1 ဇဝ်ဖြာ ဝီ တဝ်း ဒီ အာမုဝ်ဆဲ၊ “မဲ လုဝ် ဝီ ဘူင် မာဝ် ကာမာယ် အာ ဒီဖ့လာင်၊ တဲး န့ ပီ မာဝ် ဒီဖ့လာင် ဘြိမ် ပဲ့ ဟဲ့ ဘူင် အုဝ်။ အုဝ် ဒီ ဝီ ဒဲမ် ဒါရာ ပီ ဒွိုမ် ဒဲမ် အုဝ် နာ ဒဲင် မာဝ် အာ ဒီဖ့လာင် ဘြိမ် တွိုန် တဲး န့ ပီ ပီ ပျာတ့် မဲ။ 2 မဲ လုဝ် မ့ပြာယ် တူတ့်၊ တဲး ကော ဇမ် ခဲညှာ ဆိန့်ဝး စေဝ်။ မဲ လုဝ် ဝီ ဟုဝ့် ဇမ် ဒူင် ကွယ် အုဝ် နာ ကာဒဲ့ နွန် ဆီနာယ်။ 3 ဒူအီ ဟဝ် အာဝ် ပွိုန် ဟာဝ် ရိုမ် ဒူပ် မဲ။ အုဝ် တူ ခမ် ဒီ ယိုဝ် ဒူအီ ပေါ အူ ဝီ ကွယ် ဒဲင် နွန် ဘော နွန်။ ဘော ဒုဝ် ဆတ်ဒါဝါ အီ မုး မာဘူ၊ မာ ပဲ ဘော မာမက်၊ ကွဲ့ တဲး ဂေ ဟူမ် ပေတ့် ဒီ ဒင် နွန်။”

4 ဇဝ်ဖြာ ဟဲ့ ဟွတ့် ကာလာင် ပါယ် တီ အာမုဝ်ဆဲ ဝီ ဘူင် မာဝ် ဒီဖ့လာင် ကာမာယ် အာ ဒီဖ့လာင်၊ တဲး ဂါယ် ပီ အာ ဒီဖ့လာင် ဘြိမ် တွိုန်။ ပါ ခဲညှာ ဆိန့်ဝး အန် ဝီ စေဝ် ဟုဝ့် ဒီ နွန် ဆီနာယ် တွိုန်၊ တဲး န့ ပီ ပီ စ်ု ဇဝ်ဖြာ အန် ဘူင်။ အန် မိူဝ် ဂူင့် မာဝ် အာ ဒီဖ့လာင် တွိုန်။ 5 ပန် တီ ဇဝ်ဖြာ ဝီ လေး လူင် ခဲင် န့အု။ အန် တး ကွယ် ဒူင် ကွယ် အာမုဝ်ဆဲ။ အန် ဝီ ကာလာင် စိူဝ် အန်၊ တဲး အာမုဝ်ဆဲ ဝီ ထူမ်။ အန် တဝ်း၊ “အုဝ် မုး အန် ဇဝ် ပီ မုး အုဝ်။” 6 ပန် တီ ဇဝ်ဖြာ ကာလုဝ်း ဒီ အာတ့် အာမုဝ်ဆဲ။ ဒေါ အန် တီ အန် တဝ်း၊ “အုဝ် မုး အန် ဇဝ်။ အုဝ် မုး ဇဝ်ဖြာ အီ မိုဝ်း နဝ်း မွှိုမ်၊ နဝ်း ကာဝေ ဒူအီ။ အုဝ် အာဝ် ငှိုယ် ရူ။ နဝ်း အုဝ် နပ် ဒီ ရွက့် ကာဆဝ် ဒူအီ။ ဆေဆေ အုဝ် ဘော ဘူင် ပီ တဝ်း အုဝ်။ နဝ်း ရွက့် အုဝ် တီ အာဝ် နပ် ဒီ တူတ့် ဒေါ မှဝ်။ 7 အုဝ် ရွက့် ဂေ ဒူအီ ဘဲန် ဟြဲန့် စုဝ်။ အုဝ် မိူဝ် ဂဝ်း ဝဲန် မှာပ် ပီ ဘူင် ဒူအီ၊ ဂဝ်း ဝဲန် နဝ်း ဟာယ် ဒူအီ ဘော နဝ်း တူ အိုင် ဒီ ထူမ် ဂြုဝ်း အုဝ်။ အုဝ် ယီ တူ တဲး ဒူအီ မိုဝ်း မှာပ် ပွိုန် လွတ် ခမ် မှာပ် ဂေ။ အုဝ် ဒီ တဲး ဘော ဂွန် ဘော လှာန် ဒူအီ လုဝ် ခမ် မှာပ် ပီ ဒွိုမ် ဘူင် ဂုန့် ဒါ ဂေ။ ဂေ ဂွန် လုဝ် ခမ် မှာပ် ဂုန့် ဒါ ဂေ တဲး ကော ဇမ် အူယ် စုဝ် ဘော ဖွုန် စုဝ်။”

8 ဒေါ အန် တီ အာမုဝ်ဆဲ ဝီ ဂူမ် ဒီ အာတ့် ဇဝ်ဖြာ အူ ဇေန့်၊ ဝီ ဆာခိုဝ်။ အန် တဝ်း၊ 9 “အိုယ် မဲ ဇဝ်ဖြာ၊ ဆေ မဲ ဇဝ်ဖြာ ဟဲ့ အိုင် အုဝ်၊ အုဝ် မှာန့် တဲး မဲ ဇဝ်ဖြာ ဟာဝ် ရိုမ် ဒူပ် ယေ။ အုဝ် ဟဲ့ နပ်၊ ဒူအီ အီဆာရေလ နီ၊ ဂေ မုး အာမျုဝ် ဒူအီ အီ မိုဝ်း နဝ်း ဒိူဝ်။ အုဝ် ယီ မှာန့်၊ တဲး မဲ ဇဝ်ဖြာ ဂဝ်း ဝဲန် မှာပ် ယေ တီ၊ ဝဲန် နဝ်း ဟာယ် ယေ ဒူအီ အီ နပ် ဒီ ဘူင် နာ တူ မွှိုမ် ဆေဆေ။ အုဝ် ဘော မှာန့်၊ တဲး မဲ ဝီ တဲး ယေ ဘဲန် ဒူအီ အာမျုဝ် ပီ အိုပ် မဲ ဆေဆေ။”

10 အာမုဝ်ဆဲ ဟဲ့ ဟွတ့် မှာန့် ပါယ် တီ ဇဝ်ဖြာ ဝီ တဝ်း၊ “အုဝ် ဒီ ဝီ ဒွါ ကာဒိက် ဆတ်ဇာ ကာမာယ်၊ တဲး ဘော ဘေ ဘော အုဝ် ဝီ လာယ် ကာဆဲန့် ပေါ အူ စိုပ်။ အုဝ် ဒီ ဝီ ဘူင် နာ မွှိုမ် အာမ် ကာဆဝ် ဒီ အာတ့် ဘေ၊ တဲး ဘေ ဘောကာဂ့လျီတ် ပွိုန် ဒီ ယိုဝ်။ ပီ ဒီ ဘူင် အုဝ် ဇိုဝ် တီ၊ ဂေ ဒူအီ ဒဲင် ကာဒါယ် တူ ဒွိုမ် ယိုဝ် ဒေါ မှဝ်။ ဂေ ဒူအီ အီ ကွယ် ဒီ ခူပ် ဘေ၊ ဂေ ဒီ ယိုဝ် ခဲ့ တာင်၊ ခဲ့ မွှိုမ် အာမ် ကာဆဝ် ပီ ဒီ ဘူင် အုဝ် အာဒါ ဘေ။ 11 ခဲ့ ပီ စ်ု အုဝ် ဘေ ဘူင် အာတိုဝ် နီ၊ တဲး ဘေ ဝီ ထူမ်၊ ဝီ ဒူပ်၊ ဝီ ဘူင်။ ဆေ ဘေ ဝီ ထူမ် ဂြုဝ်း အုဝ်၊ အုဝ် ဒီ ဆုတ့် ဂေ အာမျုဝ် ဒူအီ ဟဝ်၊ တဲး ဂေ တဝ် အာတ့် တး ဇမ် ဘေ ဒူင် ကွယ် ဂေ။ ဘော ဂေ ဒူအီ အာမုဝ်ရိတ်၊ ဒူအီ ကာနန့်၊ ဒူအီ ဟေထိတ်၊ ဒူအီ ဖေရေဆိတ်၊ ဒူအီ ဟီဝိတ် ဘော ဂေ ဒူအီ ယေဘူဆိတ်၊ အုဝ် ဒီ တဲး ဂေ လေး တူတ့် ဒေါ တး ဇမ် ဘေ ဒူင် ကွယ် ဂေ။ 12 ဘေ လုဝ် ဆာဒိက်၊ ကွဲ့ ဒွါ ကာဒိက် ဆတ်ဇာ ဒီ ဂေ အာမျုဝ် ဒူအီ အီ ကွယ် ခဲင် မိူင် ပီ ဟာဝ် ဘေ။ ဆေ ဘေ ယီ လာယ် ကာဆဲန့်၊ န့ ဒီ တဲး ဘေ စှိုမ်။ 13 ဆေ ဘေ ဇမ် ဒူင် ကွယ် ဂေ ဒူအီ ဟဝ်၊ ဘေ လုဝ် ဝဲန် ဒူင် ပီ ကြိုပ် ဂေ အာရိုပ်။ ဘေ လုဝ် ဒုး မာဝ် ဘွတ် ပီ ကြိုပ် ဂေ၊ တဲး န့ ကာလာတ့်။ ဘော ကန်ထွန် ပီ လှူ ဂေ ဒီ နာင် ကာနမ် အီ စိူဝ် အေဆူရာ တွိုန်၊ ဘေ လုဝ် ဂ်ု ဝဲန်၊ ကွဲ့ ဟူ တဲး န့ မိုဝ်း မာဆေ၊ ပီ ကြိုပ် ဂေ။ 14 ကွဲ့ ကြိုပ် ဇဝ် ဘဲန် မျုဝ် ဘဲန် မျုဝ်။ အုဝ် အီ မုး အန် ဇဝ်၊ အုဝ် မုး ဇဝ်ဖြာ အီ တူ ခမ် ဘေ ကြိုပ် မာဆေ ဒဲင် အုဝ်။

15 ကွဲ့ လာယ် ကာဆဲန့် မာဆေ ဒီ ဒူအီ အီ ကွယ် ခဲင် မိူင် ကာမာယ် ဘေ။ ဂေ ဒူအီ အီ ကွယ် ခဲင် မိူင် တီ၊ ဂေ နပ် ဒီ ဒွါ အီဘိုန့် ဂေ၊ တဲး ဂေ ဝီ ဘဲန် ယာ မာလမ် ပီ အိုင် ဇဝ် ပီ ကြိုပ် ဂေ။ ဂေ ဘော နပ် ဒီ ဘူင် ဘ့လွယ် လှူ တာင်။ ဒေါ အန် တီ ဂေ ဒီ ဘော နပ် ဒီ ဘာင် ဘေ၊ တဲး ဘေ ကွယ် ရိုမ် ဒူပ် ဂေ၊ ဝီ ဟူမ် ပီ လှူ ဂေ။ 16 ဝါယ် အန် တီ ဘေ ဘော နပ် ဒီ ရဝ်း ဂွန် အီဘိုန့် ဂေ၊ ဒွါ ဒီ ဂွန် အီမာယ် ဘေ၊ တဲး ဂေ ခတ်။ ဆေ ဂေ ဘူင် ပါယ် တီ အီဘိုန့် ဂေ တွိုန်၊ ဂေ နပ် ဒီ ကြိုပ် ဇဝ် ဘြိမ် ပီ ဒွိုမ် ကြိုပ် ဂေ။ ဟဲ့ ဟွတ့်၊ ဂေ ဒီ ဘော ကာဆုး ဂွန် အီမာယ် ဘေ၊ တဲး ဂေ ဝဲန် အုဝ်၊ ဝီ ကြိုပ် ပီ ကြိုပ် အီဘိုန့် ဂေ။ ခုဝ် အန် တီ၊ အုဝ် ဟဲ့ တဝ်း၊ ကွဲ့ လာယ် ကာဆဲန့် မာဆေ ဒီ ဒူအီ တီ။

17 ကွဲ့ ဒိုဝ်း ခြိဝ်၊ ရွိုန်၊ ဂျီင် ဂေ ဟိန်၊ ဘူင် အာရိုပ် ပီ ဒီ ကြိုပ် ဘေ ဒေါ မှဝ်။

18 ဘေ ဘော လုဝ် ဘူင် ဘ့လွယ် ဟူမ် ခါမုန် တူ ဟပ် ဆီနမ် ဘြး ဒေါ ဇမ် မာဂျီန် အာဘိပ် တွိုန်။ အာဒါ ဘူ ဆီငဲ ဘေ လုဝ် ဘူင် ဒွန် မျုဝ် ပီ ဒွိုမ် စ်ု အုဝ် ဘေ ဘူင် ဒေါ ဇမ် ဘ့လွယ် တီ။ ပါယ် တီ ဘေ လုဝ် လှုဝ်း မာဂျီန် အာဘိပ် တွိုန် ဒေါ တဲး အုဝ် ဘေ လေး ခဲင် မိူင် အဲဂိုပ်။

19 ဘော ဂွန် အီမာယ် အီ မုး ဂွန် ဂိန့် ဒွန် အီ၊ ဘော ဂွန် ဒူအီ ဘော ဂွန် ဒုဝ် ဆတ်ဒါဝါ ပီ ဟျီင် ဘေ၊ ဂေ မုး ကြုဝ် အုဝ်။ 20 ဆေ န့ ယီ မုး ဂွန် မာလာ၊ အီ မုး ဂွန် ဂိန့်၊ ဘေ လုဝ် ဒိုဝ်း ဂွန် မာဘူ အူ ဒုဝ် ကာဒါင် အန်။ ဆေ ဘေ တူ မိုဝ်း မာဘူ အီ ကာဒါင် အန်၊ ဘေ လုဝ် မး ကူမ် အန်၊ တဲး န့ ကာလာတ့်။ ဆေ န့ မိုဝ်း ဂွန် အီမာယ် ဘေ အီ မုး ဂွန် ဂိန့်၊ ဘေ လုဝ် ဒွါ မာဘူ၊ ကာဒါင် အန်။

ဆေ ဒူအီ တူ မိုဝ်း ဒီ ဂူင့် ပီ ဒီ လှူ ဂေ၊ ကွဲ့ တဲး ဂေ တး ဇမ် ဒူင် ကွယ် အုဝ်။

21 ဒဝ် ဆီငဲ ဘေ လုဝ် ဘူင် ဂါန် ဘေ ဘဲန် မျုဝ် ဘဲန် မျုဝ်။ ဟီ ဇမ် ဆီငဲ မ့ဘူ၊ ဘေ လုဝ် ဒီလှဝ်။ န့ ဘော မုး ဒေါ ထဲ ဘေ နာ၊ န့ ဘော မုး ဒေါ ဆုဝ့် ဘေ ငှုဝ်၊ ဘေ လုဝ် ဒီလှဝ် ဆေဆေ ဒေါ ဇမ် ဆီငဲ မ့ဘူ။

22 ဖန် ဂိုဝ် ဆီငဲ ဝါယ် ဟဲ့ ဟွတ့် ဆုဝ့် ငှုဝ်၊ ဘေ လုဝ် ဘူင် ဘ့လွယ် ဆုဝ့် ငှုဝ်။ ဘော ဘ့လွယ် အုန် ဘ့လေ ဘေ လုဝ် ဘူင် ဒေါ ကွယ် ဘေ ခဲင် ထိုပ် ဘော ဘူင် ဘ့လွယ် တီ အာတ့် တူတ့် ဆီနမ်။ 23 အူ ဆီနမ် အူယ် ဇေန့် ဂေ အီမာယ် လုဝ် ဟာဝ် ဇမ် ဒူင် ကွယ် အုဝ် အီ မုး ဇဝ်ဖြာ ပီ ကြိုပ် ဘေ ဒူအီ အီဆာရေလ။ 24 အုဝ် ဒီ ဘော ဆုတ့် ဂေ ဒူအီ ဟဝ် လေး ခဲင် မိူင် ဂေ၊ တဲး န့ ဘဲန် မိူင် ဘေ၊ တဲး ဒူင် ကွယ် ဘေ ကာဝဝ်း။ အုဝ် မိူဝ် တူ တဲး န့ မိုဝ်း အာဆေ၊ အီ တဝ်း ဒီ ပြာ မာန် မိူင် ဘေ ဒေါ တး ဘေ ဒီ အာတ့် အုဝ် ဒီ ထိုပ် ဘွတ်။

25 ဆေ ဘေ ဘော လှူ ဒုဝ် ဆတ်ဒါဝါ ဒီ အုဝ်၊ အာဝ် ပွိုန် လှူ ဒူပ် ခါမုန် အီ ဟပ် ဆီနမ် ဘြး။ ဒေါ ဘူင် ဘေ ဘ့လွယ် လှုဝ်း ဘေ ဇဝ်ဖြာ ဒေါ ကာလုဝ်း အန် ကာင် ဘေ၊ အာဝ် ပွိုန် အုန် ကာလူယ် ပီ ဒီ လှူ တဲး န့ ဇမ် ခဲညှာ။

26 ပီ ဆမ် ဘေ ဘဲန် မျုဝ် ဘဲန် မျုဝ် အီ လေး ဒီ အာတ့် ဒေါ အာခြာဝ် အန်၊ ဘေ လုဝ် ဒိုဝ်း ရဝ်း အီ စှိတ် ကာဆဝ်၊ လှူ ဒီ ဇဝ်ဖြာ။

ဆေ ဘေ ဒင် ယင် ဂွန် မာပဲ၊ ကွဲ့ ဟပ် အိုမ် ပူ မာ အန်။” ခဲ့ တီ ဇဝ်ဖြာ ဟဲ့ ဝီ ကာလာင် ဒီ အာမုဝ်ဆဲ၊ တဲး ဂေ ဝီ လာယ် ကာဆဲန့် လွင် အန် တီ။

27 ဝါယ် အန် တီ ဇဝ်ဖြာ ဝီ တဝ်း ဒီ အာမုဝ်ဆဲ၊ “မဲ လုဝ် ဒဲမ် အုန် ဂြုဝ်း ပီ ကာလာင် အုဝ် ဒီ မဲ ဒေါ တီ နီ။ ဂြုဝ်း တီ မုး ဂြုဝ်း ပီ လာယ် ကာဆဲန့် အုဝ် ဒီ ဘေ။” 28 အာမုဝ်ဆဲ ယီ ကွယ် ဒူင် ကွယ် ဇဝ်ဖြာ အာဒါ ဖွုန် ဂိုဝ် ဆီငဲ ဒီ ဖွုန် ဂိုဝ် မှိုဝ်။ ဒေါ ကွယ် အန် ဒဲင် နွန်၊ အန် တူ ဟူမ် မာဆေ၊ တူ ဒျီင် အိုမ် ဒေါ မှဝ်။ အန် ဘော ဒဲမ် အုန် ပီ လာယ် ကာဆဲန့် ဇဝ်ဖြာ ဂါယ် ဒူအီ အီဆာရေလ။ အန် ဝီ ဒဲမ် ဒဲင် မာဝ် အာ ဒီဖ့လာင် အီ မုး ဒါရာ ဂိုဝ် ညွင့် ပီ ဒွါ ဇဝ်ဖြာ ဒီ ဂေ။

29 ဒေါ ဝီ လေး လူင် အာမုဝ်ဆဲ ဒဲင် နွန် ဆီနာယ် တွိုန်၊ ဝီ ဂူင့် မာဝ် ကာမာယ် အာ ဒီဖ့လာင်၊ နာ အန် ဝီ ဘ့လာင် ရာဝ် ကူပ် ကွယ် ရိုမ် အန် ဒူပ် ဇဝ်ဖြာ၊ လာယ် ကာလာင် ဂြုဝ်း။ ဂေ ဒူအီ ဟဝ် ပွိုန် ဒီ ယိုဝ် ဘ့လာင် တီ။ အာမုဝ်ဆဲ ယီ တူ နပ် လွင် အန် တီ။ 30 ပန် တီ ဘော အာရူန် ဘော ဂေ ဒူအီ အီဆာရေလ၊ ဂေ ဘောကာဂ့လျီတ် ဘော ယွတ် အာမုဝ်ဆဲ၊ ဝီ ယိုဝ် နာ အန် မိုဝ်း အာရူင် ဘ့လာင် တီ။ ဂေ ကော ယုဝ်၊ တူ ယ ဟာဝ် ကာတတ် ဒူင် ကွယ် အန်။ 31 အာမုဝ်ဆဲ ယီ ဒဲ့ ဂေ တး ဇမ် ဒူင် ကွယ် အန်။ ဟဲ့ ဟွတ့်၊ အာရူန် ဘော ဂေ ဒါ တာင် ဒူအီ အီဆာရေလ၊ ဂေ ဝီ ဟာဝ် ဇမ် ဒူင် ကွယ် အန်၊ တဲး ဂေ ဝီ လာယ် ကာလာင် ဂြုဝ်း။ 32 ဝါယ် အန် တီ ဘော ဂေ ဒူအီ ကိူန် ဝီ တး ဇမ် ဒူင် ကွယ် အာမုဝ်ဆဲ။ အန် မိူဝ် ဝီ ကာလာင် ဒီ ဂေ တဲး ဂေ ဝီ ထူမ် တူတ့် ဒါရာ ပီ စ်ု ဇဝ်ဖြာ ဂေ ဘူင် ဒေါ ကွယ် အန် ဒဲင် နွန် ဆီနာယ် တွိုန်။

33 အန် ဟဲ့ ဟွတ့် ကာလာင် ဒီ ဂေ ဒူအီ ကိူန်၊ အန် ဒိုဝ်း ဒူန့် ကာဘိတ် နာ အန်။ 34 ဒေါ ဝီ လိုပ် အန် ခဲင် ထိုပ် ဒီတဲတ်၊ ဝီ ကာလာင် ဂြုဝ်း ဒီ ဇဝ်ဖြာ၊ အန် ဘုတ့် ဝဲန် ဒူန့် တွိုန် ဒီ နာ အန်။ အန် ဟဲ့ ဟွတ့် လေး ဒူင် ကွယ် ဇဝ်ဖြာ၊ အန် ဝီ ကာလာင် ဒီ ဂေ ဒူအီ အီဆာရေလ ခဲ့ ပီ ကာလာင် ဇဝ်ဖြာ ဒီ အန်။ 35 ဂေ ဒူအီ အီဆာရေလ ယီ ယိုဝ် အာရူင် ဘ့လာင် ဒီ နာ အန်။ ခုဝ်၊ အာမုဝ်ဆဲ ဝီ ဒိုဝ်း ဒူန့်၊ ဝီ ကာဘိတ် နာ အန်၊ တဲး ကော ဇမ် အာခြာဝ် ဒီ ဝီ လိုပ် အန် ဒူင် ကွယ် ဇဝ်ဖြာ၊ ဝီ ကာလာင် ဒီ ဇဝ်ဖြာ ပေါ အူ ဇေန့်။