1 ဇဝ်ဖြာ ဝီ တဝ်း၊ “ဘေ လုဝ် ဝီ ဒိုဝ်း ဟေ ကာထိန်၊ ဘူင် ကာစှူင့် တဲး ဒူအီ လှူ ဆီနမ် အုး ငှုန် နာ ဒဲင်။ 2 ဘေ လုဝ် ဘူင် တဲး နာ တူင့် အန် အူ ကာနိး ဘော နာ တျီမ် အန် အူ ကာနိး။ ဒီ ကာတုဝ့် အန် ဘော ဖွုန် ဘ့လာက် ဘေ လုဝ် ဝီ ဘူင် တဲး န့ ကာတူတ့် ဘတ့်။ နာ စာ အန် လုဝ် ဘူင် အာ ကာနိး။ အီ ကာတူတ့် ဘတ့် ဒီ ကာတုဝ့် ကာစှူင့် လုဝ် ဘူင် တဲး န့ ဘဲန် အူ ဆိ၊ ကွဲ့ တဲး န့ ကာဒိုက် မာဆေ။ 3 ဟဲ့ ဟွတ့်၊ ဘေ လုဝ် ပိတ် ခြိဝ် ဘွတ်၊ ဘော နာ ဒဲင် ဘော ဒီ ခူပ် အန် ဘော ကာတုဝ့် အန်။ ဘေ လုဝ် ဘူင် ဘာင် ခြိဝ် တဲး န့ ကွယ် နာ ရေတ့် ကာစှူင့် ဘော ဖွုန် ဘ့လာက်။ 4 ဘေ လုဝ် ဝီ ဘူင် ခ့ဝင် ခြိဝ်၊ တဲး န့ မိုဝ်း အူ ဘ့လာက် အာ ခ့ဝင်။ ဘေ လုဝ် ဒိုက် အုန် ခ့ဝင် တီ နာ ခြိုမ် ဘာင် တွိုန်၊ တဲး ဂေ ကွယ် လာယ် ကာဆိူဝ်။ ခဲင် ခ့ဝင် တီ ဘေ လုဝ် ပ့လွ့ မင် ဂွတ်၊ တဲး ဘေ ပွိုန် ဒီ ဂွတ် ကာစှူင့် တီ။ 5 ဘေ လုဝ် ဘူင် မင် ဂွတ် တာ ဟေ ကာထိန်၊ ဝီ ပိတ် ခြိဝ်။ 6 ကာစှူင့် တီ ဘေ လုဝ် ဘ့လေး အုန် နာ ရေတ့် ဘိက် ဂွင့် အီ ကွယ် ဒီ အာတ့် ဇီဒိူက် အီ တဲး ဒူအီ နပ် လွင် အုဝ်။ ဒူင် တီ ဘော မုး နာ အာတ့် ဆီဘ့လိုက် အီ ကွယ် နာ ဒဲင် ဇီဒိူက် တွိုန် အီ မုး ဒူင် ကွယ် အုဝ်၊ တဲး ဘေ ကာတုန့် အုဝ်။

7 ဒွန် ဆိန့်ဝး၊ ဒေါ လိုပ် အာရူန် ခဲင် ထိုပ် ဘိက် ဘွတ် တွိုန်၊ ဒေါ လိုမ်လာ အန် ငဝ် ရာင် တာင် တွိုန်၊ အန် ဘော လုဝ် လှူ ဆီနမ် အုး ငှုန် ဒဲင် ကာစှူင့် လှူ တီ။ 8 ဟဲ့ ဟွတ့်၊ ဘာ ဒီ အပ် ဒေါ ဝီ လိုပ် အာရူန် ခဲင် ထိုပ် ဘိက် ဘွတ်၊ ပီဒဝ့် ငဝ် ရာင် တာင် တွိုန်၊ အန် လုဝ် ဝီ လှူ ဆီနမ် အုး ငှုန် နာ ဒဲင် ကာစှူင့် တီ ပေါ အူ ဇေန့်။ ပါယ် တီ ဘေ လုဝ် ဘူင် ဆေဆေ။ အူ ဆီငဲ အာ ဇေန့် တဲး န့ မိုဝ်း ဆီနမ် အုး ငှုန် ဒီ အာတ့် ဇဝ်ဖြာ၊ ကွဲ့ တဲး န့ ကာဒတ် ဒေါ မှဝ်၊ တဲး န့ အုး ငှုန် ဒွန် စုဝ် ဒွန် ဘာန်။ 9 ဒဲင် ကာစှူင့် လှူ ဆီနမ် အုး ငှုန် တီ၊ ကွဲ့ လှူ ဘဲန် မျုဝ် ဘဲန် မျုဝ် ဒဲင် ဆီနမ် အုး ငှုန် ပီ စ်ု အုဝ် ဘေ လှူ။ ကွဲ့ ဒိုဝ်း လှူ ဆီနမ် အုး ငှုန် ပေါ အူ မျုဝ်။ ကွဲ့ လှူ ဒုဝ် ဆတ်ဒါဝါ ပီ ဒုဝ့် ကာဆိုမ် ငဝ်၊ ကွဲ့ လှူ ကာပဲ့ ဘဲန် မျုဝ် ဘဲန် မျုဝ်၊ ကွဲ့ လှုဝ် အိုမ် မာငုန်၊ လှူ ဒီ အုဝ် ဒဲင် ကာစှူင့် တီ။ 10 အူ ဆီနမ် အူ ဇေန့် အာရူန် လုဝ် တိုယ် နှာမ် ဒုဝ် ဆတ်ဒါဝါ၊ ဖဝ်း ဒီ ကာတုဝ့် အီ ကာတူတ့် ဘတ့်၊ တဲး ဇဝ်ဖြာ ဂဝ်း ဝဲန် နာ တူ မွှိုမ် အီ ဒိုက် ဒီ ကာစှူင့် တီ။ ဒေါ အန် တီ ဘေ လုဝ် ဒိုဝ်း နှာမ် မာဘူ ပီ လှူ ဘေ ဒေါ မှာန့် ဘေ တဲး ဇဝ်ဖြာ ဂဝ်း ဝဲန် မှာပ် ဘေ။ ပါယ် တီ ဂေ ဒူအီ အီဆာရေလ လုဝ် ဘူင် ဒွန် စုဝ် ဒွန် ဘာန်။ န့ တဲး ကာစှူင့် တီ ဝီ ဘဲန် ကာစှူင့် ဘွတ် ကာဆဝ် ဒီ အာတ့် ဇဝ်ဖြာ။” ဇဝ်ဖြာ တဝ်း ပါယ် တီ ဒီ အာမုဝ်ဆဲ တွိုန်။

11 ဝါယ် အန် တီ ဇဝ်ဖြာ ဝီ တဝ်း ဒီ အာမုဝ်ဆဲ၊ 12 “ဆေ ဘေ တိး ခဲ့ ကွယ် ဂေ ဒူအီ အီဆာရေလ၊ အီမာယ် ဒွန် အီ ခဲင် ဒူအီ အီဆာရေလ လုဝ် ဒွါ ရွိုန် ဒီ အုဝ် အီ မုး ဇဝ်ဖြာ၊ တဲး န့ ကာဒါင် မှာပ် အန်၊ ကွဲ့ တဲး အာဆာက် အန် စှိုမ်။ ဆေ ဂေ ဒွါ ရွိုန် တီ၊ န့ တူ တဲး ဂေ ကာဒုး ဒုက် မာဆေ ဒေါ တိး ဘေ ခဲ့ ကိူန် ဂေ ဒူအီ အီ ဟပ် စိူဝ် ဂေ ခဲင် ဇာရာင်။ 13 ဒေါ ဟပ် ဂေ စိူဝ် ဂေ ခဲင် ဇာရာင်၊ ဂေ ဒွန် အီ လုဝ် လှူ ရွိုန် အူ ခွါယ် ဒီ အုဝ်။ ဘေ လုဝ် ဆ အုန် ရွိုန်၊ တာ မင် ဆ အီ ကွယ် ခဲင် ထိုပ် ဘိက် ဘွတ်။ 14 ဒွန် အီ အီ ဟပ် စိူဝ် အန် ခဲင် ဇာရာင်၊ အာဆာက် အာဆေ ဟဲ့ နုဝ့် အာ ဂိုဝ် ဆီနမ် ဟုဝ့် နာ ဒဲင်၊ အန် လုဝ် လှူ ရွိုန် ခဲ့ တီ ဒီ ဇဝ်ဖြာ။ 15 ဆေ န့ မုး ဒူအီ ခြမ်၊ အန် လုဝ် ဒွါ ခဲ့ အူ ခွါယ်၊ အာဝ် ပွိုန် ဒွါ လွှိုမ် တီ။ အာဆေ ဟဲ့ ဂိန် ဘော လုဝ် ဒွါ အူ ခွါယ် ခဲ့ တီ။ အာဝ် ပွိုန် ယူမ်။ ဒွန် အီ လုဝ် ဒွါ ခဲ့ တီ၊ တဲး န့ ကာဒါင် မှာပ် အန်၊ ကွဲ့ တဲး အာဆာက် အန် စှိုမ်။ 16 ဘေ လုဝ် ဂဲပ် ရွိုန် အီ ကာဒါင် မှာပ် ဂေ ဒူအီ အီဆာရေလ တီ၊ တဲး ဘေ ဝီ မိုဝ်း ဒီ ဒွါ ဒီ ဂေ ဒူအီ အီ လိုမ်လာ ထိုပ် ဘိက် ဘွတ်။ ဆေ ဘေ ဒွါ ရွိုန် တီ ဒီ အုဝ်၊ န့ ဒီ တဲး အုဝ် လှုဝ်း ဘေ ဒူအီ အီဆာရေလ၊ တဲး ဘေ ဝီ ကာလဝ့် ဒီ အုဝ်၊ ကွဲ့ တဲး အာဆာက် ဘေ စှိုမ်။”

17 ဇဝ်ဖြာ ဟဲ့ ဟွတ့် ကာလာင် ဒီ အာမုဝ်ဆဲ ပါယ် တီ အန် ဝီ တဝ်း၊ 18 “ဘေ လုဝ် ဘူင် မ့ပါန် တာင် ဘော ပ့လဝ် အန်၊ တာ ဘွင့်။ ခဲင် မ့ပါန် တီ ဘေ လုဝ် ဘ့လေး အုန် အိုမ် ပီ ဒီ တာ ဘေ ဒေါ ဘာယ် ဘေ ဘဲန် မျုဝ် ဘဲန် မျုဝ် အာတ့် လှူ။ ဘေ လုဝ် ဘ့လေး အုန် မ့ပါန် တာင် တီ ဒီ ကာတဲ ထိုပ် ဘိက် ဘွတ် ဂါယ် ကာစှူင့် လှူ တွိုန်။ ဟဲ့ ဟွတ့်၊ ဘေ လုဝ် ဟပ် အိုမ် နာ ခဲင်။ 19 ဘော အာရူန် ဂေ ဂွန် အန်၊ ဂေ လုဝ် ဘာယ် ဒဲ ဘော ပ့လဝ် ဂေ ခဲင် အိုမ် တီ။ 20 ဒွန် ဇေန့် ဒွန် ဇေန့် အာတ့် လိုပ် ဟာဝ် ဂေ ခဲင် ထိုပ် ဘိက် ဘွတ် ဂေ လုဝ် ဘာယ် ဒဲ ဘော ပ့လဝ် ဂေ။ ဒေါ ဟာဝ် ဂေ ဇမ် ကာတတ် ကာစှူင့် လှူ၊ တဲး ဂေ ဘ့လေး ပီ ဒီ လှူ နာ ဒဲင်၊ တဲး ငဝ် ကာဆိုမ်၊ ဂေ လုဝ် ဝီ ဘာယ် ဒဲ ဘော ပ့လဝ် ဂေ ဒီ အာတ့်၊ ကွဲ့ တဲး ဂေ ယမ် ဒေါ ကွယ် ဂေ ဒီ အာတ့် အုဝ်။ 21 ဘေ လုဝ် စ်ု ဘော အာရူန် ဘော ဂွန် အန် ဂေ လှုက်လှာန် အန် ဘူင် ပါယ် တီ ဆေဆေ။” ဇဝ်ဖြာ ဟဲ့ ကာလာင် ဒီ အာမုဝ်ဆဲ ပါယ် တီ။

22 ဒဲင် တီ ဇဝ်ဖြာ ဝီ တဝ်း ဒီ အာမုဝ်ဆဲ၊ 23 “ဘေ လုဝ် ဘူင် ဆီနမ် အုး ငှုန်၊ တဲး ဘေ ဒိုဝ်း န့ကြိုဝ်း ဆီနမ် ဘဲန် မျုဝ် ဘဲန် မျုဝ်။ ဘေ လုဝ် ဒိုဝ်း အိုမ် ပီ နျီ့ လေး ခဲင် ဒဝ် မောရာ အာဒါ အူယ် ဆ၊ ဘော ဂ့လဲ့ ဟေ ဆီနာမူန် အူ ဆ ဒီ ဖန် ခန် ဘော ဂုဝ်�လင် ပီ ဘူင် အီ ဆီနမ် အုး ငှုန် ပေါ အူ ဆ ဒီ ဖန် ခန်။ 24 ဒဲင် တီ ဘေ ဘော လုဝ် ဒိုဝ်း ဒဝ် ခီဒါ အူယ် ဆ၊ ဘော နာမန် အီ နျီ့ ဒီ ဘ့လေ နာမန် အာဒါ ဖွုန် ကာပဝ်။ ဘေ လုဝ် ဆ အုန် တူတ့် ဆီနမ် တီ တာ ဘ့လေ ဆ ခဲင် ထိုပ် ဇဝ်ဖြာ၊ တဲး န့ မှာန်။ 25 ဒူအီ အီ နပ် ဒီ ဘူင် ဆီနမ် အုး ငှုန်၊ အန် လုဝ် ဝီ ဒိုဝ်း ဒွန် မျုဝ် ဇိုဝ် တီ၊ ဘူင် တဲး န့ ဘဲန် နာမန် အုး ငှုန် အီ ဘွတ်၊ အီ ပွိုန် ဒီ ဖဝ်း ဒီ ဒွန် မျုဝ်။ ဘေ လုဝ် ဒိုဝ်း နာမန် အုး ငှုန် ဘွတ် တီ၊ ဖဝ်း ဒီ ဒူအီ အီ ခမ် ဒီ ဘူင် ဂါန် အုဝ် အီ မုး ဇဝ်ဖြာ။ 26 ဝါယ် အန် တီ ဘေ ဘော လုဝ် ဖဝ်း နာမန် ဘွတ် တီ ဒီ ထိုပ် ဘိက် ဘွတ် ဘော ဒီ ဇီဒိူက် တွိုန် အီ တဲး ဒူအီ နပ် လွင် အုဝ် အီ မုး ဇဝ်ဖြာ။ 27 ဘေ ဘော လုဝ် ဒိုဝ်း နာမန် တီ၊ ဖဝ်း ဒီ ကာစှူင့် ပီ အုန် ဘေ ခါမုန် ဘော အာဇ ဒွန် မျုဝ် ပီ တာ ဘေ ဒီ ကာစှူင့် တီ။ ဘေ ဘော လုဝ် ဖဝ်း ဒီ ဒင် ငဝ် အွမ် တွိုန် ဘော ဒီ အာဇ ပီ တာ ဂေ ဒေါ လိုမ်လာ ဂေ ဒင် ငဝ် အွမ် တွိုန်၊ ဘော ကာစှူင့် လှူ ဆီနမ် အုး ငှုန်၊ ဘေ လုဝ် ဖဝ်း တူတ့် ဇိုဝ် တီ၊ တာ နာမန် ဘွတ် တီ။ 28 ဟဲ့ ဟွတ့်၊ ဘေ ဘော လုဝ် ဖဝ်း ဒီ ကာစှူင့် လှူ ဘော အာဇ ပီ တာ ဒူအီ ဒေါ လှူ ဂေ ဒီ ကာစှူင့် လှူ တီ။ ဘော မ့ပါန် တာင် တွိုန် ဂေ ပ့လဝ် အန် ဘေ လုဝ် ဖဝ်း တူတ့် ဒွန် မျုဝ်။ 29 ကြုဝ် ဇိုဝ် တီ၊ ဘေ လုဝ် ဖဝ်း နာမန် ဘွတ်၊ တဲး ဂေ ဘဲန် ကြုဝ် အီ ဆီငါ ဘွတ် လွှိုမ် တူတ့်။ ဝါယ် အန် တီ န့ ဘော မိုဝ်း မာဆေ အီ တာ ဒိုဝ် ကြုဝ် ဆီငါ ဘွတ် တီ၊ ဇဝ်ဖြာ ဒီ မာတ် ဘော ကြုဝ် တီ ဒီ ဘဲန် ကြုဝ် အီ ဆီငါ ဘွတ်။

30 ဘေ လုဝ် ဝီ ဖဝ်း နာမန် ဘွတ် တီ ဒီ အာရူန် ဂေ ဂွန် အန်၊ တဲး ဂေ ဘဲန် ဒူအီ အီ ပွိုန် လှူ ဒီ အုဝ်။ 31 ဘေ လုဝ် ကာလာင် ဒီ ဂေ ဒူအီ အီဆာရေလ တဝ်း၊ ‘နာမန် ဇိုဝ် တီ မုး နာမန် ဘွတ် ပီ ဒွါ ဇဝ်ဖြာ ဒီ ဘေ၊ တဲး ဘေ ဖဝ်း ဒီ ဒွန် မျုဝ် ပီ လုဝ် ဘေ ဒေါ ဘူင် ဘေ ဂါန် ဇဝ်ဖြာ။ တဲး ဘေ တာ အာတီ ဒွန် စုဝ် ဒွန် ဘာန် ဟာဝ် နာ အာတ့်။ 32 ဘေ ယီ ကွဲ့ တာ နာမန် တီ၊ ဖဝ်း ဒီ ဒူအီ ဒွန် အီ။ ကွဲ့ ဘူင် နာမန် တီ၊ တာ န့ကြိုဝ်း တွိုန် ပီ စ်ု အုဝ် ဘေ တာ။ နာမန် တီ ဟဲ့ ဘွတ်၊ အာဝ် ပွိုန် ဒွါ အီ ဟဝ် တာ ဒေါ မှဝ်။ 33 ဆေ န့ ယီ မိုဝ်း ဒူအီ ဘူင် နာမန် ပီ နာမန် ဘွတ် တီ၊ အာဆေ ဝီ ဖဝ်း နာမန် တီ ဒဲင် ဂိန့် အီ ဟဝ်၊ အီ တူ မုး ဒူအီ လှူ ဒီ အုဝ် အီ မုး ဇဝ်ဖြာ၊ ဘေ လုဝ် ဘ့လေး ဝဲန် ဒူအီ တီ၊ ကွဲ့ ဟူ မာတ် အန် မုး ဒူအီ အီဆာရေလ။’” ပါယ် တီ ဇဝ်ဖြာ ဝီ တဝ်း ဒီ အာမုဝ်ဆဲ။

34 ဝါယ် အန် တီ ဇဝ်ဖြာ ဝီ ကာလာင် ဂြုဝ်း ဒီ အာမုဝ်ဆဲ ပေါ အူ ဇေန့်။ အန် တဝ်း၊ “မဲ လုဝ် တဲး ဒူအီ ဘူင် ဆီနမ် အုး ငှုန် ပေါ အူ မျုဝ်။ မဲ လုဝ် စ်ု ဂေ လှူ ဒီ အုဝ် ဘော ကာညန် ဟေ နာထာပ်၊ ဆီနမ် ဆေခေတ်၊ ကာညန် စှေဘေနာ ဘော ကာညန် လေဘူန် ဒီလူယ်။ စန် ဂေ ဖွုန် မျုဝ် တီ၊ ဘေ လုဝ် တဲး န့ လာယ် ကာရမ်။ 35 ဟဲ့ ဟွတ့်၊ ဘေ လုဝ် တဲး ဒူအီ နပ် ဒီ ဘူင် ဆီနမ် အုး ငှုန် ဝီ ကာဝ်ု တူတ့်၊ ဘူင် ဆီနမ် အုး ငှုန် အီ လုဝ် ဒုဝ့် ခဲင် ငဝ်။ တဲး ဘေ ဟပ် ဆယ့်၊ တဲး န့ ဘဲန် ဆီနမ် အုး ငှုန် အီ ဆီငါ ဘွတ် 36 ဆီနမ် အုး ငှုန် ဇိုဝ် တီ၊ ဘေ လုဝ် ကြိတ် မင် ကာလဝ့်၊ တဲး န့ ကာမုန်။ ဟဲ့ ဟွတ့်၊ ဘေ လုဝ် ဒုဝ့် ဒီ ငဝ် ဘော အုန် ဒီ အာတ့် ဇီဒိူက် အီ ကွယ် နာ ခဲင် ထိုပ် ဘိက် ဘွတ် အီ မုး ဒူင် ကွယ် အုဝ်၊ တဲး ဘေ ကာတုန့် အုဝ်။ ဆီနမ် အုး ငှုန် အီ လုဝ် ဒုဝ့် ဒီ ငဝ် တီ၊ န့ ဒီ ဘွတ် လွှိုမ် တူတ့်။ 37 ကွဲ့ တဲး ဘေ ခ့ဝါင် ဒူအီ ဟဝ် ဘူင် ဆီနမ် အုး ငှုန် ပီ ဆီနမ် အုး ငှုန် တီ။ ဘေ လုဝ် တဲး ဆီနမ် အုး ငှုန် တီ ဘဲန် ဆီနမ် အုး ငှုန် ဘွတ်၊ ဒွါ မီ ဒီ အုဝ်၊ ကွဲ့ တဲး အီ ဟဝ် တာ။ 38 ဆေ န့ ယီ မိုဝ်း ဒူအီ ဘူင် ဆီနမ် အုး ငှုန် ဇိုဝ် တီ၊ ဆေ အန် ဝီ တာ ရာင် အန်၊ ဘေ လုဝ် ဘ့လေး ဝဲန် ဒူအီ တီ၊ ကွဲ့ မာတ် အန် မုး ဒူအီ အီဆာရေလ။” ခဲ့ တီ ဇဝ်ဖြာ ကာလာင် ဒီ အာမုဝ်ဆဲ လွင် ဆီနမ် အုး ငှုန် တွိုန်။