1 ဝါယ် အန် တီ ဇဝ်ဖြာ ဝီ တဝ်း ဒီ အာမုဝ်ဆဲ၊ 2 “အုဝ် ဟဲ့ ဟွတ့် ရဝ်း အာဘေဇာလေန် အီ မုး ခြိုဝ် အာယူဒါ တွိုန်၊ တဲး အန် ဘူင် ဘဲန် မျုဝ် ဘဲန် မျုဝ်။ အာဘေဇာလေန် တီ၊ အန် မုး ဂွန် အာအူရီ အီ မုး ဂွန် အာဟူရာ။ 3 အုဝ် ဟဲ့ ဟွတ့် ဒွါ နဝ်း ဖွိုမ် ဇဝ်ဖြာ လိုပ် ခဲင် နဝ်း အန်၊ တဲး အန် လှဲဝ် ဒီ ဘူင် ဘဲန် မျုဝ် ဘဲန် မျုဝ် ပီ စ်ု အုဝ် ဘေ ဘူင်။ အုဝ် ဟဲ့ တဲး အန် မိုဝ်း အာငျာန်၊ တဲး အန် လှဲဝ် ဒီ ဘူင် ဒွန် မျုဝ်။ 4 အန် နပ် ဒီ ဘူင် ဘုဝ်း ဂေ ပယ့် ဒွန် မျုဝ် တာ ခြိဝ်၊ ရွိုန် ဘော ဘွင့်။ 5 အန် လှဲဝ် ဒီ ရန့် ဆဲန့် ဘော ဘူင် ကာင် ဆဲန့်။ အန် ဘော လှဲဝ် ဒီ တာ ဟေ၊ ဘူင် ဘဲန် မျုဝ် ဘဲန် မျုဝ် ဘော ဘဲန် လက်ဆာမာ အီ ဘူင် ကြုဝ်ကြာမ် အီ စှိတ် ကာဆဝ်။ 6 ဒဲင် တီ အုဝ် ဟဲ့ ရဝ်း ဘော အာအုဝ်ဟုဝ်လီအာပ်၊ အီ မုး ဂွန် အာဟီဆာမာတ်၊ အီ မုး ခြိုဝ် အာဒါန် တွိုန်။ အုဝ် ဟဲ့ စ်ု အန် စွယ် အာဘေဇာလေန် တွိုန်။ ဘော ဂေ လက်ဆာမာ အီ လုဝ် စွယ် ဂါယ် အာ ဝီ တီ၊ အုဝ် ဇဝ်ဖြာ ဟဲ့ တဲး ဂေ ဒွန် အီ မိုဝ်း အာငျာန်၊ တဲး ဂေ ပွိုန် ဒီ ဘူင် ဒွန် မျုဝ် ပီ စ်ု အုဝ် မဲ ဘူင် ဘော ပီ ဘျ အုဝ် ဒီ မဲ ဒေါ တီ နီ။ 7 ပီ လုဝ် ဘူင် ဂေ၊ န့ မုး ဘော ထိုပ် ဘိက် ဘွတ် အီ မုး ဒူင် ကွယ် အုဝ်၊ တဲး ဘေ ပွိုန် ဒီ ကာတုန့် အုဝ် ဘော ဇီဒိူက် အီ တဲး ဘေ ဒူအီ နပ် လွင် အုဝ်၊ ဘော ဆီဘ့လိုက် အန်၊ ဘော အာဇ ဒွန် မျုဝ် ပီ လုဝ် ဘ့လေး ဘေ နာ ခဲင် ထိုပ် ဘိက် ဘွတ် တွိုန်။ 8 ဂေ ဒီ ဘူင် ဘော ကာစှူင့် ခါမုန် ဂေ အာဇ ဒွန် မျုဝ် ပီ တာ ဂေ ဒီ ကာစှူင့် တီ ဘော ဒင် ငဝ် အွမ် ခြိဝ် ဂေ အာဇ ပီ တာ ဂေ ဒေါ လိုမ်လာ ဂေ ဒင် ငဝ် အွမ် တီ ဘော ကာစှူင့် လှူ ဂေ ဆီနမ် အုး ငှုန် ဒီ ဇဝ်ဖြာ။ 9 ဘော ကာစှူင့် လှူ ဂေ ဒုဝ် ဆတ်ဒါဝါ ဂေ လုဝ် ဘူင် ဘော န့ကြိုဝ်း ပီ တာ ဒူအီ ဒေါ လှူ ဂေ ဒုဝ် ဆတ်ဒါဝါ ဘော မ့ပါန် တာင် ဂေ ပ့လဝ် အန်၊ ဂေ လုဝ် ဘူင် တူတ့် ဒွန် မျုဝ် ဇိုဝ် တီ။ 10 ဂေ ဘော လုဝ် ဒဝ့် ခြိုင် ပီ ဒီ တာ အီ မုး ခြိုင် ဘွတ် ပီ ဒီ တာ အာရူန် ဂေ ဂွန် အာရူန် ဒေါ ဘူင် ဂေ ဂါန် ဇဝ်ဖြာ။ 11 ဂေ လုဝ် ဘူင် ဘော နာမန် ဘွတ် ဂေ ဆီနမ် အုး ငှုန် ပီ လုဝ် ပီဒဝ့် ဒီ ငဝ်၊ ပီ လုဝ် တာ ဂေ ခဲင် ထိုပ် ဘိက် ဘွတ်။ ဂေ လုဝ် ဘူင် တူတ့် ဒွန် မျုဝ် ဇိုဝ် တီ၊ တဲး န့ ပီ ပီ ဘျ အုဝ် ဒီ မဲ။” ပါယ် တီ ဇဝ်ဖြာ ဟဲ့ ဟွတ့် ကာလာင် ဒီ အာမုဝ်ဆဲ။

12 ဝါယ် အန် တီ ဇဝ်ဖြာ ဝီ ကာလာင် ပေါ အူ မျုဝ် ဒီ အာမုဝ်ဆဲ။ 13 အန် တဝ်း၊ “တဲး မဲ အာမုဝ်ဆဲ ဝီ စ်ု ဂေ ဒူအီ အီဆာရေလ တဝ်း၊ ‘ဘေ လုဝ် ကမ် ရိတ် ဆီငဲ ဒီလှဝ်။ န့ မုး ဆီငဲ ပီ ဒွါ အုဝ် ဒီ ဘေ။ ဆီငဲ ဒီလှဝ် တီ၊ န့ ပီ လက်ဆာနာ ပီ ဒွါ အုဝ် ဒီ ဘေ။ အူ ဆိန့် ဒေါ တီ နီ၊ ဇမ် နာ အာတ့် ဒွန် စုဝ် ဒွန် ဘာန်၊ ဒေါ ဇမ် ဆီငဲ ဒီလှဝ် န့ တဲး ဘေ လှုဝ်း၊ န့ မုး အုဝ်၊ အုဝ် ဇဝ်ဖြာ ဟဲ့ ဘဲန် ဒါ ကာညာ အီ အိုပ် ဘေ။ ဘော မုး အုဝ် အီ တဲး ဘေ ဘဲန် ဒူအီ ဘွတ် အီ တူ ပီ ဒူအီ ဟဝ်။ 14 ဘေ လုဝ် ဘူင် ပီ လုဝ် ဘူင် ဘေ ဆီငဲ ဒီလှဝ် တီ။ ခုဝ်၊ န့ မုး ဆီငဲ ဘွတ်။ ဆေ န့ မိုဝ်း ဒူအီ ဘူင် ဂါန် ဒေါ ဇမ် ဆီငဲ ဒီလှဝ်၊ ဘေ လုဝ် ငဝ်း ယမ် ဒူအီ တီ။ 15 ဒဝ် ဆီငဲ ဘေ လုဝ် ဘူင် ဂါန် ဘေ။ ဟီ ဇမ် ဆီငဲ မ့ဘူ၊ န့ မုး ဆီငဲ ဒီလှဝ်။ န့ မုး ဆီငဲ ဘွတ်၊ ဆီငဲ အီ တဲး ဘေ လှုဝ်း အုဝ်။ အာဆေ ဘူင် ဂါန် ဆီငဲ အန် တီ ဘေ လုဝ် ငဝ်း ယမ် အန်။ 16-17 ဂေ ဒူအီ အီဆာရေလ လုဝ် ကြိုပ် အုဝ် ဒေါ ဇမ် ဆီငဲ ဒီလှဝ်၊ တဲး န့ တဲး ဂေ လှုဝ်း ဆေဆေ ပီ ဘူင် အုဝ် ဒေါ မွိုန်။ အုဝ် ဟဲ့ ဖာန် ဘ့လေး ဂါင်ဟြာဝ် ဘော ကာဒါယ် အာဒါ ဒဝ် ဆီငဲ။ ယီ ဇမ် ဆီငဲ မ့ဘူ၊ အုဝ် ဝီ ဒီလှဝ်၊ တူ ဘူင် ဂါန် မာဆေ။ ခုဝ် အန် တီ၊ ဘော ဘေ လုဝ် ဒီလှဝ် ဆီငဲ မ့ဘူ။’” ခဲ့ တီ ဇဝ်ဖြာ ကာလာင် ဂြုဝ်း ဒီ အာမုဝ်ဆဲ ဒေါ ကွယ် အန် ဒီ အာတ့် ဇဝ်ဖြာ ဒဲင် နွန် ဆီနာယ် တွိုန်။

18 ဇဝ်ဖြာ ဟဲ့ ဟွတ့် ကာလာင် ဒါရာ အန် ဒွန် မျုဝ် ဒီ အာမုဝ်ဆဲ တွိုန်၊ အန် ဝီ ဒိုဝ်း မာဝ် အာ ဒီဖ့လာင်၊ ဒွါ ဒီ အာမုဝ်ဆဲ။ နာ ဒဲင် မာဝ် အာ ဒီဖ့လာင် တွိုန်၊ ဟဲ့ ဒဲမ် အုန် ဒါရာ ဇဝ်ဖြာ ပီ ဒွါ အန် ဒီ ဒူအီ၊ တဲး ဂေ နပ် လွင် အန်။ န့ မုး ပီ ဒဲမ် အုန် ဇဝ်ဖြာ ရာင် အန်၊ တာ ဒဲ အန်။