1 ဝါယ် အန် တီ ဇဝ်ဖြာ ဝီ တဝ်း ဒီ အာမုဝ်ဆဲ၊ “တဲး ဘေ လေး ခဲင် ဒူင် ကွယ် ဘေ နီ။ ဘော မဲ ဘော ဂေ ဒူအီ ပီ ယဲတ့် မဲ လေး ခဲင် မိူင် အဲဂိုပ် တွိုန်၊ တဲး ဘေ ဟာဝ် ဇမ် မိူင် ပီ ဒွိုမ် ကာလာင် အုဝ်။ အုဝ် ဟဲ့ ဒွိုမ် ဒွါ ကာဒိက် ဆတ်ဇာ ဒီ အာဘြာဟမ်၊ အာဆဲက် ဘော အာကူပ်။ အုဝ် ဟဲ့ တဝ်း ဒီ ဒွါ မိူင် တီ ဒီ ဂေ လှုက်လှာန် အာဘြာဟမ်။ တဲး ဘေ ဟာဝ် ဇမ် မိူင် တီ ဒေါ တီ နီ။ 2 အုဝ် ဒီ စ်ု အာမူ အာမာတ် အုဝ်၊ တဲး အန် ယဲတ့် ဒီ အာတ့် ဘေ။ အုဝ် ဒီ ဘော ဆုတ့် ဂေ ဒူအီ ဟဝ် လေး ခဲင် မိူင် တီ။ ဘော ဂေ ဒူအီ ကာနန့်၊ ဒူအီ အာမုဝ်ရိတ်၊ ဒူအီ ဟေထိတ်၊ ဒူအီ ဖေရေဆိတ်၊ ဒူအီ ဟီဝိတ် ဘော ဂေ ဒူအီ ယေဘူဆိတ်၊ ဒူအီ ဇိုဝ် တီ ဒွန် မျုဝ် အုဝ် ဒီ ဆုတ့် လေး ခဲင် မိူင် တီ။ 3 တဲး ဘေ ဟာဝ် လိုပ် ကွယ် ခဲင် မိူင် တီ။ န့ မုး မိူင် မွှိုမ်။ ကာဒါယ် ခဲင် မိူင် တီ ဟဲ့ ဘွတ်၊ တဲး ဘေ မိုဝ်း ဟေ ဂေ ဘ့လေ ဒွန် မျုဝ်။ တဲး ဘေ မိုဝ်း ပီ ဒီ လုဝ် ဘေ ဒွန် မျုဝ်။ အုဝ် ယီ တူ ဟာဝ် ရိုမ် ဒူပ် ဘေ။ ကူပ် မုး ဘေ ဒူအီ အီ တူ ထူမ် ဒူပ် အုဝ်၊ အုဝ် အာဝ် ဟူ ဟာဝ် ရိုမ် ဒူပ် ဘေ။ ဆေ အုဝ် ဘော ဟာဝ် ရိုမ် ဒူပ် ဘေ၊ အုဝ် ယုဝ် အုဝ် ဒီ ဘူင် တဲး ဘေ စှိုမ် ဒေါ ဟာဝ် ဘေ ဒူပ် န့တေန့်။”

4-5 ပန် တီ ဇဝ်ဖြာ ဟဲ့ စ်ု အာမုဝ်ဆဲ ကာလာင် ဒီ ဒူအီ တဝ်း၊ “ဘေ မုး ဒူအီ အီ မိုဝ်း နဝ်း တူ ထူမ် တူ ဒူပ် အုဝ်။ ဆေ အုဝ် ဒီ ဟာဝ် ရိုမ် ဒူပ် ဘေ အာဒါ အူ ကာစန်၊ အုဝ် ဒီ ဘော ဘူင် တဲး ဘေ စှိုမ်။ ဒေါ တီ နီ တဲး ဘေ ဘုတ့် ဝဲန် ခြိုင် စှိတ် ပီ တာ ဘေ။ ဟဲ့ ဟွတ့်၊ အုဝ် ဒီ ဇေန့်ဇာ လွင် ပီ ဒီ လုဝ် အုဝ် ဘူင် ဒီ ဘေ။” ဂေ ဒူအီ ကိူန် ဘော ထူမ် ဂြုဝ်း ပီ ကာလာင် ဇဝ်ဖြာ။ န့ ဝီ ဘဲန် ဒုက် ဒီ နဝ်း ဂေ၊ တဲး ဂေ ဝီ ယာမ် ဝီ က့လိုဝ်။ အာဝ် မိုဝ်း အာဆေ စှိုပ် ခြိုင် စှိတ်။ 6 ပန် တီ ဂေ ဒူအီ အီဆာရေလ ဝဲန် တူတ့် မျုဝ် အီ စှိတ် ပီ တာ ဂေ ဒေါ ကွယ် ဂေ ဒီ နွန် ဟုဝ်ရေပ် တွိုန်။^a

7 ဒေါ ကွယ် ဂေ ဒူအီ အီဆာရေလ ဒူင် ချ ဂေ၊ အာမုဝ်ဆဲ ဟဲ့ ဒွိုမ် ဘ့လေး ထိုပ် ဘိက် နာ ရေတ့် ဒူင် ချ ဂေ၊ တဲး န့ ကွယ် တူင့် အီ စဲက်။ ထိုပ် ဘိက် တီ အန် တဝ်း၊ န့ မုး ဒူင် ပီ ပွိုန် လာယ် ကာတုန့်။ အာဆေ ဆီ ဒီမွှတ် ဇဝ်ဖြာ လွင် အာမူ အန်၊ အန် ဘော နပ် ဒီ ဟာဝ် ဇမ် ဒူင် ကွယ် ထိုပ် ဘိက် တီ။ 8 ဒွန် ဇေန့် ဒွန် ဇေန့် ဒေါ ဟာဝ် လိုပ် အာမုဝ်ဆဲ ခဲင် ထိုပ် ဘိက် တွိုန်၊ ဂေ ဒူအီ ဘောကာဂ့လျီတ် ကွယ် ဒီ အာတ့် ထိုပ် ဂေ၊ ယွတ် အန် လိုပ် နာ ခဲင်။ 9 ဒေါ လိုပ် အာမုဝ်ဆဲ ခဲင် ထိုပ် ဘိက် တွိုန်၊ ရွင့် န့အု တွိုန် လေး လူင် ကွယ် ဒီ အာတ့် မာလုဝ်း အန်။ န့ ဘော ကွယ် ဒီ တီ ဒေါ ကာလာင် ဇဝ်ဖြာ ဒီ အာမုဝ်ဆဲ။ 10 ဂေ ဒူအီ ယီ ယွတ် န့အု လေး လူင် ဒီ အာတ့် မာလုဝ်း ထိုပ် ဘိက် တွိုန်၊ ဒွန် အီ ဝီ ယိတ့် ကွယ် ဒီ အာတ့် ထိုပ် ဒူင် ကွယ် အန်၊ ကြိုပ် ဇဝ်ဖြာ။ ဂေ ကြိုပ် ပါယ် တီ ဒေါ ကာလာင် ဇဝ်ဖြာ ဂြုဝ်း ဒီ အာမုဝ်ဆဲ။ 11 ဒေါ အန် တီ ဇဝ်ဖြာ ဘော ကာလာင် ဒီ အာမုဝ်ဆဲ တဲး ဂါယ် လာယ် မာငး၊ တဲး န့ ပီ ဒူအီ အူ ဝီ ကာလာင် ဒီ ဂိုက် အန်။ ဟဲ့ ဟွတ့် ကာလာင် ပါယ် တီ အာမုဝ်ဆဲ ဘော ဝေန့် ဇမ် ဒူင် ချ ဂေ ဒူအီ ကိူန်။ န့ ယီ မုး အာယုဝ်ဆူအာ၊ အီ မုး ဂွန် အာနုန်၊ အန် စွယ် အာမုဝ်ဆဲ။ အာဆာက် အန် ညှမ် ကိူန်။ အန် တူ လေး ခဲင် ထိုပ် ဘိက် တွိုန်၊ အန် ကွယ် ဆေဆေ ခဲင် ထိုပ်။

12 အာမုဝ်ဆဲ ဝီ တဝ်း ဒီ ဇဝ်ဖြာ၊ “မဲ ဇဝ်ဖြာ၊ မဲ ဟဲ့ စ်ု အုဝ် တဲး အုဝ် တိုယ် ဒူအီ ဂေ နီ၊ တဲး ဂေ တး ဇမ် ခဲင် မိူင် ကာမာယ်။ မဲ မိူဝ် ဟဲ့ တဝ်း၊ မဲ ဟဲ့ နပ် အုဝ်၊ အုဝ် မုး ဂိုက် ပီ အိုင် မဲ။ မဲ ယီ တူ ကာလာင် ဒီ အုဝ်၊ အာဆေ ဒီ ဟာဝ် ရိုမ် ဒူပ် အုဝ်။ 13 ဆေ မဲ အိုင် အုဝ်၊ ဆေ မဲ ဟဲ့ ကာဝေ အုဝ်၊ အုဝ် မှာန့်၊ တဲး မဲ ကာလာင် ဒီ အုဝ်၊ တဲး အုဝ် နပ် ပီ အိုင် မဲ၊ တဲး အုဝ် ပွိုန် ဒီ ဘူင် အီ လဝ့် နဝ်း မဲ၊ တဲး အုဝ် နပ် ဆီချာ။ အုဝ် ဘော မှာန့်၊ တဲး မဲ လှုဝ်း ဒူအီ ဂေ တီ အီ မုး ဒူအီ ပီ ရဝ်း မဲ။”

14 ဇဝ်ဖြာ ဝီ တဝ်း ဒီ အန်၊ “အုဝ် ဒီ ဟာဝ် ရိုမ် ဒူပ် မဲ၊ တဲး ဘေ ပွိုန် ဒီ ကွယ် ဒါခိုယ်။”

15-16 အာမုဝ်ဆဲ ဝီ တဝ်း၊ “ဆေ မဲ ဟာဝ် ရိုမ် ဒူပ် ယေ၊ န့ ဒီ လိုဝ်း ဆီချာ ဒီ ဒူအီ ဟဝ်၊ ယေ မုး ဒူအီ အာဝ် ပီ ဂေ ဒူအီ ဟဝ် ဒွန် မျုဝ် ဒဲင် ကာဒါယ် နီ။ ဆေ မဲ ဟာဝ် ရိုမ် ဒူပ် ယေ၊ ဂေ ဒူအီ ဒွန် မျုဝ် ဒီ ဘော နပ်၊ မဲ ဟဲ့ အိုင် ဘော အုဝ် ဘော ဂေ ဒူအီ နီ။ ဆေ မဲ ယီ တူ ဟာဝ် ရိုမ် ဒူပ် ယေ၊ ကွဲ့ တဲး မဲ စ်ု ယေ လေး ခဲင် ဒူင် ကွယ် ယေ နီ ဒေါ မှဝ်။”

17 ပန် တီ ဇဝ်ဖြာ ဝီ တဝ်း၊ “အုဝ် ဟဲ့ အိုင် မဲ။ အုဝ် ဘော နပ် ဆီချာ မဲ။ ခုဝ် အန် တီ၊ အုဝ် ဒီ ဘူင် ပီ မှာန့် မဲ။”

18 အာမုဝ်ဆဲ တဝ်း၊ “ဆေ န့ ပါယ် တီ အုဝ် ဘော မှာန့်၊ တဲး မဲ ဘျ အာရူင် ဘ့လာင် မဲ၊ တဲး အုဝ် ပွိုန် ဒီ ယိုဝ်။”

19 ဇဝ်ဖြာ ဝီ တဝ်း၊ “အုဝ် ဒီ တဲး အာရူင် ဘ့လာင် အုဝ် ဟာဝ် ဒီ အာတ့် မဲ၊ တဲး မဲ ယိုဝ်။ အုဝ် ဒီ ဝီ ကာလာင် စိူဝ် အုဝ် ဒီ မဲ၊ တဲး မဲ ထူမ်။ အုဝ် မုး အန် ဇဝ်။ အုဝ် ဒီ အိုင် ဂေ ဒူအီ ပီ ရဝ်း အုဝ်။ အုဝ် ဒီ ကာဝေ ဂေ ဒူအီ ပီ အိုင် အုဝ်။ 20 မဲ ယီ တူ ပွိုန် ယိုဝ် နာ အုဝ်။ ဒူအီ ဒဲင် ကာဒါယ် နီ၊ ဆေ ဂေ ယိုဝ် နာ အုဝ်၊ ဂေ လုဝ် ယမ်။

21 ခုဝ် အန် တီ၊ တဲး မဲ ဟာဝ် ကွယ် ဒဲင် ဒါအာင် အီ ကွယ် ကာတတ် ဒူင် ကွယ် အုဝ် နီ။ 22 အုဝ် ဒီ တဲး မဲ ကွယ် ခဲင် မာအ ဒါအာင်။ ဟဲ့ ဟွတ့်၊ အုဝ် ဒီ တာ ဒဲ အုဝ်၊ ဂွင့် ငါယ် မဲ ဒေါ ကာလုဝ်း အုဝ် ဟာဝ် ခူပ် မဲ။ 23 အုဝ် ဟဲ့ ဟွတ့် ကာလုဝ်း မဲ၊ အုဝ် ဒီ ဝီ ဘ့လေး လူင် ဒဲ အုဝ်၊ တဲး မဲ ပွိုန် ဒီ ယိုဝ် ကာတု အုဝ်။ နာ အုဝ် မဲ ယီ တူ ပွိုန် ယိုဝ်။” ပါယ် တီ ဇဝ်ဖြာ ဟဲ့ ကာလာင် ဂြုဝ်း ဒီ အာမုဝ်ဆဲ။