် ဘော န့ကြိုဝ်း ဆီနမ် အုး ငှုန် အီ လုဝ် ပီဒဝ့် ဒီ ငဝ် ဂေ န့ကြိုဝ်း နာမန် အုး ငှုန် ပီ ဒီ လုဝ် ဖဝ်း 9 ဘော ဆဲန့် ဝွင့် လုယ် ဂေ ဆဲန့် ဒွန် မျုဝ် ပီ လုဝ် ဒိုက် ဒီ ဆီတုဝ် အေဖူတ် ဂါယ် ဟူ ပီ ဘ့လေး အာရူန် ဒီ ဘင်နဝ်း အန်။ ဘေ လုဝ် ဒိုဝ်း ဒွန် မျုဝ် ဇိုဝ် တီ၊ ဝီ လှူ ဒီ ဇဝ်ဖြာ။”

10 ဝါယ် အန် တီ အာမုဝ်ဆဲ ဝီ တဝ်း ဒီ ဂေ၊ “ကာတဲ ဘေ၊ အာဆေ မိုဝ်း အာငျာန်၊ အာဆေ လှဲဝ် ဒီ ဘူင် ဘဲန် မျုဝ် ဘဲန် မျုဝ်၊ တဲး အန် တး၊ တဲး အန် ဘူင် ဒွန် မျုဝ် ပီ စ်ု ဇဝ်ဖြာ အေ ဘူင်။ 11 ဂေ ဒူအီ အီ လှဲဝ် ဒီ ဘူင် ဒွန် မျုဝ်၊ တဲး ဂေ ဝီ ဘူင် ထိုပ် ဘိက် ဘွတ် ဘော ဘိက် အီ ဘဲန် ကာတု အန် ဘော မင် ကာကျီပ် ဘော ဘဲန် ဂေ ရဲပ် အန်။ တဲး ဂေ ဘူင် ဘော ရွင့် ဂေ စေန့် အန်။ 12 ဂေ လုဝ် ဘူင် ဘော ဇီဒိူက် ဘော ဆီဘ့လိုက် အန် ဘော မင် ဂွတ် အန် ဘော ဘိက် ဂွင့် အီ ကွယ် နာ အာတ့် ဇီဒိူက် တွိုန်။ 13 ဂေ လုဝ် ဘူင် ဘော ကာစှူင့် ပီ လုဝ် ဘ့လေး ခါမုန် ဘော မင် ဂွတ် ကာစှူင့် တီ ဘော အာဇ ဒွန် မျုဝ် အီ ကွယ် ဒီ ကာစှူင့် ဘော ခါမုန် ပီ လုဝ် လှူ ဒီ ဇဝ်ဖြာ။ 14 ဂေ ဘော လုဝ် ဘူင် ဘော ဒင် ငဝ် အွမ် အီ တဲး န့ ဘ့လာင် ဘော အာဇ ပီ တာ ဂေ ဒေါ လိုမ်လာ ဂေ ဒင် ငဝ် အွမ် တီ ဘော ဆီလယ့် ဘော နာမန် ပီ ဟပ် ဂေ ခဲင် ငဝ် အွမ်။ 15 ဂေ လုဝ် ဘူင် ဘော ကာစှူင့် ပီ လှူ ဆီနမ် အုး ငှုန် ဘော မင် ဂွတ် အန် ဘော ဆီနမ် အုး ငှုန် ဘော နာမန် ပီ ဒီ ဖဝ်း။ ဂေ ဘော လုဝ် ဘူင် ဘိက် အီ ဂွင့် ဒီ အာတ့် မာလုဝ်း ထိုပ် ဘိက် ဘွတ် 16 ဘော ကာစှူင့် လှူ ဒုဝ် ဆတ်ဒါဝါ ဘော ကာဘဲး ဘွင့် ပီ ဒီ ဟပ် ခဲင် ကာစှူင့် တီ ဘော မင် ဂွတ် အန် ဘော အာဇ ပီ တာ ဒူအီ ဒေါ လှူ ဂေ ဒဲင် ကာစှူင့် တီ ဘော မ့ပါန် တာင် ဂေ စေန့် အန်။ 17 ဂေ လုဝ် ဘူင် ဘော ဘိက် ဂွင့် ပီ လုဝ် ဘ့လေး ဒီ ဝဲင် ဘော ရွင့် အန် ဘော စေန့် ရွင့် ဘော ဘိက် ဂွင့် ပီ လုဝ် ဘ့လေး ဒီ အာတ့် မာလုဝ်း ဝဲင် တွိုန်။ 18 ဂေ လုဝ် ဘူင် ဘော လွှက့် ဝန် ထိုပ် ဂေ လွှက့် ဝန် ရဲင် ဝဲင် ဘော ဝန် ပီ လုဝ် တာ။ ဂေ ဒူအီ အီ လှဲဝ် ဒီ ဘူင်၊ ဂေ လုဝ် ဘူင် တူတ့် ဒွန် မျုဝ် ဇိုဝ် တီ။ 19 ဟဲ့ ဟွတ့်၊ ဂေ လုဝ် ဝီ ဘူင် ခြိုင် ဘွတ် ပီ စှိုပ် ဂေ ဒူအီ အီ လှူ ဒီ ဇဝ်ဖြာ ဒေါ လိုပ် ဂေ နာ ခဲင် ထိုပ် ဘိက် ဘွတ်၊ ဘူင် ဂါန် ဇဝ်ဖြာ။ ဘော ခြိုင် ပီ ဒီ တာ အာရူန် ဘော ခြိုင် ဂွန် အာရူန် ပီ စှိုပ် ဂေ ဒေါ လှူ ဂေ ဒီ ဇဝ်ဖြာ၊ ဂေ လုဝ် ဘူင်။” အာမုဝ်ဆဲ ကာလာင် တဲး ဂေ ဒူအီ ကိူန် ပွိုန် ဒီ ထူမ်။

20 အန် ဟဲ့ ဟွတ့် ကာလာင် ဂြုဝ်း တီ၊ ဂေ ဒူအီ အီဆာရေလ ဒွန် အီ ဝီ ဝေန့် လေး ဒူင် ကွယ် အာမုဝ်ဆဲ တွိုန်။ 21 အာဆေ ယီ မိုဝ်း နဝ်း ဆီ လှူ၊ အန် ဝီ ဒိုဝ်း ကြုဝ် ပီ ဒီ လှူ အန် ဒီ ဇဝ်ဖြာ၊ ဟာဝ် ဒွါ ဒီ အာမုဝ်ဆဲ၊ တဲး ဂေ ပွိုန် ဒီ ဘူင် ထိုပ် ဘိက် ဘွတ် ဘော ကြုဝ် ဒွန် မျုဝ် ပီ လုဝ် ဂေ ဒေါ ဘူင် ဂေ ဂါန် ဇဝ်ဖြာ။ ဂေ ဘော လှူ ဒွန် မျုဝ် ပီ လုဝ် ဂေ၊ တဲး ဂေ ပွိုန် ဒီ ဘူင် ခြိုင် ဘွတ် တွိုန်။ 22 အာဆေ မိုဝ်း နဝ်း ဆီ လှူ၊ ဂေ ဒွန် ဝီ ဒွန် ဝီ ဘော တး ဒွါ ခြိုင် ခြိဝ် အန်။ န့ ဘော မုး ဂန်ဒဲ၊ ဘီဟျဝ့်၊ ဆီကာနူ ဂေ ခြိုင် ခြိဝ် ပီ တာ ဂေ ဘဲန် မျုဝ် ဘဲန် မျုဝ်။ ဂေ ဒွန် အီ တး လှူ ခြိုင် ခြိဝ် တွိုန် ဒီ ဇဝ်ဖြာ။ ဘော ဂေ အီမာယ် အီဘိုန့်။ ဂေ ဘော လှူ ကြုဝ် ဇိုဝ် တီ၊ မာဝတ် ဝိဝ် မာဝတ် ဝေန့် ဒီ အာတ့် ဇဝ်ဖြာ။ 23 အာဆေ ယီ မိုဝ်း ဆေန့် အီ ခွင်၊ အီ ဂုယ် ခွန် ဘော အီ ရေန့် ဂဲ၊ အာဆေ ဘော မိုဝ်း ဘိက် ကာတမ် လုယ် ဘော ဟိုက် မာ ပဲ ဘော ဟုန် မာဘူ အီ စုတ် ဆီနမ် ရေန့် ဘော ဟုန် မာမက် အိုမ်၊ အန် ဘော တိုယ် လှူ တူတ့် ကြုဝ် ဇိုဝ် တီ ဒီ ဇဝ်ဖြာ။ 24 အာဆေ ယီ မိုဝ်း နဝ်း ဆီ လှူ ရွိုန် ဂေ ဘွင့်၊ အန် ဝီ တိုယ် လှူ ဘော ကြုဝ် တီ ဒီ ဇဝ်ဖြာ။ ဒွန် အီ အီ မိုဝ်း ဟေ ကာထိန်၊ အန် ဘော ဒိုဝ်း ဒွါ ဒီ ဂေ၊ တဲး ဂေ ပွိုန် ဒီ ဘူင် ဘဲန် မျုဝ် ဘဲန် မျုဝ် ပီ လုဝ် တာ ဂေ ဟေ ကာထိန် တွိုန်။ 25 ဂေ အီဘိုန့် ဒွန် အီ အီ လှဲဝ် ဒီ ဘတ် ဆေန့်၊ ဂေ ဘော တိုယ် ဆေန့် ပီ ဘတ် ဂေ။ န့ မုး ဘော ဆေန့် အီ ခွင်၊ အီ ဂုယ် ခွန်၊ အီ ရေန့် ဂဲ ဘော ကာတမ် လုယ်။ ဂေ ဝီ လှူ ဒွန် မျုဝ် ဇိုဝ် တီ။ 26 ဘော ဂေ အီဘိုန့် အီ မိုဝ်း နဝ်း ဆီ လှူ ဘော ဂေ အီ လှဲဝ် ဒီ ဘတ် ဆေန့် ဟိုက် မာပဲ၊ ဂေ ဝီ ဘတ် ဘော ဟိုက် မာပဲ၊ ဝီ လှူ ဘော အာတီ။ 27 ဂေ အီ မုး ဒါ တာင် အီ အိုပ် အီ ယဲတ့် အီ၊ ဂေ ဝီ တိုယ် ဆဲန့် ဝွင့် လုယ် ဘော ဆဲန့် ဘဲန် မျုဝ် ဘဲန် မျုဝ်၊ ဝီ လှူ၊ တဲး ဂေ ပွိုန် ဒီ ဘူင် ဆီတုဝ် အေဖူတ် ဂါယ် ဟူ ပီ လုဝ် ဒိုက် အာရူန် ဒီ ဘင်နဝ်း အန်။ 28 ဂေ ဘော တိုယ် ဆီနမ် ဘဲန် မျုဝ် ဘဲန် မျုဝ် ဘော နာမန် ပီ လုဝ် တာ ဂေ ဘူင် နာမန် ပီ ဟပ် ခဲင် ငဝ် ရာင် တာင်၊ ဘော နာမန် ပီ လုဝ် ဖဝ်း ဘော ဆီနမ် အုး ငှုန် ပီ လုဝ် ပီဒဝ့် ဒီ ငဝ် ဒီ အာတ့် ဇဝ်ဖြာ။ 29 ဂေ ဒူအီ အီဆာရေလ ဘော ဂေ အီမာယ် အီဘိုန့်၊ ဂေ အီ မိုဝ်း နဝ်း ဆီ လှူ၊ ဂေ ဘော တး လှူ ဒွန် မျုဝ် ဒီ ဇဝ်ဖြာ၊ တဲး ဂေ ပွိုန် ဒီ ဘူင် တူတ့် ဒွန် မျုဝ် ပီ စ်ု ဇဝ်ဖြာ အာမုဝ်ဆဲ ဘူင်။

30 ဝါယ် အန် တီ အာမုဝ်ဆဲ ဝီ တဝ်း ဒီ ဒူအီ အီဆာရေလ၊ “ဇဝ်ဖြာ ဟဲ့ ရဝ်း အာဘေဇာလေန် အီ မုး ဂွန် အာအူရီ။ အန် ဘော မုး လှာန် အာဟူရာ၊ အီ မုး ခြိုဝ် အာယူဒါ။ 31 ဇဝ်ဖြာ ဟဲ့ ဟပ် နဝ်း ဖွိုမ် အန် ခဲင် နဝ်း ဒူအီ တီ၊ တဲး အန် မိုဝ်း အာငျာန်၊ တဲး အန် ပွိုန် ဒီ ဘူင် ဂါန် ဘဲန် မျုဝ် ဘဲန် မျုဝ်။ 32 ဇဝ်ဖြာ ဟဲ့ တဲး အန် နပ် ဒီ ဘူင် ဘုဝ်း ဂေ ပယ့် ဒွန် မျုဝ် တာ ခြိဝ် ဂေ ရွိုန် ဘော ဘွင့်။ 33 အန် ဘော နပ် ဒီ မ့ပြာယ် ဆဲန့် ဘော ဘူင် ကာင် ဆဲန့်။ အန် ဘော လှဲဝ် ဒီ ဘူင် ဒွန် မျုဝ် တာ ဟေ ဘော လှဲဝ် ဒီ ဘူင် ဘဲန် မျုဝ် ဘဲန် မျုဝ် အီ စှိတ် ကာဆဝ်။ 34 ဘော အာဘေဇာလေန် ဘော အာအုဝ်ဟုဝ်လီအာပ် တွိုန်၊ ဇဝ်ဖြာ ဟဲ့ တဲး ဂါယ် ပွိုန် ဒီ မာနုဝ် ဘော ဒူအီ ဟဝ်၊ တဲး ဘော ဂေ ဝီ လှဲဝ် ပီ ဂါယ်။ အာအုဝ်ဟုဝ်လီအာပ် တွိုန် ယီ မုး ဂွန် အာဟီဆာမာတ်၊ အီ မုး ခြိုဝ် အာဒါန်။ 35 ဇဝ်ဖြာ ဟဲ့ တဲး ဂါယ် အာ ဝီ တီ မိုဝ်း အာငျာန်၊ တဲး ဂါယ် ဘဲန် လက်ဆာမာ အီ နပ် ဒီ ဘူင် ဘဲန် မျုဝ် ဘဲန် မျုဝ်။ အန် မိူဝ် တဲး ဂါယ် နပ် ဒီ ဘူင် ဘ့လေး ဘုဝ်း ဂေ ပယ့်၊ တဲး ဂါယ် လှဲဝ် ဒီ စိန့် ဘုဝ်း ဂေ ပယ့် ဒွန် မျုဝ်၊ တာ ဆေန့် အီ ခွင် အီ ဂုယ် ခွန်၊ အီ ရေန့် ဂဲ ဘော ဆေန့် ကာတမ် လုယ်။ ဒူအီ အာ ဝီ တီ၊ ဂါယ် ဘော လှဲဝ် ဒီ ဒဝ့် ဘဲန် မျုဝ် ဘဲန် မျုဝ်။”