1 န့ ယီ မုး ဒူအီ အီဆာရေလ ဂေ ကိူန် အီ ကွယ် နာ ပန်။ ဂေ ဟဲ့ နှဝ့် လှေန့်၊ တဲး အာမုဝ်ဆဲ ဝီ လေး လူင် ဒီ နွန် ဇဝ်ဖြာ တွိုန်။ ဂေ ဝီ ဟာဝ် ဇမ် ဒူင် ကွယ် အာရူန်။ ဂေ တဝ်း ဒီ အန်၊ “မဲ လုဝ် ဘူင် အာရိုပ် ဇဝ် ဘဲန် ကာဒင် ဘဲန် ကာဒင်၊ တဲး ဂေ ပွိုန် ဒီ ယဲတ့် အေ၊ တဲး ဂေ နှဲ န့တေန့် ပီ လုဝ် ဟာဝ် အေ။ န့ ယီ မုး အာမုဝ်ဆဲ၊ အီ ဟဲ့ တိုယ် အေ လေး ခဲင် မိူင် အဲဂိုပ် တွိုန်၊ အန် ဟဲ့ ဟြာယ်။ ယေ တူ နပ် ပီ ပါယ် အန်၊ တူ နပ်၊ အန် ကွယ် နာ မှဝ်။”

2 ဟဲ့ ဟွတ့် တဝ်း ပါယ် တီ အာရူန် ဝီ တဝ်း၊ “တဲး ဘေ ဘုတ့် လေး ဘီဟျဝ့် ခြိဝ် ပီ တာ အီဘိုန့် ဘေ ဘော ဂွန် ဘေ၊ ဘော မုး ဂွန် အီဘိုန့် ဘော မုး ဂွန် အီမာယ်၊ တဲး ဘေ ဘောကာဂ့လျီတ် တး ဒွါ တူတ့် ဒီ အုဝ်။” 3 အန် ဟဲ့ ဟွတ့် တဝ်း ပါယ် တီ ဂေ ဘောကာဂ့လျီတ် ဘုတ့် လေး ဘီဟျဝ့် ဂေ၊ ဒွါ ဒီ အာရူန်။ 4 အာရူန် ဒိုဝ်း တူတ့် ခြိဝ် ပီ ဒွါ ဂေ ဒီ အန်။ ဟဲ့ ဟွတ့်၊ အန် ဝီ ဘူင် အာရိုပ် မက် အာလူင့်၊ တဲး ဂေ ပွိုန် ဒီ ကြိုပ်။ အန် ဟဲ့ ဟွတ့် ဘူင်၊ ဂေ ဒူအီ ကိူန် ဝီ တဝ်း၊ “အိုယ် ဘေ ဒူအီ အီဆာရေလ၊ အာတီ ဟဲ့ မုး ဇဝ်ဖြာ အီ ဟဲ့ တိုယ် ဘေ တဲး ဘေ လေး ခဲင် မိူင် အဲဂိုပ် တွိုန်၊ တး ဇမ် ဒူင် ကွယ် ဘေ နီ။”

5 ဒေါ ယိုဝ် အာရူန် ဂေ ဒူအီ ကိူန် မိုဝ်း နဝ်း ဇိုဝ် တီ၊ အန် ဘော ဘူင် ကာစှူင့် လှူ၊ ဘ့လေး ဒီ အာတ့် အာရိုပ် တွိုန်။ အန် ဘော တဝ်း ဒီ ဂေ ဒူအီ ကိူန်၊ “ခဲညှာ အေ ဒီ ဘူင် ဘ့လွယ် ဇဝ်ဖြာ။” 6 ခုဝ် အန် တီ၊ ဂေ ဒူအီ ကိူန် ဝီ စေဝ် ယိတ့်။ ဂေ လှူ ပီ ဒီ လှူ ဒွန် မျုဝ် ဒီ အာတ့် အာရိုပ် တွိုန်။ ဂေ ဘော လှူ ပီ ဒီ လှူ အီ ဒုဝ့် ဒီ ငဝ် ဘော ပီ ဒီ လှူ အီ ကွယ် ကာဇု ဟူမ် ရိုမ်။ ဝါယ် အန် တီ ဂေ ဝီ ကွယ် ရိုမ်၊ ဟူမ် ဘူမ်၊ ဒျီင် အိုမ် မာငုန်။ ဟဲ့ ဟွတ့်၊ ဂေ ဝီ ယိတ့် ဝီ က်ု ဆီနန် ဆီနိူင် ဘော ဂါ။

7 ဒေါ အန် တီ ဇဝ်ဖြာ ဝီ တဝ်း ဒီ အာမုဝ်ဆဲ၊ “တဲး မဲ ပီခြန် မဲ လေး လူင် ဒီ နီ။ ဂေ ဒူအီ အာမျုဝ် မဲ ပီ ယဲတ့် မဲ လေး ခဲင် မိူင် အဲဂိုပ် တွိုန်၊ ဂေ ဟဲ့ ဘူင် နာ တူ မွှိုမ် အီ မွှိုမ် ကာအိး။ 8 ဂေ ဝီ ကာပ့လု နဝ်း ဘော ဟာယ် ကာဆဝ်။ အာဝ် လှေန့်၊ အုဝ် ဟဲ့ တဝ်း ဒီ ဂေ မာဆေ ပီ လုဝ် ဘူင် ဂေ။ ဒေါ တီ နီ ဂေ ဟဲ့ ဟွတ့် ဘူင် အာရိုပ် မာမက် တာ ခြိဝ်။ ဂေ ဟဲ့ ဟွတ့် ဘ့လေး အန် ကာတဲ ဂေ၊ လှူ ဒွန် မျုဝ် ဒီ အန်။ ဂေ မိူဝ် ဟဲ့ တဝ်း၊ ‘အာတီ မုး ဇဝ်ဖြာ ပီ ကြိုပ် ဘေ ဒူအီ အီဆာရေလ။ ဇဝ်ဖြာ တီ ဟဲ့ ယဲတ့် ဘေ လေး ခဲင် မိူင် အဲဂိုပ်။’

9 အုဝ် ဟဲ့ နပ် ခဲ့ ဒိူဝ် နဝ်း ဂေ။ 10 ဒေါ တီ နီ အုဝ် ဟဲ့ ရူ ကာဆဝ် ဒီ ဂေ။ ကွဲ့ တဲး မဲ ခြဲ အုဝ်၊ တဲး အုဝ် ဝီ ဝဲန် ဂေ ဘောကာဂ့လျီတ်၊ တဲး ဂေ ယမ် တူတ့်။ အုဝ် ယီ ဒီ တဲး မဲ ဘော လှုက်လှာန် မဲ ဘဲန် အာမျုဝ် ဒူအီ တာင်။”

11 ဇဝ်ဖြာ ဟဲ့ ဟွတ့် တဝ်း ပါယ် တီ အာမုဝ်ဆဲ မှာန့်၊ တဲး ဇဝ်ဖြာ ဝီ ထူမ် ဂြုဝ်း အန်။ အန် ဝီ တဝ်း၊ “အိုယ် မဲ ဇဝ်ဖြာ၊ မှဝ် န့ ပါယ် ပီ ရူ ကာဆဝ် မဲ ဒီ ဒူအီ ဂေ တီ အီ မုး ဒူအီ ပီ အိုပ် မဲ။း မဲ ဟဲ့ တဲး ဂေ လေး ခဲင် မိူင် အဲဂိုပ်၊ ဘျ ပွုန် မဲ ဒီ ဂေ။ 12 ဒေါ တီ နီ ဆေ မဲ ဘူင် ပီ တဝ်း မဲ နီ၊ ဂေ ဒူအီ အဲဂိုပ် နပ် ဒီ ခဲန့် မဲ။ ဂေ နပ် ဒီ တဝ်း၊ မဲ ဟဲ့ ခြာမ် ဒီ တဲး ဂေ စှိုမ်။ ဂေ ဒီ တဝ်း၊ မဲ ဟဲ့ ညိုင်ရာင် တိုယ် ဂေ လေး ခဲင် မိူင် ဂေ။ မာလဲ မဲ ဘူင် ပါယ် တီ တဲး ဂေ ယမ် ဒဲင် နွန် နီ၊ ကွဲ့ ဟူ တဲး န့ မိုဝ်း အာမျုဝ် ဂေ ဒဲင် ကာဒါယ် နီ။ ခုဝ် အန် တီ၊ အုဝ် မှာန့်၊ တဲး မဲ ဇဝ်ဖြာ ဝီ ဝဲန် နဝ်း ရူ မဲ တီ။ အုဝ် မှာန့်၊ တဲး မဲ ကာပ့လု နဝ်း မဲ၊ ကွဲ့ တဲး မဲ ဘူင် တဲး န့ ဘဲန် ဒုက် ဒီ ဒူအီ ဂေ နီ။ 13 အုဝ် မှာန့်၊ တဲး မဲ လှုဝ်း အာဘြာဟမ် ဘော အာဆဲက် ဘော အာကူပ် တွိုန်၊ အီ မုး ဒဲစေန့် မဲ။ မဲ ဇဝ်ဖြာ ဟဲ့ ဒွိုမ် ဒွါ ကာဒိက် ဆတ်ဇာ ဒီ ဂေ။ ကာဒိက် ဆတ်ဇာ ပီ ဒွါ မဲ တီ၊ န့ ဟဲ့ မှာန် ပီ မဲ ဇဝ်ဖြာ ဟဲ့ မှာန်။ မဲ ဟဲ့ တဝ်း၊ မဲ ဒီ တဲး ဂေ လှုက်လှာန် အာဘြာဟမ် တွိုန် ကိူန် ခဲ့ ကိူန် ဆီမန့် အီ ကွယ် ဂါင်ဟြာဝ်။ မဲ မိူဝ် ဟဲ့ တဝ်း၊ မဲ ဒီ တဲး ဂေ လှုက်လှာန် အန် ကွယ် ခဲင် မိူင် တွိုန်၊ တဲး န့ ဘဲန် မိူင် ဂေ။ မဲ ဟဲ့ ဒွါ ကာဒိက် ဆတ်ဇာ တဝ်း၊ ဂေ ဒီ ပွိုန် ကွယ် ဆေဆေ ခဲင် မိူင် ပီ ဒီ ဒွါ မဲ ဒီ ဂေ။ ဒေါ တီ နီ အုဝ် မှာန့်၊ တဲး မဲ ဇဝ်ဖြာ ဝီ လှုဝ်း ကာဒိက် ဆတ်ဇာ ဇိုဝ် တီ ပီ ဒွါ မဲ ဒီ ဂေ။” 14 အာမုဝ်ဆဲ ဟဲ့ ဟွတ့် မှာန့် ပါယ် တီ ဇဝ်ဖြာ ကာပ့လု နဝ်း အန်။ အန် တူ ဝီ ဘူင် တဲး ဂေ ဒူအီ ဘောကာဂ့လျီတ် လုဝ် ယမ်။

15 ဝါယ် အန် တီ အာမုဝ်ဆဲ ဝီ လေး လူင် ဒဲင် နွန်။ အန် ဘော ဂူင့် မာဝ် အာ ဒီဖ့လာင် ပီ ဒဲမ် အုန် ဇဝ်ဖြာ၊ အီ တဲး ဒူအီ နပ် လွင် အန်။ 16 မာဝ် တွိုန် မုး ပီ ဘူင် ဇဝ်ဖြာ။ ဒုဝ် ပီ ဒဲမ် အုန် နာ ဒဲင် မာဝ် တီ၊ န့ မုး ပီ ဒဲမ် အုန် ဇဝ်ဖြာ တာ ဒဲ အန်။ အန် ဟဲ့ ဒွက် တဲး န့ လေး ဒုဝ် ထမ် ဘော အာ ဘ့လာက်။

17 ဒေါ လူင် အာမုဝ်ဆဲ ဒဲင် နွန်၊ န့ မုး အာယုဝ်ဆူအာ။ ဒေါ ယိုဝ် အန် ဂေ ဒူအီ ကိူန် ဟဲ့ ဆီနန် ဆီနိူင်၊ အန် ဝီ တဝ်း ဒီ အာမုဝ်ဆဲ၊ “တဲး မဲ ထူမ် ဆီနန် ဆီနိူင်။ န့ ပီ ဒူအီ အီ ကွယ် ဒူင် ချ အေ လာယ် ကာဂုဝ်း။”

18 အာမုဝ်ဆဲ ဝီ တဝ်း၊ “ပီ ထူမ် အုဝ် အာဝ် ပီ ပီ ဒတ် ဒူအီ ဒေါ ပဲ ဂေ ရန်ဆူ။ အာဝ် ပီ ပီ ဒတ် ဂေ ဒေါ စှိုမ် ဂေ။ န့ ပီ ဒူအီ တဝ်း မှုဝ် ဒါခိုယ် အီ လိုဝ်း ဒီ ဟျုဝ့် အုဝ်။”

19 ပန် တီ အာမုဝ်ဆဲ ဝီ တး ကာတတ် ဒူင် ချ ဂေ။ အန် ဝီ ယိုဝ် အာရိုပ် မက် တွိုန်၊ ဘော ယိုဝ် ခဲ့ ခူယ် ဒူအီ။ အန် ဘော ကြဲ ဒီ ရူ ကာဆဝ်။ အန် ဘော ဆတ့် ဝဲန် မာဝ် အာ ဒီဖ့လာင် ပီ ဂူင့် အန်၊ တဲး န့ ကာလာတ့် လိုဝ် ဒီ ဒင် နွန် တွိုန်။ 20 ဝါယ် အန် တီ အာမုဝ်ဆဲ ဝီ ဒိုဝ်း အာရိုပ် မာမက် တွိုန်၊ ဟပ် ခဲင် ငဝ်၊ တဲး န့ လာတ့် တူတ့်။ အန် ဝီ ဒုး ခြိဝ် တီ၊ တဲး အန် ဝီ ဘဲန် ကာမွတ့်။ ဟဲ့ ဟွတ့်၊ အန် ဝီ ဘြတ် ခဲင် အိုမ်၊ ဝီ ခါနှာပ် ဂေ ဒူအီ အီဆာရေလ၊ တဲး ဂေ ဒျီင် အိုမ် တီ။

21 အန် ဝီ ဒီမွှတ် အာရူန် တဝ်း၊ “မာဆေ ပီ ဘူင် ဂေ ဒူအီ ဒီ မဲ၊ တဲး မဲ ခ့ဝါင် ဂေ ဘူင် မှာပ် တာင် ဇိုဝ် တီ။း”

22 အာရူန် ဝီ တဝ်း၊ “အိုယ် ဒါ ကာညာ အုဝ်၊ ကွဲ့ တဲး မဲ ရူ ဒီ အုဝ်။ မဲ ဟဲ့ နပ် ဆီချာ၊ ဒူအီ ဂေ နီ၊ ဂေ ငှိုယ် ဒီ ဘူင် နာ တူ မွှိုမ်။ 23 ဂေ ဟဲ့ တဝ်း ဒီ အုဝ်၊ ‘တဲး မဲ ဘူင် အာရိုပ် ဇဝ်ဖြာ၊ အီ ဒီ ယဲတ့် ဒီ အာတ့် န့တေန့် ပီ လုဝ် ဝဝ့် အေ။ န့ ယီ မုး အာမုဝ်ဆဲ အီ ဟဲ့ တိုယ် အေ လေး ခဲင် မိူင် အဲဂိုပ်၊ အန် ဟဲ့ ဟြာယ်။ အေ တူ နပ် ပီ ပါယ် အန်။’ 24 ဟဲ့ ဟွတ့်၊ အုဝ် စ်ု ဂေ တဲး ဂေ ဘုတ့် လေး ခြိဝ် ပီ တာ ဂေ၊ တဲး ဂေ ဝီ ဒွါ တူတ့် ဒီ အုဝ်။ ဟဲ့ ဟွတ့်၊ အုဝ် ဝီ ဟပ် ခြိဝ် ဂေ တီ ခဲင် ငဝ်၊ တဲး အာရိုပ် မက် အာလူင့် နီ ဝီ လေး။”

25 ပန် တီ အာမုဝ်ဆဲ ကော နပ် န့ ပါယ် မှဝ်။ အန် ဘော နပ်၊ ဂေ ဒူအီ ဟဲ့ ဝဲန် ဂြုဝ်း အန်၊ အာဝ် ဟူ ဒူပ် အာဆေ။ ဘော အာရူန် တူ ပဲ ဒီ အိုပ် ဂေ။ အန် ဟဲ့ ခ့ဝါင် ဂေ ဘူင် နာ တူ မွှိုမ် ဇိုဝ် တီ၊ တဲး ရန်ဆူ ဂေ ဝီ ပွိုန် ဒီ ကာညး ဂေ၊ အာဝ် ဟူ ယုဝ် ဂေ။ 26 ခုဝ်၊ အာမုဝ်ဆဲ ဝီ ကွယ် ဒီ မာလုဝ်း ဒူင် ချ ဂေ ဒူအီ အီဆာရေလ။ အန် ဒတ် တာင် တဝ်း၊ “အာဆေ ဆီ ဒူပ် ဇဝ်ဖြာ၊ တဲး အန် တး ဇမ် ဒူင် ကွယ် အုဝ် နီ။” အန် ဟဲ့ တဝ်း ပါယ် တီ ဂေ ခြိုဝ် အာလေဝီ တွိုန် ဂေ ဘောကာဂ့လျီတ် တး ကာဇု ဒူင် ကွယ် အန်။

27 ဟဲ့ ဟွတ့်၊ အန် ဝီ တဝ်း ဒီ ဂေ၊ “အန် ဇဝ် အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ၊ အန် တဝ်း ဒီ ဘေ၊ တဲး ဘေ ဒွန် အီ ဒိုဝ်း မာပွါ့ လာင် အန်၊ ဝီ ဟာဝ် ဒွန် နာ ဒွန် ပ့လုဝ့် ဒူင် ချ ဂေ ဒူအီ အီဆာရေလ၊ တဲး ဘေ ဒွန် အီ ငဝ်း ယမ် ဘော ဂေ ဘီနွင် ဘော ဂိုက် ဘော ဂေ ဒူအီ အီ ကွယ် ကာတတ် ကာင် ဘေ။” 28 အာမုဝ်ဆဲ ဟဲ့ ဟွတ့် တဝ်း ပါယ် တီ ဂေ ဒူအီ ခြိုဝ် အာလေဝီ ဝီ ဘူင် ပီ စ်ု အာမုဝ်ဆဲ ဂေ ဘူင်။ ဆီငဲ အန် တီ န့ မိုဝ်း ဒူအီ ကာဘက် အူယ် ဟြဲန့် ဝီ အီ ဟဲ့ ယမ်။ 29 ပန် တီ အာမုဝ်ဆဲ ဝီ တဝ်း၊ “အာတိုဝ် နီ၊ ဘေ ဟဲ့ ဘဲန် ဒူအီ အီ ပွိုန် ဒီ ဘူင် ဂါန် ဇဝ်ဖြာ။ ဘေ တူ ကာဝေ ဂွန် ဘော ဘီနွင် ဘေ။ ကူပ် ဘူင် ဘေ ပါယ် တီ ဇဝ်ဖြာ ဟဲ့ မွင့်ကာရာ ဒွါ ဒီ ဘေ။”

30 ယီ ဇမ် ဆိန့်ဝး ပါ ခဲညှာ၊ အာမုဝ်ဆဲ ဝီ တဝ်း ဒီ ဒူအီ ဒွန် အီ၊ “ဘေ ဟဲ့ ဘူင် မှာပ် တာင် ကာဆဝ်။ ဒေါ တီ နီ အုဝ် ဒီ ဝီ ဟာဝ် တဲး အုဝ် ဟုဝ့် ဇမ် ဒူင် ကွယ် ဇဝ်ဖြာ နာ ဒဲင် နွန်။ အုဝ် ဒီ ဘော မှာန့် ဒီ ဇဝ်ဖြာ၊ တဲး အန် ဂဝ်း ဝဲန် မှာပ် ဘေ တီ၊ တဲး ဘေ ဝီ ကာလဝ့် ဒီ ဇဝ်ဖြာ။”

31 ပန် တီ အာမုဝ်ဆဲ ဝီ ဟုဝ့် ဒဲင် နွန်၊ ဇမ် ဒူင် ကွယ် ဇဝ်ဖြာ။ အန် တဝ်း ဒီ ဇဝ်ဖြာ၊ “အိုယ် မဲ ဇဝ်ဖြာ၊ ဂေ ဒူအီ ဟဲ့ ဟွတ့် ဘူင် မှာပ် နာ တူ မွှိုမ် ကာဆဝ်။ ဂေ ဟဲ့ ဒိုဝ်း ခြိဝ်၊ ဘူင် အာရိုပ်၊ တဝ်း န့ မုး ဇဝ်ဖြာ။ 32 အုဝ် ယီ မှာန့်၊ တဲး မဲ ဇဝ်ဖြာ ဂဝ်း ဝဲန် မှာပ် ဂေ တီ။ ဆေ မဲ ယီ တူ ဆီ ဂဝ်း ဝဲန် မှာပ် ဂေ တီ၊ အုဝ် မှာန့်၊ တဲး မဲ ဘျတ် ဝဲန် စိူဝ် အုဝ်၊ ကွဲ့ ဟူ တဲး န့ မိုဝ်း ခဲင် ဘပ် ပီ ဒဲမ် မဲ၊ ခဲင် ဇာရာင် ပီ အုန် မဲ စိူဝ် ဒူအီ ပီ အိုပ် မဲ။”

33 ဇဝ်ဖြာ ဝီ တဝ်း ဒီ အာမုဝ်ဆဲ၊ “အုဝ် ဒီ ဘျတ် ဝဲန် စိူဝ် ဂေ ဒူအီ အီ ဘူင် နာ တူ မွှိုမ် ဒီ အုဝ်၊ ကွဲ့ ဟူ တဲး ဂေ မိုဝ်း ခဲင် ဘပ် ဇာရာင် အုဝ်။ 34 ဒေါ တီ နီ မဲ လုဝ် ယဲတ့် ဟာဝ် ဒူအီ ဂေ နီ၊ တဲး ဂေ ဇမ် ခဲင် မိူင် ပဲ့ ဟဲ့ ကာလာင် အုဝ် ဒီ မဲ။ အုဝ် ဒီ တဲး အာမူ အာမာတ် အုဝ် ယဲတ့် ဘေ ဒေါ ဟာဝ် ဘေ ဒူပ် န့တေန့်။ ဆေ န့ ယီ မိုဝ်း အာခြာဝ် ဒီ ဒမ် မှာပ် ဂေ၊ ဂေ ဒီ လုဝ် ခမ် မှာပ် ဂေ။”

35 ဇဝ်ဖြာ ဟဲ့ ဟွတ့် ကာလာင် ပါယ် တီ အန် ဝီ တဲး ဆဝ် အီ ဟုဝ့် ဒီ ဒူအီ တး ဇမ် ဒူင် ကွယ် ဒူအီ အီဆာရေလ၊ တဲး ဂေ ခမ် မှာပ် ဂေ ဒေါ ကြိုပ် ဂေ အာရိုပ် မက် ပဲ့ ဟဲ့ ဘူင် အာရူန်။